Kpohọ eme nọ e riẹ eva

Kpohọ oria eware nọ e riẹe eva

Epanọ Imava-Orọo A re ro Se Orọo Rai Gboja

Epanọ Imava-Orọo A re ro Se Orọo Rai Gboja

Eware Nọ E Rẹ Wha Evawere Ze Uviuwou

Epanọ Imava-Orọo A re ro Se Orọo Rai Gboja

Aye ọ ta nọ: “Anwọ oke jọ ze na, me muẹrohọ nọ ọzae mẹ Michael ọ gbẹ be tẹzẹ omẹ homa ziezi hi, yọ ọ gbẹ be whẹtiẹ emọ na homa gbe he. * Nọ ma nwani wo evie-evuẹ Itanẹte evaọ ekọmputa mai no uruemu riẹ u ro muhọ enwene, yọ me viẹro ku inọ ọ be hae jariẹ rri ifoto ẹbẹba. Aso ẹdẹjọ nọ emọ na a kiẹzẹ no, mẹ tẹ nọe oware nọ o be thọ, kẹsena ọ tẹ vuẹ omẹ nọ ọ be hai rovie evie-evuẹ ifoto ẹbẹba evaọ Itanẹte na riwi. Me whu dikihẹ. Me rẹro oware utiona ẹdọvo evaọ akpọ mẹ hẹ. Eva nọ me fihọ iẹe kpobi e tẹ rayẹ no. Jẹ mai tube yoma na, ọzae jọ evaọ oria iruo mẹ o mu isiuru obẹlẹ họ edhesẹ kẹ omẹ no anwọ oke jọ ze na.”

Ọzae ọ ta nọ: “Eva okejọ nọ u kpemu, aye mẹ Maria ọ jọ ekọmputa mai ruẹ uwoho jọ, ọ tẹ nọ omẹ kpahe iẹe. Nọ mẹ rọwo inọ mẹ jẹ hai rovie kpohọ evie-evuẹ ifoto ẹbẹba, eva e dha riẹ tuke. Oma o vuọ omẹ gaga, udu u te je brukpe omẹ thesiwa. Me roro nọ onana o te fa orọo mai.”

EME who roro nọ o jọ ugogo ẹbẹbẹ ọzae-avọ-aye nana, Michael avọ Maria? Whọ rẹ sai roro nọ ifoto ẹbẹba iriwo họ ugogo ẹbẹbẹ Michael. Rekọ wọhọ epanọ Michael o vuhumu uwhremuna, oware ulogbo ofa jọ o wha ifoto ẹbẹba iriwo na ze—ababọ iroro osegboja nọ o wo kẹ orọo riẹ. * Oke ọsosuọ nọ Michael avọ Maria a ruọ orọo, a rẹro nọ uyoyou o te da orọo rai fia, yọ a te hai ru eware kugbe avọ omawere. Rekọ wọhọ epanọ o rẹ via kẹ erọo buobu na, osegboja nọ a wo kẹ orọo rai u whrehe nọ oke o be nya haro na, o tẹ wọhọ nọ a bi si oma no ohwohwo ẹmẹrera.

Kọ oma o be ta kẹ owhẹ nọ uyoyou nọ whẹ avọ ọrivẹ-orọo ra wha wo oke ọsosuọ u bi kiekpo nọ oke o be nya haro na? Kọ whọ gwọlọ nọ uyoyou rai imava o wariẹ ga wọhọ epaọ ọsosuọ? O tẹ rrọ ere, kiyọ o gwọlọ nọ whọ rẹ riẹ uyo enọ esa nana: Re a ta nọ ohwo o se orọo riẹ gboja, eme u dhesẹ? Didi eware e rẹ sai whrehe osegboja otiọye? Kọ eme whọ rẹ sai ru rọ ruẹ nọ who se orọo ra gboja?

Eme Họ Osegboja nọ A re Wo Kpahe Orọo?

Eme whọ rẹ sai dhesẹ wọhọ osegboja orọo? Ahwo buobu a rẹ ta nọ oware nọ o gba ohwo họ oye o re se gboja. Wọhọ oriruo, imava-orọo a rẹ sai se orọo rai gboja jẹ talamu ei fiki emọ nọ a yẹ hayo fikinọ o gba rai họ nọ a re yo ẹme kẹ Ọghẹnẹ, ọnọ ọ tuọ ọruẹrẹfihotọ orọo họ. (Emuhọ 2:22-24) Uzẹme, iroro itieye na i woma yọ i re fi obọ họ kẹ imava-orọo fi ebẹbẹ nọ e rẹ sae roma via evaọ orọo rai kparobọ. Rekọ re imava orọo a sai wo evawere, o rẹ jọ nọ fiki eware jọ nọ e gba rai họ ọvo a jẹ talamu orọo na ha.

Jihova o ru ọruẹrẹfihotọ orọo re o wha uvi oghọghọ gbe evevọwẹ se imava nọ e ruọ orọo. Ọ gwọlọ nọ ọzae ọ “wereva fiki aye nọ [ọ] rehọ,” re aye o you ọzae riẹ jẹ ruẹ vuhumu inọ ọzae riẹ o you rie wọhọ epanọ o you omobọ riẹ. (Itẹ 5:18; Ahwo Ẹfẹsọs 5:28) Re imava-orọo a sai wo usu okpekpe utioye na, o gwọlọ nọ a re fi eva họ ohwohwo. Oware ofa nọ u wuzou re họ, o gwọlọ nọ a re rri usu rai wọhọ oware nọ o rẹ jọ ribri. Nọ ọzae-avọ-aye a tẹ be daoma fi eva họ ohwohwo jẹ daoma jọ egbẹnyusu ivẹ nọ e mae kpekpe, u re ru orọo rai ghare ai obọ nọ a je sei gboja. A vẹ te reawere usu okpekpe nọ Ebaibol na i dhesẹ inọ o rẹ wọhọ ẹsenọ aimava na a rrọ “uwo ovo.”—Matiu 19:5.

Fikiere, ma rẹ sae ta nọ osegboja nọ a re wo kpahe orọo o wọhọ isimeti nọ a gua nọ a re fihọ udevie eblọko nọ u re kru uwou dikihẹ. Eware nọ a rẹ gua kugbe ro ru onana họ isimeti, ẹkpẹ, gbe ame. Epọvo na re, eware sa-sa imava-orọo a re ru ro dhesẹ nọ a se orọo rai gboja, wọhọ oriruo a re fi eva họ ohwohwo, wo usu okpekpe evaọ udevie rai, jẹ daoma jobọ kru oware jọ nọ a rẹ rọ talamu orọo na. Didi oware o rẹ sai whrehe osegboja nana?

Ebẹbẹ vẹ E rẹ Sae Roma Via?

Re ohwo o dhesẹ via inọ o se oware gboja, o gwọlọ iruo gbe omolahiẹ. O gwọlọ nọ whọ rẹ rọ unevaze kpairoro vrẹ isiuru omobọ ra re whọ ruẹsi ru eva were ọrivẹ-orọo ra. Dede na, re a ru ẹgwọlọ omọfa siọ orọ omobọ ra ba—ababọ ẹnọ inọ, ‘Eme ọ te jariẹ te omẹ?’—o rrọ oware ẹkpẹlobọ kẹ ahwo buobu, yọ o rẹ tubẹ dha otujọ eva dede. Rekọ dae nọ omara nọ, ‘Bro ahwo nọ a wo ẹzi oriobọ mẹ riẹ nọ a be wereva evaọ orọo rai?’ A tulo ho, otẹrọnọ ejọ e riẹ dede. Fikieme? Fikinọ ohwo nọ o wo ẹzi oriobọ ọ rẹ kake daezọ epanọ u ti kpomahọ orọo riẹ hẹ nọ o tẹ gwọlọ omolahiẹ mi ei, maero otẹrọnọ erere ọvo o ti tei ẹsiẹsiẹ hẹ nọ ọ tẹ rọwo fihọ ẹgwọlọ ọrivẹ riẹ. Ababọ osegboja nọ a re wo kẹ orọo, orọo o rẹ were he, makọ epanọ isiuru nọ imava a wo kẹ ohwohwo okenọ a mu usu na họ e ga te kẹhẹ.

Ebaibol e ta vevẹ nọ orọo yọ okpiruo. E ta nọ “ọzae nọ o wo aye i no, ọ rẹ ruawa eware akpọ na, epanọ o re ro ru aye riẹ eva wera,” gbe nọ “aye nọ o wo ọzae no, ọ rẹ ruawa eware akpọ na epanọ o re ro ru ọzae riẹ eva wera.” (1 Ahwo Kọrint 7:33, 34) Rekọ u yoma kẹhẹ inọ makọ erivẹ-orọo nọ i wo ẹzi oriobọ dede he, a be hai wo ovuhumuo awaọruọ ọrivẹ rai hayo yere ohwohwo kẹ oma nọ a be lahiẹ kẹ ohwohwo ẹsikpobi hi. Nọ erivẹ-orọo a gbe bi dhesẹ ovuhumuo kẹ ohwohwo ho, “ukpokpoma akpọ na” nọ a re wo u re vi epanọ o hae te jọ.—1 Ahwo Kọrint 7:28.

Re whọ sai fi ebẹbẹ kparobọ evaọ orọo ra jẹ wereva eva etoke nọ eware e be riẹ nya ziezi, o gwọlọ nọ who rri orọo ra wọhọ oware nọ o rẹ jọ ribri. Ẹvẹ whọ sai ro wo eriwo otiọye, kọ eme who re ru nọ o rẹ ta udu họ ọrivẹ-orọo ra awọ se orọo rai gboja?

Epanọ A Sae rọ Bọ Osegboja Ga

Ugogo oware nọ u re fi obọ họ kẹ ohwo wo osegboja kẹ orọo họ, oma nọ ohwo o re ro kpotọ fi ohrẹ Ẹme Ọghẹnẹ, Ebaibol na họ iruo. Onana uruo u re fi obọ họ kẹ owhẹ avọ ọrivẹ-orọo ra “wo erere.” (Aizaya 48:17) Muẹrohọ eware ivẹ jọ nọ whọ rẹ sai ru.

1. Jọ Ewoma Orọo Ra O Jọ Owhẹ Oja. Pọl ukọ na o kere nọ: “Muẹrohọ eware nọ e mae roja.” (Ahwo Filipai 1:10NW) Oghẹrẹ nọ ọzae avọ aye riẹ a re yerikugbe ohwohwo u wuzou gaga evaọ aro Ọghẹnẹ. Ọzae nọ o re bru ọghọ họ aye riẹ oma, o re wo ọghọ evaọ obọ Ọghẹnẹ. Yọ aye nọ ọ rẹ kẹ ọzae riẹ adhẹẹ ọ rrọ “ghaghae obaro Ọghẹnẹ.”—1 Pita 3:1-4, 7.

Ẹvẹ ewoma orọo ra o rrọ owhẹ oja te? Wọhọ epanọ ma riẹ, epanọ oware o rrọ ohwo oja te ere ọ rẹ raha oke fihọ iẹe te. Dae nọ omara nọ: ‘Evaọ amara nọ ọ vrẹ na, ẹvẹ mẹ raha oke kugbe ọrivẹ-orọo mẹ te? Ugogo eware vẹ me ru rọ kẹ aye hayo ọzae mẹ imuẹro inọ mẹ gbẹ rehọ iẹe ghaghae wọhọ uvi ogbẹnyusu?’ Whọ gbẹ be raha oke kugbe ọrivẹ-orọo ra ziezi hi, o rẹ sae jọ bẹbẹ kẹe re o wo imuẹro inọ who gine se orọo na gboja.

Kọ ọrivẹ-orọo ra ọ sae ginẹ ta nọ who se orọo rai gboja? Ẹvẹ whọ sae rọ riẹ oware nọ ọrivẹ-orọo ra ọ rẹ ta kpahe owhẹ, nọ a tẹ nọe sọ who se orọo rai gboja hayo who se rie gboja ha?

DAO ONANA: Kere eware isoi nana fihọ ẹwẹ-obe: ugho, iruo, orọo, ẹkeriotọ omawere, gbe egbẹnyusu. Kpoka họ ai othotha lele oware nọ who roro nọ ọrivẹ-orọo ra ọ rọ karo unọjọ utọjọ. Ta kẹ ọrivẹ-orọo ra inọ o ru epọvo na kpahe owhẹ re, jọ o kere je kpoka họ eware nọ o roro nọ whẹ omara whọ rọ karo unọjọ utọjọ. Nọ wha te kpokahọ re no, wha nwene ebe nọ wha kere na kẹ ohwohwo riwi. Nọ ọrivẹ-orọo ra ọ tẹ ta nọ whọ be daoma te hayo raha oke te kẹ ewoma orọo na ha, lele iei jiroro kpahe enwene nọ whọ rẹ sai ru re usu rai imava o ruẹse ga. Jẹ nọ omara nọ, ‘Eme mẹ rẹ sai ru nọ isiuru nọ me wo kpahe ẹgwọlọ ọrivẹ-orọo mẹ e jẹ ga vi epaọ ọsosuọ?’

2. Who Fi Ẹro họ Otafe He. Jesu ọ ta nọ: “Kohwo kohwo nọ o re ri aye rite ẹguọlọ riẹ, ọ jọ eva lele ie bruẹnwae no.” (Matiu 5:28) Nọ ohwo o te bruẹnwae, yọ ọ wha okpẹtu ologbo ziọ orọo riẹ no, onọ Ebaibol e ta nọ o rẹ sae lẹliẹ orọo fa. (Matiu 5:32) Rekọ ẹme Jesu nọ ma wariẹ evaọ obehru na u dhesẹ nọ iroro ẹnwae-obro e rẹ sae jọ ohwo udu krẹkri no taure o te ti bru-ẹnwae. Nọ ohwo ọ tẹ be kuvẹ kẹ iroro iyoma itieye eva udu riẹ yọ u dhesẹ nọ ọ rrọ ohwo eva-ivẹ.

Re whọ ruesẹ yọrọ ẹzi osegboja nọ who wo kẹ orọo ra, ru ei fihọ ọtamuo ra inọ who re rri ifoto ẹbẹba ha. Dede nọ ahwo buobu a bi sei oware evere, eriwo ifoto ẹbẹba o rẹ raha orọo. Muẹrohọ ẹme nọ aye jọ ọ ta kpahe ifoto ẹbẹba nọ ọzae riẹ o je rri: “Ọzae mẹ ọ ta nọ ifoto ẹbẹba iriwo o rẹ lẹliẹ isiuru obẹlẹ mai kẹ ohwohwo ga viere. Rekọ o be lẹliẹ omẹ wo eriwo inọ me fi oka ohwo ho, inọ mẹ be dae agba ha. Mẹ rẹ viẹ ruọ owezẹ ẹsikpobi nọ o te mu ifoto ẹbẹba na họ eriwo no.” Kọ whọ sae ta nọ ọzae nana o bi se orọo riẹ gboja manikọ o bi rri rie vo? Kọ whọ sae ta nọ o bi ru ei lọhọ kẹ aye riẹ re ọ rehọ eva kpobi kẹ orọo na? Kọ o bi lele aye riẹ yeri wọhọ ogbẹnyusu nọ ọ mae kpekpe iẹe oma?

Jọb, ọzae nọ o wo ẹrọwọ na o dhesẹ osegboja nọ o wo kẹ orọo riẹ gbe usu riẹ kugbe Ọghẹnẹ ẹkwoma ‘ibiaro riẹ nọ o duwu iyeri.’ O jọ ọtamuo riẹ inọ ‘ọmọtẹ o re si ei urru hu.’ (Job 31:1) Ẹvẹ whọ sae rọ raro kele Job?

U te no ifoto ẹbẹba nọ whọ rẹ whaha no, u fo nọ whọ rẹ sẹro udu ra re whọ siọ usu okpekpe nọ u fo ho ba emu kugbe ọzae hayo aye ọfa nọ ọ rrọ ọrivẹ-orọo ra ha. Uzẹme, ahwo buobu a rẹ sai roro nọ re a dhesẹ isiuru obẹlẹ kẹ ọzae hayo aye ọfa o rẹ wha ẹbẹbẹ ọvuọvo fihọ orọo ho. Rekọ Ebaibol e vẹvẹ omai unu nọ: “Udu na u wo ẹghẹ vi eware na kpobi, je wo uruemu ugbogbo; kọ ono ọ rẹ sai vuhu ei?” (Jerimaya 17:9) Kọ udu ra o viẹ owhẹ họ no? Dae nọ omara nọ: ‘Ono mẹ be hẹ mai se gboja—ọrivẹ-orọo mẹ manikọ omọfa jọ nọ ọ rrọ ọrivẹ-orọo mẹ hẹ? Nọ me te yo emamọ usi jọ, ono mẹ rẹ kake vuẹ—ọrivẹ-orọo mẹ manikọ omọfa jọ? Nọ ọrivẹ-orọo mẹ ọ tẹ ta kẹ omẹ nọ me bru usu mẹ kugbe ọzae hayo aye jọ kpẹre, ẹvẹ me ti rri onana? Kọ o te dha omẹ eva, manikọ mẹ te rọ evawere ru enwene nọ o gwọlọ?’

DAO ONANA: Otẹrọnọ who bi wo isiuru egaga kpahe omọfa jọ u te no ọrivẹ-orọo ra no, daoma bru usu ra kugbe ohwo otiọye na kpẹre re o jọ orọ otiẹse nọ u wo ugogo oware nọ u wuzou nọ whọ gwọlọ ru kugbei ọvo. Who du hae tẹrovi eware nọ who roro nọ e lẹliẹ ohwo na woma vi ọrivẹ-orọo ra ha. Ukpoye, tẹrovi iruemu iwoma ọrivẹ-orọo ra. (Itẹ 31:29) Hae kareghẹhọ eware nọ e soriẹ ze nọ ọrivẹ-orọo ra o ro si owhẹ urru, nọ who ro you rie oke ọsosuọ. Nọ oma ra nọ, ‘Kọ eware ezi nana i no ọrivẹ-orọo mẹ obọ no, manikọ me gbe bi muẹrohọ ai hi?’

Jowọ nọ Whọ rẹ rọ Bọ Orọo Ra Ga

Michael avọ Maria nọ ma wariẹ ẹme rai evaọ obehru na, a nya bru omọfa kẹ ohrẹ nọ a sai ro ku ẹbẹbẹ rai họ. Uzẹme, re a yare obufihọ yọ emuhọ gheghe. Rekọ ẹkwoma evuhumu inọ a gine wo ẹbẹbẹ jẹ nyae gwọlọ obufihọ, Michael avọ Maria a dhesẹ via inọ a se orọo rai gboja, gbe inọ u no rai eva ze re a daoma ruẹ nọ a wo evawere evaọ orọo rai.

Orọo ra o tẹ make rrọ ziezi hayo ebẹbẹ jọ e riẹ, u fo re whọ rọ uruemu ra dhesẹ kẹ ọrivẹ-orọo ra inọ who se orọo na gboja jẹ be daoma re evawere e jariẹ. Ru oware kpobi nọ o gwọlọ mi owhẹ nọ onana o sai ro mu ọrivẹ-orọo ra ẹro. Kọ o ruọ owhẹ nọ who re ru ere?

[Oruvẹ-obotọ]

^ edhe-ẹme 3 Ma nwene edẹ na.

^ edhe-ẹme 5 Dede nọ oriruo nana yọ orọ ọzae nọ o bi rri ifoto ẹbẹba, nọ aye o te ru oware ovona yọ o bi dhesẹ re nọ o se orọo riẹ gboja ha.

NỌ OMARA NỌ . . .

▪ Eware vẹ u fo nọ mẹ rẹ rehọ oke no ze re mẹ sai wo uvẹ jọ kugbe ọrivẹ-orọo mẹ ziezi?

▪ Eme mẹ rẹ sai ru rọ kẹ ọrivẹ-orọo mẹ imuẹro inọ me se orọo mai gboja?

[Uwoho nọ o rrọ ẹwẹ-obe avọ 16]

Ru uvẹ fihọ nọ whọ rẹ rọ jọ kugbe ọrivẹ-orọo ra

[Uwoho nọ o rrọ ẹwẹ-obe avọ 17]

Udu na iroro ọfariẹ i re jo muhọ taure ohwo o te ti bruẹnwae