Kpohọ eme nọ e riẹ eva

Kpohọ oria eware nọ e riẹe eva

IKUIGBE UZUAZỌ

Obọ nọ A re Fihọ kẹ Amọfa O rẹ Wha Eghale Buobu Ze

Obọ nọ A re Fihọ kẹ Amọfa O rẹ Wha Eghale Buobu Ze

Mẹ avọ oni mẹ gbe oniọvo-ọmọtẹ mẹ Pat, evaọ ukpe 1948

ẸDẸ jọ, oni-ologbo mẹ ọ vuẹ oni mẹ nọ, “Iwuhrẹ erue ichọche Anglican i bi wuhrẹ ahwo. Gwọlọ egagọ efa nọ i bi wuhrẹ ahwo uzẹme na.” Ere oni mẹ o ro mu egagọ uzẹme na họ ẹgwọlọ. Rekọ oke yena kpobi, ọ jẹ hae rọwo yo usi uwoma Isẹri Jihova ha. Oni mẹ ọ vuẹ omẹ nọ Isẹri Jihova a tẹ nyaze, jomẹ dhẹ dhere. Obọ Toronto ma jẹ rria oke yena evaọ Canada. Rekọ evaọ ukpe 1950, Isẹri Jihova a te je wuhrẹ oniọvo ọmaha oni mẹ Ebaibol. A te ti mu oni mẹ họ ewuhrẹ re. Obọ uwou oniọvo oni mẹ na a jẹ hae jọ wuhrẹ. Uwhremu na aimava a tẹ họ-ame.

Ọsẹ mẹ ọ jọ ohwo ologbo evaọ ichọche nọ a re se United Church of Canada nọ ọ jọ ẹwho na. Kẹdoka kẹdoka, ọsẹ mẹ ọ jẹ hae rọ omẹ avọ oniọvo-ọmọtẹ mẹ kpohọ ofẹ nọ a rẹ jọ wuhrẹ emaha na evaọ ichọche na. Evaọ ighọjọ ikpegbọvo, ma vẹ nyai kuomagbe ọyomariẹ evaọ ichọche na. Evaọ uvo, ma ve lele oni mẹ kpohọ ewuhrẹ evaọ obọ Ọgwa Uvie. Ma ruẹ vevẹ nọ Isẹri Jihova avọ ichọche na a rrọ epọvo na ha.

Mẹ avọ Brọda Hutcheson avọ aye gbe emọ riẹ okenọ ma kpohọ okokohọ akpọ-soso ukpe 1958 nọ uzoẹme riẹ o ta nọ “Divine Will”

Oni mẹ ọ jẹ hae ta usi uwoma kẹ egbẹnyusu riẹ jọ nọ a nya usu kri no. Ae họ Marion avọ ọzae riẹ Bob Hutcheson. Aimava na a te ti kurẹriẹ. Evaọ ukpe 1958, Brọda Hutcheson avọ aye riẹ a tẹ wha omẹ avọ emezae esa rai lele oma kpohọ okokohọ akpọ-soso nọ a ru evaọ New York City. Uzoẹme riẹ họ “Divine Will.” Edẹ eree a ru okokohọ na. Mẹ riẹ nọ o te lọhọ kẹ inievo na ha re a wha omẹ kpohọ okokohọ na. Rekọ uzuazọ mẹ u nwene nọ me no okokohọ yena ze.

INIEVO NA A FIOBỌHỌ KẸ OMẸ KRU EGAGỌ ỌGHẸNẸ GA

Nọ mẹ jọ uzoge, umuwou jọ ma jẹ rria, yọ ma jẹ hai thuru erao. Erao nọ a re thuru o jẹ hae were omẹ oma. Mẹ jẹ gwọlọ epa kpobi nọ me re ro kpohọ isukulu ilogbo re me wuhrẹ epanọ a re ro siwi erao. Oni mẹ ọ tẹ rọ ẹme na bru ọkpako ukoko jọ. Ọkpako na ọ tẹ vuẹ omẹ nọ jomẹ kareghẹhọ nọ “edẹ urere na” ma rrọ na. Ọ tẹ nọ omẹ nọ, ‘Who te kpohọ isukulu ilogbo, ẹvẹ who roro nọ usu ra avọ Jihova o te jọ nọ whọ te jọ obei na?’ (2 Tim. 3:1) Nọ me rri oware na, mẹ tẹ kpairoro vrẹ isukulu ilogbo.

O make rrọ ere na, me gbe je roro oware nọ me ti ru nọ me te nwrotọ no ekọleji no. Mẹ jẹ hai kpohọ usi uwoma evaọ Ẹdẹ-Ọmaha hayo Ẹdoka kpobi. Rekọ usi uwoma o jẹ nwane were omẹ tere he, yọ me roro nọ mẹ te sae jọ ọkobaro ho. Ọsẹ mẹ avọ oniọvo riẹ a jọ ukoko na ha. A jẹ vuẹ omẹ nọ me ru iruo evaọ ekọmpene ologbo jọ nọ ọ jọ Toronto. Oniọvo ọsẹ mẹ o wuzou gaga evaọ etẹe, fikiere mẹ tẹ rọwo nọ mẹ rẹ jọ etẹe ru iruo.

Nọ mẹ jọ Toronto na, mẹ jẹ hai ru iruo ẹsikpobi, ẹsejọ dede nọ o gbẹ make rrọ oke iruo ho. Mẹ jẹ hae jọ kugbe ahwo nọ a be gọ Ọghẹnẹ hẹ. Enana kpobi i te ru nọ mẹ gbẹ jẹ sai ro kpohọ ewuhrẹ gbe usi uwoma ẹsikpobi hi. Ọsẹ-ologbo mẹ, mẹ jẹ rria kugbe. Ọ jọ ukoko na ha. Nọ o je whu no, mẹ tẹ jẹ gwọlọ oria ofa nọ mẹ rẹ rria.

Brọda Hutcheson avọ aye riẹ nọ a wha omẹ kpohọ okokohọ ukpe 1958 na a jọ wọhọ ọsẹgboni kẹ omẹ. A vuẹ omẹ nọ mẹ kwa bru ai. Yọ a fiobọhọ kẹ omẹ nọ mẹ rọ wariẹ kruga ziezi. Evaọ ukpe 1960, mẹ avọ ọmọzae rai, John ma tẹ họ-ame. John o te mu ọkobaro oke-kpobi họ. O tẹ whae ze nọ me ro mu usi uwoma họ ẹnya gaga. Inievo ukoko na a ruẹ nọ mẹ be ginẹ daoma evaọ ukoko na. A tẹ te rọ omẹ mu odibo Isukulu Odibọgba Esuo-Ọghẹnẹ. a

MẸ RUẸ EMAMỌ AYE WO JE RU EWARE EFA EVAỌ UKOKO NA

Ẹdẹ ehaa orọo mai evaọ ukpe 1966

Ukpe 1966 mẹ tẹ rehọ oniọvo-ọmọtẹ jọ nọ a re se Randi Berge. Ọ jọ ọkobaro oke-kpobi nọ o se usi uwoma gboja gaga. Yọ ọ jẹ gwọlọ nọ o re kpohọ oria nọ a jọ gwọlọ iwhowho-uvie. Ọsẹro ọnyawariẹ mai o fiobọhọ kẹ omai. Ọ tuduhọ omai awọ re ma kwa kpobọ Orillia evaọ Ontario, nọ iwhowho-uvie e jọ tere he. Ma tẹ ginẹ kwa nya.

Nọ ma nwani te obọ Orillia no, me te mu ọkobaro oke-kpobi họ. Usi uwoma u te ti mu omẹ họ ẹwere gaga fiki aye mẹ. Iruo ọkobaro na e tẹ te daruọ omẹ oma. Eva e tẹ jẹ were omẹ gaga fikinọ mẹ jẹ rọ Ebaibol wuhrẹ ahwo, yọ eware na i je vẹ ai ẹro. Nọ ma jọ Orillia na, ọzae-avọ-aye jọ nọ ma wuhrẹ Ebaibol a te ti kurẹriẹ jẹ họ-ame. Eva e were omai gaga.

MA WUHRẸ ẸVẸRẸ ỌFA JE NWENE OGHẸRẸ NỌ MA JE RRI EWARE

Oke jọ nọ ma kpobọ Toronto, ma tẹ ruẹ Brọda Arnold MacNamara. Ọ jọ usu inievo nọ e jọ esẹro evaọ Ebẹtẹle. Ọ tẹ nọ omẹ sọ mẹ gwọlọ jọ ọkobaro obọdẹ. Mẹ tẹ nwane vuẹe nọ: “Kọ emejabọ? Wha sai vi omai kpohọ oria kpobi, u te no Quebec no!” Ẹvẹrẹ French a jẹ ta evaọ obọ Quebec, yọ ahwo obei a jẹ gwọlọ nọ a rẹ hẹrioma no Canada re a wo esuo obọrai. Oyibo a jẹ ta evaọ ofẹ nọ o kiọkọ evaọ Canada, yọ a jẹ rọ ekpehre ubiẹro rri ahwo Quebec. Oyejabọ mẹ gbẹ gwọlọ kpobọ Quebec he na.

Brọda Arnold ọ tẹ vuẹ omẹ nọ, “Whaọ obọ Quebec ọvo ukoko u bi vi ekobaro obọdẹ nya obọnana.” Mẹ tẹ nwane rọwo nọ ma re dhugbe kpohọ obei. Mẹ riẹ no vẹre inọ obọ Quebec o were aye mẹ. Uwhremu na mẹ tẹ te ruẹ nọ obei nọ ma nya na, a rẹ ruẹ oware nọ u woma tei hi.

Eka isoi soso ma ro wuhrẹ French. Mẹ avọ aye mẹ gbe oniọvo jọ avọ aye riẹ ma te kpohọ ẹwho jọ nọ a re se Rimouski evaọ obei. O rehọ emaele egba esa gbe ọgbagbezeza (336) thabọ no Montreal. Oke yena ma re riẹ ẹvẹrẹ na tere he. Ẹdẹ jọ nọ ma kpohọ ewuhrẹ, me te bi se iwhowhovia. Mẹ tẹ jẹ gwọlọ ta nọ evaọ okokohọ nọ ma te nya na, inievo buobu a ti no obọ Austria ze, rekọ mẹ tẹ ta nọ a ti no obọ ostrich ze, koyehọ ọvra ologbo jọ nọ a re se ogomugoro.

Uwou nọ ma je se “White House” evaọ Rimouski

Inievo-emetẹ ene jọ nọ usi uwoma o rẹ were gaga gbe oniọvo jọ nọ a re se Huberdeau avọ aye riẹ gbe emetẹ ivẹ rai a tẹ kwa ziọ Rimouski. Oke yena mẹ avọ aye mẹ gbe oniọvo ọfa jọ avọ aye riẹ ma rrọ obei no vẹre. Brọda Huberdeau avọ aye riẹ a tẹ haya uwou jọ nọ o wo ibriwou ihrẹ nọ mai kpobi ma rẹ rria. Ma jẹ hai sei White House keme ọda ọfuafo a rọ ralọ ipila riẹ gbe aro uwou na. Mai ahwo ikpegbivẹ ma jẹ rria uwou na, rekọ ẹsejọ ma re te ahwo ikpegbene. Mẹ avọ aye mẹ ma jẹ hai kpohọ usi uwoma te ohiohiẹ, te uvo, te owọwọ keme mai yọ ekobaro obọdẹ. Eva e were omai nọ ma jẹ hae ruẹ ohwo nọ o re lele omai nya ẹsikpobi makọ evaọ owọwọ nọ ekpahe e rrọ gaga.

Ekobaro inievo na a jọ, yọ mai kpobi ma tẹ te jọ wọhọ uviuwou ọvo. Ẹsejọ ma re koko erae họ evaọ owọwọ, mai kpobi ma vẹ jọ etẹe rria erae. Ẹsejọ ma ve there oghẹrẹ oware jọ nọ mai kpobi ma rẹ re kugbe. Oniọvo jọ evaọ usu mai ọ riẹ epanọ a re kporo ile gaga. Fikiere ẹsibuobu evaọ owọwọ Ẹdẹ-Ọmaha ma rẹ so ile je gbile.

Ahwo Rimouski a je yo usi uwoma gaga. Fikiere evaọ ikpe isoi ọvo, ahwo buobu nọ ma je wuhrẹ Ebaibol a te ti kurẹriẹ jẹ họ-ame. Mai iwhowho-uvie nọ e jọ ukoko na ma te ti te ọgbagbisoi, yọ eva e were omai.

A wuhrẹ omai eware nọ i re fiobọhọ kẹ omai ta usi uwoma ziezi nọ ma jọ obọ Quebec na. Jihova o je fiobọhọ kẹ omai evaọ iruo na yọ ọ jẹ rẹrote omai. Ahwo nọ a rẹ ta French nọ ma jẹ ta usi uwoma kẹ na a te ti mu omai họ ẹwere, te ẹvẹrẹ rai, te uruemu rai. Fikiere ma tẹ jẹ rọ emamọ ubiẹro rri uruemu ahwo ẹwho ọfa kpobi.—2 Kọr. 6:13.

Ukoko o tẹ vuẹ omẹ avọ aye mẹ nọ joma kwa kpobọ Tracadie nọ ọ jọ unueri New Brunswick. Ma rẹro oware utioye he. O kẹ omai uye keme oke yena yọ ma whobọhọ obe nọ ma rọ gwọlọ haya uwou jọ no. Yọ mẹ jẹ hae jọ isukulu jọ nọ ọ jọ ẹwho na wuhrẹ ẹmẹsejọ. Ere ọvo ho, ahwo jọ nọ ma je wuhrẹ Ebaibol a nwani te iwhowho-uvie obọ. Yọ ma jẹ bọ Ọgwa Uvie dede evaọ oke yena.

Ma lẹ gaga kpahe ẹme na. Ma te kpobọ Tracadie re ma riẹ oghẹrẹ nọ obei o rrọ. Obei o wọhọ Rimouski nọ ma jọ na ha. Rekọ ma tẹ ta nọ, nọ orọnọ Jihova ọ gwọlọ nọ ma kpohọ obei na, obei ma rẹ nya. Ma dawo Jihova wọhọ epanọ ọ jọ Ebaibol ta, yọ o gine fiobọhọ kẹ omai gaga. (Mal. 3:10) Oware jọ nọ ẹkwa nọ ma kwa kpohọ obei na o gbẹ rọ kẹ omai uye tere he họ, aye mẹ yọ oniọvo nọ o ye te evaọ ukoko na, ọ rẹ gwọlọ fiobọhọ kẹ ahwo, yọ ọ ta emiehwẹ viere.

Brọda Robert Ross ọvo họ ọkpako ukoko nọ ọ jọ ukoko nọ ma kpohọ na. Ọye avọ aye riẹ, Linda a jọ ekobaro evaọ ẹwho na. Nọ a je yẹ ọmọ no, a tẹ nwane daji etẹe. Dede nọ ọmọ ọ jarae obọ, a re no usi uwoma ha, yọ a riẹ epanọ a re dede ọrara rehọ. Emamọ uruemu rai u fiobọhọ kẹ omai gaga.

MA KPOHỌ ORIA KPOBI NỌ A VI OMAI NYA, YỌ ỌGHẸNẸ Ọ GHALE OMAI

Oke ekpahe evaọ okogho ọsosuọ nọ a dhe omai nya

Nọ ma rria Tracadie te ikpe ivẹ no, obọdẹ oware jọ nọ ma rẹro riẹ hẹ o tẹ via. A rehọ omẹ mu ọsẹro ọnyawariẹ. Me te je rri ikogho Oyibo evaọ ikpe ihrẹ. Uwhremu na, a te dhe omai kpohọ okogho French evaọ Quebec. Brọda Léonce Crépeault ọye ọ jọ ọsẹro ubrotọ mai evaọ Quebec. Ẹsikpobi nọ me te ru ẹme no, o re jiri omẹ gaga. Nọ otọ o jẹ fọ no, ọ vẹ nọ omẹ nọ, “Eme whọ sai ru ẹdẹfa re inievo na a sai gbe wuhrẹ emamọ eware no ẹme ra ze?” b Onọ yena nọ ọ jẹ hae nọ omẹ na o jẹ hae lẹliẹ omẹ gwọlọ epanọ inievo na a rẹ rọ riẹ otọ ẹme nọ me bi ru ziezi, a vẹ jariẹ wuhrẹ eware buobu.

Evaọ ukpe 1978, a ru okokohọ akpọ-soso evaọ Montreal. Uzoẹme riẹ họ “Victorious Faith.” Ofẹ nọ a re jo there emu evaọ okokohọ na mẹ jọ, yọ o rẹ thọrọ omẹ ẹro ho. Ma riẹ nọ ahwo nọ a te ziọ okokohọ na a ti bu te idu udhone (80,000), yọ oghẹrẹ emu nọ a ti there kẹ ae sa. Ma ri there oghẹrẹ emu otiọye ẹdẹvo ho, yọ oghẹrẹ nọ a re ro there emu na gbe eware nọ ma ti ro koko erae họ, aikpobi e jọ ọrọrara kẹ omai. Ifriji ilogbo nọ i te udhe e jariẹ, rekọ i re ru oghẹrẹ jọ ẹsejọ. U te no ere no, ẹdẹ nọ u no no u ve te ẹdẹ okokohọ na, a jẹ jọ ọgwa ologbo nọ ma haya nọ ma ti jo ru okokohọ na zaha aroza jọ. Yọ obọ udevie aso a ro kuhọ. Oke yena ma rọ ruọ eva oria na je mu eware họ ẹruẹrẹhọ. Yọ ma rẹ kake kpama re ma sae there emu nọ ahwo na a te re evaọ ohiohiẹ. Dede nọ oma o whọlọ omai no, obọ o rrọ inievo nọ ma gbe je ru iruo na ha, a jẹ ta emiehwẹ dede, yọ a se iruo Jihova gboja. Me wuhrẹ eware buobu mi ai. Mẹ avọ inievo na ma zihe ruọ egbẹnyusu, yọ ma gbẹ be nya usu rite inẹnẹ. Me roro ẹdẹvo ho inọ a te jọ Quebec ru obọdẹ okokohọ otiọye na keme a jẹ jọ obei kpokpo inievo mai gaga nọ ukpe 1940 o vrẹ no rite ubrobọ 1950.

Okenọ mẹ avọ aye mẹ ma jẹ ruẹrẹ oma họ kẹ okokohọ ologbo ukpe 1985 evaọ Montreal

Mẹ jẹ hai wuhrẹ eware buobu mi inievo efa nọ e jọ esẹro ọnyawariẹ nọ ma te bi ru okokohọ ologbo evaọ Montreal. Evaọ ọjọ nọ ma ru, Brọda David Splane nọ ọ rrọ Utu Ẹruorote na enẹna ọye ọ jọ ohwo-agbara okokohọ na. Evaọ okokohọ ọfa jọ nọ ma ru, mẹ tẹ jọ ohwo-agbara. Yọ Brọda Splane o fiobọhọ kẹ omẹ gaga.

Nọ mẹ jọ ọsẹro ọnyawariẹ te ikpe ọgbagbezeza no, evaọ ukpe 2011, ukoko o tẹ ta nọ mẹ te hae wuhrẹ ahwo evaọ Isukulu Rọkẹ Ekpako Ukoko. Ma tẹ jẹ kwa no oria ruọ oria. Evaọ ikpe ivẹ ọvo, ma kwa te isia udhosa gbe ikpegbisoi. Ọmọziọ oware he, rekọ eva e jẹ were omẹ keme koka koka nọ isukulu na i te kuhọ no, eva ọvo e rẹ were ekpako ukoko nọ ma wuhrẹ na. Eva e rẹ were ae inọ Utu Ẹruorote na u bi roro kpahe ae je fiobọhọ kẹ ae kru egagọ Jihova ga.

Uwhremu na, mẹ tẹ jẹ hai wuhrẹ ahwo evaọ Isukulu Rọkẹ Etausiuwoma Uvie Na. Euwa ihrẹ soso yọ emọ-isukulu na a keria bi wuhrẹ ọvo kẹdẹ kẹdẹ. Yọ kowọwọ kowọwọ, euwa esa a re ro ru ihomwhọko rai. Yọ koka koka a re ru ẹme te isiane hayo isiasoi. Ẹsibuobu oma o rẹ lọhọ emọ-isukulu na no, yọ udu u re bru rai. Rekọ mẹ avọ oniọvo nọ ma je wuhrẹ ae na ma rẹ vuẹ ae nọ a sae rọ ẹgba obọrai ru ei hi, inọ jọ a lẹ se Jihova re ọ kẹ ae ẹgba. Eware nọ a je roro nọ a te sai ru hu na, a ru rai kiọkọ fikinọ a rẹroso Jihova.

OBỌ NỌ A RE FIHỌ KẸ AMỌFA O RẸ WHA EGHALE BUOBU ZE

Oni mẹ o you ahwo nọ o je wuhrẹ Ebaibol gaga, yọ o jẹ lẹliẹ ae nyaharo. Makọ ọsẹ mẹ dede, ukoko na u te ti mu ei họ ẹwere. Nọ oni mẹ o whu no, nọ edẹ esa e jẹ vrẹ no, ọsẹ mẹ o te kpohọ ewuhrẹ evaọ obọ Ọgwa Uvie. U gbe omai unu. Ọsẹ mẹ o kpohọ ewuhrẹ evaọ ikpe udhegbezeza soso. Ọ họ-ame re o te ti whu hu. Rekọ ekpako ukoko na a vuẹ omẹ nọ ọye họ ohwo nọ ọ jẹ hai kaki te obọ ewuhrẹ.

Emamọ oriruo nọ oni mẹ o fihotọ u fiobọhọ kẹ omai emọ riẹ. Inievo-emetẹ esa mẹ avọ ezae rai a rrọ ukoko na. Ọjọ avọ ọzae riẹ a rrọ uwou ogha obọ Portugal, ọnọ o kiọkọ avọ ọzae riẹ kọ uwou ogha obọ Haiti.

Ekobaro obọdẹ mẹ avọ aye mẹ ma rrọ enẹna evaọ ẹwho nọ a re se Hamilton evaọ Ontario. Nọ mẹ jọ ọsẹro ọnyawariẹ, ma jẹ hai lele inievo na kpohọ ozihebro je lele ae nyai wuhrẹ ahwo rai Ebaibol. Rekọ enẹna eva e were omai gaga inọ ma wo ahwo nọ ma bi wuhrẹ Ebaibol, yọ a be daoma gaga. Ma kẹle inievo ukoko mai gaga dede nọ u ri kri nọ ma ziọ obonẹ hẹ. Jihova o bi fiobọhọ kẹ ae ẹsikpobi, maero nọ eware e tẹ rrọ oghẹrẹ jọ. Yọ o be lẹliẹ ẹrọwọ mai ga.

Inievo ukoko na a fiobọhọ kẹ omai gaga no, ma be sae ruẹ unu yere ae dede he. Mai omamai ma be daoma ru epọvo na kẹ inievo na re. Ma rẹ “ruawa gaga” kpahe inievo na. Yọ ma rẹ tuduhọ ae awọ re a romakẹ iruo Jihova. (2 Kọr. 7:6, 7) Evaọ uviuwou jọ, te oni na, te ọmọzae riẹ gbe ọmọtẹ riẹ a jọ ekobaro oke-kpobi. Ẹdẹ jọ mẹ tẹ nọ ọsẹ na nọ, ‘Kọ whọ gbẹ daoma re who mu ọkobaro họ re?’ Ọ tẹ ta nọ ọ make rrọ ọkobaro ho na, o bi fiobọhọ kẹ aye gbe emọ riẹ nọ e rrọ ekobaro. Mẹ tẹ nọe nọ, “Kọ obọ nọ who bi fihọ kẹ ae u te onọ Jihova o bi fihọ kẹ ae?” Mẹ tẹ vuẹe nọ ọkobaro nọ a rrọ na yọ emamọ emu jọ a be re gbọe na. O te gine mu ọkobaro họ evaọ emerae ezeza nọ i lele i rie.

Mẹ avọ aye mẹ ma te gbẹ vuẹ “oge nọ ọ be tha” kpahe “iruo igbunu” Jihova. Ma be hae vuẹ amọfa inọ a tẹ romakẹ iruo Jihova, eva e te were ae wọhọ epanọ eva e be were omai na.—Ol. 71:17, 18.

a Ọye a bi se ọsẹro Ewuhrẹ Uzuazọ gbe Usi Uwoma Ota enẹna.

b Ikuigbe Brọda Léonce Crépeault e rrọ Uwou-Eroro Ava 2020, ẹwẹ-obe avọ 26-30.