WINSTON avọ Pamela (Pam) Payne a rrọ iruo Ebẹtẹle evaọ uwou ogha Australasia. A be wereva evaọ iruo rai, rekọ a rẹriẹ ovao dhe ebẹbẹ jọ no. Ejọ rai họ, a rria ekwotọ nọ a jọ rẹriẹ ovao dhe uyero obẹbẹ, yọ u wo oke jọ nọ eva i no oniọvo-ọmọtẹ na. Ghelọ onana kpobi, a gbe you Jihova gbe idibo riẹ yọ a gbe bi wo oghọghọ evaọ iruo na. Joma nọ ae re a gbiku eware jọ nọ a rọ ẹro ruẹ kẹ omai.

Winston vuẹ omai, ẹvẹ who ro mu Ọghẹnẹ họ ẹgwọlọ?

Iwhre jọ nọ a re jo ru iruo ẹwọ evaọ Queensland, obọ Australia a jọ yẹ omẹ, yọ ọsẹgboni mẹ a jẹ gọ Ọghẹnẹ hẹ. Fikinọ oria na u siomano, me kuomagbe amọfa tere he u te no ahwo uviuwou mẹ no. Nọ mẹ jọ ikpe ikpegbivẹ me ro mu Ọghẹnẹ họ ẹgwọlọ. Mẹ jẹ hae lẹ sei, yare nọ jọ o ru omẹ riẹ uzẹme na kpahe iẹe. Me te ti no iwhre na, je mu iruo họ evaọ Adelaide, obọ South Australia. Nọ mẹ jọ ikpe udhegbọvo mẹ rọ nyaku Pam, oke yena me kpohọ ilivi evaọ obọ Sydney. Ọ vuẹ omẹ kpahe utu egagọ jọ nọ a re se British-Israel, nọ e rọwo nọ erua emọ Izrẹl ahwo Britain a no ze. Utu egagọ na o ta nọ uvie erua-ikpe Izrẹl nọ u kpohọ igbo evaọ ikpe-udhusoi avọ eree taure Kristi ọ tẹ te ze họ erua nọ Britain o no ze na. Fikiere nọ me zihe kpobọ Adelaide, mẹ tẹ nọ ohwo iruo mẹ nọ Isẹri Jihova a bi wuhrẹ Ebaibol kugbe. Nọ mẹ avọ iẹe ma ta ẹme omoke jọ kpahe oware nọ Isẹri Jihova a rọwo no, me te muẹrohọ nọ olẹ nọ mẹ be lẹ anwọ oke emaha ze mẹ be ruẹ uyo riẹ na. Uzẹme kpahe Ọnọ ọ ma omẹ gbe Uvie riẹ mẹ be riẹ kpahe na! Me duku ‘uzuu nọ u wo aghae gaga’ na no.​—Mat. 13:45, 46.

Pamela, nọ whọ gbẹ jọ emaha who ro mu uzuu nana họ ẹgwọlọ re. Kọ ẹvẹ whọ rọ ruẹ e riẹ?

A yọrọ omẹ evaọ uviuwou nọ a jọ se egagọ gboja, evaọ Coffs Harbour, obọ New South Wales. Ọsẹgboni mẹ avọ ọsẹ-ode gbe oniode mẹ a rọwo eware nọ utu egagọ British-Israel na a bi wuhrẹ. No emaha ze a wuhrẹ omẹ, oniọvo-ọmọzae ọmaha mẹ, oniọvo-ọmọtẹ ọkpako mẹ, gbe imoni mẹ jọ  inọ Ọghẹnẹ ọ jẹ ahwo uyẹ Britain rehọ. Ghele na, u mu omẹ ẹro ho, yọ o jọ omẹ oma nọ mẹ kẹle Ọghẹnẹ hẹ. Nọ mẹ jọ ikpe ikpegbene me kpohọ ichọche sa-sa evaọ ẹwho mai, te erọ Anglican, Baptist, gbe Seventh-day Adventist. Rekọ i ru omẹ riẹ Ọghẹnẹ ghele he.

Uwhremu na, ma tẹ kwa kpobọ Sydney, obei mẹ jọ nyaku Winston nọ ọ ziọ ilivi. Wọhọ epanọ ọ ta na, ẹme nọ mẹ avọ iẹe ma jẹ ta kpahe Ọghẹnẹ u ru nọ Isẹri Jihova a ro mu Ebaibol họ ewuhrẹ kugbei. Kẹsena, ọ tẹ jẹ hai kere eria Ebaibol buobu fihọ ileta nọ ọ jẹ hai vi se omẹ. Uzẹme riẹ họ evaọ oke ọsosuọ, onana o jẹ kẹ omẹ uye, o jẹ tubẹ dha omẹ eva dede. Rekọ ẹmẹrera na, mẹ tẹ te ruẹ nọ uzẹme ọ be ta na.

Ukpe 1962, mẹ tẹ kwa kpobọ Adelaide re mẹ jọ kẹle oria Winston. Ọ ta kẹ Thomas avọ Janice Sloman, ọzae-avọ-aye jọ nọ a rrọ Isẹri Jihova re mẹ rria kugbe ai. Aimava na imishọnare nọ e jọ obọ Papua New Guinea vẹre. A dhesẹ uwowou ulogbo kẹ omẹ; ikpe ikpegberee mẹ jọ oke yena yọ a fiobọhọ kẹ omẹ gaga si kẹle Ọghẹnẹ. Me te mu Ebaibol na họ ewuhrẹ, u gbe kri hi, me te vuhumu nọ me duku uzẹme na no. Nọ mẹ avọ Winston ma nwane ruọ orọo no, ma te mu iruo Jihova nọ e rẹ kẹ evawere na họ ovavo. Iruo nana i ru omai vuhu aghare uzuu nọ ma duku na ziezi ghelọ ebẹbẹ nọ i bi te omai kẹhẹ.

Winston, iviena vuẹ omai epanọ o jọ nọ who mu iruo Jihova họ obọ.

A. Emapo eria nọ ma te evaọ iruo ọsẹro okogho

B. Estampo ikoliko na jọ. Ikoliko Gilbert avọ Ellice a je se Kiribati avọ Tuvalu vẹre

C. Ukoliko Funafuti nọ o rrọ wowoma evaọ Tuvalu nọ o vọ avọ itho ikoral. Onana yọ ukoliko jọ nọ ma kpohọ taure a te ti vi imishọnare nya

Nọ mẹ avọ Pamela ma nwane ruọ orọo no, Jihova o te mu ‘ethẹ ilogbo’ erọ iruo họ erovie kẹ omai. (1 Kọr. 16:9, ẹme-obotọ) Brọda Jack Porter, nọ ọ jọ ọsẹro okogho mai ọye ọ rriẹ obọ họ ẹthẹ ọsosuọ kẹ omai. (Oniọvo nana ọ rrọ omọvo Ogbẹgwae Uwou Ogha Australasia enẹna.) Jack avọ aye riẹ, Roslyn, a tuduhọ omai awọ nọ ma rehọ iruo ọkobaro oke-kpobi, yọ ikpe isoi ma ru iruo nana. Nọ mẹ jọ ikpe udhegbizii, a te vi omẹ avọ aye mẹ kpohọ iruo ọsẹro okogho evaọ ikoliko sa-sa erọ South Pacific, onọ uwou ogha Fiji o jẹ rẹrote oke yena. Ikoliko na họ, American Samoa, Samoa, Kiribati, Nauru, Niue, Tokelau, Tonga, Tuvalu, gbe Vanuatu.

Evaọ oke yena, ahwo nọ a jọ ikoliko nana jọ nọ i siomano a jẹ hae rọ emamọ ubiẹro rri Isẹri Jihova ha, fikiere areghẹ gbe orimuo ma jẹ hae rọ ta usi uwoma. (Mat. 10:16) Ikoko na e jọ kakao, yọ ejọ rai a jẹ sae kẹ omai oria nọ ma rẹ rria ha. Fikiere ma tẹ jẹ hae gwọlọ oria kpobi evaọ iwhre na nọ ma rẹ rria, yọ ahwo iwhre na a jọ wowou.

Iruo efafa e rẹ were owhẹ Brọda Winston. Eme ọ wha riẹ ze?

Me bi wuhrẹ inievo na evaọ isukulu ekpako ukoko obọ Samoa

Oke yena umutho ebe-evẹvẹ gbe emebe esese jọ ọvo inievo nọ e rrọ ukoliko Tonga na a wo evaọ ẹvẹrẹ Tongan, onọ o rrọ ẹvẹrẹ Polynesia. Obe Uzẹme nọ U re Suohwo kpo Uzuazọ Ebẹdẹbẹdẹ evaọ ẹvẹrẹ Oyibo a re ro wuhrẹ ahwo nọ a te kpohọ usi uwoma ota. Fikiere, nọ ekpako ukoko a ziọ isukulu ekpako na evaọ ukoliko na, ekpako esa evaọ usu rai nọ a riẹ Oyibo omojọ a tẹ rọwo nọ a rẹ fa obe nana fihọ ẹvẹrẹ Tongan. Aye mẹ ọ tẹ rọ etapraeta kere eme na kpobi, kẹsena ma te vi ai kpobọ uwou ogha America nọ a jọ printi rai. Enwenọ eka eree a rọ fa obe na re. Dede nọ efafa na e nwani woma tere he, obe na u fiobọhọ kẹ ahwo nọ a be jẹ ẹvẹrẹ Tongan buobu wuhrẹ uzẹme na. Mẹ avọ aye mẹ yọ efefafa ha, rekọ oware yena nọ o via na u ru omai wo isiuru kẹ iruo efafa.

Pamela, ohẹriẹ vẹ o rrọ uzuazọ obọ Australia avọ orọ ikoliko na?

Oria jọ nọ ma wohọ nọ ma jọ iruo ọsẹro okogho

Ohẹriẹ rai o rrọ ruaro! Evaọ eria jọ obọ ikoliko na, inwe e rẹ tafru ohwo, yọ ọdha avọ ẹroyẹ riẹ ima, edhokpa e riẹ yọ eyao sa-sa e jariẹ re, yọ ẹsejọ emuore ọ rẹ jariẹ hẹ. Evaọ abọdekọ riẹ, oma o rẹ were owhẹ evaọ  owọwọ nọ whọ tẹ rrọ iwou-owhre nọ a re se fale bi rri abade na. Evaọ aso nọ ọvẹre o bi lo, ma rẹ ruẹ ire ibio nọ e rrọ akotọ abade na, yọ uwoho ọvẹre na o bi lo wowoma evaọ ame na. Eware urirẹ itieye na i re ru omai roro didi jẹ lẹ, iroro mai i ve kpohọ emamọ eware viukpọ eware nọ e be kẹ omai uye.

Emọ nọ e jọ eria yena e jẹ hae were omai, a re fou ehwẹ gaga. Nọ a tẹ ruẹ iyibo kerọ omai a re rri rai. Okejọ nọ ma kpobọ Niue, ọmọzae ọsese jọ ọ tẹ be rọ obọ rara eto nọ e rrọ abọ ọzae mẹ, ọ tẹ ta nọ, “ileli ra e were omẹ.” O wọhọ nọ ọ re ruẹ ohwo nọ o wo eto bu tere evaọ abọ họ, yọ ọ riẹ oghẹrẹ nọ o re se ai hi.

O jẹ da omai nọ ahwo eria yena a yogbe gaga. Eria nọ a be rria na e rrọ wowoma rekọ a wo emamọ ẹsipito ho yọ emamọ ame nọ a rẹ da ọ riẹ tere he. Ghele na, inievo mai a be ruawa ha. Uzuazọ yena o reria e rai oma no. Eva e be were ae inọ ahwo uviuwou rai a rrọ kugbe ai, a wo oria nọ a be jọ gọ Jihova, a te je wo uvẹ-ọghọ nọ a bi ro jiri Jihova. Oriruo rai o ru omai tẹrovi eware nọ e mai wuzou jẹ kpairoro vrẹ eware jọ evaọ uzuazọ.

Pamela, ẹsejọ whọ jẹ hae nyae gwọlọ ame vo jẹ daoma koko erae họ ro there emu. Ẹvẹ whọ jẹ sai ro ru onana?

Pamela nọ ọ be fọrọ iwu mai evaọ obọ Tonga

Ọsẹ mẹ ọ daoma kẹ omẹ gaga. Ọye o wuhrẹ omẹ eware buobu, wọhọ epanọ a re koko erae họ, rehọ iẹe there emu, gbe epanọ ohwo ọ sae rọ rehọ umutho eware nọ o wo yeri uzuazọ. Okejọ nọ ma kpobọ Kiribati, ma wohọ uwou-owhre jọ nọ a rọ ekpọhọ bọ, nọ a rọ ikoral (oghẹrẹ itho jọ nọ a rehọ no eva abade ze) ru otọ riẹ. Re mẹ sai there ememu, mẹ tẹ tọ ọgọdọ fihọ otọ jẹ kwa ekpe ibio fihọ ọgọdọ na nọ me ro koko erae họ. Mẹ tẹ gwọlọ vo ame, me re lele eyae iwhre na kpobọ oza je dhuhie họ. Ure nọ u theri te enwenọ irula ezeza a re ro si ame. A re thuru ufi fihọ oka jọ ure na wọhọ ufi nọ a re ro si oghọlọ. Rekọ ukpenọ a thuru ufi na fihọ oghọlọ, kọ ugbogbo. Nọ u te te ohwo, o ve fi ugbogbo na họ ame avọ ure na nọ o re kru jẹ frẹ. Kẹsena ugbogbo na o vẹ vẹtu ame na, a ve si ei ze. Me je roro nọ o rrọ lọlọhọ, rekọ nọ u te omẹ, me ru bẹ, ugbogbo na o jẹ rọwo vẹtu hu. U je vori evaọ ehru ame na ọvo! Ahwo na kpobi a te muhọ ẹhwẹ, kẹsena aye jọ o te fiobọhọ kẹ omẹ. Ahwo na a jọ wowou gaga.

Usi uwoma ota evaọ ikoliko na o were owhai imava gaga. Ivie, wha sai gbiku emamọ eware jọ nọ wha kareghẹhọ kẹ omai?

Winston: O dina raha oke re ma tẹ riẹ iruemu ẹkwotọ na jọ. Wọhọ oriruo, nọ inievo na a te there emu, emu na kpobi a rẹ wọ se omai. Oke ọsosuọ, ma riẹ hẹ inọ ma rẹ re seba kẹ ae. Fikiere ma tẹ jẹ hae re emu na kpobi no. Rekọ nọ ma riẹ no, ma te mu emu họ ẹre kiọkọ. Ghelọ ethobọ yena, eva e jẹ dha inievo na ha. Yọ ẹsikpobi nọ ma zihe bru ai ze nọ emerae ezeza e tẹ vrẹ no evaọ iruo ọsẹro okogho na, eva e rẹ were ae gaga. U te no omai no, a re ruẹ ibe Ileleikristi rai nọ i no orẹwho ofa ze ẹdẹvo ho evaọ oke yena.

Mẹ be wha inievo jọ kpohọ usi uwoma ota evaọ Niue Island

Ofariẹ, iweze mai na u ru nọ ahwo eria yena a rọ riẹ kpahe Isẹri Jihova ziezi. Ahwo iwhre na buobu a je roro nọ iwhre yena ọvo Isẹri Jihova a rrọ. Fikiere nọ a ruẹ omai nọ ma no orẹwho ofa ze te ruẹ inievo na, u gbe ahwo ukoliko na unu, a tẹ ruẹ nọ kpakọ Isẹri Jihova a rrọ erẹwho sa-sa.

Pamela: Mẹ kareghẹhọ oware jọ nọ o via nọ u duobọte omẹ gaga evaọ okenọ ma kpobọ Kiribati. Ukoko ovo o jọ oria na yọ inievo nọ e jariẹ a bu hu. Brọda Itinikai Matera ọvo họ ọkpako nọ ọ jọ ukoko na, yọ ọ daoma gaga re ọ rẹrote omai. Ẹdẹjọ, ọ tẹ nyabru omai ze avọ ekete nọ ọ riẹe obọ, yọ eke arifẹ ọvo ọ rrọ ekete na. Ọ tẹ ta nọ, “Ọrai.” Whaọ, evaọ oke yena ma jẹ sae ruẹ eke arifẹ hẹ. Ọghọ yena o duobọte omai gaga, dede nọ eke ọvo.

 Pamela, nọ imikpe jọ e vrẹ no, eva i no owhẹ. Eme o fiobọhọ kẹ owhẹ thihakọ onana?

Me dihọ evaọ 1973 nọ mẹ avọ ọzae mẹ ma jọ obọ South Pacific. Fikiere ma te zihe kpobọ Australia, kẹsena nọ emerae ene e vrẹ no eva na i te no omẹ. Oware na o kẹ ọzae mẹ uye gaga; ọmọ na ọmọ riẹ re. Edada na i kpotọ nọ oke o be nyaharo na, rekọ i no omẹ udu riẹriẹriẹ hẹ bẹsenọ Uwou-Eroro ọ Ane 15, 2009 u ro te omai obọ. A jọ oria “Enọ Ahwo nọ A s’Ebe” ta kpahe onọ nana: “Ọmọ ọ tẹ jọ eva oni whu hayo a te yẹi thọwa, kọ ẹruore ọ riẹ inọ a te kpare iẹe ze?” A jọ etenẹ ta oware nọ o kẹ omai uduotahawọ inọ ẹme na ọ rrọ obọ Jihova, yọ o re ru oware nọ u kiehọ ẹsikpobi. Fiki uyoyou nọ o wo kẹ omai, ọ te rọ Ọmọ riẹ “raha iruo Ẹdhọ,” onọ u ti si edada kpobi nọ akpọ omuomu nana ọ wha se omai no otọ. (1 Jọn 3:8) Uzoẹme yena u fiobọhọ kẹ omai vuhumu re inọ “uzuu” oghaghae ma gine wo nọ ma rọ rrọ idibo Jihova! Diẹse ma hae te jọ ababọ ẹruore Uvie na?

Nọ eva na i no omẹ no, ma tẹ wariẹ mu iruo odibọgba oke-kpobi họ. Ma jọ Ebẹtẹle Australia ru iruo omoke jọ kẹsena ma te zihe kpohọ iruo ọsẹro okogho. Evaọ 1981 nọ ma ru iruo na te ikpe ene evaọ New South Wales gbe Sydney no, a te zizie omai kpohọ uwou ogha Australia, onọ a bi se Australasia enẹna, yọ etẹe ma rrọ rite inẹnẹ.

Winston, kọ eware nọ whọ rọ ẹro ruẹ evaọ ikoliko South Pacific na i bi fiobọhọ kẹ owhẹ nọ whọ rrọ omọvo Ogbẹgwae Uwou Ogha Australasia na?

Enana i bi fiobọhọ kẹ omẹ evaọ idhere buobu. Orọ ọsosuọ, uwou ogha Australia o be rẹrote iruẹru Samoa gbe American Samoa. Kẹsena a te ku uwou ogha New Zealand avọ orọ Australia gbe. Obọnana uwou ogha Australasia o be rẹrote ekwotọ Australia, American Samoa avọ Samoa, Cook Islands, New Zealand, Niue, Timor-Leste, Tokelau, gbe Tonga. Iruo Uvie na nọ me lele inievo nana nọ i wo ẹrọwọ ru evaọ ikoliko na u bi fiobọhọ kẹ omẹ gaga obọnana nọ mẹ rrọ omọvo ogbẹgwae uwou ogha na.

Winston avọ Pamela nọ a rrọ uwou ogha Australasia

Mẹ gwọlọ ta nọ u kri no nọ mẹ avọ aye mẹ ma ro muẹrohọ rono eware nọ ma rọ ẹro ruẹ ze inọ orọnikọ ekpako ọvo e rẹ kiẹ gwọlọ Ọghẹnẹ hẹ. Izoge e rẹ gwọlọ ‘uzuu nọ u wo aghae gaga’ na re o tẹ make rọnọ o were ahwo uviuwou rai hi. (2 Iv. 5:2, 3; 2 Irv. 34:1-3) Uzẹme riẹ họ, Jihova yọ Ọghẹnẹ oyoyou nọ ọ gwọlọ nọ ahwo kpobi a wo uzuazọ, te emaha te ekpako!

Nọ mẹ avọ aye mẹ ma mu Ọghẹnẹ họ ẹgwọlọ ikpe nọ e vrẹ udhuvẹ-gbikpe nọ i kpemu, ma riẹ oware nọ u ti noi ze he. Avro ọ riẹ hẹ, uzẹme Uvie na nọ ma duku ginọ obọdẹ uzuu nọ o ghare thesiwa! Ma gba riẹ mu nọ ma rẹ rọ ẹgba mai kpobi dadabọ mu uzuu nana!