Kpohọ eme nọ e riẹ eva

Kpohọ oria eware nọ e riẹe eva

UZOẸME UWUHRẸ 30

Daoma You Jihova gbe Amọfa Vi Epaọ Ọsosuọ

Daoma You Jihova gbe Amọfa Vi Epaọ Ọsosuọ

“Re uyoyou u ru omai wo ẹnyaharo evaọ eware kpobi.”—ẸF. 4:15.

OLE AVỌ 2 Jihova Họ Odẹ Ra

EWARE NỌ MA TI WUHRẸ a

1. Eware jọ vẹ who wuhrẹ nọ who mu Ebaibol họ ewuhrẹ obọ?

 KỌ WHỌ kareghẹhọ oke ọsosuọ nọ who ro mu Ebaibol họ ewuhrẹ? Ẹsejọhọ akpọ o gbe owhẹ unu evaọ ẹdẹ ọsosuọ nọ whọ rọ riẹ nọ Ọghẹnẹ o wo odẹ. Yọ o sae jọ nọ okenọ who wuhrẹ nọ Ọghẹnẹ ọ rẹ rọ erae mahe ahwo evaọ ehẹle he, o lẹliẹ udu te owhẹ otọ. Ere ọvo ho, o sae jẹ jọ nọ eva e were owhẹ gaga nọ who wuhrẹ nọ Ọghẹnẹ ọ te kpare ahwo ra nọ i whu no ze, whai kpobi wha vẹ te rria aparadase!

2. Eme who ru nọ who je wuhrẹ Ebaibol na? (Ahwo Ẹfisọs 5:1, 2)

2 Nọ who mu Ebaibol họ ewuhrẹ ziezi no, who te mu Jihova họ eyou vi epanọ who you rie vẹre. Yọ fikinọ who you rie, who te je ru oware nọ who je wuhrẹ na. Whọ tẹ gwọlọ ru oware jọ, who re rri ẹme nọ Ebaibol ọ ta, who ve ru oware nọ u fo. Whọ daoma nwene uruemu ra gbe oghẹrẹ nọ who re rri eware re eva ra e sae were Ọghẹnẹ. Ere ọvo ho, whọ daoma jẹ rọ aro kele Ọsẹ obọ odhiwu ra wọhọ epanọ ọmọ ọ rẹ rọ aro kele ọsẹ hayo oni riẹ nọ o you rie gaga na.—Se Ahwo Ẹfisọs 5:1, 2.

3. Enọ vẹ ma sae nọ omobọ mai?

3 U fo re ma nọ omobọ mai nọ: ‘Kọ epanọ me you Jihova te okenọ me ro kurẹriẹ obọ, ere me gbe you rie kabinọ me you rie ga vi ere no? Kọ anwẹnọ mẹ rọ họ-ame na, mẹ be daoma re uruemu mẹ gbe eware nọ me bi roro e jọ enọ e rẹ were Jihova? Kọ me bi ru oware nọ u dhesẹ nọ me you inievo ukoko na?’ Otẹrọnọ “uyoyou nọ who wo oke ọsosuọ” o gbẹ ga tere he, jọ o kẹ owhẹ uye ga hrọ họ. Oware utioye o via kẹ Ileleikristi jọ evaọ oke anwae. Rekọ Jesu ọ rọ fiki ere mu ofu kẹ ai hi, ukpoye ọ daoma tuduhọ ae awọ. (Evia. 2:4, 7) Jesu ọ riẹ nọ uyoyou nọ ma wo kẹ Jihova gbe amọfa o gbẹ make ga te epaọ ọsosuọ họ, ma sai ru oware jọ kpahe iẹe. O vẹ te wariẹ ga.

4. Eme ma te ta kpahe evaọ uzoẹme nana?

4 Ma te jọ uzoẹme nana ta kpahe oware nọ ma rẹ sai ru re uyoyou nọ ma wo kẹ Jihova gbe amọfa ọ hai dhe ẹgẹga ọvo. Ma te jẹ ta kpahe erere nọ o re te omai nọ ma tẹ daoma you Jihova gbe amọfa vi epaọ ọsosuọ.

JỌ UYOYOU NỌ WHO YOU JIHOVA U DHE ẸGẸGA

5-6. Ebẹbẹ vẹ i te Pọl ukọ na, kọ ẹvẹ ọ jẹ sae rọ gọ Jihova ghele?

5 Iruo Jihova nọ Pọl ukọ na o je ru e jẹ lẹliẹ eva were iẹe gaga, yọ Jihova ọ ginẹ ghale iẹe re. Rekọ ebẹbẹ buobu i te rie. Ẹsibuobu ọ jẹ hai kpohọ eria nọ i thabọ gaga nyae ta usi uwoma. Uye o rẹ bẹ ohwo gaga nọ o te bi kpohọ erẹ evaọ oke yena. Ẹsejọ nọ Pọl o te bi kpohọ erẹ, uzuazọ riẹ ọ rẹ jọ “ọza evaọ ithẹ” yọ “igbulegbu” e jẹ hai kpokpo gaga. Ere ọvo ho, evaọ ẹsejọ, ahwo nọ a jẹ wọso ẹe a jẹ hai kpei ukpe ẹsọ. (2 Kọr. 11:23-27) Inievo ukoko na nọ Pọl ọ jẹ rọ fiki rai ruẹ uye na, oware nọ ejọ a re ru gbe eme nọ a rẹ ta kpahe Pọl ẹsejọ i re kiehọ tere he.—2 Kọr. 10:10; Fil. 4:15.

6 Kọ ẹvẹ Pọl ọ sae rọ gọ Jihova dede nọ ebẹbẹ i je tei? Eware nọ Pọl ọ jọ Ikereakere na wuhrẹ kpahe Jihova gbe eware nọ Jihova o fiobọhọ kẹe thihakọ rai e lẹliẹ e riẹ riẹ nọ Jihova o you rie gaga. (Rom 8:38, 39; Ẹf. 2:4, 5) Ọyomariẹ o te ti je you Jihova gaga re. Kọ eme onana o lẹliẹ Pọl ru? Ọ tẹ jẹ gbodibo kẹ Ọghẹnẹ yọ ‘ọ ruabọhọ jẹ gbodibo kẹ erẹri na.’—Hib. 6:10.

7. Eme ma re ru re ma sai you Jihova vi epaọ ọsosuọ?

7 Mai omamai, ma tẹ be hai romatotọ roro didi kpahe oware nọ ma se evaọ Ebaibol, o te lẹliẹ omai you Jihova gaga re. Who te bi se Ebaibol, whọ họrọ oma ha, roro didi re whọ jariẹ wuhrẹ oware jọ kpahe Jihova. Hae nọ omara nọ: ‘Eme mẹ jọ oria nọ me se na wuhrẹ nọ u dhesẹ nọ Jihova o you omẹ? Kọ eme mẹ jariẹ wuhrẹ nọ o te lẹliẹ omẹ you Jihova?’

8. Eme ọfa ma re ru re ma you Jihova vi epaọ ọsosuọ?

8 Oware ofa nọ u ti fiobọhọ kẹ omai you Jihova gaga họ, nọ ma tẹ be lẹ sei jẹ ta eva mai kpobi kẹe. (Ol. 25:4, 5) Ma tẹ lẹ se Jihova o ti yo olẹ mai. (1 Jọn 3:21, 22) Oniọvo-ọmọtẹ jọ nọ a re se Khanh evaọ obọ Asia ọ ta nọ: “Anwẹdẹ eware nọ mẹ jọ Ebaibol wuhrẹ, e lẹliẹ omẹ you Jihova. Rekọ nọ oke o be nyaharo na, nọ mẹ jẹ te ruẹ epanọ Jihova o bi ro yo olẹ mẹ, me te you rie vi epaọ ọsosuọ. Mẹ tẹ ta nọ mẹ rẹ daoma hai ru oware nọ o rẹ were iẹe ẹsikpobi.” b

RU RE UYOYOU NỌ WHO YOU AMỌFA O HAI DHE ẸGẸGA

9. Eme o lẹliẹ Pọl jiri Timoti?

9 Nọ Pọl ukọ na o kurẹriẹ ruọ ukoko Ileleikristi no, imikpe jọ e jẹ vrẹ no, avọ Timoti a tẹ te riẹ oma. Timoti o you Jihova gaga, o te je you amọfa re. Evaọ ileta nọ Pọl o kere se inievo obọ Filipai ọ ta kẹ ae nọ: “Me wo omọfa nọ o wo ọkpọ uruemu [Timoti hi] nọ ọ te rọ eva riẹ kpobi rẹrote eware nọ e rrọ ọdawẹ kẹ owhai.” (Fil. 2:20) Orọnikọ fikinọ Timoti ọ riẹ epanọ a re ru ẹme gaga hayo o re ru eware kpatiẹ, oye o lẹliẹ Pọl je jiri ei hi. Rekọ fikinọ Timoti o you inievo na gaga yọ onana o jẹ lẹliẹ eva riẹ were Pọl. Yọ ma riẹ nọ ẹsenọ ukoko jọ u te yo nọ Timoti ọye ọ be nyabru ai ze, eva ọvo e rẹ were ai.—1 Kọr. 4:17.

10. Eme Anna avọ ọzae riẹ a ru nọ u dhesẹ nọ a gine you inievo ukoko na?

10 U fo re ma hae gwọlọ oghẹrẹ kpobi nọ ma re ro fiobọhọ kẹ inievo mai. (Hib. 13:16) Kọ whọ kareghẹhọ Sista Anna nọ ma ta ẹme kpahe evaọ uzoẹme nọ o vrẹ na? Okenọ ofou ọgaga jọ o ro fou, ọ raha eware ahwo gaga. Avọ ọzae riẹ a te kpobọ uwou oniọvo jọ. Nọ a te etẹe, a tẹ ruẹ nọ ofou o fou idhe uwou rai kpare no. Oso ọ rrọ fihọ iwu rai, iwu rai kpobi e tẹ jọ gbegbe lahiẹ lahiẹ. Kọ eme Anna avọ ọzae riẹ a ru? Anna ọ ta nọ: “Ma tẹ kwa iwu inievo na kpo nyae fọrọ. Ma tẹ jẹ kpa iwu na jẹ nabi kpiri ai se inievo na. Ma rri nọ oware nọ ma ru na u te oware ovo ho. Rekọ o da inievo na ẹro fia yọ o wha riẹ ze nọ ma rọ kẹle ohwohwo gaga rite inẹnẹ na.” Kọ eme o lẹliẹ Anna avọ ọzae riẹ fiobọhọ kẹ inievo na? Fikinọ a you rai.—1 Jọn 3:17, 18.

11. (a) Nọ ma te fiobọhọ kẹ inievo ukoko na, ẹvẹ a re rri rie? (b) Eme obe Itẹ 19:17 o ta nọ Jihova o re ru nọ ma te fiobọhọ kẹ inievo mai?

11 Nọ ma te you inievo ukoko na jẹ be daoma ru oware jọ ro fiobọhọ kẹ ai, a te ruẹ nọ ma be daoma rọ aro kele Jihova. Eva e te were ae gaga inọ ma bi fiobọhọ kẹ ai. Oniọvo nọ a re se Khanh nọ ma ta ẹme kpahe oke ẹsiẹ na, ọ kareghẹhọ epanọ inievo na a ro fiobọhọ kẹe. Ọ ta nọ: “Inievo na a jẹ hae wọ omẹ kpohọ usi uwoma, a jẹ hai se omẹ re me lele ae re emu jẹ da umudi. Ma je ru kpobi no, a vẹ jẹ wọ omẹ kpo. Inievo na a gine you omẹ gaga, a daoma wo umuo ho, eware nọ a ru kẹ omẹ e da omẹ ẹro fia.” Orọnikọ ẹsikpobi nọ ma te ru oware jọ kẹ inievo mai, a ti yere omai hi. Khanh ọ ta nọ: “Mẹ gwọlọ nọ mẹ rẹ romatotọ yere inievo na kpobi nọ a je fiobọhọ kẹ omẹ na, rekọ mẹ riẹ obonọ aikpobi a be rria ha. Rekọ mẹ riẹ nọ Jihova ọ riẹ oria nọ aikpobi a rrọ, yọ mẹ rẹ lẹ nọ jọ Jihova ọ ghale ae kẹ omẹ.” Wọhọ epanọ Khanh ọ ta na, Jihova o re muẹrohọ oware kpobi nọ ma ru ro fiobọhọ kẹ inievo mai o tẹ make rrọ omoware osese dede. O re rri rie wọhọ emamọ idhe nọ ma dhe kẹe. Ere ọvo ho, o re rri rie nọ ma momo oware jọ kẹe yọ ọ te hwa osa zihe kẹ omai.—Se Itẹ 19:17.

Nọ ohwo ọ tẹ be daoma fiobọhọ kẹ amọfa, yọ u dhesẹ nọ ọ be nyaharo evaọ egagọ Jihova (Rri edhe-ẹme avọ 12)

12. Eme inievo-emezae a rẹ sai ru nọ u re dhesẹ nọ a you inievo ukoko na? (Rri iwoho na re.)

12 Whai inievo-emezae, eme wha re ru nọ u re dhesẹ nọ wha you inievo ukoko na, jẹ gwọlọ fiobọhọ kẹ ai? Uzoge ọmọzae jọ nọ a re se Jordan ọ nọ ọkpako ukoko rai jọ oware nọ ọ sai gbe ru ro fiobọhọ evaọ ukoko rai. Ọkpako na o jiri rie gaga jẹ vuẹe inọ ọ be daoma ziezi evaọ ukoko na. Ọ tẹ vuẹe nọ ọ sae hae kake ziọ ewuhrẹ re o yere inievo na, ọ hae kẹ uyo, ọ hai lele inievo nọ a gbẹ rrọ utu usi uwoma ota kpohọ usi uwoma ẹsikpobi. Ọ sae jẹ daoma fiobọhọ kẹ oniọvo nọ ọ gwọlọ obufihọ. Brọda Jordan o te gine ru epanọ ọkpako na ọ ta kẹe na. Ọ tẹ te ruẹ idhere efa nọ ọ sai ro fiobọhọ kẹ inievo ukoko na, o te je you rai vi epaọ ọsosuọ. U te no ere no, Jordan ọ tẹ te ruẹ nọ orọnikọ a rẹ rọ ohwo mu odibo oruiruo tao re o te ti mu inievo na họ efiobọhọ kẹ hẹ. Rekọ ọ rẹ hai ru ere no anwẹdẹ. Nọ a jẹ rehọ iẹe mu no, ọ vẹ ruabọhọ iẹe.1 Tim. 3:8-10, 13.

13. Fikinọ Brọda Christian o you inievo ukoko na, eme o ru nọ o wha riẹ ze nọ a rọ wariẹ rehọ iẹe mu ọkpako?

13 Kọ eme who re ru otẹrọnọ whẹ jọ ọkpako ukoko hayo odibo oruiruo vẹre, a te si owhẹ no? Kareghẹhọ inọ iruo kpobi nọ who ru kẹ Jihova no e rẹ thọrọ iẹe ẹro ho. Yọ ọ riẹ nọ fikinọ who you rie gbe inievo ukoko na who ro ru eware yena kpobi na. (1 Kọr. 15:58) Yọ eware kpobi nọ who gbe bi ru evaọ ukoko na o bi muẹrohọ ai re. U wo oniọvo jọ nọ a re se Christian nọ a si no ọkpako oke jọ, yọ o kẹ riẹ uye gaga. Ọ ta nọ: “Mẹ tẹ ta nọ te mẹ rrọ ọkpako te mẹ rrọ ọkpako ho, mẹ rẹ gbẹ daoma ru utho nọ mẹ rẹ sai ru evaọ ukoko na keme me you Jihova.” Uwhremu na, a tẹ te wariẹ rọ oniọvo na mu ọkpako. Brọda Christian ọ ta nọ: “Nọ a wariẹ rọ omẹ mu ọkpako, ozọ o jẹ dina mu omẹ. Rekọ mẹ tẹ ta nọ otẹrọnọ Jihova ọ re ohrọ mẹ, o te ru nọ a rọ wariẹ rehọ omẹ mu ọkpako, mẹ rẹ daoma ru iruo nọ ọ kẹ omẹ na keme me you rie gbe inievo ukoko na.”

14. Eme whọ jọ ẹme Sista Elena na wuhrẹ?

14 U fo nọ mai idibo Jihova ma re you ahwo nọ a rrọ ukoko na ha re. (Mat. 22:37-39) Oniọvo-ọmọtẹ jọ nọ a re se Elena nọ ọ rrọ obọ Georgia ọ ta nọ: “Vẹre vẹre, oware nọ o jẹ hae lẹliẹ omẹ kpohọ usi uwoma họ, fikinọ me you Jihova. Rekọ nọ oke o be nyaharo na, uyoyou nọ me you Jihova u te bi dhe ẹgẹga. O tẹ whae ze nọ me ro mu ahwo nọ mẹ be ta usi uwoma kẹ họ eyou re. Mẹ jẹ hai roro kpahe ebẹbẹ nọ i bi te ai. Yọ taure me te ti kpohọ usi uwoma, me re roro kpahe ẹme nọ mẹ sae ta nọ o ti te ai udu. Fikinọ mẹ jẹ hai roro kpahe ae, o soriẹ ze nọ mẹ rọ gwọlọ nọ me re fiobọhọ kẹ ai.”—Rom 10:13-15.

EGHALE NỌ I TI TE OMAI NỌ MA TE YOU AMỌFA

Omoware nọ ma ru ro fiobọhọ kẹ ohwo jọ o sae wha erere se amọfa (Rri edhe-ẹme avọ 15-16)

15-16. Wọhọ epanọ ma be ruẹ evaọ uwoho na, ẹvẹ obọ nọ ma fihọ kẹ ohwo jọ ọ rẹ rọ wha erere se amọfa?

15 Nọ ma te fiobọhọ kẹ oniọvo jọ, amọfa a rẹ re erere oware nọ ma ru kẹe na. Joma kẹ oriruo jọ. Nọ ẹyao COVID-19 o muhọ evo no, Brọda Paolo avọ aye riẹ a te je wuhrẹ inievo-emetẹ buobu nọ e kpako no epanọ a sae rọ rehọ ifonu rai ta usi uwoma. Oniọvo-ọmọtẹ jọ ọ jẹ kake riẹ oghẹrẹ nọ o re ro ru ei hi. Rekọ ẹmẹrera na ọ tẹ te riẹ oghẹrẹ nọ ọ rẹ rọ rehọ ifonu ta usi uwoma. Evaọ ezi Emu Owọwọ, oniọvo na ọ rehọ ifonu riẹ zizie imoni riẹ. Yọ imoni riẹ nọ e rehọ ifonu thuru kugbe Emu Owọwọ na a bu te udhosa soso. Whọ ruẹ na? Obọ nọ Brọda Paolo avọ aye riẹ a fihọ kẹ oniọvo-ọmọtẹ na, oye imoni riẹ a re erere riẹ na. Uwhremu na, oniọvo-ọmọtẹ na o kere se Paolo nọ: “Me yere owhẹ gaga nọ who ro wuhrẹ omai inievo nọ e kpako no oghẹrẹ nọ a rẹ rọ ifonu ta usi uwoma. Jihova ọ rehọ owhẹ fiobọhọ kẹ omai gaga.”

16 Oware nọ o via na u wuhrẹ Brọda Paolo oware jọ nọ u wuzou gaga. Ọ ruẹ nọ re ma you inievo mai, je fiobọhọ kẹ ae oye o mae roja, orọnikọ eriariẹ nọ ma wo hayo oware jọ nọ ma rẹ riẹ ru gaga ha. Ọ ta nọ: “Mẹ jọ ọsẹro ọnyawariẹ vẹre. Yọ mẹ riẹ nọ ẹsejọhọ eme nọ me ru oke yena e te thọrọ inievo na ẹro no. Rekọ rite inẹnẹ na, a rẹ gbẹ kareghẹhọ obọ nọ me fihọ kẹ ai.”

17. Nọ ma te fiobọhọ kẹ inievo mai, kọ erere jọ o re te omai re? Kẹ oriruo.

17 Ẹsejọ nọ ma te fiobọhọ kẹ amọfa no, erere nọ o re te omai u re gbe omai unu. Oware utioye o via kẹ oniọvo jọ nọ a re se Jonathan nọ ọ rrọ obọ New Zealand. Evaọ uvo Ẹdẹ-Ọmaha jọ, ọ tẹ ruẹ ọkobaro jọ nọ ọ be ta usi uwoma evaọ edhere. No umuo oke yena vrẹ, Brọda Jonathan ọ tẹ jẹ hai lele ọkobaro na kpohọ usi uwoma evaọ uvo Ẹdẹ-Ọmaha. Irere nọ i te rie uwhremu na, a tẹ vuẹe nọ irere itieye i ti tei, ọ rẹ rọwo ho. Jonathan ọ ta nọ: “Oke yena usi uwoma ota o jẹ hae were omẹ tere he. Rekọ nọ me je lele ọkobaro na kpohọ usi uwoma, me je muẹrohọ oghẹrẹ nọ o bi ro wuhrẹ ahwo, jẹ ruẹ epanọ Ọghẹnẹ ọ be rọ ghale iẹe, usi uwoma ota u te ti mu omẹ họ ẹwere. Mẹ avọ oniọvo na ma tẹ te kẹle ohwohwo ziezi yọ o fiobọhọ kẹ omẹ gaga nọ me ro wo ajọwha usi uwoma ota. Ere ọvo ho, o wha riẹ ze nọ mẹ rọ kẹle Jihova vi epaọ ọsosuọ no.”

18. Eme Jihova ọ gwọlọ nọ ma ru?

18 Jihova ọ gwọlọ nọ ma you rie vi epanọ ma you rie vẹre, uyoyou nọ ma you amọfa u ve je dhe ẹgẹga. Ma jọ uzoẹme nana wuhrẹ nọ u fo re ma hae romatotọ se Ebaibol je roro didi, ma rẹ hae jẹ lẹ se Jihova ẹsikpobi. Ma te ru ere, ma ti you Jihova vi epaọ ọsosuọ. Yọ ma tẹ be hai fiobọhọ kẹ inievo mai, o rẹ lẹliẹ omai you rai vi epaọ anwẹdẹ. Enana kpobi e te whae ze nọ ma te rọ kẹle Jihova gbe inievo ukoko na vi epaọ ọsosuọ. Ma vẹ te jọ egbẹnyusu Jihova gbe inievo mai bẹdẹ bẹdẹ.

OLE AVỌ 109 Wha You Ohwohwo No Udu Ze

a Te ma kurẹriẹ ziọ ukoko na obọ, hayo u kri no nọ ma ro kurẹriẹ, mai kpobi na ma rẹ gbẹ daoma nyaharo. Ma te jọ uzoẹme nana ta ẹme te oware jọ nọ u re fiobọhọ kẹ omai nyaharo evaọ ukoko na. Oye họ ma rẹ daoma re ma you Jihova gbe amọfa vi epanọ ma you rai vẹre. Nọ ma te ta kpahe epanọ ma sai ro ru ere na, hai roro kpahe epanọ whọ daoma you Jihova gbe amọfa te no. Hai je roro kpahe epanọ whọ sai gbe ro you rai vi ere.

b Ma nwene edẹ na jọ.