Ẹyao Iroro Ọ be Kẹ Ahwo Buobu Uye
“Mẹ rẹ ruawa ẹsikpobi. Mẹ ọvo mẹ tẹ make rrọ uwou dede, mẹ rẹ ruawa.”
“Nọ eva e tẹ be were omẹ gaga mẹ rẹ ruawa, keme mẹ riẹ nọ oware nọ u ti lele iei họ ọkora.”
“Mẹ rẹ daoma tẹrovi eware nọ mẹ rẹ sai ru evaọ okpẹdẹ, rekọ ẹsejọ mẹ vẹ be ruawa kpahe eware efa buobu.”
Ahwo nọ a ta eme nana yọ ahwo nọ a be mọ ẹyao iroro. Kọ eware nana nọ ahwo na a ta na, e be hai ru owhẹ hayo ohwo uviuwou ra jọ?
Riẹ nọ whẹ ọvo o be via kẹ hẹ. Ẹyao iroro ọ be wha ebẹbẹ se ahwo buobu. Nọ ohwo ọ tẹ be mọ ẹyao iroro, te ọye te ahwo uviuwou riẹ a rẹ ruẹ uye riẹ.
O rrọ vevẹ nọ “oke obẹbẹ nọ o rẹ bẹ ẹria” nọ ma rrọ na, o rrọ usu eware nọ o be wha ebẹbẹ nana ze. (2 Timoti 3:1) Ekiakiẹ jọ nọ a ru u dhesẹ nọ evaọ akpọ na soso, omọvo evaọ usu imaree o wo ẹyao iroro. No anwọ ukpe 2020 ze, fiki okpẹyao COVID-19 na, evaọ usu ahwo udhusoi, ahwo nọ a bu te oware wọhọ 26 a be ruawa vi epaọ ọsosuọ, yọ ahwo nọ a bu te oware wọhọ 28 a be jọ ọkọkora vi epaọ ọsosuọ.
Dede nọ u wuzou re ma riẹ nọ ahwo buobu a be mọ ẹyao iroro, oware nọ o mai wuzou họ epanọ ahwo uviuwou ra a sae rọ wereva, jẹ jọ sasasa.
Eme họ ẹyao iroro?
Ohwo nọ o wo ẹyao iroro ho, ọ rẹ jọ sasasa, yọ ọ rẹ daoma riẹ oware ru ziezi. Ọ rẹ sae thihakọ eware nọ e be kẹe uye, ru iruo ziezi jẹ wereva evaọ uzuazọ.
Ẹyao iroro . . .
-
ORỌNIKỌ fiki eware jọ nọ ohwo o ru thọ o re ro wo ẹyao iroro ho.
-
Ẹyao iroro HỌ nọ ohwo ọ tẹ be ruawa gaga, je roro iroro te epanọ ọ gbẹ sae rọ kpọ iroro riẹ hẹ hayo riẹ oware nọ o bi ru hu.
-
Ẹyao iroro ọ sai ru ei bẹbẹ re ohwo o mu usu kugbe amọfa hayo re o ru eware nọ u fo nọ o re ru kẹdẹ kẹdẹ.
-
Oghẹrẹ ahwo kpobi a sae mọ ẹyao iroro, te emaha te ekpako, te edafe te iyogbe, te enọ i kpohọ isukulu te enọ i kpohọ isukulu hu.
Oware nọ o rẹ sai fiobọhọ kẹ ohwo nọ o wo ẹyao iroro
Nọ who te muẹrohọ nọ oghẹrẹ nọ who bi ru eware u nwene idudhe, whọ be wezẹ ga hrọ hayo wezẹ tere he, re emu ga hrọ hayo re emu tere he, jọ ọkọkora, ruawa gaga, hayo eva e gbẹ be were owhẹ hẹ, o te gwọlọ nọ who re kpohọ oria nọ a rẹ sae jọ riẹ oware nọ o be kẹ owhẹ uye, re a fiobọhọ kẹ owhẹ. Diẹse whọ rẹ sai kpohọ?
Jesu Kristi họ ohwo nọ ọ mae wo areghẹ nọ ọ rria otọakpọ na no. Ọ ta nọ: “Ahwo nọ oma rai o ga a gwọlọ ọbo-imu hu, rekọ enọ e be mọ e gwọlọ ọbo-imu.” (Matiu 9:12) Ohwo nọ ọ be mọ o te kpohọ ọspito a sai fiobọhọ kẹe. Onana o sai ru nọ ẹyao na o re ro kpotọ. O ve je mu eware nọ o je ru vẹre họ eru jẹ wereva evaọ uzuazọ. Nọ ẹyao iroro ọ tẹ rrọ gaga hayo o te bi siotọ, o mai woma re ohwo ọ nyai siwi oma riẹ. a
Dede nọ Ebaibol na yọ obe imu hu, ehrẹ nọ e rrọ eva riẹ e sai fiobọhọ kẹ omai nọ ẹyao iroro ọ tẹ be kẹ omai uye. Iviena se izoeme efa nọ e rrọ Uwou-Eroro nana. A jarai ta kpahe epanọ Ebaibol na ọ sai ro fiobọhọ kẹ omai thihakọ ẹbẹbẹ ẹyao iroro.
a Ma rẹ jọ Uwou-Eroro Na ta kpahe uzedhe oghẹrẹ nọ ohwo o re ro siwi oma riẹ hẹ. Ohwo kpobi ọ rẹ kiẹ kpahe oghẹrẹ usiwo nọ u ti woma kẹe, ọ vẹ salọ ọnọ ọ were e riẹ.
Enana E Sae jẹ Were Owhẹ
IWUHRẸ EBAIBOL NỌ I WUZOU
Fikieme Ọghẹnẹ Ọ jẹ Kuvẹ kẹ Uye-Oruẹ?
Ebaibol na ọ ta emamọ eme nọ e rẹ sasa ohwo oma.
ENỌ IZOGE NA
Eme Me ti Ru re Mẹ Gbẹ Ruawa Ga Hrọ Họ?
U wo eware ezeza jọ nọ awaọruọ ọ sai fiobọhọ kẹ owhẹ ru, nọ o gbẹ rọ wha enwoma se owhẹ hẹ.
HAI ROU!
Izoge nọ E be Mọ Ẹyao Iroro I bi Dhe Ebuebu—Eme Ebaibol na Ọ Ta?
Ebaibol na ọ kẹ ehrẹ nọ i re fiobọhọ kẹ izoge nọ i wo ẹyao iroro.
KPAHE OMAI
Yare nọ Isẹri Jihova A Nyabru Owhẹ Ze
Wha te ta ẹme kpahe onọ Ebaibol na jọ, hayo whọ te riẹ ahwo nọ Isẹri Jihova a rrọ.
