Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Uwou-Eroro Na—Uvitha Uwuhrẹ  |  Aria 2017

 IRUẸRU MAI ERỌ OKE NỌ U KPEMU

“Oke Vẹ Ma te rọ Wariẹ Ru Okokohọ?”

“Oke Vẹ Ma te rọ Wariẹ Ru Okokohọ?”

O JỌ ubrobọ ekuhọ Akpegbọvo ọrọ ukpe 1932 evaọ ẹwho Mexico. Oka nọ u kpemu o jọ oke ọsosuọ kpobi nọ a rọ whẹ ikpẹ edhere nọ e rẹ kpọ edhadhẹ omoto họ evaọ ẹwho nana. Yọ ahwo nọ a vrẹ ima ọvo (1,000,000) a rrọ ẹwho na. Rekọ obọnana, usi ofa jọ o riẹ nọ ahwo a be ta ẹme kpahe viukpọ ẹme ikpẹ na. Eniyẹrẹ e be ta kpahe oware nọ o be via oka nana. A kpohọ oria nọ itreni o re jo fi ahwo hotọ avọ ekamẹra rai, be hẹrẹ ọrara jọ, ọye họ Brọda Joseph F. Rutherford nọ ọ jọ prẹsidẹnte ọ Watch Tower Society evaọ oke yena. Isẹri Jihova nọ e rrọ ẹwho na a be rọ ọwhọ hẹrẹ re a dede Brọda Rutherford rehọ avọ evawere. Ọ nyaze fiki okokohọ ologbo edesa nọ a gwọlọ ru.

Emagazini na, The Golden Age o ta nọ: “Avro ọ riẹ hẹ, okokohọ nana ọ te jọ ọrọ oghẹrẹsa nọ ma te kareghẹhọ ikpe buobu, nọ ma te roro kpahe epanọ uzẹme na u ro wo ẹnyaharo ologbo evaọ Mexico.” Rekọ eme u ru nọ okokohọ nana nọ ahwo udhuhrẹ gbe ikpe (150) ọvo a nya na u ro wuzou tere?

Taure a te ti ru okokohọ nana, ẹnyaharo ọ jẹ jọ Mexico romavia tere he evaọ iruo Uvie na. No anwọ 1919 ze, a jẹ hae jọ orẹwho na ru ikokohọ esese, rekọ ikpe nọ i lele i rie unu ikoko nọ e jọ orẹwho na i te je kpotọ. Nọ ukoko o ta nọ a ti rovie uwou ogha fihọ ẹwho Mexico evaọ 1929, o tẹ wọhọ nọ eware i bi ti woma. Rekọ ezadhe jọ e jariẹ. Nọ ukoko o ta nọ inievo na a gbe du thueki rai evaọ etoke iruo usiuwoma na ha, ọgbaẹmo-aro jọ o te muofu no ukoko na jẹ rọ utu uwuhrẹ Ebaibol obọriẹ mu. U te no ere no, ọsẹro uwou ogha oke yena o ru oware jọ nọ o rọwokugbe Ebaibol na ha, fikiere a te nwene iei. O ginẹ gwọlọ nọ a re fiobọhọ kẹ inievo nọ e gbẹ jẹ daoma ru oreva Jihova evaọ Mexico.

Brọda Rutherford ọ jọ okokohọ na kẹ obọdẹ evuẹ ivẹ rọ tuduhọ inievo na awọ ziezi, kẹsena a tẹ jẹ gaviezọ kẹ emamọ evuẹ iredio isoi efa. Oyena o jọ orọ ọsosuọ nọ oria iredio Mexico o rọ wha emamọ usi na nya orẹwho na soso duwu. Nọ a ru okokohọ na no, ọsẹro uwou ogha okpokpọ nọ a ro mu na ọ tẹ nabe wariẹ koko iruo Uvie na họ, kẹsena inievo nọ i wo ajọwha ziezi a te duomahọ iruo usiuwoma ota na, yọ Jihova ọ ghale rai re.

Okokohọ nọ a jọ ẹwho Mexico ru evaọ 1941

Ukpe nọ u lele i rie, a tẹ jọ orẹwho na ru ikokohọ ilogbo ivẹ. A ru ọjọ evaọ ẹwho Veracruz, a te ru ọnọ o kiọkọ evaọ ẹwho Mexico. Ẹvi ọ tẹ jẹ romavia evaọ iruo Uvie na fiki omodawọ inievo na. Evaọ 1931, iwhowho-uvie udhone gbivẹ e jọ orẹwho na. Ikpe ikpe nọ i lele i rie, iwhowho-uvie na a tẹ rọ akuakpe bu vi epaọ ọsosuọ! Evaọ 1941, iwhowho-uvie nọ i bu te odu ọvo (1,000) a kokohọ kẹ Theocratic Assembly nọ a jọ ẹwho Mexico ru.

“A VẸRUỌ IYẸRẸ NA”

Evaọ 1943, inievo na a tẹ jẹ rọ ewẹ-ekpala esese nọ a kere eme fihọ whowho okokohọ nọ uzoẹme riẹ o ta nọ “Free Nation’s” Theocratic Assembly, onọ a  jọ ewho ikpegbivẹ ru evaọ Mexico. * A re thuru ewẹ-ekpala evẹvẹ ivẹ kugbe a vẹ jẹ ae họ ẹkoko, ọjọ ọ rẹ jọ obaro ọdekọ ọ vẹ jọ obemu. Ukpe 1936 Isẹri Jihova a ro muọ edhere otiọna họ ero whowho usi uwoma na.

Emagazini jọ evaọ 1944 nọ uwoho inievo na o jọ romavia evaọ ẹwho Mexico, yọ a fi ewẹ-ekpala evẹvẹ họ oma

Emagazini jọ nọ a re se La Nación o ta kpahe epanọ ewẹ-ekpala nọ a je ro zizie ahwo na u wiruo te evaọ ẹwho Mexico inọ: “Evaọ ẹdẹ ọsosuọ [okokohọ] na, a vuẹ [Isẹri Jihova na] nọ jọ a zizie amọfa ze. Ẹdẹ nọ o lele i rie, ahwo na a te bu vi oria okokohọ na.” Onana u ru nọ eva e jẹ rọ dha isu ichọche Katọlik, fikiere a te mu ẹkẹ usi rai họ ewhowho be rọ wọso inievo na. Ghelọ ọwọsuọ na, inievo nọ i wo ajọwha ziezi a gbe je kpohọ iyẹrẹ nyai whowho usi uwoma na. Emagazini La Nación ọ ta re nọ: “Ahwo ẹwho na kpobi a ruẹ e rai . . . te ezae te eyae nọ a ku ewẹ-ekpala fihọ oma.” Uwoho inievo nọ e rrọ iyẹrẹ evaọ ẹwho Mexico o romavia evaọ emagazini na. A kere fihọ obotọ uwoho na nọ: “A vẹruọ iyẹrẹ na.”

“EHWA NỌ E LỌHỌ JẸ RUỌRUỌ VI OTỌ ISIMETI”

Evaọ etoke ikpe yena, o jẹ hae jọ bẹbẹ gaga kẹ Isẹri Jihova buobu re a kpohọ ikokohọ nọ a jẹ hai ru evaọ Mexico. Iwhre inievo buobu a jẹ hai no ze, yọ itreni e rẹ sae dhẹ ruọ ae eva ha keme a wo emamọ idhere he. Ukoko jọ u kere nọ: “Ufi etẹligrafo ọvo họ oware nọ o nya okegbe mai na vrẹ.” Fikiere, inievo na buobu a jẹ hae ro eketekete hayo rọ owotọ nya edẹ buobu te oria nọ a sae jọ ro itreni kpohọ ẹwho nọ a be jọ ru okokohọ na.

Inievo na buobu a wo ugho tere he, udugaga a jẹ hai ro wo ugho nọ a rẹ rọ foma te oria okokohọ na. Nọ a te te obei, ibuobu rai a re lele inievo nọ e rrọ ẹwho na rria uwou, yọ a jẹ hai dede ae rehọ avọ evawere. Efa e jẹ hae wezẹ Egwa Uvie. Evaọ okokohọ jọ nọ a nya, inievo udhone gbikpe a wezẹ uwou ogha, yọ ehru ekatọno ebe a kiẹzẹ. Yearbook of Jehovah’s Witnesses o ta nọ inievo nana nọ i wo edẹro gaga na, a rri nọ ekatọno nọ a ro ru ehwa na “e lọhọ jẹ ruọruọ vi otọ isimeti.”

Inievo na a se uye nọ o bẹ rai gbe oware ovo ho, nọ a te roro kpahe irere gbe evawere nọ a ti wo nọ a ti kuomagbe inievo efa evaọ okokohọ na. Nẹnẹ, iwhowho-uvie nọ e rrọ Mexico e joma bu te ima ọvo (1,000,000) no, yọ inievo na a gbe bi dhesẹ ẹzi edẹro ọvona. * Evaọ 1949, iyẹrẹ nọ uwou ogha Mexico u vi se ukoko kpahe inievo na họ: “Ebẹbẹ nọ inievo na a rẹ rẹriẹ ova dhe ẹsejọ, u ri ti whrehe ajọwha nọ a wo kẹ iruo Uvie na ha. Keme nọ ma te ru okokohọ no, inievo na a rẹ gbẹ ta ẹme kpahe iẹe oke lelehie, yọ onọ nọ a rẹ nọ omai ẹsikpobi họ, Oke vẹ ma te rọ wariẹ ru okokohọ?” Epọvo na o gbẹ rrọ kẹ inievo na rite inẹnẹ.​—Iruẹru Mai erọ Oke nọ U Kpemu evaọ Central America.

^ edhe-ẹme 9 Wọhọ epanọ Yearbook of Jehovah’s Witnesses ọrọ ukpe 1944 o ta, okokohọ nana “u ru nọ Isẹri Jihova a rọ romavia evaọ emapo Mexico.”

^ edhe-ẹme 14 Evaọ 2016, ahwo ima ivẹ, idu egba ivẹ gbe udhosa gbivẹ, gbe egba ezeza gbe udhuvẹ gbe ezeza (2,262,646), a kpohọ Ekareghẹhọ na evaọ Mexico.