Kpohọ eme nọ e riẹ eva

Kpohọ oria eware nọ e riẹe eva

UZOẸME UWUHRẸ 32

Rọ Aro Kele Jihova, Who Si Eware Kekeke He

Rọ Aro Kele Jihova, Who Si Eware Kekeke He

“Wha ru re ahwo kpobi a ruẹ nọ wha wo iroro.”—FIL. 4:5.

OLE AVỌ 89 Gaviezọ, Yoẹme, re Who Wo Eghale

EWARE NỌ MA TI WUHRẸ a

Oghẹrẹ ure vẹ whọ gwọlọ jọ evaọ usu ivẹ na? (Rri edhe-ẹme 1)

1. Ẹvẹ mai Ileleikristi ma rọ wọhọ ure nọ ofou o bi fou? (Rri uwoho na re.)

 U WO ẹme jọ nọ a rẹ ta inọ “ure nọ o rẹ jẹlẹ rri ofẹ nọ ofou o bi fou rri o rẹ kaki nwo ho.” Ẹsejọ nọ ẹbẹbẹ ọ tẹ rrọ otọ, re ma sae gbẹ gọ Jihova, ma re nwene oghẹrẹ nọ ma bi ru eware. Ma te ru ere, koyehọ ma wọhọ ure nọ o be jẹlẹ rri ofẹ nọ ofou o bi fou rri. Yọ, oniọvo jọ o gbe rri oware jọ oghẹrẹ nọ who rri rie he, hayo o ru oware jọ oghẹrẹ nọ who re ru ei hi, jọ o kẹ owhẹ uye he.

2. Uruemu vẹ u fo nọ ma re wo nọ eware i te nwene, kọ eme ma te ta kpahe evaọ uzoẹme nana?

2 Mai idibo Jihova ma gwọlọ jọ ahwo nọ a re si eware kekeke he. Ma gwọlọ jọ ahwo nọ i wo omaurokpotọ gbe ohrọ-oriọ re. Ma te jọ uzoẹme nana ta kpahe epanọ uruemu nana nọ inievo jọ a wo u ro fiobọhọ kẹ ae nọ eware i nwene. Ma te jẹ ta kpahe epanọ o sai ro fiobọhọ kẹ omai re. Rekọ joma kake ta kpahe epanọ Jihova avọ Jesu a ro dhesẹ nọ a re si eware kekeke he, gbe epanọ ma sae rọ rehọ aro kele ai.

JIHOVA AVỌ JESU A RE SI EWARE KEKEKE HE

3. Eme u dhesẹ nọ Jihova o re si eware kekeke he?

3 Ebaibol ọ ta nọ Jihova họ “Utho na” keme ohwo ọvo ọ sai si ei no ọkwa riẹ hẹ, yọ oware ovo o rẹ whaha iẹe oware nọ ọ gwọlọ ru hu. (Izie. 32:4) O make rrọ ere na, o re si eware kekeke he. Jihova ọ jiroro oware nọ ọ gwọlọ ru no anwẹdẹ. Rekọ fikinọ ahwo-akpọ a yoẹme he, eware e gbẹ nya epanọ ọ gwọlọ họ. Ghele na ọ be rehọ oghẹrẹ ofa ru oware nọ ọ jiroro riẹ na. Jihova ọ ma omai evaọ uwoho riẹ. Oyena u dhesẹ nọ ma te wo ẹbẹbẹ, ma sai nwene oghẹrẹ nọ ma je ru eware. Ẹbẹbẹ kpobi nọ ma wo kẹhẹ, ehrẹ nọ Jihova ọ kẹ omai evaọ Ebaibol na e sai fiobọhọ kẹ omai jẹ emamọ iroro. Eware nọ Jihova o ru no gbe ehrẹ nọ ọ kẹ omai i dhesẹ nọ o re si eware kekeke he, dede nọ a se rie “Utho na.”

4. Kẹ oriruo jọ nọ u dhesẹ nọ Jihova o re si eware kekeke he. (Iruo-Izerẹ 5:7, 11)

4 Izi Jihova kpobi e rrọ gbagba, i re ru akpọ bẹ ohwo ọvo ho. Ere izi nọ o jie kẹ ahwo Izrẹl e jọ. Ọ ta kẹ ae nọ oghẹrẹ oware ovona ohwo kpobi o re ro dhe idhe he, te ọdafe te oyogbe. Nọ ọ jẹ vuẹ ae kpahe idhe jọ, ọ ta nọ obọ ohwo u gbe te eware nọ ọ ta nọ a ro dhe idhe na ha, ọ sae rọ oware ofa dhe idhe na.—Se Iruo-Izerẹ 5:7, 11.

5. Kẹ oriruo jọ nọ u dhesẹ nọ Jihova o wo omaurokpotọ gbe ohrọ-oriọ.

5 Omaurokpotọ gbe ohrọ-oriọ nọ Jihova o wo jabọ nọ o gbe bi ro si eware kekeke he na. Ẹvẹ ma rọ riẹ? Okenọ Jihova ọ jẹ gwọlọ nọ ọ rẹ raha ahwo Sodọm fiki umuomu rai, o te vi ikọ-odhiwu riẹ nyae ta kẹ Lọt nọ jọ ọ dhẹ kpohọ obonọ igbehru e rrọ na. Rekọ ozọ obei u je mu ei. Fikiere ọ tẹ lẹ Jihova nọ jọ ọ kẹe uvẹ re avọ uviuwou riẹ a dhẹ kpohọ ẹmẹwho jọ nọ a re se Zoa. Yọ Ọghẹnẹ ọ gwọlọ nọ ọ rẹ raha ẹwho yena kugbe. Kọ eme Jihova o ru? Kọ ọ ta nọ, ‘Oria nọ mẹ vuẹ owhẹ nọ whọ dhẹ kpohọ na whọ rẹ dhẹ kpohọ’? Ijo. Ọ kẹ Lọt uvẹ nọ jọ ọ dhẹ kpohọ Zoa. Ọ gbẹ raha Zoa ha. (Emu. 19:18-22) Nọ ikpe buobu e vrẹ no, Jihova o ru oware ofa nọ u dhesẹ nọ o wo ohrọ-oriọ. Ọ vuẹ Jona ọruẹaro riẹ re ọ nyae vuẹ ahwo Nanivi nọ ọ te raha ẹwho na je kpe ai kpobi no fiki eware iyoma nọ a bi ru. Rekọ ahwo Nanivi a te kurẹriẹ. Kọ eme Jihova o ru? Ohrọ rai o re riẹ. Ọ gbẹ raha ẹwho na ha.—Jona 3:1, 10; 4:10, 11.

6. Kẹ oriruo jọ nọ u dhesẹ nọ Jesu ọ jẹ rọ aro kele Jihova nọ o re si eware kekeke he na.

6 Jesu ọ rọ aro kele Jihova, o je si eware kekeke he. Jihova o vi rie ze re ọ ta usi uwoma kẹ “igodẹ uwou Izrẹl nọ i vru.” Rekọ orọnọ ahwo Izrẹl ọvo o fiobọhọ kẹ hẹ. Ẹdẹ jọ nọ aye jọ nọ ọ rrọ ohwo Izrẹl he ọ lẹe nọ jọ o siwi ọmọtẹ riẹ nọ “idhivẹri . . . e rrọ” oma, ohrọ aye na o re riẹ, o te siwi ọmọ na. (Mat. 15:21-28) U te no oyena no, okejọ Jesu ọ ta nọ: “Ohwo kpobi nọ ọ se omẹ evaọ aro ahwo, mẹ te se iẹe.” (Mat. 10:33) Rekọ nọ Pita ọ vro riẹ isiasa, ọ se riẹ? Ijo. Jesu ọ riẹ nọ Pita o fi ẹrọwọ họ iẹe, o te je kurẹriẹ. Nọ a kpare Jesu no uki ze no, ọ tẹ romavia kẹ Pita. Yọ ẹsejọhọ ọ te vuẹe nọ ọ rọvrẹ riẹ no, yọ o you rie.—Luk 24:33, 34.

7. Ẹvẹ ma sai ro dhesẹ nọ ma bi ru oware nọ obe Ahwo Filipai 4:5 o ta na?

7 Eware nọ ma ta kpahe no na i dhesẹ nọ Jihova avọ Jesu a re si eware kekeke he. Kọ omai? Jihova ọ gwọlọ nọ ma rọ aro kele iei. (Se Ahwo Filipai 4:5, je rri ẹme-obotọ.) A jọ Ebaibol jọ fa ẹme nọ ọ rrọ obe Ahwo Filipai 4:5 na nọ: “Jọ ahwo kpobi a riẹ nọ whẹ yọ ohwo nọ o re si eware kekeke he.” U fo re ma nọ omamai nọ: ‘Kọ ahwo a rri omẹ inọ mẹ yọ ohwo nọ o re si eware kekeke he? Binikọ a rri omẹ nọ mẹ yọ ohwo nọ ọ rẹ rehọ ẹme ohwo ho? Kọ me re si ikẹ inọ ahwo a ru eware jọ oghẹrẹ nọ me roro nọ u fo nọ a re ru ai? Mẹ be hai roro kpahe ẹme nọ amọfa a ta ze, jẹ rehọ iẹe otẹrọnọ o te raha oware ovo ho?’ Ma gbe bi si eware kekeke he, yọ ma be rọ aro kele Jihova gbe Jesu. Obọnana joma ta kpahe epanọ ma gbe ro si eware kekeke he, nọ eware i te nwene, hayo nọ inievo jọ a gbe ru oware jọ oghẹrẹ nọ ma re ru ei hi, hayo a rri oware jọ oghẹrẹ nọ ma rri rie he.

NỌ EWARE I TE NWENE

8. Eme o re fiobọhọ kẹ omai nọ eware i te nwene? (Je rri ẹme-obotọ na re.)

8 Nọ ma gbe bi si eware kekeke he, u re fiobọhọ kẹ omai nọ eware i te nwene. Akpọ nana nọ ma rrọ na, eware e rẹ sai nwene idudhe. Ohwo ọ sai kie ẹyao. Ẹsejọ ohwo nọ ọ jẹ ruẹ re vẹre, ọ vẹ be kariẹ abọ re. Ozighi ọ sae jọ orẹwho mai fiki oghẹrẹ nọ egọmeti na ọ rrọ. (Ọtausi. 9:11; 1 Kọr. 7:31) Ẹsejọ dede, ukoko na o sae vuẹ omai nọ ma siọ iruo jọ nọ ma je ru evaọ ukoko na ba re ma nyai ru efa. Yọ eyena e were omai tere he. Rekọ oghẹrẹ nọ eware e rrọ kpobi kẹhẹ, eware ene jọ e riẹ nọ e sai fiobọhọ kẹ omai. Ọrọ ọsosuọ, nwane rehọ eware na oghẹrẹ nọ e rrọ na. Ọrọ avọ ivẹ, roro kpahe oware nọ whọ rẹ sae daoma ru nọ eware i nwene no na. Ọrọ avọ esa, roro kpahe irere nọ e sai no oware nọ o via na ze. Ọrọ avọ ene, hai fiobọhọ kẹ ahwo. b Ma te ta ẹme kpahe eware nọ e via kẹ inievo jọ nọ u dhesẹ nọ ma te ru eware ene nana e sai gine fiobọhọ kẹ omai.

9. Ẹvẹ oniọvo jọ avọ aye riẹ nọ a jọ imishọnare a sai ro thihakọ ẹbẹbẹ nọ o te rai?

9 Rehọ eware na oghẹrẹ nọ e rrọ na. Gaviezọ kẹ oware nọ o via kẹ oniọvo jọ nọ a re se Emanuele avọ aye riẹ Francesca nọ a vi kpohọ iruo imishọnare evaọ orẹwho ọfa. Nọ a nwani te obei, a te mu ẹvẹrẹ ẹwho na họ ewuhrẹ je mu inievo na họ ekuomagbe. U ri kri hi na, ẹyao COVID-19 o te du lahwe. A gbẹ jẹ sai kuomagbe ahwo ho. Idudhe na u te do ze nọ oni Francesca o whu no. Francesca ọ gwọlọ nọ o re kpo re ọ jọ kugbe ahwo riẹ. Rekọ fiki ẹyao COVID-19 na, ọ sai kpo ho. Kọ eme o fiobọhọ kẹe thihakọ ebẹbẹ na kpobi? Brọda Emanuele avọ aye riẹ Francesca a lẹ se Jihova re o fiobọhọ kẹ ae riẹ epanọ a rẹ sai ro thihakọ okpẹdẹ kpobi. Jihova o yo olẹ na. Eware nọ ukoko na u je kere ze oke yena, gbe eme nọ inievo na e jẹ ta i fiobọhọ kẹ ae kru udu ga. Nọ a rri ividio jọ nọ a jọ kiẹ oniọvo jọ riwi, eme nọ oniọvo na ọ ta i fiobọhọ kẹ ae gaga. Oniọvo na ọ ta nọ: “Nọ ẹbẹbẹ o te kie fihotọ kẹ omai, ma tẹ nwane rehọ eware na oghẹrẹ nọ e rrọ na, eva e rẹ were omai ghele, o vẹ te lẹliẹ omai kaki roro ku emamọ oware jọ nọ ma sae rehọ oke mai ru.” c Oware ofa nọ u fiobọhọ kẹ ae họ, a jẹ daoma riẹ epanọ a rẹ rehọ ifonu ta usi uwoma. A tube wo ohwo jọ nọ a je wuhrẹ Ebaibol. U te no ere no, inievo efa a jẹ hae tuduhọ ae awọ je fiobọhọ kẹ ae. Oniọvo-ọmọtẹ jọ ọ jẹ rehọ ifonu riẹ vi oria Ebaibol jọ se ai kẹdẹ kẹdẹ rọ tuduhọ ae awọ bẹsenọ ukpe soso u ro re. Ma tẹ be rehọ eware oghẹrẹ nọ e rrọ, eva e te were omai, yọ umutho nọ ma sai ru oke yena o te da omai ẹro.

10. Eme oniọvo-ọmọtẹ jọ o ru nọ oware nọ o rẹro riẹ hẹ o via?

10 Hai roro kpahe eware nọ whọ te rọ uvẹ na ru, gbe irere nọ i ti no ai ze. Oniọvo-ọmọtẹ jọ nọ a re se Christina nọ ọ rrọ ohwo Romania ọ jọ ukoko Oyibo evaọ obọ Japan. Ẹsiẹvo na ukoko u te kere se ai nọ a gwọlọ si ukoko Oyibo yena no. Fikiere o te kpohọ ukoko Japanese. Ukpenọ o re roro kpahe oware na ereroro re o hae kẹe uye, ọ tẹ jẹ daoma wuhrẹ ẹvẹrẹ Japanese na, jẹ be rehọ iẹe ta usi uwoma ẹsikpobi. Ọ tubẹ ta kẹ aye jọ nọ a gbe je ru iruo oke jọ inọ jọ o wuhrẹ iẹe ẹvẹrẹ na ziezi. Aye na ọ rọwo nọ ọ rẹ rehọ Ebaibol gbe ibroshọ Reawere Uzuazọ Bẹdẹ Bẹdẹ! na wuhrẹ iẹe ẹvẹrẹ na. Christina ọ tẹ te riẹ ẹvẹrẹ na ziezi. Oye ọvo ho, eware nọ aye na ọ jọ Ebaibol gbe obe mai na ruẹ e were riẹ gaga, ọ tẹ gwọlọ nọ a wuhrẹ iẹe Ebaibol. Nọ eware i te nwene, ma te bi roro kpahe oware nọ ma rẹ sai ru, gbe irere nọ i ti noi ze, oware nọ o via na o sae wha oghale nọ ma rẹro riẹ hẹ se omai.

11. Eme o fiobọhọ kẹ oniọvo jọ avọ aye riẹ thihakọ nọ eware e jọ gaga kẹ ae?

11 Hai fiobọhọ kẹ ahwo. Oniọvo jọ avọ aye riẹ nọ a jẹ rria orẹwho jọ nọ egọmeti ọ rọwo nọ egagọ Isẹri Jihova e jọ họ a jẹ ruẹ uye gaga oke nọ eware e jọ gaga evaọ orẹwho na. Kọ eme a ru? A tẹ jẹ kẹnyẹ umugho nọ a wo rọ dẹ eware nọ e roja gaga ọvo. Yọ ukpenọ a hai roro kpahe ẹbẹbẹ rai, a tẹ jẹ hai kpohọ usi uwoma kẹse kẹse. (Iruẹru 20:35) Oniọvo-ọmọzae na ọ ta nọ: “Usi uwoma nọ ma jẹ nya u fiobọhọ kẹ omai kpairoro vrẹ ẹbẹbẹ mai. Kọ epanọ ma re ro ru eware nọ e rẹ were Ọghẹnẹ ma jẹ mai roro kpahe.” Nọ eware i te kie gale uzou vi, joma kareghẹhọ nọ u wuzou gaga re ma gbẹ hai fiobọhọ kẹ amọfa. Usi uwoma ota yọ edhere jọ nọ ma re ro fiobọhọ kẹ ahwo.

12. Ẹvẹ ma sae rọ rehọ aro kele Pọl ukọ na nọ ma te kpohọ usi uwoma?

12 U fo re ma hai nwene oghẹrẹ nọ ma rẹ rọ ta usi uwoma. Ma te kpohọ usi uwoma, ma rẹ nyaku oghoghẹrẹ ahwo. Eware nọ a rọwo, gbe iwuhrẹ egagọ rai i wo ohẹriẹ. Pọl ukọ na ọ jẹ hai nwene oghẹrẹ nọ ọ rẹ rọ ta usi uwoma. Jesu ọ rehọ Pọl mu “ukọ rọkẹ erẹwho na.” (Rom 11:13) O tẹ so ẹe ze nọ ọ jẹ rọ ta usi uwoma kẹ ahwo Ju, ahwo Griki, ahwo nọ e riẹ obe, te edafe te iyogbe, gbe ivie. Pọl ọ jẹ hai nwene oghẹrẹ nọ ọ rẹ rọ ta usi uwoma re ẹme Ọghẹnẹ ọ sai te ahwo nana kpobi udu. Ọ tubẹ ta nọ: “Me zihe ruọ eware kpobi no kẹ oghẹrẹ ahwo kpobi.” (1 Kọr. 9:19-23) Pọl o je muẹrohọ uruemu ẹwho rai, uzuazọ nọ a bi yeri, gbe eware nọ a rọwo. Ọ vẹ rọ areghẹ ta ẹme te eware nana. Ma te wuhrẹ oghẹrẹ nọ ma sae rọ ta usi uwoma kẹ oghoghẹrẹ ahwo, ẹme mai o ti te ai udu re.

AHWO A GBE RRI OWARE JỌ OGHẸRẸ NỌ WHO RRI RIE HE

Joma ta nọ onọ u kiehọ omai oma ohwo kpobi o re ru hu (Rri edhe-ẹme avọ 13)

13. Eme obe 1 Ahwo Kọrint 8:9 o ta, nọ u re fiobọhọ kẹ omai nọ ahwo jọ a gbe rri oware oghẹrẹ nọ ma rri rie he?

13 Nọ ahwo a gbe rri oware jọ oghẹrẹ nọ who rri rie he, jọ o kẹ owhẹ uye he. Nọ inievo-emetẹ jọ a tẹ be sẹ osẹ, a rẹ nabi si isiaro, penti igbenu, te iziabọ gbe iziawọ rai. Rekọ ejọ i re du penti hi. Inievo jọ a rẹ da umudi ogaga ẹsejọ, rekọ ejọ e rẹ rehọ iẹe te unu hu. Nọ ma tẹ be mọ, ma re ru epanọ ẹyao na o re ro kpo. Rekọ oghẹrẹ imu evona mai kpobi ma rẹ gwọlọ rehọ họ. Ma tẹ ta nọ oware nọ ma ru oye ohwo kpobi o re ru, ma ti ru eva dha ahwo jọ, o vẹ te wha ozighi fihọ ukoko na. Ma gwọlọ ru oware utioye he. (Se 1 Ahwo Kọrint 8:9; 10:23, 24) Obọnana ma te ta kpahe epanọ ehrẹ Ebaibol i re ro fiobọhọ kẹ omai ru oware nọ u kiehọ jẹ yọroma re ma gbẹ gba ahwo họ ru oware nọ o rẹ were omai hi.

Joma ta nọ onọ u kiehọ omai oma ohwo kpobi o re ru hu (Rri edhe-ẹme avọ 14)

14. Ẹvẹ ehrẹ Ebaibol e sai ro fiobọhọ kẹ omai riẹ osẹ nọ u fo nọ ma rẹ sẹ, gbe oghẹrẹ nọ ma re ru eto mai?

14 Osẹ gbe oghẹrẹ nọ ma re ru eto mai. Jihova ọ jọ Ebaibol na vuẹ omai oghẹrẹ osẹ kpobi nọ ma rẹ sẹ hẹ. Rekọ ọ ta nọ joma sẹ osẹ nọ u fo nọ idibo Ọghẹnẹ a rẹ sẹ, “nọ ọ rrọ owowa je dhesẹ nọ a wo iroro nọ e gba.” (1 Tim. 2:9, 10; 1 Pita 3:3) Ma te bi ru epanọ Ebaibol ọ ta na, ma te gọ ẹgọ nọ ọ rẹ lẹliẹ ahwo rri omai ga hrọ họ. Ehrẹ Ebaibol ekpako ukoko a re ro wuhrẹ inievo na, orọnikọ a rẹ vuẹ ae nọ oghẹrẹ osẹ utiona wha rẹ sẹ hayo enẹ wha re ru eto rai hi. Evaọ ukoko jọ, ekpako na a ruẹ nọ inievo-emezae jọ nọ e rrọ izoge a be nware eto oheri. Dede nọ a be nware uzou na kpotọ, a be riẹe nware he. Kọ eme ekpako na a te vuẹ ae nọ o gbẹ te wọhọ ẹsenọ a bi fi izi obọrai họ kẹ ae he? Ọsẹro okogho rai ọ tẹ ta kẹ ae nọ, jọ a vuẹ inievo na nọ, “Otẹrọnọ who te bi ru ẹme evaọ eplatfọmo, ukpenọ inievo na a gaviezọ kẹ owhẹ, kọ osẹ ra hayo eto ra ọvo a bi rri, nwane riẹ nọ oware jọ o thọ kugbe osẹ ra na.” Ẹmẹme yena ọvo nọ a ta kẹ ae na o lẹliẹ e rai nwene. d A du vuẹ ae oghẹrẹ uzou nọ a rẹ nware gbe onọ a rẹ nware he he.

Joma ta nọ onọ u kiehọ omai oma ohwo kpobi o re ru hu (Rri edhe-ẹme avọ 15)

15. Eme Ebaibol ọ ta nọ o sai fiobọhọ kẹ omai jiroro oghẹrẹ nọ ma re ro siwi oma mai? (Ahwo Rom 14:5)

15 Oghẹrẹ nọ ma gwọlọ ro siwi oma mai. Ohwo kpobi ọ rẹ jiroro oghẹrẹ nọ o re ro siwi oma riẹ. (Gal. 6:5) Ebaibol ọ nwani jie izi buobu kpahe oghẹrẹ nọ ma re ro siwi oma mai hi. Ẹme nọ ọ ta ọvo họ, joma kẹnoma kẹ azẹ gbe eware nọ i wobọ kugbe idhivẹri. (Iruẹru 15:20; Gal. 5:19, 20) Nọ Oleleikristi ọ tẹ be gwọlọ rehọ edhere jọ siwi oma riẹ, yọ Ebaibol ọ nwani jie uzi ovo kpahe oghẹrẹ usiwo yena ha, ọye ọvo ọ rẹ jiroro na kẹ omariẹ. Inievo jọ a tẹ be mọ, imu iyibo na ọvo a rẹ gwọlọ ro siwi oma rai. Rekọ inievo jọ a rẹ gwọlọ ru imu ahwo obiebi, hayo rehọ oghẹrẹ ofa siwi oma rai. O tẹ make rọnọ ojọ o rẹ were omai vievie he evaọ usu ivẹ na, joma ta họ omọfa obọ họ. Eware ene jọ e riẹ nọ i ti fiobọhọ kẹ omai riẹ oria nọ ma rẹ ta te ma ve zihe oma. Orọ ọsosuọ, ma rẹ kareghẹhọ nọ Uvie Ọghẹnẹ ọvo ọye o ti ru nọ eyao mai kpobi i ti ro kpo riẹriẹriẹ. (Aiz. 33:24) Orọ avọ ivẹ, ma rẹ kareghẹhọ nọ Oleleikristi kpobi ọ rẹ rehọ edhere nọ o mu rie ẹro ziezi inọ ọye ọ mai woma ro siwi oma riẹ. (Se Ahwo Rom 14:5.) Orọ avọ esa, joma gu ahwo ẹdhọ hayo ru ai zoruẹ hẹ. (Rom 14:13) Orọ avọ ene, dede nọ ma wo udu nọ ma re ro ru oware nọ o were omai, ma re ru oware nọ u dhesẹ nọ ma you inievo na orọnikọ onọ u re fou ẹme ze he. (Rom 14:15, 19, 20) Ma tẹ be hae kareghẹhọ eware yena, o te so ẹe ze nọ ma ti ro lele inievo na riẹ yeri.

Joma ta nọ onọ u kiehọ omai oma ohwo kpobi o re ru hu (Rri edhe-ẹme avọ 16)

16. Ẹvẹ ọkpako o re ro dhesẹ nọ o re si eware kekeke he nọ avọ ekpako ibe riẹ a tẹ rrọ ẹgwae? (Rri iwoho na re.)

16 Ekpako ukoko a re ru oware nọ u re dhesẹ nọ a bi si eware kekeke he. (1 Tim. 3:2, 3) Ọkpako jọ ọ tẹ maki vi ekpako nọ i kiọkọ, jọ o roro nọ onọ ọ ta ze ọvo a re ro ru hu. Jọ ọ riẹ nọ ẹzi Jihova ọ sai ru nọ ọkpako kpobi ọ rẹ rọ ta ẹme jọ ze nọ o re fiobọhọ kẹ ae jẹ emamọ iroro. Ẹme jọ ọ tẹ rrọ otọ, ekpako buobu a tẹ ta nọ enẹ ma re ru, yọ oware nọ a ta na Ebaibol ọ ta nọ o thọ họ, rọwo fihọ iẹe, o gbẹ maki kiehọ owhẹ oma ha. Who te ru ere, u re dhesẹ nọ who bi si eware kekeke he.

IRERE I RE TE OMAI NỌ MA GBE BI SI EWARE KEKEKE HE

17. Irere vẹ i re te omai nọ ma gbe bi si eware kekeke he?

17 Ma gbe bi si eware kekeke he, irere buobu i re te omai. Ọjọ họ, ma re lele inievo ukoko na riẹ yeri. Ofa họ, eva e te were omai inọ ọvuọ oghẹrẹ riẹ nọ ma rrọ evaọ ukoko na u woma gaga. Yọ dede nọ ọvuọ uruemu riẹ o wo, ma wọhọ uviuwou ovo. Oye ovo gbe he, eva e te were omai inọ ma be rọ aro kele Jihova Ọghẹnẹ mai nọ o re si eware kekeke he na. Kọ eme o re woma vi enẹ!

OLE AVỌ 90 Ma rẹ Tuduhọ Ohwohwo Awọ

a Ma te jọ uzoẹme nana ruẹ nọ Jihova avọ Jesu a re si eware kekeke he, yọ ere a gwọlọ nọ ma jọ re. Ma tẹ be mọ, nọ ugho o gbẹ riẹ hẹ, hayo nọ ma te wo ẹbẹbẹ ọfa jọ, ma gbẹ rrọ ahwo nọ a re si eware kekeke he, ma re nwene oghẹrẹ nọ ma bi ru eware, re ẹbẹbẹ na ọ gbẹ yawo omai oma ga hrọ họ. Ma gbe bi si eware kekeke he, o rẹ jẹ lẹliẹ omai riẹ yeri kugbe inievo mai.

b Rri uzoẹme na “Gbẹ Wereva nọ Owha-Iruo Ra U te Nwene” evaọ Uwou-Eroro Aria 2019.

c Rri ividio na, Ọkiẹriwo nọ A Ru Kugbe Brọda Dmitriy Mikhaylov nọ a fodẹ evaọ Obe Ewuhrẹ Uzuazọ Oleleikristi gbe Usi Uwoma Ota Mai orọ Asa-Ane 2021. A ta ẹme tei evaọ uzoẹme na “Jihova O Ru nọ Ukpokpoma U ro Rovie Uvẹ Usi Uwoma Ota Fihọ.”

d Whọ tẹ gwọlọ gbẹ riẹ kpahe ẹme osẹ na, rri uzou avọ 52 orọ obe Reawere Uzuazọ Bẹdẹ Bẹdẹ!