Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Uwou-Eroro Na—Uvitha Uwuhrẹ  |  Akpegbọvo 2015

 IRUẸRU MAI ERỌ OKE NỌ U KPEMU

‘Ajọ Oware Ovo Evaọ Otọ Ọre na O Whaha Owhai Hi!’

‘Ajọ Oware Ovo Evaọ Otọ Ọre na O Whaha Owhai Hi!’

O JỌ ubrobọ emuhọ ukpe 1931. Aro ọgwa arozaha nọ a re se Pleyel nọ ọ viodẹ gaga na evaọ Paris ọ vọ avọ ahwo nọ a no erẹwho nọ i bu te 23 ze. Ahwo buobu nọ a sẹ ziezi a je no imoto ofa ruọ otọ evaọ aro ọgwa na, u kri hi ọgwa na ọ tẹ vọ avọ ahwo. Ahwo na nọ a joma bu te idu esa (3,000). Orọnikọ ughe arozaha jọ a nyaze ti rri hi, ukpoye kọ a nyaze te gaviezọ kẹ ovuẹ Brọda Joseph F. Rutherford, ọnọ ọ jẹ rẹrote iruo usiuwoma ota na oke yena. A jẹ fa evuẹ riẹ nọ i wo ẹgba gaga na fihọ ẹvẹrẹ French, German, gbe Polish. Uvo Brọda Rutherford o jẹ rua ruọ ọgwa na soso.

Okokohọ ologbo yena nọ a ru evaọ Paris na ọ wha enwene ologbo fihọ iruo usiuwoma ota Uvie na evaọ France. Brọda Rutherford ọ tuduhọ inievo nọ i no erẹwho sa-sa ze na awọ, maero kọ izoge na inọ a ru iruo ọgbaẹmo-aro evaọ France. Ohrẹ jọ nọ Brọda Rutherford ọ kẹ o rẹ thọrọ uzoge jọ nọ ọ jọ ofẹ ẹvẹrẹ Oyibo nọ a re se John Cooke ẹro ho. Ọ ta nọ: “Whai izoge, ajọ oware ovo evaọ otọ ọre na o whaha owhai hi nọ wha gbẹ rọ ruọ iruo ọgbaẹmo-aro ho!” *

U te no John Cooke nọ o zihe ruọ imisiọnare uwhremu na no, inievo efa buobu a jowọ lele uzizie nana nọ o wọhọ orọ obọ Masidonia na. (Iruẹru 16:9, 10) Egbaẹmo-aro 27 ọvo e jọ France evaọ 1930 rekọ a te ti bu te ẹgba ọvo gbe ene (104) evaọ 1931, ẹnyaharo nana nọ ọ romavia evaọ ukpe ọvo na o gbunu gaga. Nọ orọnọ egbaẹmo-aro ọsosuọ nana buobu a riẹ ẹvẹrẹ French he na, ẹvẹ a te sae rọ ta usiuwoma na, rẹrote omarai, je ru onana evaọ ẹkwotọ nana nọ ae ọvo a rrọ na?

A TA USIUWOMA NA GHELỌ ẸBẸBẸ ẸVẸRẸ

Ekade usiuwoma ota egbaẹmo-aro nọ i no erẹwho efa ze a rẹroso evaọ iruo usiuwoma ota na. Oniọvo-ọmọzae jọ nọ ọ rẹ ta ẹvẹrẹ German nọ ọ ta usiuwoma na ududu evaọ Paris ọ ta nọ: “Ma riẹ nọ Ọghẹnẹ mai ọ rrọ ruaro. Otẹrọnọ udu u bru omai evaọ usiuwoma ota, orọnikọ fiki ozọ ahwo ho. Ukpoye kọ ozọ inọ ẹme nana ọ te thọrọ omai ẹro: ‘Voulez-vous lire cette carte, s’il vous plaît? [onọ otofa riẹ o rrọ: Iviena se ekade nana].’ Ma riẹ nọ iruo mai na i wuzou gaga.”

Egbaẹmo-aro ọsosuọ na a jẹ rọ idhighere gbe imotosaikoro wha ovuẹ Uvie na te ahwo oma evaọ France

Nọ egbaẹmo-aro na a tẹ be ta usiuwoma evaọ iwou jọ, ẹsibuobu ahwo nọ a be rẹrote iwou na a re le ai. Ẹdẹjọ nọ inievo-emetẹ ivẹ jọ nọ e rẹ ta ẹvẹrẹ Oyibo rekọ nọ a riẹ French ẹta tere he a jọ usiuwoma, ohwo nọ ọ be rẹrote uwou jọ o te je dhuaro ku ai, be nọ ae ohwo nọ a be gwọlọ. Nọ oniọvo na jọ ọ jẹ gwọlọ epanọ o re ro kie ofu ọzae na, o te muẹrohọ ẹme jọ nọ a kere fihọ ẹthẹ evaọ oria na. Ẹme na họ: “Tournez le bouton [nọ otofa riẹ o rrọ, Kporo ẹgogo na].” Oniọvo na o roro nọ odẹ ohwo nọ o wo uwou na ọye, fikiere ọ tẹ rọ ovao ohwohwẹ kpahe kẹ ọzae na nọ: “Ma nyaze te ruẹ ‘Tournez le bouton.’ ” Emamọ uruemu osasa u fiobọhọ kẹ ekobaro nana nọ i wo ajọwha na gaga.

 A SERIHỌ HỌ, DEDE NỌ EWARE E JỌ GAGA YỌ AE ỌVO A JỌ ẸKWOTỌ

Evaọ etoke ikpe 1930, eware e jọ gaga kẹ ahwo buobu evaọ France, yọ onana u kpomahọ ekobaro na re. Oniọvo-ọmọtẹ jọ nọ a re se Mona Brzoska nọ ọ rẹ ta ẹvẹrẹ Oyibo, ọ ta epanọ o jọ kẹe gbe oniọvo-ọmọtẹ ọfa nọ a gbẹ jọ iruo ọkobaro na inọ: “Iwou anwae ma jẹ mae rria, yọ ẹbẹbẹ ologbo jọ nọ ma je wo họ epanọ ma sai ro ru iwou na roro evaọ oke ekpahe egaga. Noke toke ma jẹ hae rria ubruwou udhedhẹ nọ ame ọ rẹ jọ dhẹmu. Ohiohiẹ ma re kporo ukulu ame nọ o dhẹmu evaọ oware ame mai taure ma tẹ sae wozẹ ovao.” Kọ udu u whrehe ekobaro oke anwae na fiki uyero nọ a rẹriẹ ovao dhe? Vievie! Ọkobaro jọ ọ ta oware nọ o jọ otu nọ o kiọkọ kpobi eva inọ: “Ma wo oware ovo ho, rekọ uvumọ oware o kare omai hi.”Mat. 6:33.

Ekobaro ẹvẹrẹ Oyibo nọ a kpohọ okokohọ ubrotọ nọ a jọ Paris ru evaọ ukpe 1931

Ẹbẹbẹ ọfa jọ nọ egbaẹmo-aro na a wo oke yena họ, ae ọvo a jọ ẹkwotọ ruaro. Evaọ emuhọ etoke ikpe 1930, iwhowho-uvie nọ e jọ France i bu te egba ihrẹ (700) hẹ, yọ ibuobu rai a jọ ofẹ sa-sa orẹwho na soso. Eme o fiobọhọ kẹ egbaẹmo-aro nọ ae ọvo a jọ ẹkwotọ ruaro na nọ a jẹ sae rọ wereva ghele? Mona avọ oniọvo-ọmọtẹ nọ a gbẹ jọ iruo na a rẹriẹ ovao dhe ẹbẹbẹ nana, Mona ọ ta nọ: “Oware nọ u fiobọhọ kẹ omai fi use-abọ nana kparobọ họ, ebe ukoko na nọ ma jẹ hai wuhrẹ kugbe ẹsikpobi. Nọ orọnọ evaọ oke yena ma jẹ hai kpohọ izihebro gbe ebe-iwuhrẹ Ebaibol ho na, ma jẹ hai wo oke evaọ owọwọ nọ ma je ro kere ileta se ahwo uviuwou mai, maero kọ ibe ekobaro mai. Ma jẹ hai kere eware nọ ma be rọ ẹro ruẹ se ohwohwo jẹ tuduhọ ohwohwo awọ.”1 Tẹs. 5:11.

Inievo nana nọ i wo ẹzi omarodhidhe na, a wo emamọ eriwo ghelọ ebẹbẹ kpobi nọ a rẹriẹ ovao dhe. Ileta jọ nọ a kere se uwou ogha, ẹsejọhọ nọ ikpe buobu e ruemu anwẹnọ a ro ru iruo ọkobaro na no evaọ obọ France e kẹ imuẹro onana. Oniọvo-ọmọtẹ mai jọ nọ ọ rrọ okpodhiwu nọ a re se Annie Cregeen avọ ọzae riẹ a nya eria avọ eria France duwu evaọ etoke ikpe 1931 rite 1935. O kere kpahe epanọ o jọ oke yena inọ: “Ma yeri uzuazọ evawere nọ ma jọ reawere iruo buobu! Usu mai ekobaro na o jọ kpekpekpe. Wọhọ epanọ Pọl ukọ na ọ ta, ‘Ẹkọ mẹ kọ, Apọlọs o te ku ame ku ei, rekọ Ọghẹnẹ o te bi ru ei rro.’ Onana o jọ oware evawere kẹ omai gaga nọ i wo uvẹ nọ ma ro fiobọhọ kẹ ahwo buobu ikpe nọ i kpemu.”1 Kọr. 3:6.

Ekobaro ọsosuọ nana a fi obọdẹ oriruo ithihakọ gbe ajọwha hotọ kẹ omai inievo nọ e gwọlọ ru iruo odibọgba mai kẹre. Nẹnẹ, ekobaro oke-kpobi nọ i bu te idu ikpegbene (14,000) e rrọ France. Ikoko hayo itu evẹrẹ efa sa-sa ibuobu rai a be jọ fiobọhọ. * Wọhọ ekobaro ọsosuọ na, a be kuvẹ vievie he re oware jọ evaọ otọ ọre na o whaha ae!—Iruẹru mai erọ oke nọ u kpemu evaọ obọ France.

^ edhe-ẹme 4 Whọ tẹ gwọlọ se kpahe iruo Uvie na nọ inievo obọ Poland a ru evaọ France, rri uzoẹme na “Jihova Ọ Rehọ Owhai Ziọ France te Riẹ Uzẹme Na,” evaọ Uwou-Eroro ọ Aria 15, 2015.

^ edhe-ẹme 13 Evaọ ukpe 2014, ikoko gbe itu evẹrẹ efa sa-sa nọ e jọ otọ ẹruọsa uwou ogha France i bu te egba izii (900), yọ a be rọ evẹrẹ nọ i bu te 70 fiobọhọ kẹ ahwo nọ a gwọlọ riẹ uzẹme na.