Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Uwou-Eroro Na—Uvitha Uwuhrẹ  |  Azeza 2016

Whọ Kuvẹ re Ethobọ Amọfa I Ru Owhẹ Zoruẹ Hẹ

Whọ Kuvẹ re Ethobọ Amọfa I Ru Owhẹ Zoruẹ Hẹ

“Wha gbẹ . . . rọvrẹ ohwohwo no eva ze.”—KỌL. 3:13.

ILE: 121, 75

1, 2. Ẹvẹ Ebaibol na o ro dhesẹ ẹvi nọ ọ te romavia evaọ ukoko Jihova?

UKOKO Jihova nọ idibo riẹ a rrọ evaọ otọakpọ nẹnẹ o rrọ oghẹrẹsa. Ginọ uzẹme inọ ahwo nọ a gba ha nọ eware e rẹ thọ obọ i ru ukoko nana via. Ghele na, Jihova ọ be rọ ẹzi riẹ wọ ukoko akpọ-soso riẹ na nọ u bi ro wo ẹvi jẹ rro haro. Roro kpahe umutho jọ evaọ usu eware igbunu nọ Jihova ọ be rọ idibo riẹ nọ e rehọ unevaze fialoma via ru, dede nọ a gba ha.

2 Okenọ edẹ urere akpọ omuomu nana i muhọ evaọ ukpe 1914, idibo Ọghẹnẹ nọ e jọ otọakpọ na i tulo ho. Rekọ Jihova ọ ghale iruo usiuwoma ota rai. Ikpe jọ nọ i lele i rie, ima ahwo buobu a te ti wuhrẹ uzẹme na je zihe ruọ Isẹri Jihova. Jihova o dhesẹ nọ ẹvi ologbo nana ọ te romavia nọ ọ ta nọ: “Enọ i kpotọ i re ti zihe ruọ okpẹwho, enọ e mae kao kpobi a re ti zihe ruọ orẹwho ulogbo. Mẹ họ ỌNOWO na; me re ti ru ei vẹrẹ nọ u te ezi riẹ.” (Aiz. 60:22) Eruẹaruẹ yena i gine rugba no evaọ edẹ urere nana. Onana u ru nọ idibo Jihova nọ e rrọ otọakpọ nẹnẹ i ro bu vi unu ahwo nọ a rrọ erẹwho buobu.

3. Ẹvẹ idibo Ọghẹnẹ a ro dhesẹ uyoyou no?

 3 Evaọ oke nana, Jihova o fiobọhọ kẹ idibo riẹ wo uyoyou no re, onọ o rrọ uruemu-aghae riẹ nọ o mae rro. (1 Jọn 4:8) Jesu nọ ọ rọ aro kele Ọghẹnẹ dhesẹ uyoyou, ọ ta kẹ ilele riẹ nọ: “Mẹ be kẹ owhai ujaje okpokpọ inọ wha you ohwohwo . . . Onana ahwo kpobi a te rọ riẹ nọ whai yọ ilele mẹ, nọ wha te wo uyoyou evaọ udevie rai.” (Jọn 13:34, 35) U gine fo gaga inọ ilele Jesu a dhesẹ uyoyou, maero kọ evaọ ikpe jọ kẹle na nọ a rọ jọ akpọ na fi ẹmo sa-sa nọ a jọ kpe ahwo buobu na. Wọhọ oriruo ahwo nọ a bu te oware wọhọ ima udhuvẹ gbe ikpegbisoi (55,000,000) a whu evaọ Ẹmo Akpọ Avivẹ ọvo. Rekọ Isẹri Jihova a wobọ evaọ ikpakpe nana ha. (Se Maeka 4:1, 3.) Fikiere, ‘azẹ ohwo ọvo ọ jarai uzou hu.’—Iruẹru 20:26.

4. Fikieme ẹnyaharo idibo Jihova u ro gbunu?

4 Akpọ nana nọ ozighi gbe emuemu ọ dafia, nọ Ebaibol ọ jọ se Setan “ọghẹnẹ uyero-akpọ nana,” idibo Ọghẹnẹ a be jọ wo ẹnyaharo ghele na. (2 Kọr. 4:4) Setan ọ be kpọ egọmeti gbe ikoko iyẹrẹ-enẹ akpọ na. Rekọ ọ rẹ sae whaha iruo usiuwoma ota na ha. Dede na, fikinọ Setan ọ riẹ nọ oke nọ u kiọkọ kẹe u gbe tulo ho, ọ be daoma re o ru ahwo kie no egagọ uzẹme, yọ ọ be rọ idhere sa-sa ru onana.—Evia. 12:12.

ODAWỌ NỌ O RẸ SAI WHREHE USU MAI KUGBE ỌGHẸNẸ

5. Fikieme amọfa a sai ro ru eware nọ e rẹ dha omai eva ẹsejọ? (Rri uwoho nọ o rrọ emuhọ uzoẹme na.)

5 Ukoko na o be hae jọ omai riẹ inọ u wuzou gaga re ma wo uyoyou kẹ Ọghẹnẹ gbe ahwo-akpọ. Jesu ọ ta nọ enẹ o te ginẹ jọ. Okenọ ohwo jọ ọ nọe kpahe uzi nọ o mae rro, ọ ta nọ: “‘Whọ rẹ rehọ udu ra kpobi gbe uzuazọ ra kpobi gbe iroro ra kpobi ro you Jihova Ọghẹnẹ ra hrọ.’ Onana họ ujaje nọ o mae rro gbe orọ ọsosuọ. Orọ avọ ivẹ, nọ o wọhọ e riẹ ona: ‘Who re you ọrivẹ ra wọhọ omobọ ra hrọ.’” (Mat. 22:35-39) Dede na, Ebaibol na o ru rie vẹ inọ a yẹ omai avọ uzioraha fiki sebaẹgba Adamu. (Se Ahwo Rom 5:12, 19.) Fikiere, ẹsejọ inievo jọ evaọ ukoko na a sae ta hayo ru oware nọ o rẹ kẹ omai uye. Onana o sai kpomahọ uyoyou nọ ma wo kẹ Jihova gbe idibo riẹ. Eme ma ti ru evaọ oke utiona? Makọ idibo Ọghẹnẹ nọ i wo ẹrọwọ evaọ oke anwae a ta hayo ru eware nọ e kẹ amọfa uye, yọ ma rẹ sae jọ Ebaibol na wuhrẹ no ikuigbe rai ze.

O hae jọnọ whọ jariẹ evaọ oke Ilai gbe emezae riẹ, eme whọ hai ti ru? (Rri edhe-ẹme avọ 6)

6. Oghẹrẹ vẹ Ilai ọ rọ whọku emọ riẹ hẹ?

6 Wọhọ oriruo, emezae ivẹ Ilai Ozerẹ Okpehru na a je koko izi Jihova ha. Ebaibol na ọ ta kpahe ae nọ: “A fioka ahwo ho; a rẹ dhozọ ỌNOWO na ha.” (1 Sam. 2:12) Dede nọ Ilai ọsẹ rai ọ jọ ọkwa ologbo nọ u wobọ kugbe ẹnyaharo egaga uzẹme, emezae ivẹ riẹ na a jẹ thọ izi ilogbo. Ilai ọ riẹ kpahe oware nọ emezae riẹ na a je ru, rekọ o te je rolo obọ kẹ emọ na. Onana u ru nọ Ọghẹnẹ ọ rọ kẹ uviuwou Ilai soso uye. (1 Sam. 3:10-14) Oke u ti te nọ ahwo uyẹ Ilai a te gbẹ rọ jọ izerẹ hẹ. O hae jọnọ whọ jariẹ evaọ oke Ilai, eme whọ hai ti ru kpahe orivo nọ Ilai o dhesẹ kẹ izi ilogbo nọ emọ riẹ e jẹ thọ na? Kọ whọ hae te kuvẹ re onana u ru owhẹ zoruẹ te epanọ whọ rẹ rọ siọ Ọghẹnẹ ba ẹgọ?

7. Uzi ulogbo vẹ Devidi ọ thọ, kọ eme Ọghẹnẹ o ru kpahe iẹe?

7 Jihova o you Devidi gaga, yọ ọ ta nọ Devidi o “kiehọ udu” riẹ. (1 Sam. 13: 13, 14; Iruẹru 13:22) Rekọ uwhremu na, Devidi o te lele Batshẹba wezẹ, kẹsena o te dihọ. Onana o via evaọ okenọ Uraya ọzae riẹ ọ jọ obọ ẹmo. Nọ Uraya o kpozi evaọ omoke jọ, Devidi ọ tẹ jẹ gwọlọ ru ei re o lele Batshẹba aye riẹ wezẹ re o ruẹse jọnọ Uraya ọ kẹ riẹ eva. Rekọ Uraya o ru oware nọ Devidi ọ ta na ha, fikiere Devidi ọ tẹ ma omaa re a kpe Uraya no evaọ obọ ẹmo. Oware nọ Devidi o ru na o wha okpẹtu sei avọ uviuwou riẹ. (2 Sam. 12:9-12) Ghele na, Ọghẹnẹ ọ reohrọ Devidi, ọnọ a rẹ sae ginẹ ta nọ ọ “rehọ eva ezi” gọ Jihova evaọ edẹ uzuazọ riẹ kpobi na. (1 Iv. 9:4) O hae jọnọ whọ jọ usu idibo Ọghẹnẹ nọ e jariẹ oke yena, eme whọ hai ti ru? Kọ oware uyoma nọ Devidi o ru na o hai ti ru owhẹ zoruẹ?

8. (a) Oghẹrẹ vẹ Pita o ro ru ẹme riẹ gba ha? (b) Nọ Pita ọ maki ruthọ no, fikieme Jihova ọ rọ gbẹ rehọ iẹe ru iruo?

8 Oriruo ọfa họ, orọ Pita ukọ na. Jesu ọ salọ e riẹ re ọ jọ omọvo ikọ riẹ; ghele na u wo ẹsejọ nọ Pita ọ ta hayo ru eware jọ nọ ọ vioja rai. Wọhọ oriruo, ikọ Jesu a dhẹ siọ ẹe ba evaọ oke ẹbẹbẹ. Yọ taure oke yena u te ti te, Pita ọ ta nọ o tẹ make rọnọ ikọ nọ i kiọkọ a nyasiọ Jesu ba, ọyomariẹ ọ te jọ kugbei. (Mak 14:27-31, 50) Ghele na, nọ a je mu Jesu vrẹ, ikọ riẹ kpobi a dhẹ siọ ẹe ba, te Pita re. Pita ọ tubẹ vro Jesu vrẹ ẹsiẹvo. (Mak 14:53, 54, 66-72) Rekọ Pita o kurẹriẹ, yọ Jihova ọ gbẹ rehọ iẹe ru iruo buobu. O hae jọnọ whẹ yọ olele Jesu evaọ oke yena, kọ uruemu Pita na o hae te lẹliẹ owhẹ siọ Ọghẹnẹ ba ẹgọ?

9. Eme ọ kẹ owhẹ imuẹro nọ Jihova o re ru oware nọ u kiehọ ẹsikpobi?

9 Iriruo ahwo nọ ma ta kpahe no na yọ umutho jọ evaọ usu ahwo nọ a ru eware nọ e kẹ amọfa uye. Amọfa buobu a riẹ evaọ oke yena gbe oke mai na nọ a thọ izi ilogbo je ru eware nọ e kẹ amọfa uye dede nọ idibo Jihova a rrọ. Onọ na họ, eme who ti ru? Kọ whọ te  kuvẹ re ethobọ rai i ru owhẹ zoruẹ, nọ whọ rẹ rọ siọ Jihova ba ẹgọ je siomano idibo riẹ? Manikọ who ti vuhumu nọ Jihova ọ rẹ sae kẹ erahaizi omoke jọ re a sai kurẹriẹ jẹ kpọ eware vi evaọ edhere nọ o fo? Evaọ abọdekọ riẹ, ahwo jọ nọ a thọ izi ilogbo no, a rẹ rọwo kurẹriẹ hẹ re Jihova ọ rọ vrẹ ae. O tẹ via ere, kọ u ti mu owhẹ ẹro nọ Jihova o ti gu ahwo otiọye ẹdhọ kẹle, ẹsejọhọ je si ai no ukoko riẹ?

DAJI USU RA KUGBE ỌGHẸNẸ

10. Eme Jesu o vuhumu kpahe ethobọ Judas Iskariọt avọ Pita?

10 Ma rẹ jọ Ebaibol na ruẹ ikuigbe idibo Ọghẹnẹ buobu nọ a daji usu rai kugbe Jihova gbe idibo riẹ dede nọ amọfa a ru eware nọ e kẹ rai uye. Wọhọ oriruo, nọ Jesu ọ rehọ aso soso lẹ se Ọsẹ riẹ no, ọ tẹ salọ ikọ 12 na. Judas Iskariọt ọ jọ omọvo rai. Uwhremu na nọ Judas o vivie Jesu, Jesu ọ kuvẹ hẹ re onana o raha usu riẹ kugbe Jihova Ọsẹ riẹ; yọ okenọ Pita ọ vro riẹ ọ kuvẹ kẹ onana gbe he. (Luk 6:12-16; 22:2-6, 31, 32) Jesu ọ riẹ nọ orọnikọ Jihova hayo idibo riẹ a wha onana ze he. Jesu ọ ruabọhọ iruo riẹ dede nọ ilele riẹ jọ a ru eware jọ nọ e kẹ riẹ uye. Jihova ọ ghale Jesu ẹkwoma uwhu nọ ọ kpare riẹ no ze, onọ u ru nọ Jesu o ro zihe ruọ Ovie ọrọ Uvie obọ odhiwu.—Mat. 28:7, 18-20.

11. Eme Ebaibol na ọ ta kpahe idibo Jihova evaọ oke nana?

11 Jesu o fievahọ Jihova avọ idibo riẹ thọ họ, yọ ere o gbẹ rrọ nẹnẹ. Uzẹme na họ, ma te roro kpahe eware nọ Jihova ọ be rọ idibo riẹ ru evaọ edẹ urere nana, ma rẹ ruẹ nọ i gine gbunu gaga. Amọfa a riẹ hẹ nọ a be ta usiuwoma na evaọ akpọ na soso, keme Jihova ọ be kpọ ai hi wọhọ epanọ ọ be kpọ ukoko riẹ nẹnẹ. Obe Aizaya 65:14 u dhesẹ epanọ eware e te jọ kẹ idibo Ọghẹnẹ, inọ: “keme ri, idibo mẹ e rẹte so ile ghọghọ evaọ eva rai.”

12. Ẹvẹ u fo nọ ma re rri ethobọ amọfa?

12 Eva e be were idibo Jihova nẹnẹ fiki emamọ eware buobu nọ o bi fiobọhọ kẹ ai ru. Evaọ abọdekọ riẹ, akpọ Setan o bi bruenu keme eware i bi dhe ẹgẹga kẹ ae. Fikiere o rẹ jọ oware othọthọ hayo nọ o kare areghẹ nọ ma tẹ be fo Jihova hayo ukoko riẹ fiki ethobọ umutho idibo riẹ jọ. O gwọlọ nọ ma rẹ daji usu mai kugbe Jihova je ru lele ekpọvio riẹ, ma ve je wuhrẹ epanọ ma re rri ethobọ amọfa hayo ru kpahe ae.

OWARE NỌ MA RE RU KPAHE ETHOBỌ AMỌFA

13, 14. (a) Fikieme u ro fo nọ ma thihakọ kẹ ohwohwo? (b) Eyaa vẹ ma re roro kpahe?

13 Kọ eme ma re ru nọ odibo Ọghẹnẹ jọ ọ tẹ ta hayo ru oware jọ nọ o kẹ omai uye? Ebaibol na ọ kẹ omai emamọ ohrẹ jọ, inọ: “Whọ kaki mu ofu hu, keme ofu ọ rẹ ruọ igbama ohwo ogheghẹ.” (Ọtausi. 7:9) O gwọlọ nọ ma hae kareghẹhọ inọ anwọ oware wọhọ ikpe idu ezeza (6,000) e ruemu no na anwẹnọ ohwo-akpọ o ro no ẹgbagba nọ ọ jọ evaọ ọgbọ Idẹn. Ahwo nọ a gba ha a re ru eware thọ. Fikiere u ti woma ha re ma rẹro mi ibe Ileleikristi mai vrẹta jẹ kuvẹ re ethobọ rai i ru nọ ma gbẹ rọ jọ udevie idibo Ọghẹnẹ wo evawere he evaọ edẹ urere nana. O rẹ mai tube yoma nọ ma tẹ kuvẹ re ethobọ inievo mai i ru omai zoruẹ je kie no ukoko Jihova. Ma tẹ kuvẹ utioye, uvẹ-ọghọ nọ ma re ro ru oreva Jihova gbe ẹruore uzuazọ ebẹdẹ  bẹdẹ evaọ akpọ ọkpokpọ na o te va omai abọ.

14 Re ma gbẹ yọrọ evawere gbe ẹruore ọgaga nọ ma wo na, o gwọlọ nọ ma re roro kpahe eyaa Jihova nọ ọ ta nọ: “Ri, mẹ [be] ma idhiwu ekpokpọ gbe akpọ ọkpokpọ; a gbẹ te kareghẹhọ eware anwae he hayo a gbe ti roro ai hi.” (Aiz. 65:17; 2 Pita 3:13) Whọ kuvẹ vievie he re ethobọ amọfa i ru nọ who gbe ro wo eghale itiena ha.

15. Eme Jesu ọ ta nọ ma re ru nọ amọfa a te ru omai thọ?

15 Rekọ nọ ma ri te akpọ ọkpokpọ na ha na, ajọ ma hai roro kpahe oware nọ Ọghẹnẹ ọ gwọlọ nọ ma ru okenọ amọfa a tẹ ta hayo ru eware nọ i ru eva dha omai. Wọhọ oriruo, Jesu ọ ta nọ: “Wha tẹ rọ iruthọ amọfa rọvrẹ rae, Ọsẹ obọ odhiwu rai ọ te rọvrẹ owhai re; rekọ wha gbẹ rọ iruthọ amọfa rọvrẹ rae he, Ọsẹ rai ọ te rọ iruthọ rai rọvrẹ owhai hi.” Whọ sae jẹ kareghẹhọ inọ, okenọ Pita ọ nọ sọ ma sae rọ vrẹ “te isiahrẹ,” Jesu ọ kpahe kẹe nọ: “Mẹ be ta kẹ owhẹ nọ orọnikọ isiahrẹ hẹ, rekọ u re te isia udhosa gbe ikpegbihrẹ.” O rrọ vevẹ, oware nọ Jesu o wo họ iroro họ, ma hae rọvrẹ no eva ze ẹsikpobi. Ohrẹ nana u fo nọ o rẹ kake ziọ omai iroro nọ ohwo jọ o te ru omai thọ.—Mat. 6:14, 15; 18:21, 22.

16. Emamọ oriruo vẹ Josẹf o fihotọ?

16 Ohwo jọ nọ o fi emamọ oriruo hotọ evaọ ẹme nana họ Josẹf, ọnọ ọ jọ ọmọ ọsosuọ nọ Reshẹl o yẹ kẹ Jekọp. Esevo ikpe Josẹf a jẹ re iẹe ihri fikinọ ọsẹ riẹ o you rie gaga. Onana u ru nọ a rẹ zẹe kpohọ igbo. Nọ ikpe buobu e vrẹ no, iruo iwoma nọ Josẹf o ru evaọ Ijipti u te ru nọ a rọ rehọ iẹe mu ethabọ osu orẹwho na. Evaọ etoke nọ ohọo u je mu, inievo Josẹf a tẹ nyaze Ijipti te dẹ emu, rekọ a vuhu Josẹf ho. Josẹf ọ hae te sae rọ udu esuo riẹ ru inievo riẹ na kele fiki oware uyoma nọ a ru rie na. Rekọ o ru ere he, ukpoye ọ dawo inievo riẹ re ọ riẹ sọ a nwene no. Nọ ọ ruẹ nọ inievo riẹ a gine nwene no, Josẹf o te dhesẹ oma kẹ ae. Ọ ta kẹ ae uwhremu na nọ: “Wha dhozọ họ, mẹ rẹ te kẹ owhai avọ emọ rai oware nọ wha gwọlọ kpobi.” Oria ikere na u fibae nọ: “Ere ọ rọ wha ae udu, jẹ sasa ae oma.”—Emu. 50:21.

17. Eme who ti ru nọ amọfa a te ru owhẹ thọ?

17 O rrọ oware areghẹ re ma hae kareghẹhọ re inọ mai kpobi ma gba ha, yọ o sae jẹ jọ nọ ma bi ru amọfa eva dha re. Ma te muẹrohọ nọ ma ru ohwo jọ eva dha, Ebaibol na ọ hrẹ omai nọ ma nyabru ohwo nọ ma ru eva dha na re ma ruẹrẹhọ kugbei. (Se Matiu 5:23, 24.) O rẹ were omai nọ amọfa a gbe fi oware nọ ma ru rai thọ h’eva ha, fikiere u fo nọ ma hai ru epọvo na kẹ ai re. Obe Ahwo Kọlọsi 3:13 o tuduhọ omai awọ nọ: “Wha gbẹ hai thihakọ kẹ ohwohwo jẹ rọvrẹ ohwohwo no eva ze nọ ohwo ọ tẹ maki wo oware jọ nọ u re ru ei go kpahe omọfa. Wọhọ epanọ Jihova ọ rọvrẹ owhai riẹriẹriẹ na, wha re ru epọvo na re.” Obe 1 Ahwo Kọrint 13:5 o ta nọ uyoyou Ileleikristi “o rẹ gwọlọ ewoma obọriẹ hẹ.” Ma tẹ be hae rọvrẹ amọfa, Jihova ọ te rọvrẹ omai re. Uzẹme na họ, omọfa o te ru Oleleikristi thọ, u fo nọ Oleleikristi na ọ rẹ rọ aro kele Jihova, Ọsẹ mai nọ ọ vọ avọ ohrọ na evaọ oware nọ ọ be hai ru kpahe iruthọ mai.—Se Olezi 103:12-14.