Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Uwou-Eroro Na—Uvitha Uwuhrẹ  |  Akpegbivẹ 2015

 IKUIGBE UZUAZỌ

Me Wo Udhedhẹ Kugbe Ọghẹnẹ avọ Oni Mẹ

Me Wo Udhedhẹ Kugbe Ọghẹnẹ avọ Oni Mẹ

ONI mẹ ọ nọ omẹ nọ: “Fikieme whọ gbẹ gọ esẹ-ode ra ha? Kọ whọ gbẹ riẹ nọ ae a ru nọ whọ rọ rrọ uzuazọ? Kọ who gbe dhesẹ edẹro kẹ ae? Ẹvẹ who re keke aro fihọ siọ uruemu-ẹwho nọ u no anwae ze? Whọ tẹ ta nọ whọ rẹ gọ esemọ họ, kiyọ whọ be ta nọ egagọ mai i wotọ họ.” Nọ oni mẹ ọ ta eme nana no, o te muhọ ẹviẹ.

Oni mẹ ọ re ta ẹme enẹ ẹdẹvo ho. Ọye ọ tubẹ ta nọ a wuhrẹ Ebaibol kugbe omẹ, dede nọ ọ ta onana re a se ọyomariẹ ba ewuhrẹ. Ẹsikpobi me re yoẹme kẹe, yọ obọnana o be jọ bẹbẹ kẹ omẹ re mẹ ghẹmeeyo kẹe. Rekọ evaọ onana, o gwọlọ nọ mẹ rẹ ghẹmeeyo kẹe re mẹ sai ru eva were Jihova. Ogbẹrọnọ Jihova o fiobọhọ kẹ omẹ hẹ, mẹ hae te sai ru ei hi.

EPANỌ ME RO ZIHE RUỌ OLELEIKRISTI

Wọhọ ahwo Japan buobu, egagọ Buddha ma jọ. Rekọ etoke emerae ivẹ ọvo nọ Isẹri Jihova a ro wuhrẹ Ebaibol kugbe omẹ, o kẹ omẹ imuẹro nọ Ebaibol na yọ obe uzẹme. Nọ me wuhrẹ nọ me wo Ọsẹ obọ odhiwu, mẹ tẹ gwọlọ nọ mẹ rẹ riẹe. Mẹ avọ oni mẹ ma jẹ hae rọ evawere ta kpahe eware nọ me bi wuhrẹ na. Me te mu iwuhrẹ Ẹdoka họ ẹnya evaọ obọ Ọgwa Uvie. Nọ me wuhrẹ uzẹme na te oria jọ no, mẹ tẹ vuẹ oni mẹ nọ me ti gbe wobọ evaọ iruẹru egagọ Buddha ha. Idudhe na, uruemu riẹ u te nwene. Ọ tẹ ta nọ: “O rẹ jọ oware omovuọ gaga otẹrọnọ ohwo jọ ọ rẹ jọ uviuwou nana nọ o re you esẹ-ode mai hi.” Ọ tẹ vuẹ omẹ nọ me gbe wuhrẹ Ebaibol na ha, yọ me gbe kpohọ iwuhrẹ gbe he. Me roro ẹdẹvo ho inọ oni mẹ ọ te ta ẹme otiọna! O nwene riẹriẹriẹ.

Mẹ jọ obe Ahwo Ẹfẹsọs uzou avọ 6 wuhrẹ nọ Jihova ọ gwọlọ nọ me yoẹme kẹ ọsẹgboni mẹ. Ọsẹ mẹ ọ jọ abọ Oni mẹ. Evaọ oke ọsosuọ, me je roro nọ me te ru lele oware nọ a be vuẹ omẹ na, a te gaviezọ kẹ omẹ yọ udhedhẹ o te jọ uwou na. Evaọ oke nana, ẹdawọ nọ a rẹ rọ ruọ ekọleji o totọ no, yọ o gwọlọ nọ mẹ rẹ ruẹrẹ oma kpahe. Fikiere mẹ tẹ rọwo nọ me re ru lele ẹme rai evaọ etoke emerae esa, rekọ mẹ ya eyaa kẹ Jihova nọ mẹ te wariẹ mu iwuhrẹ họ nọ emerae esa na e tẹ gba no.

Iroro nọ mẹ jẹ na e thọ evaọ idhere ivẹ. Orọ ọsosuọ, me roro nọ isiuru mẹ kẹ uzẹme na u ti nwene evaọ etoke emerae esa ha. Rekọ u kri hi, usu mẹ kugbe Jihova u te muhọ ewhrehe.  Orọ avivẹ, ukpenọ ọsẹgboni mẹ a dina rolo obọ kẹ omẹ, a te koko erae họ ẹme na inọ mẹ rẹ whaha oware kpobi nọ u wobọ kugbe egagọ uzẹme.

OBUFIHỌ GBE ỌWỌSUỌ

Evaọ obọ Ọgwa Uvie, mẹ ruẹ inievo buobu nọ uviuwou rai o be wọso. A tuduhọ omẹ awọ nọ Jihova ọ te kẹ omẹ ẹgba. (Mat. 10:34-37) A te je ru omẹ riẹ nọ mẹ họ ugogo ohwo nọ ọ rẹ sai fiobọhọ kẹ ahwo uviuwou mẹ wo esiwo. Fikiere, mẹ tẹ ruabọhọ olẹ, bi wuhrẹ epanọ a re fievahọ Jihova.

Idhere sa-sa a jẹ rọ wọso omẹ evaọ uwou na. Oni mẹ ọ daoma lẹ omẹ, je lele omẹ jiroro sọ mẹ sai nwene iroro. Ẹsibuobu mẹ rẹ fọ tou. Mẹ tẹ kpunu, ẹsibuobu ẹwhọ o re noi ze keme nọ mẹ be ta nọ omẹ o gba yọ ọ be ta nọ oriẹ o gba. Mẹ hai ti gbe dhesẹ orimuo jẹ rọ adhẹẹ kẹ orọwọ oni mẹ, ẹsejọhọ oyena o hae te lẹliẹ ofu na kpotọ. Ọsẹgboni mẹ a fiba iruo-uwou nọ me re ru re mẹ siọ uwou ba eno. Ẹsejọ a rẹ kare ẹthẹ dhe omẹ re mẹ siọ uwou ba ẹro nọ mẹ tẹ nyavrẹ, yọ ẹsejọ dede a rẹ nyase emu ba kẹ omẹ hẹ.

U te oria nọ oni mẹ o je ro bo se amọfa inọ a fiobọhọ kẹe whaha omẹ. Ọ lẹ iticha mẹ nọ o fiobọhọ kẹe, rekọ iticha na ọ jọ abọ ọvo ho. Oni mẹ ọ tẹ rehọ omẹ se ohwo nọ o wuzou oria iruo riẹ, re ọ ruẹsi ru omẹ rọwo inọ egagọ evuevo i woma ha. Evaọ obọ uwou, oni mẹ ọ rọ ifonu se imoni mai sa-sa be lẹ ae nọ a fiobọhọ kẹe. Onana u ru eva dha omẹ gaga. Rekọ evaọ obọ ewuhrẹ, ekpako na a tẹ ta kẹ omẹ inọ mẹ kareghẹhọ nọ ahwo nọ oni mẹ o bi se vuẹ ẹme na, usiuwoma ọ be rọ ere ta kẹ ae na.

 Kẹsena mẹ tẹ rẹriẹ ovao dhe ẹme isukulu ikpehru enya. Ọsẹgboni mẹ a wo omaa fihotọ kẹ omẹ, onọ a roro nọ me ti ro mu emamọ akpọ họ eyeri. A rẹro nọ me te kpohọ isukulu ikpehru mẹ te rọ ruẹ emamọ iruo. Fikinọ ẹsibuobu ẹwhọ ọ jẹ hai no ẹme mai ze, ma jẹ sae keria totọ ta ẹme dhedhẹ hẹ. Fikiere me te kere ileta sa-sa se ọsẹgboni mẹ, rọ vuẹ ae utee mẹ. Eva e tẹ dha ọsẹ mẹ gaga, o te seha nọ: “Who te roro nọ whọ sae ruẹ iruo, gwọlọ iruo na odẹnotha ogbẹrọ ere he who ti no uwou nana.” Mẹ tẹ lẹ se Jihova kpahe ẹme na. Okiokiọ riẹ nọ mẹ jọ usiuwoma ota, inievo-emetẹ ivẹ jọ a tẹ vuẹ omẹ evaọ ọvuọ oke riẹ inọ a rehọ omẹ iruo nọ mẹ rẹ rọ jọ obọ uwou wuhrẹ emọ rai eware isukulu. Iruo nana nọ i te omẹ obọ na o were ọsẹ mẹ hẹ, yọ o gbe je lele omẹ ta ẹme he. Oni mẹ ọ ta nọ u re woma re mẹ jọ ọmọ nọ ọ rẹ họre uthu viukpọ Osẹri Jihova.

Jihova o fiobọhọ kẹ omẹ kpọ eriwo mẹ vi jẹ riẹ oware nọ u fo nọ me re ru

Ẹsejọ me re roro sọ Jihova ọ ginẹ gwọlọ nọ mẹ ghẹmeeyo kẹ ọsẹgboni mẹ te enẹ evaọ ẹme nana. Rekọ olẹ gbe eria Ebaibol sa-sa nọ e ta kpahe uyoyou Jihova nọ mẹ jẹ hai roro kpahe i fiobọhọ kẹ omẹ riẹ nọ oware nọ Ọghẹnẹ ọ gwọlọ oye, je wo emamọ eriwo kpahe ọwọsuọ gbe inọ fiki ewoma mẹ nọ a wo họ iroro o be lẹliẹ ọsẹgboni mẹ ru onana. Jihova o fiobọhọ kẹ omẹ kpọ eriwo mẹ vi, jẹ riẹ oware nọ u fo nọ me re ru. U te no ere no, epanọ me je wobọ te evaọ iruo usiuwoma ota na ere mẹ jẹ reawere riẹ te. Onana u ru nọ me ro fi utee iruo ọkobaro họ.

IRUO ỌKOBARO

Nọ inievo-emetẹ jọ a riẹ nọ mẹ gwọlọ mu iruo ọkobaro họ, a tẹ hrẹ omẹ nọ mẹ hẹrẹ re ofu ọsẹgboni mẹ o kpotọ tao. Mẹ tẹ lẹ kẹ areghẹ, ru ekiakiẹ, roro kpahe ẹjiroro nọ mẹ rọ gwọlọ ru iruo ọkobaro, jẹ ta ẹme na kẹ inievo nọ i kruga ziezi evaọ ukoko na. Mẹ tẹ gbaemu nọ me re ru Jihova eva were. Ofariẹ, mẹ tẹ make hẹrẹ re oke jọ o vrẹ taure me te mu iruo ọkobaro họ, oyena o te nwane lẹliẹ ọsẹgboni mẹ nwene iroro ho.

Me mu iruo ọkobaro na họ nọ mẹ jọ ukpe urere ekọleji. Nọ me ru iruo ọkobaro na te ikpe jọ no, me te fi utee họ inọ mẹ rẹ kwa kpohọ oria nọ ẹgwọlọ ọ mae rrọ. Rekọ ọsẹgboni mẹ a gwọlọ nọ me no uwou hu. Fikiere mẹ tẹ hẹrẹ re me te ikpe 20 tao. Nọ oke yena u te no, mẹ tẹ yare nọ uwou ogha o kẹ omẹ ẹkwotọ evaọ ofẹ Japan jọ nọ imoni mai a rrọ, re oni mẹ ọ gbẹ ruawa gahrọ họ.

Evaọ ẹkwotọ na, eva e were omẹ gaga nọ me ro wuhrẹ Ebaibol na kugbe ahwo buobu te epanọ a rọ roma mudhe jẹ họ-ame. Me wuhrẹ Oyibo re mẹ sae ta usiuwoma kẹ ahwo ẹvẹrẹ Oyibo. Inievo-emezae ivẹ nọ e jọ ekobaro obọdẹ a jọ ukoko nọ mẹ jọ na. Me muẹrohọ nọ inievo nana a wo ajọwha gaga yọ a je fiobọhọ kẹ amọfa ziezi. Onana u ru nọ me ro fi utee ọkobaro obọdẹ họ. Evaọ etoke nana, oni mẹ ọ mọ gaga isiava. Yọ isiava na me kpo nyae rẹrote ei. Onana u gbe rie unu gaga, ofu nọ o je mu kẹ omẹ na o tẹ dina kpotọ.

ME WO EGHALE BUOBU

Nọ ikpe ihrẹ e vrẹ no, Atsushi, ọkobaro obọdẹ jọ evaọ usu ivẹ nọ mẹ fodẹ ẹsiẹe na o te kere ileta se omẹ. Ọ jọ ileta na vuẹ omẹ nọ o bi roro kpahe orọo jẹ nọ sọ o were omẹ inọ ọ rẹ rehọ omẹ. Me wo isiuru itieye kẹ Atsushi vẹre he, yọ me roro nọ o wo iroro itieye kẹ omẹ vẹre gbe he. Nọ amara ọvo ọ vrẹ no, me te kere zihe sei inọ ma daoma riẹ ohwohwo ziezi tao. Ma muẹrohọ nọ u wo eware buobu nọ ma ro tho ohwohwo, ma wo utee iruo odibọgba oke kpobi jẹ rọwo nọ ma re ru iruo kpobi nọ a kẹ omai. Ukuhọ riẹ, ma tẹ ruọ orọo. Eva e were omẹ gaga inọ ọsẹgboni mẹ gbe ahwo uviuwou mai efa a nyaze ehaa-orọo mai.

Nepal

 Nọ ma rrọ iruo ọkobaro oke-kpobi na, u kri hi, a tẹ kẹ ọzae mẹ iruo ethabọ ọsẹro okogho. O raha oke he eghale efa i te bru omai ze. A tẹ kẹ omai iruo ọkobaro obọdẹ, kẹsena a tẹ kẹ omai iruo ọsẹro okogho. Okejọ nọ ma rri ikoko kpobi nọ e jọ okogho mai re no, uwou ogha o tẹ rọ ifonu se omai, a tẹ nọ omai nọ: ‘Kọ wha sai kpobọ Nepal kẹ iruo ọsẹro okogho na?’

Erẹwho sa-sa nọ ma jọ ru iruo Uvie na u wuhrẹ omẹ eware buobu kpahe Jihova

Mẹ jẹ ruawa kpahe epanọ o te jọ ọsẹgboni mẹ oma nọ ma te kpohọ ugbothabọ yena. Fikiere mẹ tẹ rọ ifonu se ai. Ọsẹ mẹ ọ tọlọ ifonu na, nọ mẹ vuẹe no ọ tẹ kpahe kẹ omẹ nọ: “Emamọ oria whọ be te nya na.” Evaọ oka nọ u kpemu, ogbẹnyusu riẹ jọ ọ kẹ riẹ obe jọ nọ o ta kpahe Nepal, yọ ọsẹ mẹ o je tube roro nọ Nepal o fo oria nọ a re weze kpohọ.

Nọ ma bi rri inievo Nepal avọ evawere na, oghale ofa u te ghelie bru omai ze. A ku Bangladesh kugbe okogho mai, ẹkwotọ nana ọ kẹle Nepal rekọ o wo ohẹriẹ evaọ idhere sa-sa. Oghẹrẹ nọ a rẹ rọ ta usiuwoma evaọ obei u wo ohẹriẹ gaga re. Nọ ikpe isoi e ruọ emu no, a tẹ wariẹ vi omai kpohọ Japan nọ ma be jọ reawere iruo ọsẹro okogho na enẹna.

Japan, Nepal, gbe Bangladesh, nọ ma jọ ru iruo Uvie na u wuhrẹ omẹ eware buobu kpahe Jihova! Duọ orẹwho duọ ọvuọ uyereakpọ gbe uruemu riẹ. Yọ makọ evaọ orẹwho ovona, omomọvo o wo ohẹriẹ. Mẹ ruẹ epanọ Jihova ọ be rọ rẹrote ahwo omomọvo, be jẹ ae rehọ, fiobọhọ kẹ ae jẹ be ghale ae.

Jihova ọ rọ eriariẹ kpahe ọyomariẹ, iruo Uvie na, gbe emamọ ọzae ghale omẹ no. Ọghẹnẹ o fiobọhọ kẹ omẹ jẹ emamọ iroro, yọ enẹna me wo emamọ usu kugbe ei avọ ahwo uviuwou mẹ. Me yere Jihova inọ mẹ avọ oni mẹ ma wariẹ zihe ruọ emamọ egbẹnyusu no. Eva e be were omẹ gaga nọ me wo udhedhẹ kugbe Ọghẹnẹ avọ oni mẹ.

Ma be reawere iruo ọsẹro okogho na gaga