Kpohọ eme nọ e riẹ eva

Kpohọ oria eware nọ e riẹe eva

RỌ ARO KELE ẸRỌWỌ RAI

“Ọ Maki Whu no Dede na, Yọ Ọ Gbẹ Rọ Ẹme Ẹta”

“Ọ Maki Whu no Dede na, Yọ Ọ Gbẹ Rọ Ẹme Ẹta”

EBẸLE o dikihẹ bi rri igodẹ riẹ nọ e be re ẹbe evaọ akotọ ugbehru na. Ẹsejọhọ o rri vrẹ oria nọ igodẹ na e be jọ re ẹbe na kpohọ oria jọ nọ elo ọnwranwra o bi no ze. Ọ be ruẹ ọgbọdọ nọ o bi fou kurẹriẹ ababọ eriosehọ, re ohwo ọ siọ ọgbọ Idẹn na ba ẹruọ. Etenẹ ọsẹgboni riẹ a jẹ rria vẹre, rekọ obọnana a gbẹ kẹ aimava na hayo emọ rai uvẹ re a rueva ọgbọ na ha. Dae jọ iroro ra ruẹ Ebẹle evaọ abọ owọwọ ẹdẹ yena nọ ọ kpare ovao rri ehru bi roro kpahe ọnọ ọ ma riẹ na. Kọ ohwo-akpọ avọ Ọghẹnẹ a te sae wariẹ wo usu okpekpe ẹdẹjọ? Onana o mae jọ Ebẹle oja.

Ebẹle ọ be ta ẹme kẹ owhẹ nẹnẹ. Ẹsejọhọ whọ te ta nọ o lọhọ vievie he. Whọ rẹ sai roro ere keme u kri no nọ ọmọ avivẹ Adamu nana o ro whu. Ebẹle o zihẹ ruọ ẹkpẹ no, oware wọhọ ikpe idu ezeza nọ e vrẹ. Kpahe ahwo nọ a whu no, Ebaibol na ọ ta nọ: “Iwhuowhu e riẹ oware ovo ho.” (Ọtausiuwoma Na 9:5, 10) Ofariẹ, ma re jọ Ebaibol na se ku ẹme ọvo nọ Ebẹle ọ ta ha. Kọ ẹvẹ ọ be rọ ta ẹme kẹ omai?

Pọl ukọ na o kere kpahe Ebẹle nọ: “Fiki epa orọwọ riẹ, ọ maki whu no dede na, yọ ọ gbẹ rọ ẹme ẹta.” (Ahwo Hibru 11:4) Fikiere, Ebẹle ọ be rọ ẹkwoma ẹrọwọ riẹ ta ẹme kẹ omai nẹnẹ. Ebẹle họ ohwo ọsosuọ nọ o wo ẹrọwọ. Fiki ẹrọwọ ọgaga riẹ, a gbẹ be ta ẹme kpahe emamọ oriruo nọ o fihotọ, yọ ma rẹ sae raro kele iei nẹnẹ. Ma te roro kpahe ẹrọwọ riẹ jẹ be daoma raro kele iei, o rẹ wọhọ ẹsenọ ma be gaviezọ kẹ Ebẹle nọ ọ be ta ẹme kẹ omai.

Rekọ eme ma rẹ sai wuhrẹ kpahe Ebẹle gbe ẹrọwọ riẹ, nọ o rọnọ Ebaibol ọ ta kodo kpahe iẹe he na? Joma ta kpahe eware jọ.

A YẸ RIẸ EVAỌ OKE NỌ AHWO A MU AKPỌ NA HỌ ẸRIA OBỌ

Nọ a ma Adamu avọ Ivi no, o nwani kri gahrọ re a te ti yẹ Ebẹle he. Jesu ọ ta kpahe Ebẹle nọ ọ rria no “otọhọ otọ akpọ ze.” (Luk 11:50, 51) Jesu ọ be jọ etenẹ na ta kpahe ahwo nọ a ti wo erọvrẹ izieraha rai, orọnikọ otọakpọ na dẹe Jesu o wo họ iroro ho. Dede nọ Ebẹle họ ohwo avene evaọ otọakpọ na, o wọhọ nọ ọye họ ohwo ọsosuọ nọ Ọghẹnẹ ọ ruẹ nọ ọ te rọ izieraha riẹ vrẹ. * O rrọ vevẹ nọ uruemu ahwo nọ e jọ akpọ na oke yena u kpomahọ Ebẹle tere he.

O wọhọ nọ Adamu avọ Ivi a wo erru jẹ goma gaga, ghele na a wo evawere he. A keke aro họ thọ uzi ulogbo jọ, jẹ rẹriẹ ovao dhe ẹbẹbẹ, dede nọ a mu akpọ na họ ẹrria obọ. A kake jọ gbagba vẹre, yọ Ọghẹnẹ ọ vuẹ rae nọ a te yoẹme kẹe, a te rria bẹdẹ bẹdẹ. Rekọ fikinọ a ghẹmeeyo, Ọghẹnẹ o te le ai no ọgbọ Idẹn; enẹ a ro ku Aparadase fiẹ. Fikinọ a roro kpahe omobọ rai ọvo, a te ku ẹgbagba gbe uzuazọ ebẹdẹ bẹdẹ rai kufiẹ, a tube roro kpahe epanọ onana u ti kpomahọ emọ rai hi.—Emuhọ 2:15–3:24.

Nọ a le Adamu avọ Ivi no ọgbọ Idẹn no, akpọ ọ tẹ jẹ bẹ ae. Ghele na, nọ a yẹ Keni, ọmọ ọsosuọ rai, Ivi ọ tẹ ta nọ: “Mẹ rehọ obọufihọ ỌNOWO na, yẹ ọzae no.” O wọhọ nọ Ivi ọ ta ẹme nana fiki eyaa nọ Jihova ọ ya evaọ okenọ ọyomariẹ avọ ọzae riẹ a gbẹ jọ ọgbọ Idẹn na. Jihova ọ ta nọ ubi aye jọ o te whọlọ Ẹdhọ, nọ o su Adamu avọ Ivi thọ na. (Emuhọ 3:15; 4:1) Kọ o sae jọnọ Ivi o bi roro nọ ọye họ aye nọ eruẹaruẹ yena e ta kpahe na, ubi na o vẹ jọ Keni?

Otẹrọnọ ere Ivi o je roro, kiyọ o roro thọ. Otẹrọnọ Adamu avọ Ivi a je ru Keni roro nọ ọye ọ te jọ ubi na, enwoma ọvo a wha sei. Nọ oke o be nyaharo na, Ivi o te yẹ ọmọzae ọfa, rekọ ma jọ Ebaibol na ruẹ ẹme evawere ọvo nọ Ivi ọ ta kpahe iẹe he. A se odẹ riẹ Ebẹle, yọ o sae jọnọ otofa odẹ na họ “Ofofe.” (Emuhọ 4:2) O sae jọnọ a mu odẹ nana kẹ Ebẹle fikinọ a roro nọ ọ te wha ewoma ọvo se ai hi. Kọ o gbẹ rọnọ a je roro nọ Keni o woma vi Ebẹle? Ma sae nwane ta gbiae he.

Oghẹrẹ kpobi kẹhẹ, esẹgbini nẹnẹ a rẹ sai wuhrẹ oware jọ no oma Adamu avọ Ivi ze. Kọ whọ be rọ ẹkwoma ẹme gbe uruemu ra ru emọ ra wo iroro omorro, omuhrowo, hayo isiuru ọkwa-okpehru? Manikọ who bi wuhrẹ ai re a you Jihova? U yoma gaga nọ Adamu avọ Ivi a gbabọkẹ owha-iruo rai. Ghele na, emọ rai a wo ẹruore.

EME O FI OBỌ HỌ KẸ EBẸLE WO ẸRỌWỌ OTIỌYE?

Nọ Keni avọ Ebẹle a be rro ze na, o wọhọ nọ Adamu o wuhrẹ aimava na re a ru iruo nọ e rẹ sae lẹliẹ uviuwou na soso re eva vọ. Keni ọ jọ ọwhẹrẹ; Ebẹle kọ othuru-igodẹ.

Ebẹle o ru oware jọ nọ u wuzou gaga. O wo ẹrọwọ, yọ Pọl o kere kpahe okwakwa-aghae nana uwhremu na. Roro kpahe onana. Ohwo ọvo o fi emamọ oriruo họ otọ nọ Ebẹle ọ rọ aro kele he. Kọ ẹvẹ ọ sai ro fi ẹrọwọ họ Jihova? Joma ta kpahe eware esa jọ nọ o sae jọnọ i fi obọ họ kẹ Ebẹle wo ẹrọwọ ọgaga.

Eware nọ Jihova ọ ma.

Ginọ uzẹme nọ Jihova ọ la otọ na eka, onọ o soriẹ nọ idhigbo gbe enwẹnwẹ e rọ dhẹ noi ze, nọ i re kpe ekakọ. Ghele na, otọ na o jẹ mọ ibi nọ uviuwou na soso a jẹ rọ kuoma rai. Ọghẹnẹ ọ la erao eka ha, evra gbe iyei; yọ ọ la igbehru eka gbe he, ewae, ithẹ, ebade; hayo ọ la idedeghe na eka ha, ẹgho, ọre, ọvẹre gbe isi na. Oria kpobi nọ Ebẹle o rri, ọ jẹ ruẹ eware nọ i dhesẹ uyoyou, areghẹ, gbe ewoma Jihova via, ọnọ ọ ma eware kpobi na. (Ahwo Rom 1:20) Nọ o roro kpahe eware nana gbe ekwakwa-aghae Ọghẹnẹ, ẹrọwọ riẹ ọ tẹ ga ziezi.

U muẹro nọ Ebẹle ọ rehọ oke roro kpahe Jihova zizie. Dae jọ iroro ra ruẹ Ebẹle nọ o bi su igodẹ riẹ na. Othuru-igodẹ avọ igodẹ riẹ a rẹ nya thethabọ. O re su igodẹ na kpobọ igbehru, ikiekpotọ, ithẹ, be gwọlọ ẹbe nọ igodẹ na a rẹ re, ame nọ a rẹ da gbe oria nọ a sai jo serihọ. Evaọ usu eware nọ Ọghẹnẹ ọ ma na kpobi, o wọhọ nọ igodẹ họ erao nọ e mae lọhọ, wọhọ ẹsenọ Ọghẹnẹ ọ ma ae re ohwo-akpọ ọ sẹro rai. Kọ Ebẹle ọ ruẹ vuhumu nọ ọyomariẹ ọ gwọlọ ọkpọvio gbe obufihọ Ọghẹnẹ? Ababọ avro, Ebẹle ọ le se Ọghẹnẹ kpahe onana, yọ u ru ẹrọwọ riẹ gaga ziezi.

Eware nọ Jihova ọ ma e bọ ẹrọwọ Ebẹle ga ziezi

Eyaa Jihova.

O sae jọnọ Adamu avọ Ivi a gbiku kẹ emọ rai kpahe oware nọ a ru, nọ Ọghẹnẹ o ro le ai no ọgbọ Idẹn na. Fikiere, ma sae ta nọ eware buobu e jariẹ nọ Ebẹle o je roro kpahe.

Jihova ọ la otọ na eka. Ebẹle ọ jẹ ginẹ ruẹ idhigbo gbe enwẹnwẹ nọ i di no otọ na ze, nọ i ru ẹme Jihova gba. Jihova ọ tẹ jẹ ta nọ Ivi ọ te ruẹ edada fiki udihọ, gbe okenọ o te bi yẹ. Ebẹle ọ ruẹ eme yena nọ i rugba evaọ oma oni riẹ. Jihova ọ ta re nọ Ivi o ti wo ẹgwọlọ kpahe uyoyou ọzae riẹ, gbe nọ Adamu họ ọnọ o ti wuzou riẹ. Ebẹle ọ ruẹ onana nọ u rugba evaọ oma ọsẹgboni riẹ. Evaọ eware na kpobi nọ e jẹ via na, Ebẹle ọ ruẹ vuhumu nọ ẹme Jihova ọ rẹ nya ọrue he. Fikiere, onana u fi obọ họ kẹ Ebẹle fi ẹrọwọ họ eyaa Jihova kpahe ‘ubi’ jọ nọ o te kpọ eware nọ e jọ ọgbọ Idẹn thọ na vi.—Emuhọ 3:15-19.

Idibo Jihova.

Ohwo ọvo o fi emamọ oriruo họ otọ nọ Ebẹle ọ raro kele he, rekọ ikọ-odhiwu jọ e jọ otọakpọ na evaọ oke yena nọ Ebẹle ọ rọ aro kele emamọ oriruo rai. Nọ Jihova o le Adamu avọ Ivi no ọgbọ Idẹn na no, o te ru re aimava gbe emọ rai a siọ ọgbọ na ba ẹruọ. Jihova o fi ikọ-odhiwu ivẹ họ unuẹthẹ ọgbọ na avọ ọgbọdọ nọ o bi fou kurẹriẹ ababọ eriosehọ.—Emuhọ 3:24.

Dai roro epanọ o jọ Ebẹle oma nọ ọ jẹ ruẹ ikọ-odhiwu yena nọ ọ be rro ze na. Nọ orọnọ ikọ-odhiwu na a zihe oma ruọ ahwo-akpọ na, Ebẹle ọ ruẹ nọ a rrọ goba jẹ goma gaga. Makọ ọgbọdọ na ọ rẹ kẹ idudu re. Nọ Ebẹle ọ be rro ze na, ọ ruẹ ẹdẹvo ho inọ iruo nọ Jihova ọ kẹ ikọ-odhiwu na e bẹ rai, hayo kọ a dhẹ se iruo na ba. Taso tuvo, no ukpe te ukpe, ikọ-odhiwu na a dikihẹ oria ovona. Onana o kẹ Ebẹle imuẹro nọ Jihova o wo idibo nọ e be rọ oma kpotọ kẹe. Ebẹle ọ ruẹ ohwo ọvo evaọ uwou rai nọ o dhesẹ oghẹrẹ ẹmeoyo gbe omaurokpotọ nọ ikọ-odhiwu yena a dhesẹ hẹ. Avro ọ riẹ hẹ, emamọ oriruo ikọ-odhiwu yena o bọ ẹrọwọ riẹ ga ziezi.

Evaọ edẹ uzuazọ riẹ kpobi, Ebẹle ọ ruẹ nọ ikọ-odhiwu na a wo ẹrọwọ je yoẹme kẹ Jihova

Nọ Ebẹle o roro kpahe eware nọ Jihova ọ ma, eyaa riẹ gbe emamọ oriruo ikọ-odhiwu na, enana i te ru ẹrọwọ riẹ ga ziezi. Avro ọ riẹ hẹ, Ebẹle ọ be ta ẹme kẹ omai, ogbẹrọ ere? Oriruo Ebẹle o rẹ sai fi obọ họ kẹ izoge fi ẹrọwọ họ Jihova Ọghẹnẹ, o tẹ make rọnọ ahwo uviuwou rai a bi ru ere he. Eware nọ Ọghẹnẹ ọ ma nọ ma be ruẹ, Ebaibol na, gbe emamọ oriruo inievo ukoko na, enana kpobi e rẹ sae bọ ẹrọwọ mai ga.

OWARE NỌ ỌGHẸNẸ Ọ RỌ JẸ IDHE EBẸLE REHỌ

Nọ ẹrọwọ nọ Ebẹle o fihọ Jihova o be rro na, ọ tẹ gwọlọ edhere nọ o re ro dhesẹ iẹe via. Rekọ eme ohwo-akpọ gheghe ọ rẹ sae kẹ Jihova nọ ọ ma ehrugbakpọ na? Uzẹme riẹ họ, Ọghẹnẹ ọ gwọlọ obufihọ hayo oware ovo mi ohwo-akpọ họ. Nọ oke o be nyaharo na, Ebẹle ọ tẹ ruẹ oware jọ vuhumu: Inọ otẹrọnọ ọ rehọ oware nọ o mai woma evaọ usu eware nọ o wo dheidhe kẹ Jihova, o te were Jihova gaga.

Fikiere Ebẹle ọ tẹ rehọ igodẹ jọ no udevie uthuru riẹ ze re o ro dheidhe kẹ Jihova. Ebẹle ọ salọ igodẹ nọ e mai woma, jẹ rehọ eria nọ e mai woma evaọ erao na ro dheidhe. Keni omariẹ ọ tẹ jẹ gwọlọ nọ o re ru Jihova eva were, fikiere ọ tẹ jọ ekakọ riẹ rehọ eware jọ ze re o ro dheidhe. Rekọ iroro nọ o bi ro ru onana i wo ohẹriẹ no erọ Ebẹle. Oware nọ o wọ aimava na nyai dheidhe u dhesẹ oma via nọ a dheidhe na no.

Ẹrọwọ o wọ Ebẹle dheidhe, rekọ Keni o wo ẹrọwọ họ

O sae jọnọ aimava na a dheidhe na evaọ ọvuọ agbada-idhe riẹ jẹ rọ erae mahe idhe na, yọ ẹsejọhọ evaọ oria nọ ikọ-odhiwu na a sae jọ rue rai. Jihova ọ salọ idhe nọ e were riẹ. Ebaibol na ọ ta nọ: “ỌNOWO na ọ ruẹ nọ idhe Ebẹle i woma, o te mi ai.” (Emuhọ 4:4) Ebaibol na ọ ta kpahe oware nọ Jihova o ru ro dhesẹ nọ ọ jẹ idhe Ebẹle rehọ họ. Rekọ fikieme ọ rọ jẹ idhe na rehọ?

Kọ fiki erao nọ Ebẹle o ro dheidhe na? Ginọ uzẹme nọ erao Ebẹle o ro dheidhe, onọ u kugbe azẹ erao na. Kọ o sae jọnọ Ebẹle ọ riẹ epanọ azẹ ọ ghare kẹ Ọghẹnẹ te, nọ ọ rọ rehọ erao dheidhe na? Nọ ikpe buobu e vrẹ no, Ọghẹnẹ ọ rehọ azẹ omogodẹ ro dhesẹ idhe nọ Ọmọ ọgbagba riẹ o ti dhe, ọnọ ọ rrọ “Omogodẹ Ọghẹnẹ,” nọ azẹ riẹ o ti hwẹ fiki ahwo-akpọ. (Jọn 1:29; Ọnyano 12:5-7) Dede na, evaọ oke yena, Ebẹle ọ riẹ epanọ azẹ hayo arao nọ a re ro dheidhe kẹ Jihova ọ ghare te he.

Oware nọ ma rẹ sae ta gbiae họ: Ebẹle ọ rehọ oware nọ o mai woma nọ o wo ro dheidhe kẹ Jihova. Orọnikọ idhe na ọvo i si Jihova urru hu, rekọ te Ebẹle omariẹ. Uyoyou gbe ẹrọwọ nọ Ebẹle o wo kpahe Jihova e wọ riẹ dheidhe yena.

Keni ọ wọhọ Ebẹle he. Ebaibol ọ ta nọ: “Keni avọ akpẹwẹ riẹ e were Ọghẹnẹ hẹ.” (Emuhọ 4:5) Orọnikọ ekpehre eware Keni o ro dheidhe na ha, keme uzi nọ Ọghẹnẹ ọ kẹ emọ Izrẹl uwhremu na o ta nọ a rẹ sae rehọ ibi ekakọ rai ro dheidhe. (Iruo-Izerẹ 6:14, 15) Ebaibol ọ ta kpahe Keni nọ “iruo riẹ i yoma.” (1 Jọn 3:12) Wọhọ ahwo buobu nẹnẹ, Keni o roro nọ oware kpobi nọ o ru o te lẹliẹe wo ọjẹrehọ Ọghẹnẹ. Rekọ uruemu riẹ u dhesẹ nọ o wo uyoyou kẹ Jihova ha, yọ o fi ẹrọwọ họ iẹe he.

Nọ Keni ọ ruẹ nọ Jihova ọ jẹ idhe riẹ rehọ họ, kọ ọ sai wuhrẹ no emamọ oriruo Ebẹle ze? Vievie. O te wo ẹgo kpahe oniọvo riẹ. Jihova ọ riẹ oware nọ o rrọ Keni eva, ọ tẹ ta kẹe re ọ siọ oyena ba. Jihova ọ vẹvẹ Keni unu nọ o gbe si ofu no eva ha, u ti su ei kpohọ uzioraha ulogbo, je fibae nọ otẹrọnọ o re nwene uruemu riẹ, ọ te jẹe rehọ.—Emuhọ 4:6, 7.

Keni ọ gaviezọ kẹ unuovẹvẹ Ọghẹnẹ hẹ. Ukpoye, ọ tẹ ta kẹ Ebẹle re a gbe kpobọ ẹwọ. Obei o jo kpei. (Emuhọ 4:8) Who te rri rie, Ebẹle họ ohwo ọsosuọ nọ a kpe fiki Ọghẹnẹ ọgọ. O whu kri no, rekọ a gbe bi gbiku riẹ rite inẹnẹ.

Azẹ Ebẹle o bo te Jihova oma re ọ kioja kẹe. Jihova ọ ginẹ kioja Ebẹle, keme ọ kẹ Keni uye fiki oware uyoma nọ o ru na. (Emuhọ 4:9-12) Rekọ oware nọ u wuzou gaga họ, ikuigbe ẹrọwọ Ebẹle e be ta ẹme kẹ omai nẹnẹ. O sae jọnọ ikpe udhusoi ọvo Ebẹle ọ rria, yọ ma tẹ rehọ onana wawọ epanọ ahwo oke yena a jẹ tọ te, ma rẹ sae ta nọ ọ tọ họ, ghele na ọ rọ umutho ikpe nọ ọ rria na ru Ọghẹnẹ eva were. Taure o te whu, ọ riẹ nọ o wo ọjẹrehọ Jihova. (Ahwo Hibru 11:4) U mu omai ẹro nọ Jihova ọ te kareghẹhọ iẹe jẹ kpare iẹe ziọ uzuazọ evaọ akpọ ọkpokpọ na. (Jọn 5:28, 29) Kọ whọ te jọ akpọ ọkpokpọ na rue riẹ? O sae lọhọ, otẹrọnọ whọ be gaviezọ kẹ ẹme nọ Ebẹle ọ be ta kẹ owhẹ, jẹ raro kele ẹrọwọ riẹ.

^ edhe-ẹme 8 Ẹme na, “otọhọ otọ akpọ ze,” u dhesẹ ahwo nọ a yẹ evaọ oke yena, fikiere o be ta kpahe ahwo nọ e kake jọ otọakpọ na. Kọ fikieme Jesu ọ rọ ta nọ Ebẹle ọ rria no “otọhọ otọ akpọ ze,” ukpenọ ọ ta ere kpahe Keni, kpakiyọ Keni họ ohwo ọsosuọ nọ a yẹ evaọ akpọ na? Uruemu Keni u dhesẹ nọ o keke aro fihọ wọso Jihova. Wọhọ Adamu avọ Ivi, a te rọ izieraha Keni vrẹ riẹ hẹ, yọ a te kpare iẹe ze gbe he.