EVAỌ oware wọhọ ikpe 10 nọ i kpemu, ọzae-avọ-aye jọ nọ a kpako vrẹ ikpe 30 no, Gregorio avọ Marilou a jọ ekobaro oke-kpobi yọ evaọ oke ovona a rrọ ọvuọ iruo riẹ evaọ ẹwho Manila obọ Philippines. O jọ lọlọhọ kẹ ai hi re a ru iruo ọkobaro kugbe okọ rai, rekọ a ruabọhọ iẹe. Kẹsena a te fi aye na họ ọga ebanke nọ ọ jẹ jọ ruiruo na. Ọ ta nọ: “Ma jẹ reakpọ kuoma fiki iruo nọ ma jọ na.” Eware i woma kẹ ae te epanọ a rọ jiroro nọ a rẹ bọ uwou obọrai fihọ emamọ oria jọ nọ o rehọ emaele 12 thabọ no Manila evaọ ofẹ ovatha-ọre. A te ru ọruẹrẹfihotọ kugbe ekọmpene jọ nọ ọ rẹ bọ iwou re ọ bọ uwou na kẹ ae, kẹsena a vẹ te hwosa na kẹ ekọmpene na kamara kamara evaọ etoke ikpe 10.

Marilou ọ ta nọ: “Iruo mẹ e jẹ rehọ oke gbe ẹgba mẹ te epanọ isiuru nọ me wo kẹ iruẹru ukoko i je ro kiekpo. O jọ omẹ oma nọ mẹ be wha Jihova re. Mẹ gbẹ be sae kẹ Jihova oke nọ mẹ ya eyaa nọ me re ro ru iruo riẹ hẹ.” Fikinọ oware nọ o be via na u kiehọ ae oma ha, Gregorio avọ Marilou a tẹ keria ẹdẹjọ re a ginẹ ta ẹme kpahe oware nọ a be rọ uzuazọ rai ru.  Gregorio ọ ta nọ: “Ma gwọlọ ru inwene rekọ ma riẹ uzedhe inwene nọ ma re ru hu. Ma tẹ jiroro kpahe oghẹrẹ nọ ma sae rọ rehọ uzuazọ mai gọ Jihova ziezi, maero nọ ma wo emọ họ na. Ma lẹ se Jihova kẹ ọkpọvio.”

Evaọ oke yena, a yo ovuẹ sa-sa nọ a kẹ kpahe usiuwoma ota evaọ oria nọ a jọ mae gwọlọ iwhowho-uvie. Gregorio ọ ta nọ: “Ma tẹ rehọ iẹe nọ Jihova ọ be rọ ẹkwoma eme nana kuyo olẹ mai na.” A tẹ lẹ se Jihova re o fi obọ họ kẹ ai wo ẹrọwọ gbe udu nọ a rẹ rọ jẹ emamọ iroro. Oware nọ a ti ru kpahe uwou rai nọ a be bọ na o jọ ẹbẹbẹ ologbo kẹ ae evaọ iroro-ejẹ na. A hwosa ikpe esa fihotọ kẹ ekọmpene na no. Kọ ẹvẹ a ti ru na? Marilou ọ ta nọ: “Ma tẹ dobọ uwou na ji, koyehọ edele igho nọ ma hwa fihotọ na kpobi i vru no. Rekọ ma romatotọ roro ẹme na, ma tẹ ruẹ nọ eware ivẹ e rrọ otọ na, sọ ma re ru oreva Jihova hayo oreva mai.” Nọ a roro kpahe ẹme Pọl nọ ọ ta nọ o “ku eware kpobi fiẹ,” a tẹ dobọ uwou na ji, no iruo okọ rai, zẹ eware rai buobu, kẹsena a tẹ kwa kpohọ iwhre jọ nọ e rrọ unueri Palawan evaọ ofẹ obọze ovatha-ọre nọ o rehọ emaele egba esa (300) thabọ no Manila.—Fil. 3:8.

Taure Gregorio avọ Marilou a tẹ te kwa, a ruẹrẹ oma kpahe kẹ epanọ a ti ro yeri uzuazọ olọlọhọ, rekọ nọ a te obei a rọ ruẹ nọ kpakọ a te jọ ababọ eware buobu. Aye na ọ ta nọ: “U gb’omẹ unu. Ikpẹ ẹlẹtriki gbe eware efa nọ e rẹ dina ru uzuazọ kiehọ ohwo oma e riẹ hẹ. Ire ma je ko ro koko erae họ viukpọ istovu ẹlẹtriki. Whọ rẹ ruẹ oria nọ whọ jẹ dẹ emamọ oware nọ whọ rẹ re he wọhọ epanọ o rrọ evaọ obonọ ma no ze.” Ghele na, aimava a jẹ hae tẹrovi ẹjiroro nọ a rọ fiki riẹ kwa ze iwhre na, yọ u kri hi iwhre na e tẹ te reriae oma no. Marilou ọ ta nọ: “Enẹna me bi muẹrohọ epanọ emama Ọghẹnẹ i wo erru te, wọhọ isi nọ e rẹ jọ ehru lo evaọ aso na, yọ o be were omẹ gaga. Oware nọ o be mae were omai họ, evawere nọ ahwo a re wo nọ ma tẹ be ta usiuwoma kẹ ae. Usiuwoma nọ ma rrọ etenẹ ta na u bi fi obọ họ kẹ omai “wuhrẹ edidi” ọrọ epanọ umutho eware nọ ma wo e rẹ rọ da omai ẹro.—Fil. 4:12.

Ọzae riẹ ọ ta nọ: “Nọ ma kwa ze obọ, Isẹri Jihova ene ọvo e jọ iwhre na. Eva e jẹ were ae gaga nọ me mu ovuẹ ogbotu họ ẹkẹ koka koka gbe okenọ mẹ tẹ be rehọ ijita mẹ kporo lele ile ukoko nọ a be so.” Evaọ etoke ukpe ovo, utu okakao nana u te ti zihe ruọ ukoko nọ u wo iwhowho-uvie 24 no. Gregorio ọ ta re nọ: “Ẹmeunu gbe uruemu uyoyou nọ inievo na a dhesẹ kẹ omai u duobọte omai gaga.” Enẹna, o vrẹ ikpe ezeza no nọ a rọ rrọ iwhre nana ta usiuwoma, aimava na a ta nọ: “Oware ovo o riẹ hẹ nọ a rẹ rọ wawo evawere nọ who re wo nọ whọ tẹ ruẹ ahwo nọ a bi kurẹriẹ ziọ ukoko na. Enẹna ma ruẹ nọ ma bi gine yeri emamọ uzuazọ.”

Inievo emezae gbe erọ emetẹ nọ e joma bu te idu esa (3,000) a be kwa kpohọ eria sa-sa nọ a jọ mae gwọlọ iwhowho-uvie evaọ Philippines. Inievo-emetẹ egba isoi (500) nọ e re te rọo ho a rrọ usu rai. Oniọvo otiọna jọ họ Karen.

Karen nọ ọ rrọ oware wọhọ ikpe 25 ọ whẹro evaọ Baggao obọ Philippines. Okenọ ọ re kpako te ikpe 20 he, ọ jẹ hai roro kpahe epanọ o re ro duomahọ iruo usiuwoma ota na ziezi. Ọ ta nọ: “Fikinọ oke nọ u kiọkọ u gbe tulo ho, yọ o gwọlọ nọ ahwo kpobi a re yo usiuwoma na, o jọ omẹ oma nọ mẹ rẹ kwa kpohọ oria nọ a jọ mae gwọlọ iwhowho-uvie.” Ahwo uviuwou riẹ jọ a jẹ ta udu họ iẹe awọ nọ o kpohọ isukulu ikpehru ukpenọ ọ rẹ kwa kpohọ obojọ nyae ta usiuwoma, rekọ Karen ọ tẹ lẹ se Jihova re o fi obọ họ kẹe riẹ onọ o re ru. Ọ tẹ jẹ ta ẹme na kẹ inievo jọ nọ e kwa kpohọ oria nọ iwhowho-uvie e rrọ tere he kẹ usiuwoma ota. Nọ ọ kpako te ikpe 18 no, ọ tẹ kwa kpohọ iwhre jọ nọ o rehọ emaele 40 thabọ no ẹwho riẹ.

Ukoko osese nọ Karen ọ nyai fi obọ họ kẹ na a rẹ ta usiuwoma evaọ ẹkwotọ igbehru nọ o rrọ unueri Abade Pacific. Karen ọ ta nọ: “O rehọ omai edẹ esa re ma tẹ nya no Baggao te obei, ma nya ikpehru gbe ikpotọ vrẹ yọ ma fa ithẹ sa-sa vrabọ te unuẹse nọ u vi 30.” O fibae nọ: “Mẹ rẹ nya euwa ezeza re mẹ tẹ nyate emọ-uwuhrẹ Ebaibol mẹ jọ oma, mẹ rẹ wezẹ oria ọmọ-uwuhrẹ jọ hẹrioke kẹsena okiokiọ riẹ mẹ vẹ nya euwa ezeza zihe kpo.” Kọ erere jọ o no uye nana kpobi nọ ọ ruẹ na ze? Karen o kpohwẹ ku unu jẹ ta nọ: “Ẹsejọ awọ ọ rẹ da omẹ, rekọ me wo emọ-uwuhrẹ Ebaibol nọ i bu te 18. Mẹ ‘jawo no jẹ ruẹ nọ ỌNOWO na o woma’!”—Ol. 34:8.

Sukhi, oniọvo-ọmọtẹ jọ nọ o wo ọzae he nọ ọ vrẹ ikpe 40 no ọ kwa no America kpohọ Philippines kẹ iruo usiuwoma ota, eme ọ wọ riẹ ru onana? Evaọ ukpe 2011, o kpohọ okokohọ okogho jọ nọ a jọ kiẹ ọzae-avọ-aye jọ riwi. A ta epanọ a rọ zẹ eware rai kpobi re a sae kwa kpohọ Mexico kẹ iruo usiuwoma ota na. Sukhi ọ ta nọ: “Ọkiẹriwo yena u ru nọ me ro muhọ eroro kpahe itee jọ nọ e re ziọ omẹ iroro vẹre he.” Sukhi yọ ohwo India, yọ okenọ o yo nọ a be gwọlọ inievo nọ e rẹ sae ta usiuwoma kẹ ahwo ẹvẹrẹ India jọ nọ a re se Punjabi evaọ obọ Philippines, ọ tẹ gbaemu nọ ọ rẹ nya. Kọ ọ rẹriẹ ovao ku ebẹbẹ jọ?

Sukhi ọ ta nọ: “Iroro e jẹ bẹ omẹ ẹjẹ kpahe eware mẹ nọ mẹ rẹ zẹ gbe enọ mẹ rẹ seba. Ikpe 13 mẹ ọvo mẹ jẹ rria uwou whelie whelie, rekọ mẹ tẹ kwa nyai kuomagbe ahwo uviuwou mẹ bẹsenọ mẹ te nya vrẹ, uwou na o jọ kekeke. O jọ bẹbẹ kẹ omẹ, rekọ edhere otiọna mẹ sae rọ ruẹrẹ oma kpahe kẹ uzuazọ olọlọhọ nọ mẹ gwọlọ yeri na.” Ebẹbẹ vẹ ọ rẹriẹ ovao ku nọ ọ kwa kpohọ Philippines no? Ọ ta nọ: “Ozọ eware  nọ e rẹ jọ otọ si gbe emerae itieye efa e jẹ hai mu omẹ gaga, yọ urru obọ uwou o jẹ hai si omẹ, onana o mae jọ ẹbẹbẹ kẹ omẹ. Me wuhrẹ epanọ a re fievahọ Jihova evaọ oghẹrẹ uzuazọ okpokpọ nana nọ me muhọ na.” Kọ erere jọ o no uye nana kpobi nọ ọ ruẹ na ze? Sukhi o kpohwẹ ku unu jẹ ta nọ: “Jihova ọ ta kẹ omai nọ, ‘Wha dawo omẹ, sọ me gbe ti vi oghale se owhai hi.’ Mẹ ruẹ uzẹme ẹme nana okenọ ohwo jọ nọ mẹ jẹ ta usiuwoma kẹ ọ nọ omẹ nọ, ‘Kọ ẹdẹ vẹ who ti zihe ze? Me wo enọ efa buobu nọ mẹ gwọlọ nọ owhẹ.’ O be kẹ omẹ evawere nọ me bi fi obọ họ kẹ ahwo nọ a gwọlọ riẹ uzẹme na.” (Mal. 3:10) O fibae nọ: “Oware nọ o mae jọ ẹbẹbẹ kẹ omẹ họ, epanọ mẹ sae rọ jọ udu mẹ gbaemu re mẹ ginẹ kwa. Rekọ nọ mẹ kwa no, u gb’omẹ unu gaga kpahe oghẹrẹ nọ Jihova ọ ruẹrẹ eware họ kẹ omẹ.”

Sime, oniọvo-ọmọzae nọ ọ kpako vrẹ ikpe 30 nọ ọ rọo no, ọ kwa no Philippines kpohọ orẹwho ofa jọ nyai ru iruo nọ a rẹ jọ hwa okposa. Ọsẹro okogho jọ ọ jọ obei kẹe uduotahawọ, ọ tẹ jẹ gaviezọ kẹ ovuẹ ogbotu nọ omọvo Ugboma Esuo na jọ o ru, onana o tẹ kẹe ajọwha nọ ọ rọ gwọlọ rọ iruo Jihova karo evaọ uzuazọ riẹ. Ọ ta nọ: “Rekọ udu u je bru omẹ inọ me ti siobọno iruo mẹ.” O make jọ ere na, o siobọno iruo na je zihe kpobọ Philippines. Enẹna, Sime avọ aye riẹ Haidee a rrọ iruo usiuwoma ota na evaọ ẹwho Davao del Sur nọ o rrọ ofẹ Philippines jọ nọ a jọ mae gwọlọ iwhowho-uvie. Sime ọ ta nọ: “Me te roro kpemu, eva e be were omẹ gaga nọ me fi ozọ nọ mẹ jẹ dhẹ kpahe iruo mẹ nọ me ti siobọno kparobọ jẹ rọ iruo Jihova karo evaọ uzuazọ. A rẹ ruẹ oware nọ o rẹ kẹ evawere tei hi re ohwo ọ rọ uzuazọ riẹ ru iruo Jihova.”

Okenọ ọzae-avọ-aye nọ a rrọ ekobaro nọ a re se Ramilo avọ Juliet nọ a kpako vrẹ ikpe 30 no a yo nọ ukoko jọ nọ o rehọ emaele 20 thabọ no uwou rai o gwọlọ obufihọ, a tẹ ta nọ a rẹ nya. Koka koka, te oso ọ be rrọ hayo uvou o be rro, aimava na a rẹ rehọ imotosaikoro rai dhẹ ugbo-uthabọ kpohọ iwuhrẹ gbe usiuwoma ota. Dede nọ onya na o jẹ hae jọ bẹbẹ fikinọ edhere na o woma ha, eva e be were ae nọ a kpohọ usiuwoma ota evaọ ẹwho nọ a jọ mae gwọlọ iwhowho-uvie. Ramilo ọ ta nọ: “Mẹ avọ aye mẹ ma bi wuhrẹ Ebaibol kugbe ahwo 11. Usiuwoma ota evaọ oria nọ a jọ mae gwọlọ iwhowho-uvie o gwọlọ omarodhidhe rekọ o be kẹ omai evawere gaga.”—1 Kọr. 15:58.

Kọ whọ gwọlọ riẹ eware efa kpahe epanọ whọ sai ro kpohọ usiuwoma ota evaọ oria nọ a jọ mae gwọlọ iwhowho-uvie evaọ orẹwho ra hayo orẹwho ofa? O tẹ rrọ ere, ta ẹme na kẹ ọsẹro okogho ra re who je se evuẹ nọ e rrọ otọ uzoẹme na, “Kọ Whọ Sae ‘Nyaze Obọ Masẹdonia’?” evaọ Odibọgba Uvie Mai ọrọ November 2011.