Nọ ma bi dhe emebe-evẹvẹ họ otọ ethẹ iwou nọ i kiọkọ evaọ ẹkwotọ nọ a ghale kẹ omai, yọ oke o be joma ke no. Ma ru oware nana evaọ 1939, yọ udevie aso ma rọ kpama re ma dhẹ ugbo nọ o vrẹ auwa ọvo kpohọ okpẹwho Joplin evaọ ofẹ obọze ovatha-ọre Missouri, obọ America. Nọ ma lẹlẹ dhe emebe-evẹvẹ na họ re no, ma tẹ ruọ omoto gidi gidi dhẹ kpohọ oria nọ a ta nọ ma kokohọ hẹrẹ bẹsenọ itu nọ i kiọkọ e rẹ dhẹ ze. Ẹsejọhọ u bi gbe owhẹ unu nọ, ‘fikieme ma ro kpohọ usi uwoma ota evaọ irioke itieye je no ẹkwotọ na gidi gidi?’ Mẹ te vuẹ owhẹ ẹsiẹfa.

EVA e were omẹ nọ ọsẹgboni mẹ, Fred avọ Edna Molohan yọ Ileleikristi nọ i wuhrẹ omẹ epanọ mẹ rẹ rọ romakẹ egagọ Ọghẹnẹ. Okenọ a yẹ omẹ evaọ 1934 yọ a rrọ Emọ-Uwuhrẹ Ebaibol (hayo Isẹri Jihova) te ikpe udhe no. Ẹwho ọsese nọ a re se Parsons evaọ ofẹ obọze ovatha-ọre Kansas uviuwou mai o jẹ rria. Ukoko nọ ma jọ evaọ etẹe, enwenọ ohwo kpobi nọ ọ jariẹe yọ Oleleikristi nọ a rọ ẹzi wholo. Uviuwou mai o jẹ hai kpohọ iwuhrẹ ukoko je whowho Ẹme Ọghẹnẹ kẹ ahwo ẹsikpobi. Ma jẹ rehọ uvo Ẹdẹ-Ọmaha kpobi ta usi uwoma iyẹrẹ, ere ma je se usi uwoma ẹgbede oke yena. Ẹsejọ oma o rẹ dina rrọ omai, rekọ ọsẹ mẹ ọ jẹ hae dẹ askrimu kẹ omai nọ ma te kuhọ no.

Ẹkwotọ nọ ukoko osese mai o jẹ jọ ta usi uwoma o jọ ruaro, yọ ewho esese sa-sa gbe eria buobu nọ a jẹ jọ ru iruo ẹwọ e jọ usu ẹkwotọ na. Nọ ma tẹ nyabru ewhẹrẹ na, ẹsibuobu ma rẹ rehọ ebe mai nwene eware nọ a kẹ omai, eware wọhọ ibi-ekakọ gbe ẹbe, ike erifẹ ekpokpọ (uzedhe enọ a tọlọ obọ), hayo uzedhe erifẹ dede. Fikinọ ọsẹ mẹ o ru unevaze fihọ ebe na no vẹre, ma rẹ re eware nọ ma rehọ ebe nwene na.

USI-UWHOWHO SA-SA

Ọsẹgboni mẹ a wo egramafonu nọ a jẹ hae rọ ta usi uwoma. Oke yena mẹ kawo hrọ kẹ ohwo nọ o re kporo iei, rekọ me je fiobọhọ kẹ ọsẹgboni mẹ nọ a tẹ be rehọ iẹe kporo evuẹ ogbotu Brọda Rutherford kẹ emọ-uwuhrẹ Ebaibol rai gbe amọfa nọ a zihe bru.

Mẹ avọ ọsẹ gbe oni mẹ evaọ aro omoto-ọgba mai

Ọsẹ mẹ o zihe omoto mai nọ a re se Ford nọ a ku evaọ 1936 ruọ omoto-ọgba, koyehọ omoto nọ a wọ ọgba ologbo fihọ ehru riẹ. Omoto nana o fiobọhọ kẹ omai whowho usi uwoma Uvie na gaga. A rẹ kaki kporo ile nọ a rekọdo rọ kpare isiuru ahwo, kẹsena a ve kporo ovuẹ ogbotu nọ a rekọdo. Nọ u te kporo re no, ma vẹ rehọ ebe kẹ ahwo nọ a wo isiuru.

 Evaọ ẹwho ọsese jọ nọ a re se Cherryvale, evaọ Kansas, iporisi a ta kẹ ọsẹ mẹ nọ a kẹ riẹ uvẹ hẹ re ọ dhẹ omoto-ọgba na ruọ oria nọ a ru fihọ ẹwho na nọ ahwo buobu a rẹ jọ serihọ evaọ Ẹdoka, rekọ a kẹ riẹ uvẹ re omoto na ọ jọ otafe oria na. Fikiere ọsẹ mẹ ọ tẹ dhẹ omoto na kpohọ iyẹrẹ nọ e rẹriẹ ovao ku oria na evaọ oghẹrẹ nọ ahwo nọ a rrọ etẹe a gbẹ sai ro yo ovuẹ na. Oke utioye na, oma o jẹ hae were omẹ gaga nọ mẹ tẹ rrọ kugbe ọsẹ mẹ gbe Jerry, oniọvo-ọmọzae ọkpako mẹ.

Evaọ abọ urere ikpe 1930, ma ru ọruẹrẹfihotọ obọdẹ nọ ma sae rọ ta usi uwoma evaọ ekwotọ nọ a jẹ jọ wọso omai gaga. Ma rẹ riọ kpama, (wọhọ epanọ ma ru evaọ ẹwho Joplin, evaọ Missouri na) ma vẹ lẹlẹ dhe emebe-evẹvẹ hayo emebe esese họ otọ ethẹ iwou ahwo. Ma te ru ere no, ma vẹ jọ obọ otafe okpẹwho na hẹrẹ re ma riẹ sọ iporisi i mu ahwo mai jọ.

Evaọ oke yena, edhere ọfa jọ nọ a jẹ hae rọ ta usi uwoma họ onọ ma jẹ hae jọ dhe uhie họ nya. Re ma whowho ovuẹ Uvie na, ma rẹ jẹ ewẹ-ekpala nọ a kere eme fihọ họ uriohọ, ma ve dhe uhie họ nya okpẹwho wariẹ. Mẹ kareghẹhọ onya utioye jọ nọ a nya evaọ ẹwho mai, a kere fihọ ewẹ-ekpala nọ inievo na a jẹhọ uriohọ nọ, “Egagọ yọ Agbefẹ gbe Iwhayo.” A jọ ẹwho na nya ugbo nọ u thabọ te omaele ovo, kẹsena a te zihe ziọ uwou mai. A jọ onya na nyaku ọwọsuọ ọvuọvo ho, rekọ a nyaku ahwo buobu nọ a wo isiuru nọ a je riwi ai.

IKOKOHỌ ILOGBO OKE YENA

Uviuwou mai o jẹ hai no Kansas kpohọ ikokohọ ilogbo evaọ Texas. Ọsẹ mẹ o je ru iruo evaọ ekọmpene Missouri-Kansas-Texas nọ e rẹ dhẹ itreni (nọ a re je se M-K-T, hayo Katy). Fikiere ma jẹ hae rehọ obe-udu iruo riẹ rọ ruọ itreni na, onọ u ru rie lọhọ nọ ma jẹ sai ro weze bru imoni mai jọ, je kuomagbe ai kpohọ ikokohọ ilogbo na. Oniọvo-ọmọzae oni mẹ, Fred Wismar, avọ aye riẹ, Eulalie, a jẹ rria ẹwho nọ a re se Temple, evaọ Texas. Fred, oniọvo oni mẹ na o kurẹriẹ evaọ obọ emuhọ ikpe 1900 jẹ họ-ame evaọ okenọ ọ jọ uzoge, yọ ọ ta eware nọ o wuhrẹ na kẹ inievo-emetẹ riẹ, koyehọ amọ oni mẹ. Inievo ukoko na a riẹ riẹe gaga evaọ Texas, oria nọ ọ jọ je ru iruo odibo unuakpọ (nọ a bi se ọsẹro okogho enẹna). Ọ jọ wowou, ohwo nọ ọ rẹ wereva, yọ eva e rẹ were ohwo nọ ọ rrọ kugbei ẹsikpobi. O kru uzẹme na ga, yọ oriruo riẹ o fiobọhọ kẹ omẹ gaga evaọ okenọ mẹ gbẹ jọ uzoge.

Evaọ ukpe 1941, uviuwou mai u kpohọ okokohọ ologbo jọ evaọ St. Louis, Missouri. A te zizie emaha na kpobi re a keria ofẹ jọ evaọ okokohọ na re a gaviezọ kẹ ẹme Brọda Rutherford nọ uzoẹme riẹ o ta nọ, “Emọ Ovie Na.” Evaọ obọ ukuhọ ẹme riẹ na, Brọda Rutherford avọ ahwo nọ a je fiobọhọ kẹe a tẹ kẹ omai emaha na kpobi obe okpokpọ nọ uzoẹme riẹ o ta nọ Children (Emọ), onọ o siobọno, ma rẹro onana ha. Emaha nọ i bu te idu ikpegbisoi (15,000) obọdẹ okẹ nana u te obọ.

Evaọ amara Ane ọrọ ukpe 1943, ma reawere okokohọ ọsese jọ nọ o rẹ thọrọ ẹro ho evaọ okpẹwho Coffeyville, evaọ Kansas, onọ uzoẹme riẹ o jọ, “Call to Action” (“Use nọ O Kẹ Omai Ajọwha Iruo”). Okokohọ yena a jọ to Isukulu Odibọgba Esuo-Ọghẹnẹ họ, onọ a te hae jọ ikoko kpobi ru,  a te je siobọno omobe osese nọ u wo iwuhrẹ udhuvẹ gbe ikpegbivẹ nọ a ti ro ru isukulu na. Evaọ obọ ekuhọ ukpe yena, me ru ẹme ọsosuọ mẹ evaọ isukulu na. Okokohọ yena o jọ orọ obọdẹ kẹ omẹ keme, mẹ avọ amọfa jọ ma họ-ame evaọ ẹtẹre ame odhedhẹ jọ nọ o kẹle etẹe.

UTEE MẸ HỌ RE MẸ JỌ EBẸTẸLE RU IRUO

Me nwrotọ no isukulu evaọ ukpe 1951, u te te okenọ mẹ rẹ rọ jiroro oware nọ me ti ru evaọ obaro. Oware nọ mẹ gwọlọ họ re mẹ jọ Ebẹtẹle ru iruo, oria nọ Jerry ọ jọ ru iruo no vẹre. Fikiere a te vi efọmo mẹ kpobọ Brooklyn. Iroro nana nọ mẹ jẹ na o wha erere se omẹ gaga evaọ egagọ Ọghẹnẹ. U kri hi, a tẹ whobọhọ efọmo mẹ na, a te zizie omẹ nọ me mu iruo Ebẹtẹle họ evaọ Asa 10, 1952.

Me je rẹro nọ mẹ te jọ oria nọ a rẹ jọ printi ebe ru iruo re mẹ sae jọ usu ahwo nọ a bi printi emagazini gbe ebe efa. Rekọ a te fi omẹ họ iruo ahwo nọ a rẹ wọ emu kẹ ahwo, uwhremu na, a tẹ kẹ omẹ iruo evaọ ikichini, onọ mẹ jọ wuhrẹ eware buobu nọ e were omẹ gaga. A fi omẹ họ oria nọ a rẹ jọ printi ebe ẹdẹvo ho. Rekọ oghẹrẹ nọ omaa iruo ikichini na o jọ u fiobọhọ kẹ omẹ gaga, keme o jẹ kẹ omẹ uvẹ ru uwuhrẹ omobọ mẹ evaọ uwou-ebe Ebẹtẹle na. Onana u fiobọhọ kẹ omẹ wo ẹnyaharo evaọ egagọ Ọghẹnẹ jẹ bọ ẹrọwọ mẹ ga. U te je ru omẹ gbaemu nọ mẹ rẹ gọ Jihova evaọ Ebẹtẹle te epanọ u re kri te kpobi. Jerry o no Ebẹtẹle evaọ 1949, ọ tẹ rehọ Patricia, rekọ a jẹ rria kẹle Brooklyn. A fiobọhọ kẹ omẹ gaga, jẹ tuduhọ omẹ awọ evaọ ikpe ọsosuọ nọ mẹ rọ ziọ Ebẹtẹle.

Nọ mẹ ziọ Ebẹtẹle obọ, a ru ọruẹrẹfihotọ nọ a jẹ rọ dawo inievo-emezae nọ a re fiba usu inievo nọ ukoko ulogbo u re vi nyae kẹ evuẹ ogbotu. A re vi inievo nana kpohọ ikoko nọ e rehọ emaele egba ivẹ (200) thabọ no Brooklyn re a kẹ ovuẹ ogbotu je lele ukoko na kpohọ usi uwoma ota. Me wo uvẹ-ọghọ nọ a ro fi omẹ họ usu inievo nana. Ozọ u je mu omẹ nọ mẹ jẹ kẹ ovuẹ ogbotu ọsosuọ mẹ, onọ o jẹ hai theri te auwa ọvo evaọ oke yena. Itreni mẹ jẹ hai ro kpohọ ikoko na. Mẹ kareghẹhọ uvo Ẹdoka jọ nọ ekpahe e jọ evaọ ukpe 1954. Mẹ ruọ itreni nọ o bi kpohọ New York nọ o hai ti ru nọ me re ro te Ebẹtẹle evaọ ubrobọ owọwọ. Rekọ okpofou jọ o te fou avọ ekpalekpa-ame nọ i bi kie. Kẹsena ẹjini itreni na o te fu. Ukuhọ riẹ, itreni na o te te okpẹwho New York evaọ oware wọhọ ighọjọ isoi ohiohiẹ Ẹdọvo-Oka. Mẹ tẹ nwane ruọ edhere Brooklyn jẹ nya ovavo kpobọ ikichini kpohọ iruo, mẹ dina leti yọ oma o rrọ omẹ gaga no fiki itreni nọ mẹ keria asohẹrioke na. Rekọ ebẹbẹ itieye na i te oware ovo ho nọ who te rri evawere nọ who re wo, nọ who te weze bru inievo na je mu egbẹnyusu ekpokpọ evaọ iweze obọdẹ itieye na.

Ma be ruẹrẹ oma kpahe re ma jọ istudio WBBR whowho evuẹ

Evaọ ikpe ọsosuọ nọ mẹ rọ ziọ Ebẹtẹle, a zizie omẹ re mẹ jọ usu ahwo nọ a re whowho evuẹ evaọ irediyo WBBR. Oke yena yọ istudio na e jọ edhe avọ ivẹ uwou-ehru nọ o jọ 124 Columbia Heights. Iruo nọ a kẹ omẹ họ re mẹ jọ omọvo enọ i bi ru uwuhrẹ Ebaibol koka koka evaọ irediyo na. Brọda A. H. Macmillan, omọvo uviuwou Ebẹtẹle na nọ o kri no, ọ jẹ hai wobọ evaọ iruẹru irediyo nana kẹse kẹse. Brọda Mac ahwo a mae riẹe. Ọ jọ emamọ oriruo kẹ omai izoge nọ e jọ uviuwou Ebẹtẹle na evaọ epanọ a re ro thihakọ evaọ egagọ Jihova.

Ma jẹ ghale ewẹ-ebe WBBR kẹ ahwo rọ kpare isiuru rai

Evaọ 1958 a te zizie omẹ re me ru iruo kugbe Isukulu Giliad. Iruo nọ mẹ jọ etẹe je ru họ, mẹ jẹ hai fiobọhọ kẹ inievo nọ i nwrotọ no isukulu na ze re a sai wo ivisa je ru ọruẹrẹfihotọ epanọ a sae ro kpohọ eria nọ a vi rai nya. Ofa arupre o jọ ghaghae gaga evaọ oke yena, onọ o wha riẹ ze nọ evaọ usu inievo nọ i nwrotọ na, umutho rai ọvo e ruọ arupre. Ibuobu nọ i je kpohọ Africa gbe Ofẹ Ovatha-ọre akpọ na, ekọ oyibo ilogbo a jẹ ro. Nọ arupre nọ a rẹ rọ fa ofa i ti muhọ ebu no, ofa arupre u te kpotọ omojọ, imishọnare buobu a tẹ jẹ ruọ arupre kpohọ oria nọ a vi rai nya.

Me je koko ileta nọ a te kẹ ahwo isukulu Giliad họ taure a te ti nwrotọ

OKOKOHỌ OLOGBO NỌ MA NYA

Evaọ 1960, iruo mẹ e tẹ jẹ kẹre te irupre ilogbo nọ mẹ jẹ haya re e wọ inievo no America kpobọ Europe, oria nọ a jọ ru ikokohọ akpọ-soso evaọ ukpe 1961. Mẹ ruọ arupre ologbo nọ o no New  York kpobọ Hamburg, evaọ Germany kpohọ okokohọ yena. Nọ okokohọ na o kuhọ no, mẹ gbe inievo-emezae esa efa nọ i no Ebẹtẹle ze ma tẹ haya omoto dhẹ no Germany kpobọ Italy, kpobọ uwou ogha nọ o rrọ Rome. Ma tẹ wariẹ dhẹ no etẹe kpobọ France, jẹ dhẹ orọ Igbehru Pyrenees ruọ Spain, oria nọ a jọ fi awhaha họ iruo Uvie na. Ma sae wha ebe jọ se inievo mai evaọ obọ Barcelona, ma fare ebe na uko wọhọ okẹ nọ ma ro se ai. Oma o were omai gaga nọ ma ruẹ e rai! Nọ ma dhẹ te Amsterdam, ma tẹ jọ etẹe ruọ arupre mai zihe kpobọ New York.

Oware wọhọ ukpe ovo nọ u lele i rie, iruo mẹ evaọ Ebẹtẹle e tẹ kẹre te ọruẹrẹfihotọ nọ me re ru re inievo nọ a salọ a sai kpohọ eria sa-sa akpọ na kẹ okokohọ akpọ soso nọ a ru evaọ 1963, onọ uzoẹme riẹ o jọ, “Everlasting Good News” (Usi Uwoma Ebẹdẹ Bẹdẹ). A ru ọruẹrẹfihotọ na kẹ inievo egba isoi gbe udhone-gbesa (583) re a kpohọ okokohọ na evaọ Europe, Asia, gbe South Pacific, onya na u te kuhọ evaọ Honolulu, Hawaii, gbe Pasadena evaọ California. Oware ofa nọ a ru evaọ erẹ okokohọ na họ, a wẹriẹ obọ Lebanon gbe Jordan re a wuhrẹ kpahe ekwotọ sa-sa nọ a fodẹ evaọ Ebaibol na. U te no ofa irupre gbe ehọtẹle nọ a rẹ rria nọ ma jẹ ruẹrẹhọ no, ẹko-iruo Ebẹtẹle mai na o mi ivisa kẹ ahwo kpobi nọ a kpohọ okokohọ na nọ a sae rọ wẹriẹ erẹwho sa-sa.

ỌRIVẸ ỌKPOKPỌ

Ukpe 1963 yọ obọdẹ ukpe gaga kẹ omẹ fiki oware uwoma ofa jọ nọ o via. Evaọ Azeza 29, mẹ rọo Lila Rogers nọ o no Missouri ze, yọ ọ jọ omọvo uviuwou Ebẹtẹle na te ikpe esa no. Oka ọvo nọ ma rọo no, mẹ avọ Lila ma jọ usu ahwo nọ a kpohọ ekwotọ sasa akpọ na, ma kpobọ Greece, Egypt, gbe Lebanon. Ma ruọ arupre no Beirut kpohọ oria okakao jọ nọ irupre e rẹ kpahe evaọ Jordan. Fikinọ a fi awhaha họ iruo mai evaọ Jordan, yọ a vuẹ omai no vẹre inọ a be kẹ Isẹri Jihova ivisa ruọ orẹwho na ha, ma riẹ oware nọ o te via ha nọ ma te te obei. U gbe omai unu gaga nọ ma te obei jẹ ruẹ ogbotu ahwo nọ a dikihẹ akotọ oria nọ arupre ọ rẹ kpahe, yọ a kru omohọ nọ a kere fihọ nọ, “Isẹri Jihova, Dedegbo”! Eva e were omai gaga inọ ma rọ ubiẹro ruẹ ekwotọ nọ a fodẹ evaọ Ebaibol na! Ma te eria nọ esẹ-ode oke anwae nọ a gbiku rai fihọ Ebaibol na a rria, eria nọ Jesu avọ ikọ riẹ a jọ ta usi uwoma, gbe eria nọ Ileleikristi e jọ muhọ ẹvaha ruọ akpọ na soso.​—Iruẹru 13:47.

Anwọ ikpe udhuvẹ gbe ikpegbisoi mẹ avọ Lila ma bi ro ru iruo kugbe na. Ma kpohọ Spain gbe Portugal ẹsibuobu evaọ okenọ a ro fi awhaha họ iruo mai evaọ erẹwho yena. Ma jẹ tuduhọ inievo na awọ, jẹ wha ebe gbe eware efa nọ a gwọlọ ro se ae. Ma tubẹ nyae ruẹ inievo jọ dede, enọ a fihọ uwou-odi evaọ Cádiz nọ o rrọ Spain. Eva e were omẹ gaga inọ mẹ sae rehọ ẹme nọ me ru no Ikereakere na ze bọ ae ga.

Mẹ avọ Lila kugbe Patricia avọ Jerry Molohan, nọ ma je kpohọ okokohọ ologbo nọ a ru ukpe 1969, onọ uzoẹme riẹ o jọ “Peace on Earth”

Anwọ 1963 ze na, me fiobọhọ ru ọruẹrẹfihotọ kẹ inievo no, nọ a ro kpohọ ikokohọ akpọ-soso evaọ Africa, Australia, Central gbe South America, Europe, Ofẹ Ovatha-ọre Akpọ na, Hawaii,  New Zealand, gbe Puerto Rico. Mẹ avọ Lila ma kpohọ ikokohọ ilogbo buobu kugbe no, ojọ họ onọ a ru evaọ Warsaw, Poland, evaọ ukpe 1989. Inievo buobu nọ i no obọ Russia ze a ziọ okokohọ ologbo yena, onọ o jọ orọ ọsosuọ rai! Inievo emezae gbe emetẹ buobu nọ ma ruẹ yọ enọ a mu fihọ uwou-odi Soviet Union ikpe buobu no fiki ẹrọwọ rai.

Iwou ogha sa-sa wariẹ akpọ na họ nọ ma jẹ hae weze kpohọ jẹ tuduhọ iviuwou Ebẹtẹle gbe imishọnare awọ na yọ uvẹ-ọghọ nọ mẹ reawere riẹ gaga no. Orọ urere nọ ma ro weze kpobọ South Korea, ma jọ obei ruẹ inievo udhuvẹ-gbikpe mai nọ e rrọ uwou-odi evaọ okpẹwho Suwon. Inievo nana kpobi a wo emamọ eriwo, yọ a bi rẹro oke nọ a te wariẹ wobọ evaọ iruo usi uwoma ota na. Inievo nana nọ ma ruẹ na o kẹ omai uduotahawọ gaga!​—Rom 1:11, 12.

ẸVI Ọ BE WHA OGHỌGHỌ SE OMAI

Anwọ ikpe buobu ze na mẹ ruẹ epanọ Jihova o bi ro ru ahwo riẹ vihọ no, evaọ 1943 nọ mẹ rọ họ-ame, iwhowho-uvie idu udhusoi (100,000) e jọ ukoko na evaọ akpọ-soso, enẹna iwhowho-uvie nọ e be gọ Jihova evaọ ekwotọ nọ i bu te egba ivẹ gbe udhuvẹ (240) i bu vi ima eree (8,000,000) no. Ẹvi nana ọ be romavia fiki iruo usi uwoma ota na, onọ inievo nọ i nwrotọ no isukulu Giliad ze a be kobaro riẹ na. A re gbiku eva nọ e be were omẹ hẹ nọ me ro lele ibuobu imishọnare nana ru iruo no evaọ ikpe nana kpobi, je fiobọhọ kẹ ae kpohọ ẹkwotọ nọ a vi rai nya!

Eva e were omẹ gaga inọ evaọ oke uzoge mẹ, mẹ jiroro nọ me re kpohọ Ebẹtẹle re mẹ rọ ere ru iruo odibọgba mẹ kẹre. Jihova ọ ghale omẹ gaga no evaọ idhere sa-sa. U te no oghọghọ nọ iruo Ebẹtẹle e wha se omai no, evaọ ikpe buobu, mẹ avọ Lila ma lele ikoko nọ e rrọ Brooklyn ru iruo usi uwoma ota na no, yọ ma jarai wo egbẹnyusu buobu.

Lila ọ be tha omẹ uke nọ mẹ gbẹ be sai ro ru iruo Ebẹtẹle mẹ kẹdẹ kẹdẹ. Dede nọ mẹ kpako te ikpe udhone-gbene no enẹna, mẹ gbẹ be sai ru iruo nọ e rẹ kẹ evawere, me bi fiobọhọ koko ileta họ evaọ uwou ogha na.

Mẹ avọ Lila enẹna

Oghọghọ riẹ o rro kẹhẹ nọ mẹ rọ rrọ ukoko Jihova, jẹ be ruẹ ohẹriẹ ulogbo nọ o rrọ udevie ahwo nọ a be gọ Jihova gbe enọ e be gọe he. Ma bi wo otoriẹ eme nọ e rrọ obe Malakae 3:18 na vevẹ, inọ: “Wha ve ti vuhu enọ ikiẹrẹe gbe iruimuomu, gbe ọnọ ọ be gọ Ọghẹnẹ gbe ọnọ ọ be gọ e he.” Kẹdẹ kẹdẹ ma be ruẹ akpọ Setan nọ o bi dhe ẹhẹhẹriẹ, yọ ahwo nọ a wo ẹruore ọvo ho gbe enọ i wo evawere tere he evaọ uzuazọ a da riẹ fia. Rekọ ahwo nọ a you Jihova jẹ be gọe, a bi wo evawere evaọ uzuazọ ghelọ oke ogaga nana, a te je wo ẹruore nọ o muẹro kpahe obaro. Ọghọ riẹ ọ rro kẹhẹ nọ ma bi ro whowho usi uwoma Uvie na! (Mat. 24:14) Ma bi rẹro ẹdẹ nọ ọ be tha kẹle na nọ Uvie Ọghẹnẹ o te rọ raha akpọ anwae nana no, o vẹ te rehọ akpọ ọkpokpọ avọ eghale nọ a ya eyaa riẹ na ze, te oma okpokpọ gbe uzuazọ nọ u wo oba ha. Evaọ oke yena, idibo Jihova nọ i kru ẹrọwọ rai te urere evaọ otọakpọ a vẹ te reawere uzuazọ ebẹdẹ bẹdẹ.