NỌ A rehọ obọ te ẹkoko Kingsley, o te mu isase Ebaibol riẹ họ, onana họ ẹme ọsosuọ riẹ evaọ Isukulu Odibọgba Esuo-Ọghẹnẹ na. Ọ be nabe romatotọ se eme na kpobi, o bi vo ubiẹme ọvo ho. Rekọ hẹrẹ tao! Fikieme o gbe bi ro rri Ebaibol riẹ hẹ?

Obọ Sri Lanka, Kingsley ọ be rria, yọ o tuaro. O re yo ẹme tere gbe he, akaba-ọmo o re ro no oria ruọ oria. Ẹvẹ ọzae nana ọ sai ro wuhrẹ kpahe Jihova je te ohwo nọ o re ru ẹme evaọ Isukulu Odibọgba Esuo-Ọghẹnẹ na? Jọ me gbiku na ze.

Ẹdẹ ọsosuọ nọ mẹ rọ ruẹ Kingsley, eva e were omẹ gaga nọ mẹ ruẹ nọ ọ gwọlọ riẹ uzẹme na. Isẹri Jihova sa-sa a wuhrẹ Ebaibol kugbei no, yọ obe Eriariẹ Nọ I Re Su Kpohọ Uzuazọ Ebẹdẹ Bẹdẹ ọrọ ahwo nọ a tuaro nọ o wo ọ who gaga no. * Ọ rọwo nọ ma wariẹ mu ewuhrẹ riẹ họ, rekọ ebẹbẹ ivẹ jọ e jariẹ.

Ẹbẹbẹ ọsosuọ họ, Kingsley ọ jẹ rria kugbe amọfa evaọ uwou nọ a rẹ jọ rẹrote ekpako soso gbe ahwo nọ a ko. Nọ ma te bi wuhrẹ, mẹ rẹ kpare uvou mẹ kpehru gaga fiki ẹme nọ Kingsley o bi yo tere he na gbe edo ahwo na. Ahwo kpobi a jẹ hai yo oware nọ ma bi wuhrẹ koka koka.

Ẹbẹbẹ avivẹ họ, umutho ẹme ọvo Kingsley ọ  jẹ hai se jẹ sae kareghẹhọ evaọ oke kpobi nọ ma te bi wuhrẹ. Re Kingsley o wo erere no uwuhrẹ na ze ziezi, ọ jẹ hae romatotọ ruẹrẹ oma kpahe. O re dhe oria nọ ma ti wuhrẹ esese kpahotọ, je rri eria ikereakere na evaọ Ebaibol Braille riẹ, ọ vẹ jẹ jọ iroro riẹ ruẹrẹ iyo enọ na kpahe. Onana u fiobọhọ gaga. Evaọ oke nọ ma te bi wuhrẹ, ọ rẹ keria erọgo jẹ whaliẹ awọ riẹ, nọ ọ tẹ be ta oware nọ o wuhrẹ ọ rẹ tae do gaga yọ ọ be rọ obọ tehe otọ avọ evawere. U kri hi, ma te je wuhrẹ isiava ẹkpoka, yọ ma jẹ hai wuhrẹ te euwa ivẹ evaọ ẹkeriotọ ọvo.

O TE MU IWUHRẸ HỌ JẸ BE JARAI WOBỌ

Kingsley avọ Paul

O jọ Kingsley oja gaga re o kpohọ iwuhrẹ evaọ obọ Ọgwa Uvie, rekọ onana o jọ okolo iruo ho. O gwọlọ nọ ohwo jọ ọ rẹ wọe fihọ akaba-ọmo riẹ na jẹ wọe noi, wọe ruọ omoto, jẹ wọe no omoto ruọ evaọ Ọgwa Uvie. Inievo na buobu a tẹ jẹ hai nwene ohwohwo fiobọhọ kẹe, yọ a rri rie fihọ uvẹ-ọghọ. Nọ ọ tẹ rrọ ewuhrẹ, o re fi ọgba kẹle ozọ riẹ, ọ vẹ gaviezọ ziezi, yọ ọ rẹ tubẹ kẹ iyo.

Nọ Kingsley o wuhrẹ te umuo jọ no, o te fi odẹ hotọ kẹ Isukulu Odibọgba Esuo-Ọghẹnẹ na. Eka ivẹ taure ẹme isase Ebaibol ọsosuọ riẹ o te ti te, mẹ tẹ nọe sọ ọ be ruẹrẹ oma kpahe. O te yo kẹ omẹ ududu nọ, “Ee, Brọda, me se oria na te isia 30 no.” Me te yere iei kẹ omodawọ riẹ jẹ ta kẹe nọ o sei kẹ omẹ. O te rovie Ebaibol Braille riẹ, fi iziabọ riẹ họ iẹe kẹsena o te muhọ ese. Rekọ, me te muẹrohọ nọ iziabọ riẹ i bi no oria ruọ oria ha, wọhọ epanọ o rẹ jọ vẹre. Ọ riẹ oria isase Ebaibol na kpobi fihọ uzou no!

Irui-oviẹ i te su no omẹ aro ze nọ me bi rri rie avọ igbunu na. Mẹ tẹ nọe epanọ ọ be sae rọ kareghẹhọ eme na kpobi kpakiyọ isia 30 ọvo o se oria na no. Ọ tẹ ta nọ: “Ijo, kẹdẹ kẹdẹ mẹ be hai se oria na te isia 30.” Oware amara soso gbọ, Kingsley ọ be hae rọ keria erọgo riẹ se oria na bẹsenọ ọ rọ riẹe fihọ uzou.

Ẹdẹ nọ o ti ro ru ẹme na evaọ obọ Ọgwa Uvie o te ti te. Nọ Kingsley o se re no, ukoko na soso u te mu abọ họ ẹtehe, irui i no ahwo buobu aro ze nọ a ruẹ oware nọ ọmọ uwuhrẹ ọkpokpọ nana o ru. Owhowho-uvie jọ nọ ọ siọ ẹme ba eruo no evaọ isukulu na fiki ozọ, ọ tẹ ta nọ a wariẹ fi odẹ riẹ họ isukulu na. Nọ a nọ oniọvo-ọmọtẹ nana oware nọ o lẹlẹ e riẹ nwene iroro, ọ ta nọ, “Otẹrọnọ Kingsley ọ sai ru ei, kiyọ mẹ rẹ sai ru ei re!”

Nọ o wuhrẹ Ebaibol na te ikpe esa no, evaọ Azie 6, 2008, Kingsley ọ tẹ họ-ame ro dhesẹ omaromudhe riẹ kẹ Jihova. Ọ gọ Jihova bẹsenọ o ro whu evaọ Asoi 13, 2014. U mu Kingsley ẹro inọ evaọ Aparadase otọakpọ, ọ te rọ oma kọkọ gbe ẹgba riẹ gọ Jihova. (Aiz. 35:5, 6)—Paul McManus o gbe iku na.

^ edhe-ẹme 4 A kere i rie evaọ 1995; rekọ a gbe bi printi riẹ enẹna ha.