Kpohọ eme nọ e riẹ eva

Kpohọ oria eware nọ e riẹe eva

Erere Vẹ O re Te Owhẹ nọ Whọ tẹ Riẹ Ọghẹnẹ Ziezi?

Erere Vẹ O re Te Owhẹ nọ Whọ tẹ Riẹ Ọghẹnẹ Ziezi?

Evaọ izoẹme nọ e vrẹ na, ma ta kpahe eware sa-sa nọ i re fiobọhọ kẹ omai kẹ uyo onọ nana, Kọ Whọ Ginẹ Riẹ Ọghẹnẹ? Ma kake jọ Ebaibol na ruẹ nọ odẹ riẹ Jihova, gbe nọ uyoyou họ uruemu riẹ nọ o mae viodẹ kpaobọ. Ma tẹ jẹ ta kpahe eware nọ o ru no gbe enọ o ti ru nọ e te wha erere se ahwo-akpọ kpobi. Eware buobu e ginẹ riẹ nọ ma rẹ sai wuhrẹ kpahe Ọghẹnẹ. Rekọ whọ sae nọ omara nọ, erere vẹ me ti wo nọ mẹ tẹ riẹ Ọghẹnẹ ziezi?

Jihova ọ ya eyaa nọ, “otẹrọnọ whọ gwọle riẹ, whọ rẹ te rue riẹ.” (1 Iruẹru-Ivie 28:9) Dai roro kpahe emamọ oware nọ u ti te owhẹ obọ nọ who te wuhrẹ kpahe Ọghẹnẹ jẹ riẹe ziezi—whọ te jọ ogbẹnyusu ọkpekpe riẹ! (Olezi 25:14) Erere vẹ o ti te owhẹ nọ whọ tẹ rrọ ogbẹnyusu Ọghẹnẹ?

Evawere. A jọ Ebaibol na se Jihova “Ọghẹnẹ evawere.” (1 Timoti 1:11) Whọ tẹ rrọ ogbẹnyusu riẹ jẹ daoma rọ aro kele iei, who ti gine wo evawere, yọ onana o sai fiobọhọ kẹ owhẹ wo ududhomẹno gbe omakpokpọ. (Olezi 33:12) Ofariẹ, who ti yeri emamọ uzuazọ keme who ti wuhrẹ epanọ whọ sae rọ whaha iruemu etọtọ, wo emamọ iruemu, jẹ riẹ epanọ whọ sai ro wo emamọ usu kugbe amọfa. Whọ te ruẹ nọ ẹme ọso-ilezi na ginọ uzẹme, nọ ọ ta nọ: “Uwoma kẹ omẹ re me sikẹle Ọghẹnẹ.”—Olezi 73:28.

Ọ te rẹrote owhẹ. Jihova ọ ya eyaa kẹ idibo riẹ nọ: “Ẹro mẹ me re ti ro su owhẹ.” (Olezi 32:8) Onana u dhesẹ nọ Jihova o re muẹrohọ idibo riẹ omomọvo jẹ rẹrote ai wọhọ epanọ ẹgwọlọ rai ọ rrọ. (Olezi 139:1, 2) Nọ who te mu usu okpekpe kugbe Jihova, whọ te ruẹ nọ ọ te jọ kugbe owhẹ ẹsikpobi.

Ẹruore uzuazọ ebẹdẹ bẹdẹ. Orọnikọ epanọ whọ sai ro wo evawere je yeri emamọ uzuazọ enẹna ọvo họ erere nọ who ti wo ho, rekọ Ọghẹnẹ o ti rovie uvẹ uzuazọ ebẹdẹ bẹdẹ fihọ kẹ owhẹ re. (Aizaya 48:17, 18) Ebaibol na ọ ta nọ: “Re a wo uzuazọ ebẹdẹ bẹdẹ, o gwọlọ nọ a rẹ riẹ owhẹ, Ọghẹnẹ uzẹme ọvo na, gbe ọnọ who vi ze na, Jesu Kristi.” (Jọn 17:3) Evaọ oke obẹbẹ nana, ẹruore nọ Ọghẹnẹ ọ kẹ omai na o rẹ sae jọ wọhọ umuokọ rọkẹ omai, onọ u “muẹro jẹ rrọ gaga.”—Ahwo Hibru 6:19.

Eware nana yọ umutho jọ gheghe evaọ usu eware nọ u ro fo nọ ma rẹ riẹ Ọghẹnẹ ziezi je mu usu okpekpe kugbei. Whọ tẹ gwọlọ gbẹ riẹ kpahe eware efa, whọ sae ta ẹme kẹ Osẹri Jihova kpobi hayo kpohọ www.jw.org/iso.