Kpohọ eme nọ e riẹ eva

Kpohọ oria eware nọ e riẹe eva

IKUIGBE UZUAZỌ

Emamọ Iriruo nọ Mẹ rọ Aro Kele O Wha Eghale Se Omẹ

Emamọ Iriruo nọ Mẹ rọ Aro Kele O Wha Eghale Se Omẹ

OKENỌ mẹ gbẹ jọ ọmaha, usi uwoma ota o jẹ hae bẹ omẹ. Yọ mẹ be kpako ze na, a kẹ omẹ ewha-iruo sa-sa nọ me roro nọ mẹ te sai ru ẹdẹvo ho. Jọ me gbiku kẹ owhẹ kpahe emamọ iriruo ahwo jọ nọ mẹ rọ aro kele, onọ u si ozọ no omẹ ẹro je ru nọ eghale buobu i ro te omẹ evaọ etoke ikpe udhuvẹ gbe ikpegberee nọ mẹ rọ rrọ iruo odibọgba oke-kpobi na.

A yẹ omẹ evaọ Quebec, ẹkwotọ Canada jọ nọ a rẹ jọ ta ẹvẹrẹ French. Ọsẹgboni mẹ, Louis avọ Zélia a you omẹ jẹ rẹrote omẹ ziezi. Ọsẹ mẹ o re kuomagbe ahwo tere he, yọ obe-use o rẹ were iẹe gaga. Eware-ikere e rẹ were omẹ gaga yọ mẹ jẹ jiroro nọ evaọ obaro mẹ te jọ ohwo nọ ọ rẹ niyẹrẹ.

Nọ mẹ jọ ikpe ikpegbivẹ, ọzae jọ nọ avọ ọsẹ mẹ a gbe je ru iruo, nọ a re se Rodolphe Soucy avọ ogbẹnyusu riẹ jọ a ziọ uwou mai. Ezae nana yọ Isẹri Jihova. Mẹ riẹ kpahe Isẹri Jihova tere he, yọ egagọ rai e nwane were omẹ tere he. Rekọ, oghẹrẹ nọ a rẹ rọ rehọ Ebaibol na kiyo enọ o rẹ were omẹ. Onana o were ọsẹgboni mẹ re, fikiere a tẹ rọwo nọ Isẹri Jihova a wuhrẹ Ebaibol kugbe ai.

Oke yena, mẹ jọ isukulu Katọlik. Ẹmẹsejọ, mẹ jẹ hai lele emọ eklase mẹ ta kpahe eware nọ mẹ be jọ Ebaibol wuhrẹ na. Uwhremu na, iticha isukulu na nọ e jọ izerẹ Katọlik a tẹ te riẹ. A sae rọ Ikereakere na dhesẹ nọ eware nọ mẹ be ta na ọrue he, ukpoye iticha na jọ ọ tẹ jọ iraro emọ eklase mẹ kpobi whọku omẹ je se omẹ ọmọ aghẹmeeyo. Dede nọ oware na o kẹ omẹ uye gaga, o wha eghale se omẹ keme u fiobọhọ kẹ omẹ ruẹ nọ eware nọ a be jọ isukulu na wuhrẹ omai kpahe egagọ e rọwokugbe Ebaibol ho. Mẹ tẹ jiroro nọ me re no isukulu na. Ọsẹgboni mẹ a kẹ omẹ uvẹ inọ mẹ sai ru ere, fikiere me te kpohọ isukulu ọfa.

OGHẸRẸ NỌ USI UWOMA OTA U RO MU OMẸ HỌ ẸWERE

Mẹ ruabọhọ uwuhrẹ Ebaibol mẹ rekọ me je wo ẹnyaharo tere he keme ozọ usi uwoma ota no uwou ruọ uwou u je mu omẹ. Egagọ Katọlik e dowọ muotọ gaga evaọ ẹkwotọ na yọ iruo usi uwoma ota mai na e jẹ were ae vievie he. Maurice Duplessis nọ ọ jọ osu Quebec avọ ilorida ichọche Katọlik, okọ gbe uvi. Fikinọ osu orẹwho na ọ jọ abọ rai, ahwo a jẹ hai kpokpo Isẹri Jihova jẹ tubẹ họre ae dede. Re ohwo ọ sae ta usi uwoma evaọ oke yena, o gwọlọ udu.

Oniọvo nọ o si ozọ no omẹ ẹro họ John Rae, nọ o nwrotọ no eklase avọ izii Isukulu Giliad. Oniọvo nana o wo onaa ziezi, ọ jọ wowou, yọ o wo omaurokpotọ gaga. Ọ rẹ kake whọku omẹ hẹ, rekọ emamọ oriruo riẹ u wuhrẹ omẹ eware buobu. Brọda John ọ re riẹ ẹvẹrẹ French ẹta tere he, fikiere mẹ jẹ hai lele iei kpohọ usi uwoma ota re me fiobọhọ kẹe evaọ ẹvẹrẹ na. Usu mẹ avọ John u fiobọhọ kẹ omẹ wo udu je dikihẹ ga evaọ egagọ Ọghẹnẹ. Mẹ tẹ te họ-ame evaọ Asoi 26, 1951, koyehọ nọ ikpe ikpe e vrẹ no, rono oke nọ Isẹri Jihova a ro mu obe họ ewuhrẹ kugbe omẹ.

Emamọ oriruo John Rae (A) u fiobọhọ kẹ omẹ (B) si ozọ no ẹro kpahe usi uwoma ota no uwou ruọ uwou

Ukoko osese mai nọ o jọ Quebec u wo ekobaro buobu. Emamọ oriruo rai u fiobọhọ nọ mẹ rọ ruọ iruo ọkobaro na. Oke yena, Ebaibol na ọvo ma jẹ hae rọ ta usi uwoma no uwou ruọ uwou. Nọ ebe efa e jariẹ hẹ na, o gwọlọ nọ ma re wuhrẹ epanọ ma rẹ rọ rehọ Ikereakere na ta usi uwoma ziezi. Fikiere, me te wuhrẹ eria Ebaibol nọ mẹ rẹ rọ ta usi uwoma ziezi. Rekọ ahwo buobu a jẹ hae rọwo se Ebaibol ho, o gbẹ rrọ onọ ichọche Katọlik a printi hi.

Evaọ 1952, mẹ avọ oniọvo-ọmọtẹ nọ a re se Simone Patry nọ o kru ukoko na ga ziezi evaọ ẹwho na ma tẹ ruọ orọo. Ma tẹ kwa kpobọ Montreal, nọ ma rọo te oware wọhọ ukpe ovo no ma te yẹ ọmọtẹ mai, Lise. Dede nọ mẹ siọ iruo ọkobaro na ba taure ma tẹ te rọo, mẹ avọ aye mẹ ma kpairoro vrẹ eware jọ re uviuwou mai o sai wo oke ziezi kẹ iruo Uvie na.

Ikpe ikpe e vrẹ taure mẹ tẹ te wariẹ muhọ eroro kpahe iruo ọkobaro oke-kpobi. Evaọ 1962, nọ mẹ jọ Isukulu Odibọgba Uvie rọkẹ ekpako ukoko, onọ a jọ uwou ogha obọ Canada ru evaọ amara soso, mẹ avọ brọda Camille Ouellette ma gbẹ jọ uwou. Ajọwha nọ Camille o wo kẹ iruo usi uwoma ota na u duobọte omẹ gaga, maero nọ mẹ riẹ nọ o wo aye gbe emọ. Evaọ oke yena whọ rẹ kake jọ Quebec ruẹ oniọvo nọ o wo ọmọ yọ o bi ru iruo ọkobaro ho. Rekọ oye Camille ọ be ma omaa riẹ na. Nọ ma jọ kugbe, ọ tuduhọ omẹ awọ nọ mẹ wariẹ roro kpahe iruo ọkobaro na. Nọ emerae jọ e nwane vrẹ no, mẹ tẹ ruẹ nọ mẹ sae wariẹ mu iruo ọkobaro na họ. O jọ ahwo jọ oma nọ emamọ iroro mẹ jẹ na ha, rekọ oyena o whaha omẹ hẹ. Me fievahọ Jihova inọ o ti fiobọhọ kẹ omẹ wobọ ziezi evaọ iruo usi uwoma ota na.

A RỌ OMAI MU EKOBARO OBỌDẸ JE VI OMAI ZIHE KPOBỌ QUEBEC

Evaọ 1964, a tẹ rọ omẹ avọ aye mẹ mu ekobaro obọdẹ je vi omai zihe kpobọ Quebec, ẹwho mai. Ma jọ etẹe ru iruo na ikpe buobu. Dede nọ ukpokpoma o gbẹ jariẹ oke nana, ma dina wo ufuoma nọ ma jẹ rọ jọ ẹkwotọ na ta usi uwoma.

Uvo Ẹdẹ-Ọmaha jọ a mu omẹ evaọ ẹwho jọ nọ ọ kẹle Quebec nọ a re se Sainte-Marie. Iporisi ọ tẹ wha omẹ kpobọ isteshọno rai je fi omẹ họ uwou-odi inọ mẹ be ta usi uwoma no uwou ruọ uwou ababọ obe-udu. Uwhremu na, a tẹ rọ omẹ bru obruoziẹ jọ nọ ovao riẹ u re mu ozọ gaga, nọ a re se Baillargeon. Ọ tẹ nọ omẹ sọ me wo ohwo nọ o ti dikihẹ kẹ omẹ evaọ ekọto. Nọ mẹ fodẹ Glen How, * elọya jọ nọ ọ rrọ Osẹri Jihova nọ a riẹ odẹ ziezi, ozọ u te mu ei o te bo nọ: “O, ohwo yena?” A riẹ Glen How wọhọ elọya nọ o wo onaa ziezi yọ o re dikihẹ kẹ Isẹri Jihova gaga evaọ ekọto oke yena. U gbe kri hi, ogbẹgwae ekọto na o tẹ vuẹ omẹ nọ a kpairoro vrẹ ẹme na.

Ukpokpoma nọ u je te omai na, u ru rie bẹbẹ re ma ruẹ emamọ oria nọ ma rẹ haya jo ru iwuhrẹ mai. Udugaga ukoko osese mai o rọ ruẹ oria uwou nọ a rẹ dhẹ omoto fihọ, yọ u wo oware nọ u re ru ei roro ho. Inievo na a tẹ gwọlọ oware nọ u re ru oria roro, kọ oye a jẹ hai ro tu evaọ ezi ekpahe egaga. Ma rẹ keria wariẹ oware nana họ umutho euwa jọ jẹ tuduhọ ohwohwo awọ taure oke iwuhrẹ na u te ti te.

O be kẹ evawere gaga nọ ma be ruẹ oghẹrẹ nọ iruo Uvie na i wo ẹnyaharo te no anwọ ikpe buobu ze na. Evaọ etoke 1960 rite 1969, umutho ikoko jọ ọvo e jọ ekwotọ Quebec nọ a re se Côte-Nord gbe Gaspé Peninsula. Rekọ enẹna, ikoko buobu e rrọ ekwotọ nana, yọ a bi ru iwuhrẹ rai evaọ emamọ Egwa Uvie.

IRUO ỌSẸRO ỌNYAWARIẸ

Ukpe 1977 nọ ma jọ ẹgwae esẹro ọnyawariẹ evaọ Toronto, obọ Canada

Evaọ 1970 a rọ omẹ mu ọsẹro okogho. Kẹsena evaọ 1973, a tẹ rọ omẹ mu ọsẹro ubrotọ. Ikpe yena nọ mẹ avọ aye mẹ ma je ru iruo na, me wuhrẹ eware buobu mi inievo nọ i wo onaa ziezi evaọ iruo Uvie na, wọhọ Laurier Saumur * avọ David Splane. * Inievo ivẹ nana a jọ iruo ọsẹro ọnyawariẹ. Nọ okokohọ kpobi o te kuhọ no, mẹ avọ David ma rẹ keria ta kẹ ohwohwo kpahe epanọ ma sae rọ riẹ ẹme ru ziezi nọ o re te inievo na udu. Mẹ kareghẹhọ ẹme nọ David ọ vuẹ omẹ okejọ inọ: “Léonce, ẹme urere ra na ọ were omẹ ziezi. Ọ jọ wowoma, rekọ eware nọ whọ ta evaọ ẹme ọvo yena i re te omẹ kẹ evuẹ esa!” Eware nọ mẹ jẹ hae ta kpahe evaọ ovuẹ ọvo e jẹ hai bu hrọ. O gwọlọ nọ mẹ rẹ ta kpahe umutho eware evaọ ovuẹ mẹ.

Mẹ jọ ikpewho sa-sa ru iruo Uvie na evaọ ofẹ ovatha-ọre Canada

A re vi esẹro ubrotọ nyae tuduhọ esẹro okogho awọ. Whaọ iwhowho-uvie buobu nọ e rrọ Quebec a riẹ omẹ ziezi. A te vi omẹ bru esẹro okogho, iwhowho-uvie na buobu a rẹ gwọlọ lele omẹ kpohọ usi uwoma. Dede nọ o jẹ hae were omẹ nọ mẹ avọ inievo nana ma tẹ gbẹ rrọ usi uwoma, me gbe je wo oke kẹ esẹro okogho tere he. Ẹdẹjọ, ọsẹro okogho owowou jọ ọ tẹ kareghẹhọ omẹ nọ: “U gine woma nọ who bi wo oke kugbe inievo na, rekọ kareghẹhọ nọ oka nana, fiki mẹ whọ rọ nyaze. Mẹ gwọlọ uduotahawọ re.” Ohrẹ oniọvo owowou nana u wuhrẹ omẹ nọ u fo re me rri ofẹ jọ siọ ofẹ jọ ba ha.

Ukpe 1976, oware jọ nọ me rẹro riẹ hẹ o via nọ o wha uweri ulogbo se omẹ. Simone, aye oyoyou mẹ na o kie ẹyao, kẹsena o te whu. Ọ jọ ghaghae kẹ omẹ, keme o you Jihova yọ o rẹ were iẹe re o fiobọhọ kẹ amọfa. Iruo usi uwoma ota na nọ mẹ romakẹ u fiobọhọ kẹ omẹ thihakọ uwhu riẹ na, yọ me yere Jihova nọ o ro fiobọhọ kẹ omẹ thihakọ evaọ etoke obẹbẹ yena. Uwhremu na mẹ tẹ rọo Carolyn Elliott, ọkobaro nọ o wo ajọwha ziezi. Ẹvẹrẹ Oyibo oniọvo nana ọ rẹ ta, yọ ọ ziọ Quebec ti fiobọhọ fikinọ a jọ obonẹ gwọlọ iwhowho-uvie. Carolyn o wo omaurokpotọ yọ ọ rẹ whẹtiẹ ahwo họ oma ziezi, maero kọ enọ oma o rẹ vo nọ a rẹ gwọlọ kuomagbe amọfa ha. O fiobọhọ kẹ omẹ gaga nọ o kuomagbe omẹ evaọ iruo ọsẹro okogho na.

UKPE NỌ O RẸ THỌRỌ ẸRO HO

Evaọ amara Ọvo 1978, ukoko u vi omẹ nyai wuhrẹ eklase ọsosuọ ọrọ Isukulu Ekobaro evaọ Quebec. Udu u je bru omẹ keme isukulu na o jọ oware okpokpọ kẹ omẹ, yọ ere o jọ kẹ inievo nọ e be te ziọ isukulu na re. Oware nọ Ọghẹnẹ o re ru na, inievo nọ e jọ eklase ọsosuọ na a rrọ iruo ọkobaro kri no. Dede nọ mẹ jọ owuhrẹ rai, me wuhrẹ eware buobu mi inievo yena!

Ubrobọ urere ukpe 1978, ma te ru Okokohọ Akpọ-Soso nọ uzoẹme riẹ o jọ “Victorious Faith” (Ẹrọwọ nọ Ọ Kparobọ), evaọ afe arozaha nọ o rrọ Montreal. Oye o jọ okokohọ nọ o mae rro nọ a ru no evaọ Quebec, yọ ahwo nọ a ziọ okokohọ na a bu vrẹ idu udhone (80,000). Me kuomagbe inievo nọ e jọ Ẹko-Iruo Usi-Uwhowho evaọ okokohọ na. Me lele ahwo buobu nọ a rẹ wha usi ta ẹme yọ eva e were omẹ gaga inọ a kere emamọ iyẹrẹ buobu kpahe omai. Oke nọ a ro whowho usi okokohọ na evaọ etẹlẹvisiọno gbe iredio u bu vrẹ euwa udhe, yọ izoẹme nọ a jọ kere kpahe okokohọ na evaọ ebe-isi i bu te egba buobu. Onana u ru nọ ahwo buobu a rọ riẹ kpahe Isẹri Jihova!

MA KWA KPOHỌ ẸKWOTỌ ỌFA

Me ru enwene ologbo evaọ 1996. Quebec nọ a be jọ ta ẹvẹrẹ French mẹ be jọ ru iruo odibọgba mẹ anwẹnọ mẹ rọ họ-ame. Kẹsena ukoko u te vi omẹ kpohọ ubrotọ jọ evaọ Toronto nọ a rẹ jọ ta Oyibo. O jọ omẹ oma nọ me te kẹ iruo na ha, yọ ozọ u je mu omẹ inọ mẹ te sae rọ Oyibo ru ẹme he. Onana u ru nọ mẹ jẹ hae rọ lẹ kẹse kẹse, me te je fievahọ Jihova vi epaọ anwẹdẹ.

Dede nọ ozọ u je mu omẹ oke ọsosuọ, ikpe ivẹ nọ me ru iruo Uvie na evaọ Toronto e jọ erọ evawere. Carolyn o fiobọhọ kẹ omẹ riẹ epanọ a rẹ ta Oyibo, yọ inievo na a kẹ omẹ uduotahawọ gaga re. U kri hi, ma te ti wo egbẹnyusu buobu.

U te no oma nọ mẹ rẹ ruẹrẹ kpahe kẹ okokohọ nọ ma re ru evaọ urere oka gbe eware efa nọ me re ru no, mẹ rẹ rọ enwenọ auwa ọvo kpohọ usi uwoma ota no uwou ruọ uwou evaọ owọwọ Edisoi-Oka. Ahwo jọ a sai roro nọ, ‘Fikieme who re ro kpohọ usi uwoma Edisoi-Oka, nọ orọnọ iruo buobu e rrọ kẹ owhẹ evaọ okokohọ urere oka na?’ Ghele na, mẹ ruẹ nọ usi uwoma nọ mẹ rẹ ta kẹ ahwo o rẹ kẹ omẹ omosasọ. Makọ enẹna, oke kpobi nọ me kpohọ usi uwoma ota, eva e rẹ were omẹ.

Evaọ 1998, a dhe omẹ avọ Carolyn kpohọ iruo ọkobaro obọdẹ evaọ Montreal. Ikpe buobu, ewha-iruo mẹ jọ họ, me re ru ọruẹrẹfihotọ usi uwoma ota ẹgbede ọrọ obọdẹ, je lele ahwo nọ a rẹ wha usi ta ẹme re a niyẹrẹ nọ i re ru nọ ahwo a rẹ rọ siọ ekpehre ubiẹro ba ero rri Isẹri Jihova. Enẹna, mẹ avọ Carolyn ma be ta usi uwoma kẹ ahwo nọ a kwa no erẹwho efa ziọ Canada obọ. Ahwo nana a rẹ gwọlọ wuhrẹ Ebaibol na.

Mẹ avọ aye mẹ Carolyn

Nọ me te roro kpahe ikpe udhosa-gberee nọ mẹ rọ roma mudhe kẹ Jihova no na, mẹ ruẹ nọ me wo eghale buobu no. Oghẹrẹ nọ usi uwoma ota na u ro mu omẹ họ ẹwere gbe ahwo buobu nọ me fiobọhọ kẹ kurẹriẹ ziọ ukoko Jihova o be wha evawere se omẹ. Nọ ọmọtẹ mai Lise avọ ọzae riẹ a yọrọ emọ rai whẹro no, a te mu iruo ọkobaro oke-kpobi họ. Ọwhọ nọ ọmọtẹ mai o wo kẹ usi uwoma ota na rite enẹna o be kẹ omẹ evawere. Me te je bi yere Jihova kẹ ibe Ileleikristi mẹ nọ emamọ oriruo rai gbe ohrẹ rai u fiobọhọ kẹ omẹ wo ẹnyaharo jẹ sae rẹrote ewha-iruo buobu evaọ ukoko na. Mẹ ruẹ no inọ re ma sai ru iruo kpobi nọ ukoko Jihova o kẹ omai, ma rẹ rẹroso Jihova inọ ọ te rọ ẹzi ọfuafo riẹ fiobọhọ kẹ omai. (Ol. 51:11) Me gbe bi yere Jihova inọ ọ kẹ omẹ uvẹ-ọghọ nọ me bi ro jiri odẹ riẹ.​—Ol. 54:6.

^ edhe-ẹme 16 Whọ sai se iku W. Glen How evaọ uzoẹme na, “The Battle Is Not Yours, but God’s” (Ẹmo na Ọra Ha, Rekọ ọrọ Ọghẹnẹ) evaọ Awake!, Ane 22, 2000.

^ edhe-ẹme 20 Whọ sai se iku Laurier Saumur evaọ uzoẹme na, “I Found Something Worth Fighting For” (Mẹ Ruẹ Oware nọ U Fo Ele), evaọ Uwou-Eroro Akpegbọvo 15, 1976, ọrọ Oyibo.

^ edhe-ẹme 20 David Splane yọ omọvo Utu Ẹruorote Iruẹru Isẹri Jihova.