Kpohọ eme nọ e riẹ eva

Kpohọ oria eware nọ e riẹe eva

Kọ Whọ Riẹ?

Kọ Whọ Riẹ?

Fikieme u ro woma gaga inọ Jihova ọ kuvẹ re a rọ irueruẹ hayo ilekuku dhe idhe?

UZI Mosis na o ta nọ ohwo ọ sae rọ ilekuku hayo irueruẹ dhe idhe kẹ Jihova. Evaọ izi nọ a jie kpahe idhe, a rẹ fodẹ ọjọ siọ ọjọ ba ha evaọ usu evra ivẹ nana. Yọ ọnọ ohwo o ro dhe idhe kpobi a rẹ rehọ. (Izerẹ 1:14; 12:8; 14:30) Fikieme onana u ro woma gaga? Keme ẹsikpobi a jẹ hae ruẹ irueruẹ hẹ. Fikieme o rọ jọ ere?

Erueruẹ

Irueruẹ e rẹ jọ Izrẹl evaọ ezi ivo. Evaọ amara Akpe, e vẹ fa kpohọ erẹwho efa nọ ẹrrorro ọ rrọ ziezi. Rekọ nọ ivo e tẹ wariẹ muhọ ẹrro no, i ve zihe ziọ ẹkwotọ Izrẹl. (Ole. 2:11, 12; Jeri. 8:7) Fikiere evaọ ezi ekpahe, o jẹ hae jọ bẹbẹ re ohwo Izrẹl ọ ruẹ erueruẹ nọ o re ro dhe idhe.

Olekuku

Rekọ ilekuku e rẹ fa no oria ruọ oria ha. Fikiere a jẹ hae jọ Izrẹl ruẹ e rai evaọ ukpe na soso. Ere ọvo ho, a jẹ hae jọ Izrẹl thuru ilekuku. (Je rri Jọn 2:14, 16.) Obe na Bible Plants and Animals o ta nọ: “A jẹ hae jọ iwhre gbe ewho kpobi nọ e jọ unuakpọ obọ Izrẹl na thuru ilekuku. Ohwo kpobi nọ o wo uwou ọ jẹ hae bọ oria fihọ iẹe nọ o re jo thuru ilekuku.”​—Je rri Aizaya 60:8.

Olekuku nọ ọ rrọ uwou riẹ

Uvẹ nọ Jihova ọ kẹ ahwo Izrẹl inọ a sae rehọ evra nọ a rẹ ruẹ ẹsikpobi dhe idhe na, u dhesẹ nọ o wo ororokẹ gbe inọ o you idibo riẹ gaga.