Kpohọ eme nọ e riẹ eva

Kpohọ oria izoẹme

Odẹ Ohwo jọ Evaọ Ebaibol nọ A Ruẹ Evaọ Othẹ Anwae

Odẹ Ohwo jọ Evaọ Ebaibol nọ A Ruẹ Evaọ Othẹ Anwae

Evaọ ukpe 2012, ewẹ othẹ jọ nọ a ruẹ nọ e rria te ikpe idu esa (3,000) no, o lẹliẹ akpọ gbe ekiotọ unu gaga. Eme ọ lẹliẹ onana gbe ahwo unu? Orọnikọ ewẹ othẹ na ha, rekọ oware nọ a kere fihọ ae.

Nọ ekiotọ eware anwae a koko ewẹ othẹ na họ, a te muẹrohọ nọ a rọ ibieme Kenan kere ẹme jọ fihọ iẹe. Ẹme na họ: “Eshba’al Ben [ọmọzae] Beda.” Onana họ orọ ọsosuọ nọ ekiotọ eware anwae a ruẹ odẹ nana evaọ oware anwae.

Uzẹme riẹ họ, a ginẹ jọ Ebaibol na se ohwo jọ Ẹshbal, ọnọ ọ jọ ọmọ Sọl ovie na. (1 Irv. 8:33; 9:39) Prọfẹsọ jọ nọ a re se Yosef Garfinkel, ọnọ ọ jọ usu ahwo nọ a tọ ewẹ othẹ na via na ọ ta nọ: “U gbunu gaga inọ odẹ na, Ẹshbal o rrọ Ebaibol, ma tẹ jẹ ruẹ e riẹ evaọ ewẹ othẹ anwae nọ ma tọ ku. Yọ te ọnọ Ebaibol ọ fodẹ gbe ọnọ ma tọ ku na, etoke esuo Devidi ovie na odẹ na o jọ romavia.” Ahwo jọ a roro nọ etoke yena ọvo a rọ rehọ odẹ nana se ohwo. Oware nana nọ ekiotọ eware anwae a kiẹ via na, yọ oware ofa nọ o kẹ imuẹro nọ Ebaibol ọ rrọ gbagba.

U wo oria ofa evaọ Ebaibol na nọ a jọ se Ẹshbal na Ish-boshẹth. A jọ oria nana rọ “boshẹth” ro nwene “bal.” (2 Sam. 2:10) Fikieme? Ekiotọ-eriariẹ a ta nọ: “O sae jọnọ oware nọ o soriẹ nọ a gbe ro se odẹ na Ẹshbal evaọ obe 2 Samuẹle he họ, o jẹ hae kareghẹhọ ahwo ẹdhọ Kenan nọ a re se Ebale. Rekọ whọ rẹ jọ obe Iruẹru-Ivie ruẹ odẹ na dẹe.”