Kpohọ eme nọ e riẹ eva

Kpohọ oria eware nọ e riẹe eva

UZOẸME UWUHRẸ 29

Kọ Whọ Ruẹrẹ Oma Kpahe kẹ Uye Ulogbo na No?

Kọ Whọ Ruẹrẹ Oma Kpahe kẹ Uye Ulogbo na No?

“Wha ruẹrẹ oma kpahe.”—MAT. 24:44.

OLE AVỌ 150 Gwọlọ Ọghẹnẹ re Whọ Sae Zọ

EWARE NỌ MA TI WUHRẸ a

1. Fikieme u ro fo re ma ruẹrẹ oma kpahe kẹ eware okpẹtu?

 TAURE oware okpẹtu o tẹ te via, ohwo ọ tẹ riẹ, ọ jẹ ruẹrẹ oma kpahe u re fiobọhọ kẹe zọ. Ọ sai je fiobọhọ kẹ amọfa re. Utu ahwo jọ nọ a re fiobọhọ kẹ ahwo nọ oware okpẹtu o via kẹ evaọ obọ Europe a ta nọ: “Ohwo ọ tẹ ruẹrẹ oma kpahe ziezi re oware okpẹtu o tẹ te via, u re fiobọhọ gaga.”

2. Fikieme ma rẹ rọ ruẹrẹ oma kpahe kẹ uye ulogbo na? (Matiu 24:44)

2 Idudhe kpregede “uye ulogbo” na u ti ro du lahwe. (Mat. 24:21) Rekọ orọnọ ahwo kpobi o te ruọ ọza wọhọ epanọ eware okpẹtu buobu e rẹ ruọ ahwo ọza na ha. Oware wọhọ ikpe idu ivẹ (2,000) nọ i kpemu, Jesu ọ ta kẹ ilele riẹ inọ a ruẹrẹ oma kpahe kẹ uye ulogbo na. (Se Matiu 24:44.) Ma tẹ ruẹrẹ oma kpahe, ẹsiẹe ma te sai ro thihakọ eware nọ e te via oke yena jẹ sai fiobọhọ kẹ amọfa.—Luk 21:36.

3. Ẹvẹ ithihakọ, ohrọ-oriọ gbe uyoyou nọ ma rẹ daoma wo enẹna u ti ro fiobọhọ kẹ omai evaọ oke uye ulogbo na?

3 Joma ta kpahe eware esa jọ nọ ma re ru rọ ruẹrẹ oma kpahe kẹ uye ulogbo na. A tẹ vuẹ omai inọ ma whowho ovuẹ ẹdhoguo evaọ oke yena, kọ ma sai ti whowho iei nọ a tẹ be make wọso omai? (Evia. 16:21) Oye u ro fo nọ ma re wo ithihakọ keme u re fiobọhọ kẹ omai yoẹme kẹ Jihova jẹ rẹroso ẹe inọ ọ te thọ omai. A tẹ raha eware inievo mai jọ, eme ma ti ru? (Hab. 3:17, 18) U ti woma re ma re ohrọ rai, o vẹ te so ẹe ze nọ ma ti ro fiobọhọ kẹ ai. Okenọ erẹwho na a te wọ ohọre bru omai ze na, ẹsejọhọ te omai te inievo efa jọ ma ti si uzou koko oria ọvo. Kọ ẹvẹ ma ti ro lele inievo mai rria oke yena? (Izik. 38:10-12) U ti fo re ma rọ uyoyou lele ai yeri. Ere ma te sai ro thihakọ ebẹbẹ nọ ma wo.

4. Eme Ebaibol ọ ta, nọ u dhesẹ nọ u fo re ma gbẹ daoma wo ithihakọ, ohrọ-oriọ gbe uyoyou?

4 Ebaibol ọ vuẹ omai inọ ma daoma wo ithihakọ, ohrọ-oriọ gbe uyoyou. Luk 21:19 o ta nọ: “Wha te thihakọ, wha ti siwi uzuazọ rai.” Ahwo Kọlọsi 3:12 o ta re nọ: ‘Wha whẹ ọdawẹ họ oma.’ 1 Ahwo Tẹsalonika 4:9, 10 o tẹ jẹ ta nọ: “Ọghẹnẹ o wuhrẹ owhai nọ wha you ohwohwo. . . . Rekọ, inievo, ma be tuduhọ owhai awọ nọ wha hai gbe ru onana ziezi.” Ehrẹ nana kpobi yọ ehrẹ nọ a kere se Ileleikristi nọ i bi thihakọ ebẹbẹ jọ no vẹre a te je wo ohrọ-oriọ gbe uyoyou no. Rekọ ẹme na họ u fo nọ emamọ iruemu nọ a wo na i re fi ai abọ kie he. Ere o gwọlọ nọ ma re ru nẹnẹ re. Ma te ta kpahe epanọ Ileleikristi ọsosuọ a ro dhesẹ nọ a wo ithihakọ, ohrọ-oriọ, gbe uyoyou gbe epanọ ma sae rọ rehọ aro kele ai. Eware esa nana i ti fiobọhọ kẹ omai ruẹrẹ oma kpahe kẹ uye ulogbo na.

GBẸ HAI THIHAKỌ

5. Eme o fiobọhọ kẹ Ileleikristi ọsosuọ thihakọ ebẹbẹ nọ i te rai?

5 Ebẹbẹ buobu i je te Ileleikristi ọsosuọ na, yọ u fo re a thihakọ. (Hib. 10:36) Ebẹbẹ jọ nọ i je te ai na, i je te ahwo kpobi evaọ oke yena. Rekọ ebẹbẹ efa jọ e jariẹ nọ i je te Ileleikristi ọvo. Ojọ rai họ, isu ahwo Ju gbe egọmeti Rom a je kpokpo ae. Yọ ahwo uviuwou ejọ nọ a jọ Ileleikristi hi a je kpokpo ai re. (Mat. 10:21) U te no ere no, ikọ erue a jẹ rehọ iwuhrẹ rai wha ozighi fihọ ukoko na. (Iruẹru 20:29, 30) Ileleikristi oke yena a je thihakọ ebẹbẹ nana kpobi. (Evia. 2:3) Kọ eme o fiobọhọ kẹ ai? A jẹ hae kareghẹhọ epanọ idibo Ọghẹnẹ oke anwae wọhọ Job a ro thihakọ. (Jem. 5:10, 11) A jẹ lẹ se Ọghẹnẹ re ọ kẹ ai ẹgba. (Iruẹru 4:29-31) Ere ọvo ho, a jẹ hai roro kpahe emamọ oware nọ o re noi ze nọ a te thihakọ.—Iruẹru 5:41.

6. Eme o fiobọhọ kẹ Sista Merita thihakọ ebẹbẹ nọ i te rie, kọ eme oyena u wuhrẹ owhẹ?

6 Ma rẹ jọ Ebaibol ruẹ iku idibo Ọghẹnẹ nọ i thihakọ, yọ iku itieye e rrọ ebe ukoko na re. Ma te bi se ai je roro didi kpahe ae, u re fiobọhọ kẹ omai thihakọ. U fiobọhọ kẹ oniọvo-ọmọtẹ jọ nọ a re se Merita nọ ọ rrọ obọ Albania thihakọ okenọ ahwo uwou riẹ a je kpokpo iei gaga. Ọ ta nọ: “Iku Job nọ mẹ romatotọ se e kẹ omẹ ẹgba. Ọmọziọ uye o bẹ Job hu. Yọ dede nọ ọ riẹ ohwo nọ ọ jẹ wha uye riẹ ze he, ọ ta nọ: ‘Bẹsenọ me re whu, me re siobọno ẹgbakiete mẹ hẹ!’ (Job 27:5) Nọ me roro te uye nọ o bẹ Job, me te rri ọmẹ inọ u te oware ovo ho. Mẹ riẹ ohwo nọ ọ be wha ebẹbẹ na kpobi ze, rekọ Job ọ riẹ ohwo nọ ọ jẹ wha ebẹbẹ riẹ ze he.”

7. Ẹbẹbẹ ologbo ọvo ọ gbẹ make rrọ otọ kẹ omai hi, eme ma rẹ gbẹ hai ru ghele?

7 Oware ofa nọ o sai fiobọhọ kẹ omai thihakọ họ, ma tẹ be hae lẹ se Jihova ẹsikpobi jẹ vuẹe oware nọ o be kẹ omai uye. (Fil. 4:6; 1 Tẹs. 5:17) Ẹsejọhọ who bi thihakọ ẹbẹbẹ ologbo ọvo obọnana ha. O tẹ make rrọ ere, emebẹbẹ efa jọ e be hai te owhẹ. Ẹsejọ eva e rẹ dha owhẹ nọ eware jọ e tẹ be via yọ whọ rẹ riẹ oware nọ who re ru hu. Kọ whọ be hae vuẹ Jihova, nọ oware utiọye na o tẹ be via? Whọ tẹ be hae lẹ sei re o fiobọhọ kẹ owhẹ thihakọ ebẹbẹ nọ i bi te owhẹ kẹdẹ kẹdẹ, ẹdẹfa nọ ẹbẹbẹ ologbo o te te owhẹ, who ti bo sei. Yọ u ti mu owhẹ ẹro inọ Jihova ọ be ruẹ oware kpobi nọ o be via kẹ owhẹ, ọ tẹ jẹ riẹ oghẹrẹ nọ o mai woma nọ ọ sai ro fiobọhọ kẹ owhẹ gbe oke nọ o re ro ru ei.—Ol. 27:1, 3.

ITHIHAKỌ

Ẹbẹbẹ kpobi nọ ma thihakọ riẹ, u re fiobọhọ kẹ omai thihakọ ọfa nọ o ti te omai (Rri edhe-ẹme avọ 8)

8. Ẹvẹ oriruo Mira u ro dhesẹ nọ ebẹbẹ nọ ma bi thihakọ rai nẹnẹ na i ti fiobọhọ kẹ omai thihakọ enọ i ti te omai ẹdẹfa? (Jemis 1:2-4) (Rri uwoho na re.)

8 Ma te bi thihakọ ebẹbẹ nọ i bi te omai nẹnẹ, u ti fiobọhọ kẹ omai thihakọ uye ulogbo na. (Rom 5:3) Fikieme ma rọ ta ere? Inievo mai buobu a ta nọ eware nọ a thihakọ rai vrẹ no, u fiobọhọ kẹ ae nọ a be sai ro thihakọ ebẹbẹ efa nọ i bi te ai. Eware egaga nọ i ru rai no e lẹliẹ ẹrọwọ rai ga no. Fikiere a fievahọ Jihova inọ o ti fiobọhọ kẹ ae thihakọ ẹbẹbẹ kpobi nọ o te rai. (Se Jemis 1:2-4.) Oniọvo jọ nọ a re se Mira nọ ọ rrọ ọkobaro evaọ obọ Albania ọ ta nọ eware nọ o thihakọ rai vrẹ no i fiobọhọ kẹe nọ ọ be sai ro thihakọ ebẹbẹ efa nọ i te rie. Ọ ta nọ ẹsejọ o re roro nọ ọye akpọ ọ be mae bẹ. Rekọ nọ ọ kareghẹhọ epanọ Jihova o ro fiobọhọ kẹe anwọ ikpe udhe ze na, o tẹ lẹliẹe nwene iroro. Ọ tẹ vuẹ omariẹ nọ: ‘Me re kru ẹrọwọ mẹ. Eware nọ Jihova o fiobọhọ kẹ omẹ thihakọ rai no anwọ oke yena kpobi ze na i te epanọ me re ro wo ẹrọwọ.’ Whẹ omara, hae kareghẹhọ epanọ Jihova o ro fiobọhọ kẹ owhẹ thihakọ ebẹbẹ jọ no. Jọ u mu owhẹ ẹro inọ ọ be ruẹ oware kpobi nọ o be via kẹ owhẹ, yọ who te thihakọ, ọ te ghale owhẹ. (Mat. 5:10-12) U te mu owhẹ ẹro ere, who ti thihakọ eware nọ e te via nọ uye ulogbo na u te muhọ no. Oke yena whọ vẹ te ta nọ ‘Jọ onọ o be via, o via.’ Keme whọ riẹ nọ Ọghẹnẹ ọ rrọ owhẹ emu.

WO OHRỌ-ORIỌ

9. Eme inievo nọ e jọ Antiọk ọrọ Siria a ru nọ u dhesẹ nọ ohrọ inievo rai o re rai?

9 Joma ta kpahe oware nọ Ileleikristi jọ a ru nọ a yo nọ ohọo u bi mu evaọ obọ Judia. Nọ ukoko nọ o jọ Antiọk obọ Siria a yo nọ ohọo o bi mu gaga, ohrọ inievo rai nọ e be rria obọ Judia o tẹ re ae. A te ru oware jọ nọ u dhesẹ nọ ohrọ rai o ginẹ re ae. Ebaibol ọ ta nọ: “Fikiere ilele na a tẹ jiroro nọ a rẹ zọhọ eware, wọhọ epaọ onọ omomọvo ọ rẹ sae rehọ ze, re a rọ dhogbo bru inievo nọ e be rria Judia.” (Iruẹru 11:27-30) Dede nọ obonọ inievo nọ akpọ ọ jẹ bẹ na a jọ o thabọ, inievo obọ Antiọk na a ta nọ a re fiobọhọ kẹ ae.—1 Jọn 3:17, 18.

OHRỌ-ORIỌ

Nọ eware okpẹtu e tẹ via kẹ inievo mai, jọ ohrọ rai o re omai re ma fiobọhọ kẹ ae (Rri edhe-ẹme avọ 10)

10. Eme ma re ru kẹ inievo mai nọ uye u te oma nọ u re dhesẹ nọ ma be re ohrọ rai? (Rri uwoho na re.)

10 Nọ ma te yo nọ uye u te inievo mai jọ, u fo re ma ru oware jọ nọ u re dhesẹ nọ ma be re ohrọ rai. Ma sae nọ ekpako ukoko mai sọ oware jọ o riẹ nọ ma sai ru ro fiobọhọ kẹ inievo na. Ma sai ru unevaze fihọ etehe unevaze rọkẹ iruo akpọ-soso, ma sae jẹ lẹ roro inievo na re. b (Itẹ 17:17) Joma kẹ oriruo jọ. Evaọ ukpe 2020, Egbẹgwae Ogbodhẹ nọ i bu vi egba izii gbe udhuvẹ-gbikpe (950) a ro mu evaọ akpọ na soso. Inievo nana a je fiobọhọ kẹ inievo nọ akpọ ọ jẹ bẹ fiki ẹyao COVID-19 nọ o je vo na. Inievo na a ru kẹhẹ. Fiki ohrọ inievo rai nọ o re rai, a fa emuore gbe eware efa se ai, a tẹ jẹ rehọ Ẹme Ọghẹnẹ tuduhọ ae awọ. Ere ọvo ho, a ruẹrẹ iwou inievo jọ nọ e raha, a bọ iwou ekpokpọ kẹ ejọ nọ iwou rai e raha muotọ, a ruẹrẹ Egwa Uvie jọ, jẹ wariẹ efa bọ.—Je rri 2 Ahwo Kọrint 8:1-4.

11. Ma te wo ohrọ-oriọ, ẹvẹ o sae rọ wha orro se Ọsẹ obọ odhiwu mai?

11 Nọ ma tẹ be re ohrọ inievo mai je bi fiobọhọ kẹ ai, amọfa a rẹ ruẹ oware nọ ma bi ru na. Ere o jọ nọ ofou ọwhibo jọ nọ a se Hurricane Dorian ọ raha Ọgwa Uvie jọ evaọ obọ Bahamas evaọ ukpe 2019. Okenọ a jẹ bọ Ọgwa Uvie na, inievo na a tẹ ta kẹ ọzae jọ nọ ọ rrọ ukoko ho nọ ọ rẹ bọ iwou re ọ nyaze ti ru iruo jọ kẹ ai. A tẹ nọe ugho nọ o ti mi. Ọzae na ọ tẹ vuẹ ae nọ: “Wha daezọ họ, me ti ru iruo na yọ mẹ te rehọ eware nọ a ti ro ru iruo na kpobi ze, . . . me ti mi owhai ugho ho. Jọ oyena o jọ onọ me ro fiobọhọ kẹ owhai, keme oghẹrẹ nọ wha re ro fiobọhọ kẹ ahwo rai nọ uye u te oma o were omẹ gaga. Wha rẹ re ohrọ rai wo umuo ho.” Ahwo buobu evaọ akpọ na a riẹ Jihova ha. Rekọ ibuobu a be ruẹ oware nọ Isẹri Jihova a bi ru. Ma tẹ be re ohrọ inievo mai je bi fiobọhọ kẹ ai, o rẹ lẹliẹ ahwo nana riẹ Jihova, ọnọ “ọ vọ avọ ohrọ” na.—Ẹf. 2:4.

12. Ma tẹ be re ohrọ inievo mai enẹna, eme o te lẹliẹ omai ru evaọ oke uye ulogbo na? (Eviavia 13:16, 17)

12 Eme ọ te via evaọ oke uye ulogbo na nọ o te lẹliẹ omai re ohrọ inievo mai? Ebaibol ọ ta nọ a ti ru eware ga kẹ ahwo nọ a rọwo nọ a rẹ jọ abọ esuo akpọ na ha. Oware yena o be via enẹna, yọ o te via evaọ oke uye ulogbo na re. (Se Eviavia 13:16, 17.) Nọ egọmeti o te bi kpokpo inievo mai o rẹ lẹliẹ eware jọ gaga kẹ ae. Inievo mai jọ a re tube wo emu nọ a rẹ re he. Nọ Jesu Kristi Ovie mai ọ te nyaze te raha akpọ omuomu nana, ajọ ọ ruẹ omai nọ ma be dhogbo bru inievo mai re ọ ta kẹ omai nọ: “Wha nyaze, [te] reuku Uvie” na.—Mat. 25:34-40.

GBẸ HAI YOU INIEVO NA

13. Ma te rri obe Ahwo Rom 15:7, emamọ ohrẹ vẹ Ileleikristi ọsosuọ na a lele nọ o lẹliẹ e rai you ohwohwo?

13 Ahwo kpobi nọ a jẹ ruẹ Ileleikristi ọsosuọ na a riẹ nọ a you ohwohwo gaga. Kọ o jọ lọlọhọ kẹ ae re a riẹ yerikugbe ohwohwo? Joma ta kpahe ukoko nọ o jọ Rom. Ahwo Ju a jọ ukoko na yọ Uzi Mosis a koko no emaha ze. Ahwo erẹwho efa a jọ ukoko na re yọ oghẹrẹ nọ a rọ yọrọ ae u wo ohẹriẹ. O wọhọ nọ Ileleikristi jọ evaọ oke yena a jọ erigbo, efa emuyẹ. O sae jẹ jọ nọ efa a wo erigbo dede. Kọ ẹvẹ aikpobi a sae te rọ riẹ yerikugbe dhedhẹ je you ohwohwo? Pọl ukọ na ọ tuduhọ ae awọ nọ a hai “dede ohwohwo rehọ.” (Se Ahwo Rom 15:7.) Eme họ otọ ẹme riẹ na? Ẹme nọ a fa nọ “dede ohwohwo rehọ” na, otọ riẹ họ epanọ who re dede ohwo nọ ọ ziọ uwou ra rehọ sasasa, gbe oghẹrẹ nọ a rẹ ghọ ọrara, hayo mu usu kugbe ohwo. Pọl ọ ta ọkpọ ẹme otiọye na kẹ Filimọn okenọ Onẹsimọs ọrigbo riẹ ọ dhẹ se iẹe ba. Ọ ta kẹe nọ jọ o “dede iei rehọ sasasa.” (Filim. 17) Prisila avọ Akwila a dede Apọlọs rehọ dede nọ ọ re riẹ oghẹrẹ nọ eware e rrọ evaọ ukoko na ziezi hi. Ebaibol ọ ta nọ “a tẹ rehọ iẹe fihọ usu rai.” (Iruẹru 18:26) Enana kpobi i dhesẹ nọ dede nọ Ileleikristi ọsosuọ na a jọ epọvo na ha, a jẹ riẹ yerikugbe ohwohwo.

UYOYOU

Eva e rẹ were omai nọ inievo mai kpobi a te you omai (Rri edhe-ẹme avọ 15)

14. Eme Sista Anna avọ ọzae riẹ a ru nọ u dhesẹ nọ a you inievo na?

14 Ma te bi kuomagbe inievo efa evaọ ukoko na, te enọ ma riẹ tere he, yọ ma bi dhesẹ nọ ma you rai kpobi. Ae omarai a ti ru epọvo na re. O vẹ te whae ze nọ uyoyou nọ ma wo kẹ ohwohwo evaọ ukoko na u ti ro dhe ẹgẹga. (2 Kọr. 6:11-13) Joma kẹ oriruo epanọ oniọvo mai jọ nọ a re se Anna avọ ọzae riẹ a je ro kuomagbe inievo na. Nọ a vi ai kpohọ iruo imishọnare evaọ West Africa, oke yena ẹyao COVID-19 u ro du lahwe. Nọ a te obei, a sai je kuomagbe inievo na ru ewuhrẹ evaọ Ọgwa Uvie he. Kọ eme oniọvo na avọ ọzae riẹ a ru nọ u dhesẹ nọ a you inievo na? A jẹ rọ ekọmputa gbe ifonu rai thuru kugbe inievo na. Yọ ẹsikpobi nọ a te se inievo na, a rẹ vuẹ ae nọ a ginẹ gwọlọ riẹ ae ziezi. Eva e were inievo ukoko na gaga, yọ ae omarai a jẹ hae rọ ifonu se Anna avọ ọzae riẹ je vi uwou se ai kẹse kẹse. Kọ eme o lẹliẹ Sista Anna avọ ọzae riẹ je ru oware nana? Anna ọ ta nọ, “Inievo ukoko na a jẹ hai no abotọ mai hi, yọ a jẹ hai dikihẹ kẹ omai nọ eware e tẹ make rrọ oghẹrẹ jọ. Mẹ gwọlọ ru epọvo na kẹ inievo efa re.”

15. Eme iku Vanessa i wuhrẹ omai nọ o rẹ sai fiobọhọ kẹ omai you inievo mai kpobi? (Rri uwoho na re.)

15 Mai ahwo buobu ma rrọ ukoko nọ ahwo nọ a no eria efa ze a rrọ. Uruemu ejọ, oghẹrẹ nọ a rọ yọrọ ae, gbe uzuazọ nọ a yeri no u wo ohẹriẹ gaga no omai. Ma tẹ be hai muẹrohọ emamọ uruemu rai, o rẹ lẹliẹ omai you rai gaga. Oniọvo-ọmọtẹ jọ nọ a re se Vanessa nọ ọ rrọ obọ New Zealand ọ ta nọ oke ọsosuọ, ọ jẹ sae riẹ yerikugbe inievo jọ ziezi hi. Keme oghẹrẹ nọ inievo jọ a jẹ hai ru o were riẹ hẹ. Kọ oniọvo na ọ ta nọ, ‘Jọ a jọ orai re mẹ jọ omẹ?’ Ijo. Ọ jẹ tubẹ daoma kuomagbe inievo na vi epaọ ọsosuọ. Ẹmẹrera na ọ tẹ te ruẹ nọ a wo emamọ iruemu jọ nọ o lẹliẹ Jihova you rai. Sista Vanessa ọ ta nọ: “Anwẹnọ a ro fi ọzae mẹ họ ọsẹro okogho na, ma be jọ kugbe inievo buobu nọ uruemu rai u wo ohẹriẹ no omai. Yọ o gbẹ be bẹ omẹ tere he re me lele inievo na riẹ yeri. O tubẹ were omẹ dede inọ mai ọvuọ uruemu riẹ ma wo. Obọnana mẹ ruẹ no nọ Jihova ọ gwọlọ nọ ahwo nọ a wo ọvuọ uruemu riẹ a jọ ukoko riẹ.” Nọ ma tẹ be daoma muẹrohọ emamọ eware nọ inievo mai a bi ru, u re dhesẹ nọ ma you rai, ma tẹ be jẹ rọ aro kele Jihova.—2 Kọr. 8:24.

Jihova ọ te thọ omai evaọ oke uye ulogbo na nọ ma te bi kuomagbe inievo mai gọe (Rri edhe-ẹme avọ 16)

16. Fikieme u ti ro wuzou gaga re ma you ohwohwo evaọ oke uye ulogbo na? (Rri uwoho na re.)

16 U ti fo re ma you inievo mai gaga evaọ oke uye ulogbo na. Nọ uye ulogbo na u te muhọ no, ẹvẹ Jihova ọ te rọ thọ omai? Kareghẹhọ oware nọ Jihova ọ ta kẹ ahwo riẹ nọ a ru okenọ amọfa a te rọ wọ ohọre ziọ Babilọn. Ọ ta kẹ ae nọ: “Ahwo mẹ, wha nya, wha ruọ eva ibrikpẹ obeva rai, wha kare ethẹ rai dhe oma. Wha dhere omoke kpẹkpẹe bẹsenọ ofu na ọ rẹ vrẹ no.” (Aiz. 26:20) O wọhọ nọ oware ovona ma ti ru re nọ uye ulogbo na u te muhọ no. Ẹsejọhọ ọvuọ ukoko riẹ nọ ma rrọ na họ “ibrikpẹ obeva” nọ a fodẹ na. Jihova ọ te thọ omai evaọ oke uye ulogbo na nọ ma te bi kuomagbe inievo mai gọe. Fikiere, joma daoma ziezi re ma hai thihakọ kẹ ohwohwo jẹ kpairoro vrẹ eware nọ inievo mai a ru omai thọ. Joma you inievo mai keme ẹsejọhọ ere Jihova ọ te rọ thọ omai.

MU OMA HỌ ẸRUẸRẸ KPAHE ENẸNA

17. Eme ma ti ru evaọ oke uye ulogbo na nọ ma tẹ ruẹrẹ oma kpahe enẹna?

17 “Ẹdẹ ologbo Jihova” ọ te jọ ẹdẹ idhọvẹ gaga kẹ ahwo-akpọ. (Zẹf. 1:14, 15) Eware e te jọ gaga kẹ ahwo Jihova re. Rekọ ma te mu oma họ ẹruẹrẹ kpahe enẹna, udu u ti bru omai hi evaọ oke yena, yọ ma te sai fiobọhọ kẹ amọfa re. Ma ti thihakọ ebẹbẹ nọ i te omai. Nọ ma tẹ ruẹ inievo mai nọ uye o be bẹ, ohrọ rai o te re omai. Ma ve ti ru oware jọ ro fiobọhọ kẹ ae. Yọ fikinọ ma you inievo mai, o te whae ze nọ a tẹ maki ru eva dha omai, ma te gbẹ jọ kugbe ai ghele. Ukuhọ riẹ Jihova ọ vẹ te ghale omai. Ọ vẹ te kẹ omai uzuazọ ebẹdẹ bẹdẹ evaọ akpọ nọ eware okpẹtu gbe uye ọvo o te jọ họ. Ma gbẹ te kareghẹhọ uye nọ o bẹ omai evaọ akpọ nana ha.—Aiz. 65:17.

OLE AVỌ 144 Fiẹrohọ Osa Na!

a Uviemenẹ uye ulogbo na u ti muhọ. Ma tẹ jọ oke nana wuhrẹ epanọ a re thihakọ, jẹ daoma wo ohrọ-oriọ gbe uyoyou, u ti fiobọhọ kẹ omai oke yena nọ akpọ ọ te rọ tahaku na. Ma te ta kpahe epanọ eware yena i ro fiobọhọ kẹ Ileleikristi ọsosuọ gbe epanọ e sai ro fiobọhọ kẹ omai ruẹrẹ oma kpahe kẹ uye ulogbo na.

b Ahwo nọ a gwọlọ fiobọhọ kẹ inievo nọ oware okpẹtu o via kẹ, a rẹ kaki fili efọmo Local Design/Construction Volunteer Application (DC-50) hayo Application for Volunteer Program (A-19) a vẹ hẹrẹ re a se ai tao re a tẹ te nyai fiobọhọ kẹ inievo nọ oware okpẹtu o via kẹ.