Ono họ Gọg obọ Magọg nọ a jọ obe Izikiẹl fodẹ na?

Anwọ ikpe buobu ze na, ma be hae jọ ebe mai ta nọ Gọg obọ Magọg yọ odẹ nọ a se Setan Ẹdhọ na anwẹnọ a ro lei no obọ odhiwu ze no. Ma wo otoriẹ nana anwẹdẹ fikinọ obe Eviavia o ta nọ Setan Ẹdhọ na ọ te kobaro evaọ ẹmo nọ akpọ na soso ọ te jọ wọso idibo Ọghẹnẹ. (Evia. 12:1-17) Fikiere ma te je roro nọ Gọg yọ odẹ ofa nọ a mu kẹ Setan evaọ eruẹaruẹ.

Rekọ otoriẹ nana o kpare enọ jọ nọ i wuzou gaga ze. Fikieme? Roro kpahe onana: Nọ Jihova ọ jẹ ta kpahe okenọ a ti ro fi Gọg kparobọ, ọ ta kpahe iẹe nọ: “Whọ . . . te jọ emuore rọ kẹ emevra gbe erao-ẹwọ kpobi re e raha owhẹ.” (Izik. 39:4) Jihova o te je fibae nọ: “Evaọ ẹdẹ ọyena mẹ rẹ te rehọ oria uki rọ kẹ Gọg evaọ Izrẹl, . . . etẹe a re ti ki Gọg avọ ogbotu riẹ kpobi họ.” (Izik. 39:11) Kọ, ẹvẹ omama ẹzi ọ sae rọ “jọ emuore rọ kẹ emevra gbe erao-ẹwọ”? Ẹvẹ Setan ọ sai ro wo oria nọ “a re ti ki” ei fihọ evaọ otọakpọ? Ebaibol na ọ ta vevẹ nọ a ti gbolo Setan fihọ ọgọdọ odidi, ọ vẹ te jọ etẹe ikpe odu ọvo (1,000), orọnikọ a ti ki ei hayo emevra gbe erao e te riẹe he.—Evia. 20:1, 2.

Ebaibol e ta nọ ikpe odu ọvo (1,000) na e tẹ gba no a ve ti siobọno Setan no evaọ ọgọdọ na, kẹsena “ọ vẹ te nyai su erẹwho nọ e rrọ ibienẹ ene akpọ na thọ, Gọg avọ Magọg, re o koko ai họ kẹ ẹmo na.” (Evia. 20:8) Onọ ofa jọ họ, ẹvẹ Setan o ti ro su Gọg thọ otẹrọnọ ọyomariẹ họ Gọg? Fikiere, “Gọg” o dikihẹ kẹ Setan evaọ eruẹaruẹ nọ e rrọ obe Izikiẹl hayo obe Eviavia na ha.

Nọ o rrọ ere na, kọ ono họ Gọg obọ Magọg? Re ma sae kuyo na, o gwọlọ nọ ma rẹ kiẹ Ikereakere na riwi re ma riẹ ahwo nọ a be wọ ẹmo bru idibo Ọghẹnẹ. Orọnikọ ohọre ‘Gọg obọ Magọg’ ọvo Ebaibol na ọ ta kpahe he, rekọ ọ fodẹ ohọre “ovie obọ ẹkpẹlobọ-ọre” gbe ohọre “ivie otọakpọ na.” (Izik. 38:2, 10-13; Dan. 11:40, 44, 45; Evia. 17:14; 19:19) Kọ ehọre nana i wo ohẹriẹ no ohwohwo? Ijo. U muẹro nọ ohọre ovona Ebaibol ọ be rọ odẹ sa-sa dhesẹ na. Fikieme ma rọ ta ere? Fikinọ Ebaibol na ọ ta nọ erẹwho akpọ na soso a ti wobọ evaọ ohọre urere nana nọ u ti su kpohọ Amagẹdọn na.—Evia. 16:14, 16.

 Nọ ma kiẹ eria ikere nana kpobi nọ e ta kpahe ohọre urere nọ a te wọso idibo Ọghẹnẹ na riwi, u te mu omai ẹro inọ orọnikọ Setan họ Gọg obọ Magọg na ha, rekọ erẹwho sa-sa nọ i kuomagbe. Kọ o sae jọnọ “ovie obọ ẹkpẹlobọ-ọre” nọ a ta ẹme te evaọ eruẹaruẹ na o ti su erẹwho sa-sa nọ i ti kuomagbe te họre idibo Ọghẹnẹ na? Ma sae ta ere gbiae he. Rekọ o dina wọhọ nọ ere o be te jọ keme Jihova ọ ta kpahe Gọg nọ: ‘Wha ti no ẹkpẹlobọ-ọre vievie ze avọ ahwo rai kpobi, whai enọ e be dhẹ enyenya, avọ ogbotu ẹmo rai kpobi.’—Izik. 38:6, 15.

Epọvo na re, Daniẹl ọruẹaro na nọ avọ Izikiẹl a gbẹ rria oke ovona ọ ta kpahe ovie ẹkpẹlobọ-ọre na nọ: “Rekọ usi nọ u re ti no obọ ovatha-ọre gbe ẹkpẹlobọ-ọre tha u re ti mu ei ozọ, ọ rẹ te rehọ ofu ologbo nya ọ vẹ te raha je kpe ibuobu muotọ. Ọ rẹ te bọ iwou-idhu riẹ họ udevie abade avọ ugbehru oruaro ọrẹri; dede na yọ u re ti re, ohwo ọvuọvo o re ti fiobọhọ kẹ e he.” (Dan. 11:44, 45) Nwanọ oghẹrẹ eme itiena Izikiẹl ọ ta kpahe iruẹru Gọg re.—Izik. 38:8-12, 16.

Kọ eme ọfa o ti no ohọre urere nana ze? Daniẹl ọruẹaro na ọ ta nọ: “Evaọ oke oyena Maekẹl [Jesu Kristi] o re ti muẹ [evaọ Amagẹdọn], ọmọ-ovie ologbo nọ owouzou ahwo ra [anwọ ukpe 1914 ze]. Oke uye o rẹte jọ, [uye ulogbo] utionọ o rẹte jọ ẹdẹvo ho, anwẹnọ orẹwho na o rọ rọ rite oke oyena; rekọ oke oyena a reti siwi ahwo ra, ọnọ a ruẹ odẹ riẹ eva obe na kpobi.” (Dan. 12:1) A jọ obe Eviavia 19:11-21 ta kpahe owojẹ Jesu nana re.

Rekọ ono a jọ obe Eviavia 20:8 se “Gọg avọ Magọg” na? Evaọ odawọ urere nọ o te romavia evaọ obọ ekuhọ odu ikpe na, enọ e te wọso Jihova a ti dhesẹ ọkpọ uruemu ‘Gọg obọ Magọg,’ koyehọ erẹwho nọ e wọ ohọre bru idibo Ọghẹnẹ evaọ abọ urere uye ulogbo na. Yọ oware ovona o te via kẹ itu ivẹ nana, uwhu ebẹdẹ bẹdẹ. (Evia. 19:20, 21; 20:9) Fikiere, o nwani fo re a se enọ e te wọso evaọ obọ ekuhọ odu ikpe na “Gọg avọ Magọg.”

Nọ ma rrọ emọ uwuhrẹ Ebaibol nọ i fiẹro hotọ na, ma be rọ ọwhọ hẹrẹ ohwo hayo utu ahwo nọ a ti dikihẹ ẹta “ovie obọ ẹkpẹlobọ-ọre” evaọ obaro kẹlena. Rekọ, ohwo kpobi nọ o ti su erẹwho sa-sa nọ i ti kuomagbe họre idibo Ọghẹnẹ na kẹhẹ, ma wo imuẹro eware ivẹ jọ: (1) A ti fi Gọg obọ Magọg avọ ogbaẹmo riẹ kparobọ jẹ raha ae muotọ riẹriẹriẹ; yọ (2) Jesu Kristi, Ovie mai nọ o bi su enẹna, o ti siwi idibo Ọghẹnẹ je su ai ruọ akpọ ọkpokpọ nọ udhedhẹ gbe omofọwẹ o dafia.—Evia. 7:14-17.