Kọ u gine fo re a se ahwo nọ a jẹ zẹ erao evaọ etẹmpol Jerusalẹm na “iwhewheriwhe”?

OBE Matiu o ta nọ: “Jesu ọ tẹ ruọ etẹmpol na o te le ahwo kpobi nọ a jẹ zẹ eware gbe enọ e jẹ dẹ evaọ etẹmpol na ruọ otafe, o te gele emẹjẹ inwene-igho na kie gbe ekpala enọ e jẹ zẹ irueruẹ. Ọ tẹ ta kẹ ae nọ: ‘A kere nọ, “A re ti se uwou mẹ uwou olẹ,” rekọ wha ru rie fihọ uwou iwhewheriwhe no.’”Mat. 21:12, 13.

Eware nọ a kere fihotọ kpahe ahwo Ju i dhesẹ nọ otu nọ ọ jẹ hae zẹ eki evaọ etẹmpol na a jẹ hai mi igho buobu, rọ ere wha ehreki rai re. Wọhọ oriruo, Obe ahwo Ju jọ nọ a re se Mishnah o ta kpahe oware jọ nọ o via evaọ ikpe-udhusoi ọsosuọ, nọ ugho nọ a rẹ zẹ ilekuku ivẹ nọ a re ro dhidhe o ghare te ubiugho nọ a re se golden denar. Ohwo o re ru iruo edẹ udhegbisoi re ọ sai wo ugho nana. Whaọ Ọghẹnẹ ọ kuvẹ nọ iyogbere e rẹ sae rọ ilekuku hayo irueruẹ dhidhe kẹe, rekọ i te ti zihe ruọ evra nọ a jẹ sae dẹ notọ họ. (Izerẹ 1:14; 5:7; 12:6-8) Onana u te ru eva dha owuhrẹ egagọ ahwo Ju jọ nọ a re se Rabbi Simeon ben Gamaliel gaga, kẹsena o te fi uzi họ nọ u ru nọ idhe nọ o gbahọ nọ ahwo a re dhe i gbe ro bu tere he. Onana u te ru nọ unuigho ilekuku u ro kpotọ gaga keme a gbẹ jẹ dẹ ae tere he. A tẹ ghale ugho golden denar na kpohọ abọ udhusoi, kọ abọvo riẹ a jẹ rọ dẹ ilekuku ivẹ.

Ma te roro kpahe oware nọ o via na, Jesu ọ ta gba nọ o ro se ahwo na “iwhewheriwhe” fiki uvou-uthei gbe ofruriọ rai.