IKPE jọ nọ i kpemu, Roald avọ aye riẹ Elsebeth nọ a joma kpako te ikpe udhuvẹ gbikpe no a jẹ rria ẹwho nọ a re se Bergen, evaọ obọ Norway, yọ uzuazọ o jọ wowoma kẹ ae. Ae omarai, ọmọtẹ rai nọ a re se Isabel gbe ọmọzae rai nọ a re se Fabian a je w’obọ ziezi evaọ iruẹru ukoko na. Roald ọ jọ ọkpako ukoko yọ Elsebeth ọ jọ ọkobaro oke-kpobi. Isabel avọ Fabian a jọ iwhowho-uvie nọ i wo ajọwha ziezi.

Rekọ evaọ amara ọ September ọrọ ukpe 2009, uviuwou na soso o tẹ jiroro inọ a re kpohọ iwhre jọ re a jọ obei ta usiuwoma evaọ oka ovo. Fikiere, Roald avọ Elsebeth gbe Fabian nọ ọ jọ ikpe ikpegberee oke yena a te kpohọ Nordkyn, ẹkwotọ Finnmark jọ nọ ame ọ joma wariẹ họ. A jọ iwhre ẹkwotọ na jọ nọ a re se Kjøllefjord ta usiuwoma na kugbe inievo efa nọ e ziọ obei. Roald ọ ta nọ: “Nọ oka iruo usiuwoma ota na u muhọ no, eva e jẹ were omẹ gaga inọ mẹ sae ruẹrẹ omaa mẹ họ nọ mẹ rọ ziọ iruo usiuwoma ota obọdẹ nana evaọ ẹkpoka soso.” Rekọ nọ iruo ẹkpoka na e be nyaharo na, Roald o te je roro kpahe oware ofa jọ nọ o wha ọkora sei. Didi oware?

Roald ọ ta nọ: “Ọkobaro jọ nọ a re se Mario evaọ ẹkwotọ Finnmark na, ọ nọ omai sọ ma sae kwa kpohọ Lakselv, ẹwho ọsese jọ evaọ Finnmark, re ma fi obọ họ kẹ ukoko osese jọ nọ iwhowho-uvie udhegbesa a rrọ. Me rẹro onọ na vievie he.” Onọ yena o ruọ Roald ọza. Ọ ta re inọ: “Mẹ avọ aye mẹ ma roro kpahe iẹe no vẹre inọ ma te kwa kpohọ oria nọ a jọ mae gwọlọ iwhowho-uvie, rekọ obọnana ha, okenọ emọ mai e tẹ kpako je no uwou no.” Rekọ evaọ umutho edẹ nọ Roald ọ ta usiuwoma evaọ ẹkwotọ na, ọ ruẹ nọ ahwo buobu a gwọlọ wuhrẹ kpahe Jihova. Enẹna a gwọlọ obufihọ. Roald ọ ta nọ: “Fiki onọ yena nọ me je roro kpahe, aso buobu mẹ wezẹ hẹ.” Kẹsena, Mario ọ tẹ rọ omoto wọ Roald avọ uviuwou riẹ dhẹ emaele udhuhrẹ gbikpe (150) kpohọ ẹmẹwho nọ a re se Lakselv nọ o rrọ ofẹ jọ Kjøllefjord. Mario ọ gwọlọ nọ uviuwou na ọvo a rọ ẹro rai ruẹ ukoko osese nọ o rrọ ẹmẹwho na.

Nọ a te Lakselv no, omọvo jọ nọ a re se Andreas evaọ usu ekpako ivẹ nọ e rrọ ukoko na o te dhesẹ ẹmẹwho na kẹ ae gbe Ọgwa Uvie rai. Inievo nọ e rrọ ukoko na a dede i rai rehọ ziezi, kẹsena a tẹ ta kẹ Roald avọ aye riẹ inọ eva e te were ai gaga otẹrọnọ uviuwou rai o sae kwa ze ti fi obọ họ kẹ ae evaọ iruo usiuwoma ota na. Andreas o te kpohwẹ kunu jẹ ta nọ ọ nya onya iruo fihotọ kẹ Roald avọ Fabian ọmọzae riẹ no. Kọ eme a ti ru obọnana?

Ẹme ọsosuọ nọ Fabian ọ ta họ: “Mẹ gwọlọ kwa ziọ obonẹ hẹ.” O were riẹ hẹ re ọ nya siọ egbẹnyusu ekpekpe riẹ nọ a gbẹ rrọ ukoko ovona ba te rria ẹmẹwho ọkakao nana. U te no ere no, o ri nwrotọ họ evaọ iruo ekwakwa ẹlẹtriki nọ a rẹ ruẹrẹ nọ o bi wuhrẹ. Rekọ okenọ a nọ Isabel nọ ọ jọ ikpe udhegbọvo epanọ o roro kpahe ẹme na, ọ kuyo nọ: “Nwanọ oware nọ mẹ gwọlọ oye.” Rekọ Isabel ọ ta re inọ: “Nọ me roro kpahe iẹe didi, mẹ nọ omamẹ nọ, ‘Kọ mẹ te sai gine ru oware nana? Kọ mẹ kwa siọ egbẹnyusu mẹ ba? Manikọ mẹ jọ ukoko mẹ nọ o reria omẹ oma no na?’” Kọ eme Elsebeth, oni rai ọ ta? Ọ ta nọ: “O jomẹ oma inọ Jihova ọ kẹ uviuwou mai iruo no, rekọ me te je roro kpahe uwou mai nọ ma ruẹrẹ obọ gbe ekwakwa eyero nọ ma dẹ fihọ uwou na anwọ ikpe udhegbisoi nọ i kpemu.”

Nọ oka obọdẹ iruo usiuwoma ota na u re no, Roald avọ uviuwou riẹ a te zihe kpohọ ẹwho ọ Bergen nọ a no ze. Rekọ oke na kpobi a je roro kpahe inievo Ileleikristi rai nọ e rrọ obọ Lakselv na, onọ o rehọ emaele odu ọvo gbe egba esa (1,300) thabọ no oria rai. Elsebeth ọ ta nọ: “Mẹ lẹ se Jihova unuẹse buobu, yọ ẹsikpobi mẹ jẹ hae ta ẹme kugbe inievo nọ ma jọ obei nyaku nọ i zihe ruọ egbẹnyusu mai no, ma je vi ifoto gbe iku eware nọ ma rọ ẹro ruẹ evaọ usiuwoma ota se ohwohwo.” Ọzae riẹ Roald ọ ta nọ: “O gwọlọ nọ mẹ gbẹ rọ omoke jọ ruẹrẹ udu mẹ kpahe kẹ ẹkwa na. Me te je roro kpahe oghẹrẹ nọ eware e te jọ evaọ obei. Kọ ẹvẹ ma te sai rọ rẹrote oma omai? Mẹ lẹ se Jihova gaga kpahe iẹe, me lele ahwo uviuwou mẹ jiroro na jẹ ta ẹme na kẹ inievo nọ e rrọ ukoko na kri no.” Fabian ọ ta nọ: “Epanọ me roro kpahe oware na te, ere u bi mu omẹ ẹro te inọ u fo nọ ma rẹ kwa nya. Yọ epanọ mẹ lẹ se Jihova kpahe iẹe te, ere o rrọ isiuru mẹ te inọ ma rẹ kwa nya.” Kọ Isabel omariẹ? O mu iruo ọkobaro họ re ọ rọ ere ruẹrẹ oma kpahe. Nọ o ru iruo ọkobaro te emerae ezeza no avọ uwuhrẹ Ebaibol omobọ riẹ nọ o bi ru ẹsikpobi, ọ tẹ ruẹ nọ ọ ruẹrẹ oma kpahe no kẹ onya na.

Nọ isiuru nọ a gwọlọ rọ kwa kpohọ oria nọ a jẹ mae gwọlọ iwhowho-uvie o be ga na, ahwo uviuwou na soso a te ru ọvuọ oware nọ u re fi obọ họ kẹ ai le ute na t’obọ. Roald ọ rrọ iruo nọ a be jọ hwae emamọ osa, rekọ ọ tẹ yare ọga riẹ nọ ọ gwọlọ no iruo na ẹgbukpe ọvo. Ọga na ọ tẹ ta kẹe nọ ukpoye, jọ o ru iruo ubroke, inọ o ru iruo eka ivẹ re o serihọ eka ezeza. Roald ọ ta nọ: “A si no osa mẹ gaga, rekọ onana u fi obọ họ.”

Elsebeth ọ ta nọ: “Ọzae mẹ ọ ta kẹ omẹ nọ mẹ nyae gwọlọ uwou evaọ obọ Lakselv re ma haya uwou mai nọ o rọ Bergen kẹ ahwo. Onana o jọ bẹbẹ, yọ o rehọ oke mi omai rekọ ma sai ru ei. Nọ omoke jọ o vrẹ no, emọ mai a tẹ ruẹ iruo ubroke yọ onana u fi obọ họ kẹ omai ruẹ ugho emuore gbe ugho onya edhere.”

Isabel ọ ta nọ: “Fikinọ ẹwho nọ ma kwa nya na o tulo  ho, o jọ ẹbẹbẹ k’omẹ gaga re mẹ ruẹ iruo nọ mẹ rẹ rọ rẹrote omamẹ evaọ iruo ọkobaro na. Evaọ ẹsejọ o rẹ wọhọ nọ irẹro evuevo e riẹ hẹ.” Ghele na, o je ru iruo ubroke kpobi nọ obọ riẹ u te, yọ o ru iruo itienana evaọ eria izii sa-sa ukpe ọsosuọ nọ a jọ ẹwho na, onọ u fi obọ họ kẹe rẹrote araha riẹ ukpe yena. Kọ Fabian omariẹ? Ọ ta nọ: “Re mẹ sai wuhrẹ iruo ekwakwa ẹlẹtriki eruẹrẹ na nwrotọ, o gwọlọ nọ mẹ rẹ gbẹ jọ otọ ohwo jọ. Ere me ru evaọ obọ Lakselv. Me te ti wuhrẹ nwrotọ jẹ ruẹ iruo ubroke.”

Marelius avọ aye riẹ nọ a re se Kesia a gwọlọ nyae ta usiuwoma evaọ oria nọ a jọ mae gwọlọ iwhowho-uvie. Marelius nọ ọ rrọ ikpe udhegbizii enẹna ọ ta nọ: “Eme nọ a ta kpahe iruo ọkobaro gbe ekobaro jọ nọ a kiẹriwi evaọ Okokohọ ubrotọ e lẹliẹ omẹ roro kpahe epanọ mẹ sai ro ru viere evaọ iruo usiuwoma ota na.” Rekọ o jọ ẹbẹbẹ kẹ aye riẹ Kesia nọ ọ rrọ ikpe udhegbezeza enẹna re ọ nya siọ ahwo uviuwou riẹ ba. Ọ ta nọ: “Iroro na dede e jọ idhọvẹ kẹ omẹ inọ mẹ te nya siọ ahwo uviuwou mẹ ba nyae rria oria ofa.” Evaọ oke nana yọ Marelius o bi ru iruo n’oke t’oke re a ruẹse hwosa ugho nọ a momo rọ dẹ uwou rai. Ọ ta nọ: “Jihova o yo elẹ mai, onọ u fi obọ họ kẹ omai ru inwene nọ o gwọlọ re ma sae kwa kpohọ oria nọ a jọ mae gwọlọ iwhowho-uvie.” Oware ọsosuọ nọ a ru họ, a raha oke ziezi kẹ uwuhrẹ Ebaibol. Kẹsena a tẹ zẹ uwou rai je no iruo nọ a je ru, evaọ amara August ọrọ ukpe 2011 a tẹ kwa kpohọ ẹwho Alta evaọ obọ Norway. Re a sae rẹrote omarai evaọ iruo ọkobaro na, Marelius ọ jọ okele-igho evaọ oria iruo jọ yọ Kesia o bi ru iruo evaọ uwou-eki.

Ikuigbe Yearbook nọ e ta kpahe ahwo nọ i kpohọ iruo usiuwoma ota evaọ oria nọ a jẹ mae gwọlọ iwhowho-uvie u duobọte Knut avọ Lisbeth aye riẹ nọ a rrọ ikpe ọgba gbọ enẹna. Lisbeth ọ ta nọ: “Ikuigbe nana nọ ma se u ru nọ ma ro roro kpahe epanọ ma re ro kpohọ orẹwho ofa nyae ta usiuwoma na, rekọ o jẹ ruọ omẹ oma ha keme me roro nọ onana yọ oware nọ ohwo gheghe wọhọ omẹ na ọ rẹ sai ru hu.” Ghele na, a daoma le utee rai na t’obọ. Knut ọ ta nọ: “Ma zẹ uwou mai, ma tẹ kwa nyai lele oni mẹ ria re araha ugho mai ọ sai kpotọ. Kẹsena, re ma riẹ epanọ o rẹ jọ nọ ohwo ọ tẹ kwa kpohọ ẹkwotọ ọfa, ma te kuomagbe ukoko Oyibo nọ o rrọ Bergen ukpe ovo re ma sai wuhrẹ ẹvẹrẹ Oyibo. Oni Lisbeth ma lele rria uwou oke yena.” U kri hi, Knut avọ Lisbeth a tẹ ruẹ nọ a ruẹrẹ oma kpahe no re a kwa kpohọ Uganda. Rekọ a re zihe kpobọ Norway kpohọ iruo emerae ivẹ kukpe kukpe. Ere a be rọ ruẹ ugho rẹrote oma rai kukpe kukpe evaọ obọ Uganda.

Ẹvẹ eware e jọ kẹ inievo nana nọ i kpohọ eria nọ ẹgwọlọ ọ jọ mae rro na? Roald ọ ta nọ: “Uviuwou mai o be hae jọ kugbe ziezi enẹna vi okenọ ma jọ obọ Bergen. Ma kpekpe oma vi epaọ anwẹdẹ. O be kẹ omai evawere gaga nọ ma tẹ ruẹ uyoyou nọ emọ mai a wo kẹ Jihova no enẹna.” Ọ ta re inọ: “Enẹna  ekwakwa efe e gbẹ rrọ omai oja tere he keme ma ruẹ nọ i wuzou te epanọ ma je roro ho.”

Elsebeth ọ ruẹ nọ u fo re o wuhrẹ ẹvẹrẹ ọfa. Fikieme? Fikinọ emotọ ofẹ jọ Norway, Sweden, Finland, gbe Russia nọ e be ta ẹvẹrẹ ọ Sami a rrọ ẹkwotọ usiuwoma ota ukoko ọ Lakselv na. Fikiere, re Elsebeth ọ sae ta usiuwoma kẹ ahwo nana, o te mu ẹvẹrẹ Sami na họ ewuhrẹ. Enẹna ọ sae rọ ẹvẹrẹ na ta usiuwoma. Kọ ọ be reawere iruo usiuwoma ota riẹ evaọ ẹkwotọ ọkpokpọ nana? Ọ ta avọ evawere inọ: “Me bi ru iwuhrẹ Ebaibol ezeza enẹna, yọ eva e be were omẹ gaga inọ mẹ rrọ ẹkwotọ nana ta usiuwoma.”

Fabian nọ ọ rrọ ọkobaro oke-kpobi gbe odibo oruiruo enẹna ọ ta nọ, ọyomariẹ avọ Isabel a fi obọ họ kẹ izoge esa jọ nọ i kru ga tere he evaọ ukoko okpokpọ nọ a kwa nya na. Enẹna Izoge esa na a be daoma ziezi evaọ usiuwoma ota. Imava evaọ usu rai a họ-ame no, yọ evaọ amara ọ March 2012 a ru iruo ọkobaro obufihọ. Ọjọ evaọ usu izoge nana o yere Fabian avọ Isabel fiki obọ nọ a fihọ kẹe “kruga evaọ ukoko na.” Fabian ọ ta nọ: “Uyere na u duobọte omẹ udu gaga. O rẹ kẹ evawere gaga nọ ohwo o te fi obọ họ kẹ omọfa.” Isabel omariẹ ọ ta nọ: “Evaọ iruo usiuwoma ota nana, mẹ ginẹ ‘jawo, jẹ ruẹ nọ ỌNOWO o woma.’” (Ol. 34:8) Ọ ta re nọ: “U te no ere no, iruo usiuwoma ota evaọ ẹkwotọ nana o be were omẹ oma.”

Enẹna Marelius avọ Kesia a ru uzuazọ rai lọhọ no, yọ a be were eva vi epaọ anwẹdẹ. Iwhowho-uvie nọ e rrọ ukoko Alta nọ a kwa nya na i bu te udhuvẹ gb’ọvo no. Marelius ọ ta nọ: “O be kẹ omai omosasọ nọ ma te rri kpemu jẹ ruẹ inwene nọ ma ru no evaọ uzuazọ. Ma yere Jihova inọ ma rrọ iruo ọkobaro evaọ obonẹ. Oware nọ u woma vi onana o rrọ họ.” Aye riẹ nọ a re se Kesia o fibae inọ: “Me wuhrẹ epanọ ohwo o re fi eva riẹ kpobi họ Jihova, yọ ọ be ginẹ rẹrote omai ziezi. Fikinọ mẹ avọ imoni mẹ ma be rria thabọ no ohwohwo, me rri omoke kpobi nọ mẹ be rọ jọ kugbe ai ghaghae. Mẹ be vioja riẹ vievie he inọ ma kwa ziọ obonẹ kẹ iruo usiuwoma ota na.”

Kọ ẹvẹ o rrọ kẹ Knut avọ Lisbeth evaọ obọ Uganda? Knut ọ ta nọ: “O rehọ oke ziezi re ẹkwotọ ọkpokpọ mai na gbe uruemu ahwo na e tẹ reria omai oma. Ẹsibuobu ma rẹ ruẹ ame he, wo ikpẹ hẹ, yọ ma re wo ẹbẹbẹ eva nọ e rẹ da omai ẹsejọ, rekọ ma be hai ru iwuhrẹ Ebaibol kugbe ahwo buobu.” Lisbeth ọ ta nọ: “Ekwotọ jọ e kẹle oria nọ ma rrọ na nọ usiuwoma ota na u ri te ẹdẹvo ho. Rekọ oke kpobi nọ ma te obei, ma rẹ ruẹ ahwo nọ a bi se Ebaibol na yọ a rẹ lẹ omai inọ ma wuhrẹ ai. O jọ oware omawere k’omai gaga nọ ma je wuhrẹ ahwo nana nọ a wo omaurokpotọ na Ebaibol.”

Dai roro epanọ eva e rẹ were Osu mai Jesu Kristi te nọ o te rri no obọ odhiwu ze jẹ ruẹ oghẹrẹ nọ a be rọ wha iruo usiuwoma ota nọ o muhọ na te eria sa-sa akpọ na. Evaọ uzẹme, o rrọ oware oghọghọ kẹ omai idibo Ọghẹnẹ kpobi re ma rọ unevaze koko ujaje Jesu nọ ọ ta nọ ma “wuhrẹ ahwo erẹwho kpobi.”—Mat. 28:19, 20.