FIKIEME u ro mu owhẹ ẹro nọ Jihova ọ be ginẹ daezọ ra? Ẹjiroro jọ họ, Ebaibol na ọ ta ere. Obe 1 Pita 5:7 o ta nọ: “Wha gbolo awaọruọ rai kpobi kẹe, keme ọ be daezọ rai.” Eme ọ kẹ owhẹ imuẹro inọ Jihova Ọghẹnẹ o wo isiuru kpahe owhẹ?

ỌGHẸNẸ Ọ BE KO AHWO-AKPỌ

Jihova o fi oriruo na hotọ evaọ uwowou gbe ọghoruo

Oware jọ họ, Ọghẹnẹ o wo emamọ iruemu nọ whọ rẹ gwọlọ nọ uvi egbẹnyusu ra a wo na. Ahwo nọ a rẹ jọ wowou kugbe ohwohwo je ru ohwohwo ọghọ ẹsikpobi a rẹ jọ egbẹnyusu ekpekpe. Wọhọ epanọ ma rẹ sae ruẹ ẹsikpobi na, Jihova ọ rrọ wowou je bi ru ahwo-akpọ ọghọ kẹdẹ kẹdẹ. Roro kpahe oriruo jọ: “O bi ru ọre riẹ va ze kẹ ahwo oyoma gbe ahwo owoma, je bi ru oso rrọ kẹ ahwo okiẹrẹe gbe enọ i kiẹrẹe he.” (Mat. 5:45) Eme ọre gbe oso i re ru kẹ omai? Oware jọ họ, Ọghẹnẹ ọ rẹ rọ ẹkwoma rai ‘kẹ ahwo-akpọ emuore buobu jẹ rọ oghọghọ vọ udu rai.’ (Iruẹru 14:17) Ẹhẹ, Jihova ọ ma otọakpọ na evaọ oghẹrẹ nọ ma rẹ rọ jariẹ wo emu buobu. Yọ ma riẹ nọ emamọ emu yọ oware jọ nọ o rẹ kẹ omai evawere gaga.

Nọ o rrọ ere na, kọ fikieme ohọo u bi ro kpe ahwo buobu? Keme isu ahwo-akpọ a be tẹrovi epanọ a re gbe ro wo ọkwa okpehru ọfa gbe igho buobu viukpenọ a rẹ tẹrovi epanọ uzuazọ ahwo nọ a rrọ otọ rai u re ro woma. Kẹle na, Jihova ọ te rehọ Uvie obọ odhiwu nọ Ọmọ riẹ ọ rrọ Ovie riẹ nwene egọmeti ahwo-akpọ, ọ vẹ te rọ ere ku ẹbẹbẹ oriobọ na họ. Oke yena, ohọo u gbe ti kpe uvumọ ohwo ho. Rekọ taure oke yena u te ti te, Ọghẹnẹ ọ be rẹrote idibo riẹ. (Ol. 37:25) Kọ onana u gbe dhesẹ nọ Jihova ọ be daezọ mai?

 JIHOVA Ọ BE RỌ OKE RIẸ GBOKE HE

Jihova o fi oriruo na hotọ evaọ oke riẹ nọ ọ rẹ rọ gbogbọ họ

Emamọ ogbẹnyusu ra ọ rẹ raha oke kugbe owhẹ. Ọ sae rọ euwa buobu lele owhẹ ta ẹme kpahe oware nọ o rẹ were owhai imava. Yọ emamọ ogbẹnyusu ọ rẹ romatotọ gaviezọ nọ whọ tẹ be vuẹe ẹbẹbẹ ra gbe eware nọ e be kẹ owhẹ uye. Kọ Jihova ọ rẹ gaviezọ ere re? Ee. Ọ rẹ gaviezọ kẹ elẹ mai. Oyejabọ nọ Ebaibol na ọ rọ tuduhọ omai awọ nọ ma “ruabọhọ olẹ” jẹ hae tubẹ “lẹ kẹse kẹse.”—Rom 12:12; 1 Tẹs. 5:17.

Ẹvẹ Jihova ọ rẹ raha oke te rọ gaviezọ nọ whọ tẹ be lẹ sei? Oriruo olẹ jọ nọ a ta ẹme te evaọ Ebaibol na o kẹ omai uyo na. Taure Jesu ọ tẹ te salọ ikọ riẹ, “ọ . . . rọ aso na soso lẹ se Ọghẹnẹ.” (Luk 6:12) Evaọ olẹ yena, o sae jọnọ Jesu ọ fodẹ edẹ ilele riẹ buobu unọjọ utọjọ, ta kpahe emamọ iruemu rai gbe abọ nọ a jọ ga tere he, jẹ yare Ọsẹ riẹ re o fiobọhọ kẹe salọ ae. Nọ ọre ọ va ze no okiokiọ riẹ, Jesu ọ riẹ nọ ọ jọ usu ilele riẹ salọ ahwo nọ a gine te ziezi re a jọ ikọ riẹ. O rẹ were Jihova, “ọnọ o re yo elẹ” na re ọ gaviezọ kẹ elẹ kpobi nọ ma be rọ eva efuafo lẹ sei. (Ol. 65:2) Ohwo ọ tẹ make be rehọ euwa buobu ta oware nọ o be kẹe uye gaga evaọ olẹ, Jihova o re rri oke kẹe he.

ỌGHẸNẸ Ọ RẸ RỌVRẸ

Jihova o fi oriruo na hotọ evaọ ẹrọvrẹ nọ ọ rẹ rọvrẹ omai

Re a rọvrẹ omọfa o rẹ jọ bẹbẹ ẹsejọ, makọ rọkẹ egbẹnyusu ekpekpe dede. Usu imava nọ u tube kri no dede o rẹ sae fa nọ imava na a gbẹ rọvrẹ ohwohwo ho. Rekọ Jihova ọ rrọ ere. Ebaibol na ọ ta nọ Jihova o zizie ahwo nọ a wo evezi kpobi inọ a yare iẹe kẹ erọvrẹ, keme “ọ rẹ te rehọ vrẹ” ae. (Aiz. 55:6, 7) Eme ọ rẹ wọ Ọghẹnẹ rọvrẹ omai tere?

Oware na họ, uyoyou Ọghẹnẹ nọ u wo ibe he. O you akpọ na te epanọ o ro siobọno Ọmọ ọvo riẹ, Jesu, re ahwo-akpọ a sai no igbo uzioraha gbe uwhu. (Jọn 3:16) U tube wo eware efa nọ ẹtanigbo na o re ru lọhọ kẹ omai. Ẹkwoma idhe ẹtanigbo Jesu Kristi na, Ọghẹnẹ ọ rẹ rọvrẹ enọ o you, riẹriẹriẹ. Jọn ukọ na o kere nọ: “Ọghẹnẹ o re ru ẹme riẹ  gba o te je kiẹrẹe, fikiere nọ ma tẹ feva izieraha mai, ọ te rọ izieraha mai rọvrẹ omai.” (1 Jọn 1:9) Fikinọ Jihova o wo erọvrẹ, ahwo-akpọ a rẹ sae jọ usu kugbei ribri, yọ onana u duobọte omai udu gaga.

O RE FIOBỌHỌ KẸ OWHẸ NỌ WHỌ TẸ GWỌLỌ OBUFIHỌ RIẸ

Jihova o fi oriruo na hotọ evaọ obufihọ nọ ọ rẹ kẹ omai nọ ma te wo ẹbẹbẹ

Uvi ogbẹnyusu ọ rẹ dhogbo bru egbẹnyusu riẹ nọ a tẹ gwọlọ obufihọ riẹ. Kọ Jihova o re ru epọvo na re? Ebaibol na ọ ta nọ: Nọ odibo Ọghẹnẹ “ọ tẹ [maki] kie dede, a te nwane vu ei wa nọ o kie kpare ohọe he, keme ỌNOWO o ti kru ei dikihẹ.” (Ol. 37:24) Jihova o re ‘kru idibo riẹ dikihẹ’ evaọ idhere sa-sa. Joma ta kpahe oware jọ nọ o via evaọ ukoliko Caribbean jọ, obọ St. Croix.

Evaọ ukoliko na, ibe emọ-eklase ọmaha jọ nọ ọ rrọ ọmọtẹ a jẹ hae poviẹe fikinọ orọwọ riẹ u ru nọ o gbe bi ro yere obiala ha. Nọ ọmọ na ọ lẹ se Jihova kẹ obufihọ no, ọ tẹ jiroro nọ ọ rẹ vuẹ emọ eklase riẹ oware nọ o gbe bi ro ru ere he. Nọ iticha riẹ ọ kẹe ẹme inọ o ru evaọ eklase, ọ tẹ salọ nọ ọ rẹ ta kpahe obiala nọ a re yere. Ọ tẹ rọ obe na, Obe Ikuigbe Ebaibol Mẹ ta kẹ eklase na kpahe epanọ iku Shedrak, Mishak, gbe Abẹdnigo i ro fiobọhọ kẹe gbaemu inọ o re yere obiala na ha. Ọmọ na ọ ta nọ, “Jihova ọ thọ ahwo Hibru esa yena fikinọ a rọwo nọ a rẹ gọ ẹmema ha.” Kẹsena o te dhesẹ obe na kẹ emọ nọ e jọ eklase ẹdẹ yena. Ikpegbọvo evaọ usu emọ-eklase riẹ na a tẹ ta nọ a gwọlọ obe na. O kẹ ọmọ na evawere gaga nọ ọ ruẹ vuhumu nọ Jihova ọ kẹ riẹ udu gbe areghẹ nọ o ro se isẹri kpahe ẹme obiala nọ o rẹ sae wha ẹbẹbẹ ze.

Whọ tẹ be jọ udu ra roro nọ o wọhọ nọ Jihova ọ be daezọ ra ha, iviena roro didi kpahe eria Ebaibol wọhọ Olezi 34:17-19; 55:22; gbe 145:18, 19. Nọ mi Isẹri Jihova nọ i kri ukoko na no kpahe epanọ Jihova o ro fiobọhọ kẹ ai no, nọ u dhesẹ nọ ọ be ginẹ daezọ rai. Nọ whọ tẹ gwọlọ obufihọ Ọghẹnẹ evaọ oware jọ, lẹ sei kpahe ẹme na. Whọ te ruẹ epanọ Jihova ọ be rọ “daezọ” ra.