Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Uwou-Eroro Na—Uvitha Uwuhrẹ  |  Azeza 2016

Uruemu-Ezi nọ O ghare Vi Edaemọno

Uruemu-Ezi nọ O ghare Vi Edaemọno

Notọ avọ otọ ze, ahwo a rri utho edaemọno ghaghae gaga. Ejọ i te enaera ima-odu buobu. Dede na, kọ o sae jọnọ u wo eware jọ nọ Ọghẹnẹ o rri ghare vi edaemọno gbe itho eghaghae efa?

 Ẹdẹjọ, Haykanush nọ ọ rrọ owhowho-uvie nọ ọ re te họ-ame he evaọ obọ Armenia, ọ ruẹ obe ohwo jọ nọ a sai ro kpohọ orẹwho ofa evaọ oria jọ kẹle uwou riẹ. Yọ ekade nọ a rẹ rọ rehọ ugho evaọ ebanke gbe ugho buobu e jọ evaọ obe na. Haykanush ọ tẹ vuẹ ọzae riẹ, ọnọ ọ rrọ owhowho-uvie nọ ọ re te họ-ame he re.

Eware e jọ gaga kẹ ọzae-avọ-aye na yọ a riesa; ghele na, a jiroro nọ a rẹ rọ ugho na kpohọ oria adrẹse nọ a kere fihọ obe na. Oware na u gbe ọzae nọ obe riẹ u vru na unu gaga, yọ ere u gbe ahwo uviuwou riẹ unu re. Kẹsena, Haykanush avọ ọzae riẹ a tẹ vuẹ ọzae na nọ eware nọ a be jọ Ebaibol wuhrẹ u ru nọ a rọ rehọ oware na ze. A ruẹ nọ u fo re ae omarai a dhesẹ uruemu oruọzewọ, kẹsena a tẹ rọ uvẹ na ta kẹ uviuwou na kpahe Isẹri Jihova jẹ kẹ ae ebe jọ.

Ahwo na a jẹ gwọlọ kẹ Haykanush ugho jọ fiki oware nọ o ru na, rekọ ọ rọwo ho. Okiokiọ riẹ, aye ọzae na ọ tẹ nyabru Haykanush avọ ọzae riẹ evaọ obọ uwou rai, je sikẹ nọ Haykanush ọ rẹ rehọ ẹmẹro edaemọno nọ a bi ro dhesẹ edẹro kẹ ae.

Wọhọ uviuwou yena, uruemu oruọzewọ nọ Haykanush avọ ọzae riẹ a dhesẹ na o rẹ sai gbe ahwo buobu unu. Kọ u ti gbe Jihova unu? Ẹvẹ o rri uruemu oruọzewọ rai na? Kọ a wo erere jọ nọ o ghare te uruemu oruọzewọ rai na?

IRUEMU EZI NỌ E GHARE VI EKWAKWA EFE

Iyo enọ yena e bẹ hẹ. Onana o rrọ ere keme idibo Ọghẹnẹ a riẹ nọ iruemu-aghae Jihova nọ a re dhesẹ o ghare kẹe vi edaemọno, igoru, hayo ekwakwa efa. Ẹhẹ, eriwo Jihova kpahe eware nọ e rrọ ghaghae gbe enọ e ghare he u wo ohẹriẹ no orọ ahwo-akpọ buobu. (Aiz. 55:8, 9) Idibo Ọghẹnẹ a tẹ be sae rọ aro kele iruemu-aghae Jihova ziezi yọ obọdẹ oware nọ o ghare thesiwa.

Ma rẹ sae ruẹ onana evaọ oware nọ Ebaibol na ọ ta kpahe orimuo gbe areghẹ. Obe Itẹ 3:13-15 o ta nọ: “Ohwo nọ o wo areghẹ ọ wereva gbe ohwo nọ o re ri oware muẹ. Keme erere nọ o re noi tha o re ti woma vi erere isiliva, gbe erere riẹ o veje woma vi oro. O ghare vi izuu, oware ovo nọ [whọ] sai kele dhe ei o rọ họ.” Ababọ avro, onana u dhesẹ nọ Jihova o rri iruemu itieye na ghare vi ekwakwa efe jọ kpobi.

Kọ ẹvẹ kpahe oruọzewọ?

Jihova omariẹ yọ ohwo oruọzewọ, “ọ rẹ sae ta ọrue he.” (Tait. 1:2) Yọ ọ rọ ẹzi ọfuafo riẹ kẹ Pọl ukọ na kere se Ileleikristi obọ Hibru evaọ ikpe-udhusoi ọsosuọ nọ: “Wha gbẹ hae lẹ roro omai, keme u mu omai ẹro nọ ma wo obroziẹ-iroro ọfuafo jẹ gwọlọ ru eware kpobi avọ oruọzewọ.”—Hib. 13:18.

Jesu o fi emamọ oriruo oruọzewọ hotọ kẹ omai. Wọhọ oriruo, roro kpahe okenọ Kayafas Ozerẹ Okpehru na ọ ta kẹe nọ: “Mẹ be ta kẹ owhẹ nọ whọ rehọ odẹ Ọghẹnẹ nọ ọ rrọ uzuazọ na duwu iyei re whọ ta kẹ omai sọ whẹ họ Kristi na, Ọmọ Ọghẹnẹ!” Jesu ọ ta uzẹme na inọ ọye họ Mesaya na, dede nọ ọ riẹ nọ uzẹme nana nọ ọ ta na o sai ru nọ ogbẹgwae Sanhẹdrin na a rẹ rọ ta nọ ọ ta ẹme aghọ je tube bruoziẹ uwhu kpei.—Mat. 26:63-67.

Kọ ẹvẹ kpahe omai? Kọ ma te ta uzẹme ẹme, otẹrọnọ ma tẹ ta ubro riẹ hayo gẹle ẹme na oghẹrẹ ofa u ti ru omai wo ugho hayo oware ofa jọ?

EWARE NỌ E RẸ SAI RU EI BẸBẸ RE A DHESẸ ORUỌZEWỌ

Uzẹme na họ, o rrọ bẹbẹ re ohwo o dhesẹ oruọzewọ evaọ edẹ urere nana nọ ahwo  buobu a jọ “you omobọrai [je] you ugho” na. (2 Tim. 3:2) Ẹbẹbẹ ugho gbe iruo nọ e riẹ hẹ u bi ru ei bẹbẹ re ahwo a dhesẹ oruọzewọ. Ahwo buobu a re roro nọ o thọ họ re a tho-uji, wha amọfa re, hayo fi oghẹrẹ iwhayo efa jọ. Uruemu nana o vọ oria kpobi te epanọ o rọ rrọ ahwo iroro inọ thakpinọ ohwo o wo erere, oruọzewọ u muẹme he. Makọ Ileleikristi jọ dede a rọ fiki “erere nọ a rẹ rọ ewhariọ wo” whrehe no evaọ ukoko na no.—1 Tim. 3:8; Tait. 1:7.

Dede na, Ileleikristi efa buobu a be rọ aro kele Jesu. A vuhumu nọ emamọ iruemu Oleleikristi nọ a re wo u wuzou vi oghẹrẹ efe hayo erere ọfa jọ kpobi. Fikiere, izoge Ileleikristi nọ e rrọ isukulu a re rri tho ho re a ruẹse riẹ kere ziezi jẹ kparobọ evaọ ẹdawọ. (Itẹ 20:23) Uzẹme, orọnikọ oke kpobi nọ ma dhesẹ uruemu oruọzewọ emamọ oware jọ u re te omai obọ họ wọhọ epanọ o via kẹ Haykanush na. Ghele na, Ọghẹnẹ o rri uruemu oruọzewọ ghaghae, yọ u re fiobọhọ kẹ omai wo obroziẹ-iroro ọfuafo, a rẹ ruẹ oware nọ u woma te onana ha.

Oriruo Gagik u dhesẹ onana vevẹ. Ọ ta nọ: “Taure me te ti kurẹriẹ, me je ru iruo kẹ ekọmpene ilogbo jọ. Erere kakao ọvo ohwo nọ o wo ekọmpene na ọ jẹ hae fodẹ kẹ egọmeti inọ ekọmpene na o bi wo re ọ ruẹse siọ osauzou ba ẹhwa. Fikinọ mẹ jẹ rẹrote ekọmpene na, o tẹ gwọlọ nọ mẹ rẹ hae jẹ udi kẹ ohwo nọ o re mi osauzou na re ọ ruẹse kpairoro vrẹ ewhariọ nọ ma je ru na. Onana u ru nọ mẹ rọ jọ ohwo iwhayo. Okenọ me wuhrẹ uzẹme na no, mẹ gbẹ jẹ rọwo ru uruemu yena ha, dede nọ a jẹ jọ iruo na hwa omẹ osa buobu. Ukpoye, me te rovie oria iruo obọmẹ. Yọ no umuo ẹdẹ nọ me ro rovie oria na, me te fi odẹ ekọmpene mẹ hotọ evaọ obọ egọmeti jẹ hwa osauzou mẹ kpobi.”—2 Kọr. 8:21.

Gagik ọ ta nọ: “Ugho nọ me je wo o rọ abọvo kpotọ vi epaọ anwẹdẹ, u ru nọ o rọ dina jọ bẹbẹ kẹ omẹ re mẹ rẹrote uviuwou mẹ. Rekọ obọnana eva e be mae were omẹ. Me wo obroziẹ-iroro ọfuafo evaọ aro Jihova. Me bi fi emamọ oriruo hotọ kẹ emezae ivẹ mẹ, yọ me wo ewha-iruo sa-sa no evaọ ukoko na. Otu nọ o re mi osa-uzou gbe amọfa nọ me bi lele ru iruo enẹna a riẹ omẹ wọhọ ohwo oruọzewọ.”

JIHOVA O RE FIOBỌHỌ KẸ OMAI

Jihova o you ahwo nọ a rẹ whẹ erru họ uwuhrẹ riẹ ẹkwoma iruemu-aghae riẹ nọ a re dhesẹ, enọ i kugbe oruọzewọ. (Tait. 2:10) Ọ rọ ẹzi ọfuafo riẹ kẹ Devidi ovie na, ọnọ ọ ta nọ: “Mẹ jọ ọmaha, enẹna mẹ who uno; dede na mẹ te ruẹ okiẹrẹe nọ a se he, hayo kọ emọ riẹ e jẹ yare re a tẹ re he.”—Ol. 37:25.

Oriruo Rut nọ o wo ẹrọwọ ọgaga na u dhesẹ onana. Ọ talamu Naomi oniọrọo riẹ, ọ rọwo nyasiọ iẹe ba ha makọ evaọ okenọ ọ who no. Rut o lele i rie kpobọ Izrẹl nọ ọ rẹ sae jọ gọ Ọghẹnẹ uzẹme na. (Rut 1:16, 17) Nọ Rut o te Izrẹl, o dhesẹ uruemu oruọzewọ ọ tẹ jẹ jọ ọgba iruo, o si isogẹ wọhọ epanọ Uzi na o ta. Wọhọ epanọ o via kẹ Devidi ikpe buobu nọ i lele i rie na, Jihova ọ kuvẹ re ohọo u kpe Rut avọ Naomi hi. (Rut 2:2-18) Yọ orọnikọ ẹko ọvo Jihova ọ ko Rut hu. Ọ salọ Rut re ọ jọ oni-ode Devidi ovie na gbe Mesaya nọ a ya eyaa riẹ na dede.—Rut 4:13-17; Mat. 1:5, 16.

O rẹ sae jọ bẹbẹ kẹ idibo Jihova jọ re a ruẹ ugho nọ u re te ai rẹrote omarai. Ukpenọ a rẹ rọ edhere ewhariọ wo ugho ababọ  ẹroyẹ, a re kru obọ ga je ru iruo ziezi. A vẹ rọ enẹ dhesẹ nọ obọdẹ iruemu-aghae Ọghẹnẹ, nọ i kugbe oruọzewọ o ghare rai obọ vi oware ofa kpobi nọ ugho o rẹ sae kẹ ae.—Itẹ 12:24; Ẹf. 4:28.

Wọhọ Rut oke anwae, Ileleikristi wariẹ akpọ na soso họ a fi ẹrọwọ họ Jihova inọ o wo ogaga nọ ọ sai ro fiobọhọ kẹ ae. A fi eva rai kpobi họ Ọnọ ọ ya eyaa nana nọ e rrọ Ebaibol na inọ: “Mẹ te nyasiọ owhẹ ba vievie he, yọ me ti gbabọkẹ owhẹ vievie he.” (Hib. 13:5) Jihova o dhesẹ via unuẹse buobu no inọ ọ rẹ sai fiobọhọ kẹ ahwo nọ eware e ga kẹ rekinọ a bi dhesẹ oruọzewọ ẹsikpobi, yọ o ti gine ru ere. O bi ru eyaa riẹ gba kpahe ẹgwọlọ idibo riẹ kẹdẹ kẹdẹ.—Mat. 6:33.

Ẹhẹ, ahwo-akpọ a sai rri edaemọno gbe itho eghaghae efa ghaghae gaga. Rekọ ma wo imuẹro inọ, Ọsẹ obọ odhiwu mai na o rri oruọzewọ gbe emamọ iruemu efa nọ ma re dhesẹ ghare vi itho eghaghae kpobi.

Uruemu oruọzewọ u re fiobọhọ kẹ omai wo obroziẹ-iroro ọfuafo gbe ufuoma nọ ma rẹ rọ ta ẹme ziezi evaọ usiuwoma ota