Kpohọ eme nọ e riẹ eva

Kpohọ oria eware nọ e riẹe eva

Ma rẹ Sai Wuhrẹ Kpahe Ọghẹnẹ Ẹkwoma Eruẹaro Riẹ

Ma rẹ Sai Wuhrẹ Kpahe Ọghẹnẹ Ẹkwoma Eruẹaro Riẹ

Evaọ oke anwae, Ọghẹnẹ ọ jẹ rehọ ẹkwoma eruẹaro riẹ ta ẹme kẹ ahwo-akpọ. Kọ ma sae jọ eme nọ Ọghẹnẹ ọ ta riẹ epanọ ma re ro wo eghale riẹ? Ee, ma sai wuhrẹ eware buobu. Joma ta kpahe eruẹaro esa Ọghẹnẹ jọ gbe eware nọ ma rẹ sai wuhrẹ mi ai.

ABRAHAM

Ọghẹnẹ o wo ọriẹwẹ hẹ yọ ọ gwọlọ nọ ọ rẹ ghale ahwo-akpọ kpobi.

Ọghẹnẹ ọ ya eyaa kẹ Abraham ọruẹaro na inọ: “Oghale u ti gine te iviuwou otọ na kpobi ẹkwoma ra.”​—Emuhọ 12:3.

Eme onana u wuhrẹ omai? Ọghẹnẹ o you omai gaga yọ ọ gwọlọ ghale uviuwou kpobi​—te ezae te eyae, te emaha nọ i yoẹme kẹe.

MOSIS

Ọghẹnẹ ọ vọ avọ ohrọ yọ ọ rẹ ghale ahwo kpobi nọ a gwọlọ riẹe.

Ọghẹnẹ Erumeru na ọ kẹ Mosis ọruẹaro na ogaga nọ o je ro ru iruo igbunu. Ghele na Mosis ọ lẹ inọ: “Ru omẹ riẹ idhere ra, re mẹ ruẹse riẹ owhẹ jẹ ruabọhọ wo ọjẹrehọ ra.” (Ọnyano 33:13) Oware nana nọ Mosis ọ yare na o were Ọghẹnẹ gaga, fikiere o te fiobọhọ kẹe re ọ riẹe ziezi je wo otoriẹ idhere riẹ. Wọhọ oriruo, Mosis o wuhrẹ nọ Ọghẹnẹ nọ ọ ma omai na yọ “Ọghẹnẹ nọ o wo ohrọ-oriọ gbe ọdawẹ.”​—Ọnyano 34:6, 7.

Eme onana u wuhrẹ omai? Ọghẹnẹ ọ gwọlọ nọ ọ rẹ ghale omai kpobi​—te ezae, te eyae, te emaha na otẹrọnọ ma daoma re ma riẹe ziezi. Ọ jọ Ikereakere Efuafo na vuẹ omai oghẹrẹ nọ ma rẹ rọ gọe keme ọ gwọlọ nọ ma re wo aruoriwo gbe eghale riẹ.

JESU

Jesu o dhesẹ nọ o wo ọdawẹ keme o siwi oghẹrẹ eyao kpobi

Ọghẹnẹ ọ te ghale omai bẹdẹ bẹdẹ otẹrọnọ ma wuhrẹ kpahe Jesu, eware nọ o ru, gbe eware nọ o wuhrẹ.

Ma rẹ jọ Ẹme Ọghẹnẹ se kpahe iku uzuazọ Jesu gbe eware nọ o wuhrẹ. Ọghẹnẹ ọ kẹ Jesu ogaga nọ o je ro ru iruo igbunu. O siwi ahwo nọ i tuaro, enọ i diezọ, enọ e ko, jẹ tubẹ kpare ahwo nọ a whu no zihe ziọ uzuazọ. Eware nana nọ Jesu o ru na i dhesẹ nọ Ọghẹnẹ ọ te ghale ahwo-akpọ kpobi evaọ obaro. Jesu ọ ta oware nọ mai omomọvo o re ru re ma sai wo eghale Ọghẹnẹ inọ: “Re a wo uzuazọ ebẹdẹ bẹdẹ, o gwọlọ nọ a rẹ riẹ owhẹ, Ọghẹnẹ uzẹme ọvo na, gbe ọnọ who vi ze na, Jesu Kristi.”​—Jọn 17:3.

Jesu o wo ọdawẹ gbe ohrọ-oriọ, yọ ọ jọ wowou. Ezae gbe eyae, te emaha te ekpako a jẹ hae nyabru Jesu ze, keme ọ ta nọ: “Wha . . . wuhrẹ mi omẹ, keme mẹ rrọ wowolẹ je wo omaurokpotọ, wha re ti wo omosasọ kẹ omarai.” (Matiu 11:29) Evaọ oke Jesu, ahwo a jẹ hai gboja kẹ eyae na je rri rai vo, rekọ Jesu ọ jọ ere he. Ukpoye, o bru ọghọ họ ae oma, yọ ọ jọ wowou kugbe ae.

Eme onana u wuhrẹ omai? Jesu o you ahwo kpobi, yọ o fi emamọ oriruo họ otọ kẹ omai kpahe epanọ ma re yerikugbe ohwohwo.

JESU HỌ ỌGHẸNẸ HẸ

Ẹme Ọghẹnẹ ọ ta nọ “rọkẹ omai, Ọghẹnẹ ọvo ọ rrọ,” gbe inọ Jesu Kristi yọ ọnyukọ Ọghẹnẹ. (1 Ahwo Kọrint 8:6) Jesu ọ ta vevẹ nọ Ọghẹnẹ ọ rro vi ei yọ Ọghẹnẹ o vi rie ziọ otọakpọ na.​—Jọn 11:41, 42; 14:28. *

^ edhe-ẹme 17 Re who gbe wuhrẹ kpahe Jesu Kristi, se uwuhrẹ avọ 4 ibroshọ na Emamọ Usi nọ U No Obọ Ọghẹnẹ Ze! evaọ oria itanẹte mai www.jw.org/iso.