Evaọ edhere vẹ a rọ rehọ Pọl ukọ na “vrẹ idudhe kpohọ odhiwu avọ esa” je kpohọ “aparadase”?—2 Kọr. 12:2-4.

Evaọ obe 2 Ahwo Kọrint 12:2, 3, Pọl ọ ta kpahe ọzae jọ nọ a rehọ vrẹ “idudhe kpohọ odhiwu avọ esa.” Ono họ ohwo na? Nọ Pọl o je kere ileta se ukoko obọ Kọrint, ọ ta nọ Ọghẹnẹ ọ be rehọ iẹe ruiruo wọhọ ukọ. (2 Kọr. 11:5, 23) Kẹsena ọ tẹ fodẹ “eruẹaruẹ gbe eviavia igbunu nọ i no obọ Olori na ze.” Who te rri eme efa nọ ọ ta evaọ oria ikere yena, whọ rẹ ruẹ nọ ọ fodẹ inievo efa ha. Fikiere, ma sae ta nọ omobọ riẹ ọ jẹ ta kpahe na, ọye họ ọzae nọ ọ ruẹ eruẹaruẹ gbe eviavia na.—2 Kọr. 12:1, 5.

Pọl họ ohwo nọ ‘a rehọ vrẹ idudhe kpohọ odhiwu avọ esa’ na, gbe ọnọ ‘a rehọ vrẹ kpohọ aparadase’ na. (2 Kọr. 12:2-4) Ọ ta kpahe “eviavia,” onọ u dhesẹ nọ a vuẹ riẹ eware nọ e te via evaọ obaro.

Eme họ “odhiwu avọ esa” nọ Pọl ọ ruẹ na?

Evaọ ẹvẹrẹ ọsosuọ nọ a ro kere Ebaibol na, “odhiwu” ọ sai dikihẹ kẹ ehru nọ ma be ruẹ na. (Emu. 11:4; 27:28; Mat. 6:26) Rekọ a rọ “odhiwu” dhesẹ eware efa re. Ẹsejọ a rẹ rehọ iẹe dhesẹ esuo ohwo-akpọ. (Dan. 4:20-22) A rẹ jẹ rehọ iẹe dhesẹ esuo Ọghẹnẹ, wọhọ oriruo, Uvie Ọghẹnẹ.—Evia. 21:1.

Pọl ọ ruẹ “odhiwu avọ esa.” Eme ọ be ta kpahe na? Ẹsejọ a rẹ jọ Ebaibol na wariẹ ẹme isiasa ro fiẹgba họ oware, ro dhesẹ epanọ u wuzou te. (Aiz. 6:3; Izik. 21:27; Evia. 4:8) O wọhọ nọ Pọl ọ fodẹ “odhiwu avọ esa” ro dhesẹ isuẹsu nọ i kpehru gaga, koyehọ Uvie Mesaya na, onọ Jesu Kristi avọ ahwo idu udhuhrẹ gbe ene (144,000) a ti su na. (Rri Insight on the Scriptures, Uko 1, ẹwẹ. 1059, 1062.) Wọhọ epanọ Pita ukọ na o kere, ma be hẹrẹ “idhiwu ekpokpọ” nọ Ọghẹnẹ ọ ya eyaa riẹ.—2 Pita 3:13.

Eme họ “aparadase” nọ Pọl ọ fodẹ na?

“Aparadase” o dikihẹ kẹ eware sa-sa re: (1) Nọ ma te roro kpahe oria nọ ọzae avọ aye ọsosuọ na a jọ, ma sae ta nọ “aparadase” o dikihẹ kẹ Aparadase otọakpọ nọ ọ be tha. (2) O sai dhesẹ obọdẹ udhedhẹ nọ idibo Jihova a te reawere riẹ evaọ akpọ ọkpokpọ na. (3) O sai je dhesẹ obọdẹ uyero nọ o rrọ obọ odhiwu nọ a se “aparadase Ọghẹnẹ” evaọ obe Eviavia 2:7.—Rri Uwou-Eroro Na, ọrọ Ahrẹ 15, 2015, ẹwẹ. 8. edhe. 8.

O sae jọnọ esa nana Pọl o wo họ iroro evaọ obe 2 Ahwo Kọrint 12:4 nọ ọ jẹ ta oware nọ ọ ruẹ.

Eware nọ ma wuhrẹ na ena:

O sae jọnọ “odhiwu avọ esa” nọ a jọ obe 2 Ahwo Kọrint 12:2 fodẹ na u dikihẹ kẹ Uvie Mesaya na, onọ Jesu Kristi avọ ahwo idu udhuhrẹ gbe ene (144,000) a ti su na, oyehọ “idhiwu ekpokpọ” na.—2 Pita 3:13.

A se rie “odhiwu avọ esa” keme isuẹsu yena o kpehru gaga.

O sae jọnọ “aparadase” nọ ‘a rehọ Pọl vrẹ kpohọ’ na u dikihẹ kẹ (1) Aparadase otọakpọ nọ ọ rrọ obaro tha, (2) aparadase egagọ Ọghẹnẹ, koyehọ evawere gbe okugbe nọ ma te reawere riẹ vọvọ evaọ akpọ ọkpokpọ na, onọ u ti vi onọ ma be reawere riẹ nẹnẹ na, (3) “aparadase Ọghẹnẹ” nọ ọ rrọ obọ odhiwu, yọ enana kpobi e te jariẹ evaọ oke ovona evaọ akpọ ọkpokpọ na.

Fikiere, idhiwu ekpokpọ na gbe otọakpọ ọkpokpọ na eye i ru akpọ ọkpokpọ na via. O te jọ ọruẹrẹfihotọ ọkpokpọ, onọ u kugbe Uvie obọ odhiwu gbe ahwo-akpọ nọ a te gọ Jihova evaọ aparadase otọakpọ.