FIKINỌ ebẹbẹ “edẹ urere na” i bi dhe evievihọ, o gwọlọ nọ Isẹri Jihova a re wo odiri vi epaọ anwẹdẹ kpobi. (2 Tim. 3:1-5) Ahwo nọ a wariẹ omai họ nẹnẹ a bi you omobọrai ọvo, a bi ru lele ọtamuo ho, yọ a wo oma-onyẹ hẹ. Ahwo nọ a wo iruemu itiena a re wo odiri vievie he. Oyejabọ nọ Oleleikristi uzẹme kpobi ọ rẹ rọ nọ omariẹ nọ: ‘Kọ mẹ be rọ aro kele ahwo nana nọ a wo odiri hi na? Eme odiri u gine dhesẹ? Ẹvẹ uvi odiri nọ Ọghẹnẹ ọ gwọlọ nọ idibo riẹ a re wo o sae rọ jọ ẹkẹ uruemu mẹ?’

OWARE NỌ ODIRI U DHESẸ

Evaọ oghẹrẹ nọ a rọ jọ Ebaibol fodẹ ẹme na, odiri o vi akothiho nọ ohwo o re wo nọ ọ tẹ rẹriẹ ovao dhe ẹbẹbẹ. Ohwo nọ o wo ọkpọ odiri nọ a jọ Ebaibol fodẹ na, o re thihakọ avọ ẹjiroro. O re rri vrẹ ẹbẹbẹ riẹ, je roro kpahe ewoma ohwo nọ ọ be wha ẹbẹbẹ na ze na. Fikiere, a te ru ohwo nọ o wo odiri eva dha, o re fievahọ inọ eware i ti woma o tẹ make rọnọ onana o wha ẹbẹbẹ fihọ usu riẹ avọ ohwo nọ o ru rie eva dha na. Agbẹta nọ “odiri” o rọ rrọ oware ọsosuọ nọ a jọ Ebaibol na fodẹ evaọ usu iruemu ezi efa nọ uyoyou o rẹ wọ ohwo ru na. * (1 Kọr. 13:4) Ebaibol na ọ tẹ jẹ fodẹ “odiri” kugbe usu eware sa-sa nọ i ru “ubi ẹzi na” via. (Gal. 5:22, 23) Rekọ, eme u dhesẹ re a ta nọ ma wo odiri?

EPANỌ MA SAI RO WO ODIRI

Re ma sai wo odiri, o gwọlọ nọ ma rẹ lẹ kẹ obufihọ ẹzi Jihova, onọ ọ rẹ kẹ ohwo kpobi nọ o fievahọ iẹe. (Luk 11:13) Rekọ, dede nọ ẹzi Ọghẹnẹ o wo ẹgba gaga, o gwọlọ nọ ma re ru ẹkẹ abọ mai hayo ru iruo nọ e rọwokugbe olẹ mai taure ẹzi na ọ sai fiobọhọ kẹ omai. (Ol. 86:10, 11) Onana u dhesẹ nọ ma rẹ hae daoma wo odiri kẹdẹ kẹdẹ re uruemu nana o sae dowọ muotọ evaọ udu mai. Rekọ o gwọlọ nọ ma rẹ gbẹ daoma viere taure odiri ọ sai zihe ruọ ẹkẹ uruemu mai. Eme ọfa o rẹ sai fiobọhọ kẹ omai?

Ma rẹ sai gbe wo odiri nọ ma tẹ be hai roro kpahe oriruo Jesu jẹ rọ aro kele iei. Rọwokugbe oriruo Jesu, ẹzi Ọghẹnẹ ọ wọ Pọl ukọ na kere kpahe “uruemu okpokpọ na,” onọ u kugbe “odiri,” jẹ ta nọ “jọ udhedhẹ Kristi u su udu” mai. (Kọl. 3:10, 12, 15) Ma te wo ẹrọwọ wọhọ Jesu je fievahọ nọ Ọghẹnẹ ọ te kpọ eware vi evaọ oke nọ ọyomariẹ o fihọ, o rẹ sai ru nọ “udhedhẹ” Kristi u re ro su evaọ udu mai. Ma tẹ be rọ aro kele oriruo Jesu, oware o te dha omai eva te epanọ ma sai ro thihakọ riẹ hẹ hẹ, ghelọ eware nọ e be via wariẹ omai họ kẹhẹ.​—Jọn 14:27; 16:33.

Dede nọ ma be rọ ọwhọ hẹrẹ Akpọ ọkpokpọ na, ma rẹ sai gbe wo odiri ziezi nọ ma tẹ be hai roro didi kpahe oghẹrẹ nọ Jihova o bi wo odiri kẹ omai te. Ebaibol na ọ kẹ omai imuẹro nọ: “Jihova ọ be kpẹlẹ obọ evaọ erugba eyaa riẹ hẹ, wọhọ epanọ ahwo jọ a bi  roro, rekọ o bi wo odiri kẹ owhai keme ọ gwọlọ nọ a raha ohwo ọvo ho rekọ ọ gwọlọ nọ ahwo kpobi a wo uvẹ nọ a re ro kurẹriẹ.” (2 Pita 3:9) Nọ ma bi roro kpahe epanọ Jihova o wo odiri hayo ithihakọ kẹ omai te na, kọ oma o gbẹ be wọ mai wo odiri kẹ amọfa viere? (Rom 2:4) Kọ iyero vẹ o rẹ sae jọ gwọlọ nọ ma wo odiri hayo ithihakọ?

IYERO NỌ O RẸ JỌ GWỌLỌ NỌ MA WO ODIRI

U wo eware buobu nọ ma be rẹriẹ ovao dhe kẹdẹ kẹdẹ nọ u re ru omai riẹ epanọ ma gine wo odiri te. Wọhọ oriruo, who te wo ẹme jọ nọ o wuzou gaga nọ whọ gwọlọ ta, o rẹ sae gwọlọ nọ who wo odiri hayo thihakọ gaga re whọ siọ ẹme ba ebrudhe amọfa unu. (Jem. 1:19) O sae jẹ gwọlọ nọ who wo odiri nọ whọ tẹ rrọ kugbe ibe Oleleikristi nọ uruemu riẹ o rẹ dha owhẹ eva. Ukpenọ iruemu itieye na e dha owhẹ eva vrẹta hayo lẹliẹ owhẹ ru oware nọ u fo ho, u re woma re who roro kpahe epanọ Jihova avọ Jesu a bi ru kpahe ethobọ mai. A be tẹrovi eware esese nọ ma be jọ ruthọ họ. Ukpoye, a be tẹrovi abọ nọ ma be jọ riẹ ru, je bi thihakọ kẹ omai.​—1 Tim. 1:16; 1 Pita 3:12.

Oware ofa nọ u re je dhesẹ epanọ ma wo odiri te họ, nọ omọfa ọ tẹ vuẹ omai nọ ma ta hayo ru oware jọ thọ. Ẹsibuobu, o rẹ were omai hi nọ a tẹ vuẹ omai ẹme otiọna yọ ma rẹ tubẹ gwọlọ tanọ ma ruthọ họ. Dede na, oware nọ Ebaibol na ọ gwọlọ nọ ma ru evaọ etoke nana u wo ohẹriẹ. O ta nọ: “Ohwo nọ ọ rọ oma kpotọ evaọ ẹzi [hayo, nọ o wo odiri] o woma vi ohwo nọ o re ru oma oruoro evaọ ẹzi. Whọ kaki mu ofu hu, keme ofu ọ rẹ ruọ igbama ohwo ogheghẹ.” (Ọtausi. 7:8, 9) Fikiere, o tẹ make rọnọ ẹme nọ a ta kpahe omai na uzẹme he, u fo nọ ma rẹ rọ odiri hayo ithihakọ maa ẹme te re ma tẹ kpahe kẹ ohwo na. Jesu o ru lele ehri-uzi Ebaibol nana evaọ okenọ amọfa a jẹ ta ikpehre eme kpahe iẹe.​—Mat. 11:19.

U fo nọ esẹgbini a re wo odiri gaga nọ a tẹ ruẹ nọ ọmọ rai o wo isiuru hayo uruemu jọ nọ o gwọlọ nọ a rẹ kpọ vi. Wọhọ oriruo, okenọ Mattias nọ ọ rrọ iruo Ebẹtẹle evaọ obọ Scandinavia enẹna ọ jọ ọmaha, emọ isukulu riẹ a jẹ hai sei ẹkoko gaga fiki eware nọ ọ rọwo. Oke ọsosuọ, ọsẹgboni riẹ a riẹ kpahe ẹbẹbẹ riẹ nana ha. Rekọ nọ oke o be nyaharo na, ọwọsuọ emọ isukulu nana u te ru nọ Mattias ọ jẹ rọ nọ ọsẹgboni riẹ sọ iwuhrẹ nọ ọ rọwo na ginẹ uzẹme. Ọsẹ Mattias nọ a re se Gillis ọ ta nọ: “Ẹbẹbẹ na o gwọlọ odiri mi omẹ gaga.” Mattias ọ rẹ nọ omai nọ: “Ono họ Ọghẹnẹ? Kọ otẹrọnọ Ebaibol na yọ Ẹme Ọghẹnẹ hẹ? Ẹvẹ ma rọ riẹ nọ Ọghẹnẹ họ ọnọ ọ ginẹ gwọlọ nọ ma ru ona hayo ona?” Ọ rẹ jẹ nọ ọsẹ riẹ nọ: “Fikieme ohwo jọ o re ro gu omẹ ẹdhọ nọ mẹ gbẹ rọwo eware nọ whọ rọwo ho?”

Gillis ọ ta nọ, “ẹsejọ evedha ọmọzae mai na ọ rẹ rọ nọ enọ nana, orọnikọ mẹ avọ oni riẹ ọ be dheva kẹ na ha rekọ kpahe uzẹme na, onọ o roro nọ u bi ru uzuazọ riẹ jọ bẹbẹ na.” Eme Gillis o ru kpahe ẹbẹbẹ na? Ọ ta nọ: “Mẹ avọ ọmọzae mẹ na ma rẹ keria kugbe oke lelehie be ta kpahe ẹbẹbẹ na. Ẹsibuobu mẹ rẹ gaviezọ kẹe ọvo, jẹ nọe enọ otiẹse re mẹ sae riẹ eriwo riẹ gbe epanọ eware na kpobi e ginẹ riẹe oma. Ẹsejọ me re ru ẹme jọ vẹ  kẹe nọ o re roro kpahe evaọ okpẹdẹ soso hayo bẹsenọ ma rẹ wariẹ keria kẹ ẹme na. Evaọ oke ofa jọ, mẹ rẹ vuẹe nọ ọ kẹ omẹ emedẹ jọ ro roro kpahe onọ nọ ọ nọ omẹ. Ẹme nọ ma jẹ hae ta kugbe noke toke na u ru nọ Mattias ọ rọ rehọ ẹmẹrera wo otoriẹ iwuhrẹ wọhọ ẹtanigbo na, udu-esuo Ọghẹnẹ, gbe uyoyou Jihova jẹ rọ ere jẹ iwuhrẹ na rehọ. O jọ bẹbẹ yọ o rehọ oke, rekọ ẹmẹrera na uyoyou nọ o wo kẹ Jihova u te je dhe ẹruẹro evaọ udu riẹ. Eva e were omẹ avọ aye mẹ gaga inọ odiri nọ ma je ro fiobọhọ kẹ ọmọzae mai evaọ etoke uzoge riẹ na u duobọtei udu jẹ wha emamọ iyẹrẹ ze.”

Gillis avọ aye riẹ a fievahọ uketha Jihova nọ a jẹ rọ odiri fiobọhọ kẹ ọmọzae rai na. Gillis ọ ta nọ evaọ oke yena: “Mẹ jẹ hae ta kẹ Mattias nọ uyoyou nọ ma wo kẹe u ru nọ mẹ avọ oni riẹ ma jẹ hae rọ lẹ gaga inọ ajọ Jihova o fiobọhọ kẹe wo otoriẹ eware na.” Ọsẹgboni nana a yere Ọghẹnẹ gaga nọ a wo odiri kẹ ọmọ rai!

U te no obọ nọ Ileleikristi uzẹme a re fihọ kẹ amọfa wo usu okpekpe kugbe Jihova no, o gwọlọ nọ a re wo odiri nọ a tẹ be rẹrote ohwo uviuwou hayo ogbẹrioma rai nọ oma o ga tere he. Oniọvo-ọmọtẹ nọ a re se Ellen * nọ ọ be rria obọ Scandinavia re o fi emamọ oriruo hotọ evaọ ẹme nana.

Ikpe eree nọ i kpemu, okie o kie ọzae Ellen isiava soso, onọ o raha eware jọ evaọ ẹvori ọzae na. Fikiere ọzae na ọ gbẹ riẹ epanọ a rẹ re-ohrọ, wereva, hayo weri hi. Re Ellen ọ rẹrote ọzae na o jọ owha-iruo ulogbo gaga. Ọ ta nọ: “Me bi wo odiri anwọ ikpe buobu ze na, yọ mẹ be lẹ gaga re.” Ọ ta re nọ: “Oria Ebaibol nọ o be kẹ omẹ omosasọ họ, Ahwo Filipai 4:13, nọ o ta nọ: ‘Evaọ eware kpobi, me bi wo ẹgba ẹkwoma ọnọ ọ be kẹ omẹ ogaga.’” Ọghẹnẹ o ru nọ Ellen o bi ro wo omosasọ no oria ikere nana ze, onọ u bi fiobọhọ kẹe thihakọ je fievahọ uketha Jihova.​—Ol. 62:5, 6.

RỌ ARO KELE ODIRI JIHOVA

Jihova họ ọnọ ọ mai wo odiri kpaobọ nọ ma rẹ sae rehọ aro kele. (2 Pita 3:15) U wo eria Ebaibol na sa-sa nọ a jọ gbiku epanọ Jihova o ro dhesẹ nọ o wo odiri. (Neh. 9:30; Aiz. 30:18) Wọhọ oriruo, eme Jihova o ru evaọ okenọ Abraham ọ nọe unu kpahe ẹjiroro riẹ inọ ọ rẹ raha Sodọm no? Orọ ọsosuọ, Jihova o bru ẹme dhe Abraham unu hu. Ukpoye, Ọ rọ odiri gaviezọ nọ Abraham ọ be nọe enọ na unọjọ utọjọ je dhesẹ ọdawẹ riẹ via na. Ofariẹ, Jihova ọ wariẹ eme nọ Abraham ọ jẹ ta kẹ ọyomariẹ na rọ kẹ Abraham uyo, jẹ kẹe imuẹro inọ Ọ te raha ẹwho Sọdọm ho o tẹ make rọnọ ahwo okiẹrẹe ikpe ọvo ọ jariẹ ruẹ. (Emu. 18:22-33) Onana yọ obọdẹ oriruo oghẹrẹ nọ ohwo ọ rẹ rọ odiri gaviezọ, ababọ ofu nọ o re mu vrẹta!

Avro ọ riẹ hẹ, uvi odiri Oleleikristi yọ abọjọ uruemu okpokpọ na nọ u wuzou gaga, onọ o gwọlọ nọ Oleleikristi kpobi o re wo. Ma tẹ be hae daoma epanọ ma re ro wo obọdẹ uruemu nana, o rẹ wha orro se Ọsẹ obọ odhiwu mai nọ o wo ọdawẹ gbe odiri gaga na. U ti je ru nọ a ti ro kele omai kugbe “enọ e rọ ẹkwoma ẹrọwọ gbe odiri wo eyaa na.”​—Hib. 6:10-12.

^ edhe-ẹme 4 Uyoyou họ orọ ọsosuọ evaọ uvitha sa-sa nọ ma be jọ ta kpahe iruemu izii nọ i ru “ubi ẹzi na” na via.

^ edhe-ẹme 15 Ma nwene odẹ na.