Kpohọ eme nọ e riẹ eva

Kpohọ oria eware nọ e riẹe eva

Ẹrọwọ​—Ọ rẹ Kẹ Ohwo Ogaga

Ẹrọwọ​—Ọ rẹ Kẹ Ohwo Ogaga

ẸRỌWỌ o wo ẹgba gaga. Wọhọ oriruo, dede nọ Setan ọ gwọlọ raha usu mai kugbe Jihova, ẹrọwọ o re fiobọhọ kẹ omai “furie ese kpobi nọ e be ware erae nọ omuomu na ọ be sa.” (Ẹf. 6:16) Ma te wo ẹrọwọ, ma sai fi ebẹbẹ nọ e rrọ ruaro wọhọ ugbehru kparobọ. Jesu ọ ta kẹ ilele riẹ nọ: “Wha te wo ẹrọwọ nọ ọ make kawo wọhọ ubi mọstad, wha te ta kẹ ugbehru nana nọ, ‘No etenẹ kpohọ obei,’ o ve no etẹe.” (Mat. 17:20) Nọ orọnọ ẹrọwọ o re ru usu mai kugbe Jihova jọ gaga na, u fo nọ ma re roro kpahe enọ nana: Eme họ ẹrọwọ? Ẹvẹ oghẹrẹ nọ udu mai o rrọ u re ro kpomahọ ẹrọwọ mai? Ẹvẹ ma sai ro ru ẹrọwọ mai ga ziezi? Kọ ono ma re fi ẹrọwọ họ?​—Rom 4:3.

EME HỌ ẸRỌWỌ?

Re ohwo o wo ẹrọwọ, orọnikọ ọ rẹ rọwo uzẹme na ọvo ho, keme makọ “idhivẹri na e rọwo [inọ Ọghẹnẹ ọ rrọ], yọ a bi nuhu fiki ozọ.” (Jem. 2:19) Nọ o rrọ ere na, kọ eme họ ẹrọwọ?

Wọhọ epanọ u mu omai ẹro inọ uvo gbe aso e rẹ se oma ba ẹrọvia ha na, ere u mu omai ẹro inọ ẹme Ọghẹnẹ ọ rẹ seba erugba ha

Ebaibol na ọ ta nọ eware ivẹ i ru ẹrọwọ via. Orọ ọsosuọ, “ẹrọwọ họ imuẹro inọ oware nọ a bi rẹro riẹ o te via.” (Hib. 11:1a) Who te wo ẹrọwọ, u re mu owhẹ ẹro ziezi inọ eware kpobi nọ Jihova ọ ta uzẹme, yọ e te seba erugba ha. Wọhọ oriruo, Jihova ọ ta kẹ ahwo Izrẹl nọ: “Otẹrọnọ wha sae raha ọvọ mẹ kpahe uvo gbe ọvọ mẹ kpahe aso, re uvo gbe aso e siọ oma ba ẹrọvia evaọ ẹruoke rai, ẹsiẹe ọvo mẹ sae rọ raha ọvọ mẹ nọ mẹ re kugbe Devidi odibo mẹ.” (Jeri. 33:20, 21) Kọ whọ ruawa no ẹdẹjọ inọ ọre na ọ te va ze he hayo kiediwi hi, onọ u ti ru nọ ma gbe ti ro wo aso gbe uvo ho? Otẹrọnọ whọ re vro ẹdẹvo ho inọ akpọ na o bi ghelie kurẹriẹ je ghelie wariẹ ọre na họ, kọ u fo re whọ vro inọ Ọnọ ọ ma eware kpobi na ọ te sai ru ẹme riẹ gba ha? Vievie!​—Aiz. 55:10, 11; Mat. 5:18.

Orọ avọ ivẹ, ẹrọwọ yọ “oware nọ o kẹ imuẹro ivevẹ inọ eware nọ a rẹ ruẹ hẹ e ginẹ rrọ.” A jọ oria Ebaibol nana dhesẹ nọ ẹrọwọ yọ “oware nọ o kẹ imuẹro ivevẹ” hayo “imuẹro nọ i re ru ohwo rọwo” eware nọ a rẹ rọ ẹro ruẹ hẹ, rekiyọ e ginẹ rrọ. (Hib. 11:1b; ẹme-obotọ) Oriruo vẹ ma sai ro dhesẹ onana? Dae rehọ iẹe nọ ọmaha jọ ọ nọ owhẹ nọ, ‘Ẹvẹ whọ rọ riẹ nọ ofou ọ rrọ?’ Dede nọ whọ re ruẹ ofou ẹdẹvo ho, who ti fiobọhọ kẹ ọmọ na roro kpahe imuẹro nọ i dhesẹ nọ ofou ọ rrọ, wọhọ ẹwẹ nọ ma be wẹ na, ofou nọ o re fou eware, gbe iriruo itieye na efa. Iriruo nana i te mu ọmọ na ẹro, ọ te rọwo nọ eware jọ nọ ọ rẹ sae ruẹ hẹ e rrọ. Epọvo na re, o gwọlọ imuẹro egaga re ohwo o te wo ẹrọwọ.​—Rom 1:20.

U FO RE MA WO EMAMỌ UDU

Nọ orọnọ ẹrọwọ o re no imuẹro ze na, re ohwo ọ sai wo ẹrọwọ ọ rẹ kaki wo “eriariẹ egbagba uzẹme na.” (1 Tim. 2:4) Rekọ oyena ovo u te he. Pọl ukọ na ọ ta nọ: “Udu na ohwo o re jo wo ẹrọwọ.” (Rom 10:10) Orọnikọ ohwo ọ rẹ rọwo uzẹme na ọvo ho, o re je rri rie ghaghae. Ere o ti ro ru eware nọ i dhesẹ nọ o wo ẹrọwọ, hayo yeri uzuazọ nọ o rẹ were Ọghẹnẹ. (Jem. 2:20) Ohwo nọ o rri uzẹme na ghaghae he o re wo ẹrọwọ họ o tẹ make rọnọ ọ ruẹ imuẹro egaga, keme o ti nwene eware nọ ọ rọwo anwẹdẹ hẹ yọ ọ te rọwo siobọno eware iyoma nọ o bi ru hu. (2 Pita 3:3, 4; Jud 18) Oyejabọ nọ ahwo oke anwae jọ nọ a make rọ ẹro ruẹ eware igbunu nọ a gbiku rai fihọ Ebaibol na, a gbe ro wo ẹrọwọ họ na. (Ik. 14:11; Jọn 12:37) Ahwo nọ a gine rri uzẹme na ghaghae ọvo ẹzi Ọghẹnẹ o re fiobọhọ kẹ wo ẹrọwọ.​—Gal. 5:22; 2 Tẹs. 2:10, 11.

OGHẸRẸ NỌ DEVIDI O RO WO ẸRỌWỌ ỌGAGA

Devidi ovie na yọ ohwo jọ nọ o wo uvi ẹrọwọ. (Hib. 11:32, 33) Dede na, orọnikọ ohwo kpobi evaọ uviuwou riẹ o wo oghẹrẹ ẹrọwọ otiọye he. Wọhọ oriruo, u wo okejọ nọ oniọvo ọkpako Devidi nọ a re se Ẹlayab o dhesẹ nọ o wo ẹrọwọ họ. Ọ whọku Devidi fikinọ o jẹ kẹ Devidi uye inọ Goliat ọ be poviẹ egbaẹmo Ọghẹnẹ. (1 Sam. 17:26-28) A re yẹ ohwo avọ ẹrọwọ họ, yọ a rẹ reuku riẹ mi ọsẹgboni gbe he. Fikiere, usu okpekpe nọ Devidi o wo kugbe Ọghẹnẹ u ru nọ o ro wo ẹrọwọ.

Devidi ọ jọ Olezi avọ 27 dhesẹ oghẹrẹ nọ o ro wo ẹrọwọ ọgaga otiọye. (Owọ 1) Devidi o roro didi kpahe eware nọ ọ rọ ẹro ruẹ gbe oghẹrẹ nọ Jihova o ro fi ewegrẹ riẹ kparobọ. (Owọ avọ 2, 3) Oria egagọ Jihova o were riẹ gaga. (Owọ avọ 4) Devidi ọ jẹ hai kuomagbe idibo Ọghẹnẹ efa nyae gọ Ọghẹnẹ evaọ uwou-udhu egagọ riẹ. (Owọ avọ 6) Ọ lẹ se Jihova gaga. (Owọ avọ 7, 8) Devidi ọ tẹ jẹ gwọlọ nọ Ọghẹnẹ o wuhrẹ iẹe idhere riẹ. (Owọ avọ 11) Ẹrọwọ o wuzou kẹ Devidi gaga te epanọ ọ rọ nọ inọ: “Diẹse mẹ hae te jọ ogbẹrọnọ me wo ẹrọwọ họ.”​—Owọ avọ 13.

EPANỌ WHỌ SAI RO RU ẸRỌWỌ RA GA

Whọ sai wo oghẹrẹ ẹrọwọ Devidi na otẹrọnọ who ru eware nọ ọ fodẹ evaọ Olezi avọ 27 na. Nọ orọnọ eriariẹ egbagba i re ru ohwo wo ẹrọwọ na, epanọ who wuhrẹ Ebaibol na gbe ebe ukoko na te, ere o te lọhọ kẹ owhẹ te re who wo ẹrọwọ. (Ol. 1:2, 3) Hae daoma roro didi nọ who te bi ru uwuhrẹ omobọ ra. Ma tẹ be hai roro didi, ẹsiẹe ma rẹ mai wo edẹro kẹ uzẹme na. Nọ edẹro nọ ma wo kẹ eware nọ Jihova o bi wuhrẹ omai i bi dhe ẹgẹga na, ma te hai kpohọ ewuhrẹ gbe usi uwoma ota ziezi re ma rọ ere dhesẹ ẹrọwọ mai via. (Hib. 10:23-25) Ma re je dhesẹ nọ ma wo ẹrọwọ nọ ma tẹ be “hae lẹ kẹse kẹse” jẹ ruẹ nọ “o bẹ [omai] no ho.” (Luk 18:1-8) Fikiere, hae lẹ se Jihova “kẹse kẹse,” re u je mu owhẹ ẹro nọ “ọ be daezọ” ra. (1 Tẹs. 5:17; 1 Pita 5:7) Ẹrọwọ ọ rẹ wọ omai ru oware ezi, yọ ma te bi ru oware ezi, u re ru ẹrọwọ mai ga.​—Jem. 2:22.

FI ẸRỌWỌ HỌ JESU

Evaọ owọwọ urere taure Jesu o te ti whu, ọ ta kẹ ilele riẹ nọ: “Wha fi ẹrọwọ họ Ọghẹnẹ; wha fi ẹrọwọ họ omẹ re.” (Jọn 14:1) Fikiere, ma re fi ẹrọwọ họ Jihova, ma ve je fi ẹrọwọ họ Jesu re. Ẹvẹ whọ sai ro fi ẹrọwọ họ Jesu? Joma ta kpahe idhere esa jọ.

Ẹvẹ ma re ro fi ẹrọwọ họ Jesu?

Orọ ọsosuọ, rri idhe ẹtanigbo na wọhọ okẹ nọ Ọghẹnẹ ọ kẹ owhẹ omara. Pọl ukọ na ọ ta nọ: “Oware nọ o be kpọ uzuazọ nọ me bi yeri enẹna . . . họ ẹrọwọ nọ me fihọ Ọmọ Ọghẹnẹ, ọnọ o you omẹ, o te siobọno omariẹ fiki mẹ.” (Gal. 2:20) Who te fi ẹrọwọ họ Jesu, u re mu owhẹ ẹro ziezi inọ idhe ẹtanigbo na e rrọ rọkẹ owhẹ, fiki idhe na a be rọ rehọ izieraha ra vrẹ owhẹ, fiki riẹ who ro wo ẹruore uzuazọ ebẹdẹ bẹdẹ, yọ oye họ oware nọ Ọghẹnẹ ọ mai ro dhesẹ uyoyou nọ o wo kẹ owhẹ. (Rom 8:32, 38, 39; Ẹf. 1:7) Onana o te kẹ owhẹ omosasọ inọ oghẹrẹ kpobi nọ o rrọ kẹhẹ, whọ sai gbe wo emamọ usu kugbe Ọghẹnẹ.​—2 Tẹs. 2:16, 17.

Orọ avọ ivẹ, hae lẹ se Jihova ẹsikpobi, idhe ẹtanigbo Jesu i ru onana lọhọ. Fikinọ Jesu o whu kẹ omai, ma sae lẹ se Jihova “ududu, re ọ ruẹsi dhesẹ ohrọ gbe uwowou ulogbo kẹ omai evaọ ẹruoke nọ ma tẹ gwọlọ obufihọ.” (Hib. 4:15, 16; 10:19-22) Olẹ u re fiobọhọ kẹ omai dikihẹ ga nọ ma gbe ro kie ruọ odawọ họ.​—Luk 22:40.

Orọ avọ esa, yoẹme kẹ Jesu. Jọn ukọ na o kere nọ: “Ọnọ o fi ẹrọwọ họ Ọmọ na o re wo uzuazọ ebẹdẹ bẹdẹ; ọnọ ọ ghẹmeeyo kẹ Ọmọ na o ti wo uzuazọ họ, rekọ ofu Ọghẹnẹ ọ te jariẹ uzou.” (Jọn 3:36) Muẹrohọ nọ Jọn ọ ta nọ ohwo o gbe wo ẹrọwọ họ yọ ọ be ghẹmeeyo. Fikiere, who te bi yoẹme kẹ Jesu u re dhesẹ nọ who fi ẹrọwọ họ iẹe. Ohwo nọ o bi yoẹme kẹ Jesu o re koko “uzi Kristi na,” koyehọ, eware kpobi nọ o wuhrẹ je juzi rai. (Gal. 6:2) Ohwo nọ o bi yoẹme kẹ Jesu o re je ru lele uthubro nọ Jesu ọ be rọ “ọrigbo nọ a re fievahọ nọ o wo areghẹ na” kẹ omai. (Mat. 24:45) Who te bi yoẹme kẹ Jesu, who ti wo ẹgba nọ who re ro thihakọ ebẹbẹ nọ e wọhọ okpofou.​—Luk 6:47, 48.

“WHA KRU OMA GA EVAỌ ẸRỌWỌ ỌRẸRI RAI”

Ẹdẹjọ, ọzae jọ o bo kẹ Jesu nọ: “Me wo ẹrọwọ! Fiobọhọ kẹ omẹ evaọ oria nọ mẹ jọ gwọlọ ẹrọwọ!” (Mak 9:24) Ọzae nana o wo ẹrọwọ, rekọ omaurokpotọ riẹ u ru rie vuhumu nọ ọ gbẹ gwọlọ ẹrọwọ. Wọhọ ọzae nana, u re wo okejọ nọ mai kpobi ma rẹ rọ ruẹ nọ o gwọlọ nọ ma re fiba ẹrọwọ mai. Yọ mai kpobi ma rẹ sai ru ẹrọwọ mai ga enẹna. Wọhọ epanọ ma ruẹ no na, ẹrọwọ mai ọ rẹ ga nọ ma tẹ be hai se Ebaibol na je roro didi kpahe oware nọ ma se, onọ u re ru omai wo edẹro kẹ eware nọ Jihova o bi wuhrẹ omai. Ẹrọwọ mai ọ te jẹ ga ziezi nọ ma tẹ be hai kuomagbe ibe Ileleikristi mai gọ Jihova, ta usi uwoma na, jẹ lẹ ẹsikpobi. Ofariẹ, ẹrọwọ mai ọ tẹ ga ziezi, ma ti wo oghale nọ o mae rro. Ebaibol na ọ ta nọ: “Iyoyou mẹ, wha kru oma ga evaọ ẹrọwọ ọrẹri rai . . . re wha ruẹsi gbe ru eware nọ Ọghẹnẹ o re ro you owhai.”​—Jud 20, 21.