Kpohọ eme nọ e riẹ eva

Kpohọ oria eware nọ e riẹe eva

Didi Odẹ Ọghẹnẹ?

Didi Odẹ Ọghẹnẹ?

Whọ tẹ gwọlọ riẹ ohwo, ababọ avro oware ọsosuọ nọ whọ te nọe họ, “Didi odẹ ra?” Whọ tẹ nọ Ọghẹnẹ onọ yena, uyo vẹ ọ te kẹ owhẹ?

“Mẹ họ Jihova. Odẹ mẹ oye.”Aizaya 42:8, NW.

Kọ who yo odẹ yena no ẹdẹjọ? O sae jọ nọ who yo rie no, rekọ ahwo buobu a ri yoi hi. O rrọ ere keme efefafa Ebaibol buobu a fi odẹ na họ umutho eria jọ ọvo evaọ efafa rai, yọ ejọ dede a si rie no riẹriẹriẹ. A rehọ “OLORI” ro nwene iei evaọ eria buobu. Rekọ evaọ ẹvẹrẹ ọsosuọ nọ a ro kere Ebaibol na, odẹ na Jihova o romavia te oware wọhọ asia idu ihrẹ (7,000). Ibieme ene a re ro kere odẹ na evaọ ẹvẹrẹ Hibru, eye họ YHWH hayo JHVH. Yọ u kri akpọ no nọ a be rọ fae “Jehovah” evaọ ẹvẹrẹ Oyibo.

Odẹ Ọghẹnẹ o romavia evaọ ikere Hibru na soso gbe efafa efa buobu

Uko-Obe Abade Owhuowhu ọrọ Ilezi Ikpe-udhusoi ọsosuọ, ẹvẹrẹ HIBRU

Efafa Tyndale Ukpe 1530, ẹvẹrẹ OYIBO

Efafa Reina-Valera Ukpe 1602, ẹvẹrẹ SPANISH

Efafa Union Version Ukpe 1919, ẹvẹrẹ CHINESE

OWARE NỌ ODẸ ỌGHẸNẸ U RO WUZOU

Ọghẹnẹ o rri odẹ na ghaghae. Ohwo ọvo ọ kẹ Ọghẹnẹ odẹ na ha, ọye ọvo o mu odẹ na kẹ omariẹ. Jihova ọ ta nọ: “Onana họ odẹ mẹ bẹdẹ bẹdẹ, inọ, ere a re roro mẹ họ nọ ige te ige.” (Ọnyano 3:15) Evaọ Ebaibol na, odẹ oma Ọghẹnẹ o romavia bu vi edẹ-ova riẹ kpobi, wọhọ Erumeru, Ọsẹ, Olori, hayo Ọghẹnẹ. U te je bu vi odẹ ofa kpobi nọ o romavia evaọ Ebaibol na wọhọ Abraham, Mosis, Devidi, gbe Jesu. Ofariẹ, Jihova ọ gwọlọ nọ ahwo a riẹ odẹ riẹ. Ebaibol na ọ ta nọ: “Jọ ahwo a riẹ nọ whẹ, ọnọ odẹ riẹ o rrọ Jihova, Whẹ ọvo họ Ọnọ Ọ Mai Kpehru vi otọakpọ na kpobi.”—Olezi 83:18, NW.

Jesu o rri odẹ na ghaghae. Evaọ olẹ Olori na nọ o viodẹ gaga na, Jesu o wuhrẹ ilele riẹ inọ a tẹ be lẹ se Ọghẹnẹ, a hae yare nọ: “Jọ odẹ ra o jọ fuafo.” (Matiu 6:9) Jesu omariẹ ọ lẹ se Ọghẹnẹ nọ: “Ọsẹ, kẹ odẹ ra oruaro.” (Jọn 12:28) Nọ Jesu ọ jọ otọakpọ, o jariẹ oja gaga re ọ kẹ odẹ Ọghẹnẹ oruaro. Fikiere ọ sae ta nọ: “Me dhesẹ odẹ ra via kẹ ae no yọ me ti gbe dhesẹ iẹe via.”—Jọn 17:26.

Ahwo nọ a riẹ Ọghẹnẹ a rri odẹ na ghaghae. Idibo Ọghẹnẹ oke anwae a vuhumu nọ re a sai wo ọthọwẹ gbe esiwo Ọghẹnẹ, u wuzou re a riẹ odẹ riẹ. Ebaibol na ọ ta nọ: “Odẹ [Jihova, NW ] họ uwou ukpehru; ohwo okiẹrẹe ọ tẹ dhẹ ruẹ ẹe ọ vẹ zọ.” (Itẹ 18:10) “Kohwo kohwo nọ o se odẹ [Jihova, NW ] a re ti siwi ei.” (Joẹl 2:32) Ebaibol na o dhesẹ nọ a te rọ odẹ Ọghẹnẹ vuhu ahwo nọ a be gọe. “Keme ahwo na kpobi a be nya evaọ ọvuọ odẹ ẹdhọ riẹ, rekọ evaọ odẹ [Jihova, NW ] Ọghẹnẹ mai ma rẹ rọ nya bẹdẹ bẹdẹ.”—Maeka 4:5; Iruẹru Ikọ 15:14.

OWARE NỌ OTOFA ODẸ NA U DHESẸ

Odẹ na u dhesẹ ohwo nọ Ọghẹnẹ ọ ginẹ rrọ. Ahwo buobu nọ a wuhrẹ kpahe Ebaibol gaga a ta nọ otofa odẹ na Jihova họ “O re Ru Zihe Ro.” Jihova Ọghẹnẹ o ru omai riẹ otofa odẹ riẹ na, nọ ọ ta kpahe omariẹ kẹ Mosis nọ: “Me ti Zihe Ro Oghẹrẹ Kpobi nọ Mẹ Gwọlọ Zihe Ro.” (Ọnyano 3:14, NW ) Fikiere, otofa odẹ na u ru omai riẹ nọ Ọghẹnẹ họ ọnọ ọ ma eware kpobi. U te je dhesẹ nọ ọ rẹ sai ru omariẹ gbe emama riẹ zihe ro oware kpobi nọ o gwọlọ re o ru ẹjiroro riẹ gba. Edẹ-ova Ọghẹnẹ i ru omai riẹ ọkwa, udu-esuo, gbe ogaga riẹ, rekọ odẹ oma Jihova ọvo u dhesẹ oghẹrẹ ohwo nọ ọ ginẹ rrọ gbe eware nọ ọ rẹ sai ru.

Odẹ na u dhesẹ nọ Ọghẹnẹ o wo isiuru kẹ omai. Otofa odẹ Ọghẹnẹ u dhesẹ nọ o wo isiuru kẹ emama riẹ kpobi, te omai ahwo-akpọ. Ofariẹ, nọ orọnọ Ọghẹnẹ ọ vuẹ omai odẹ riẹ na u dhesẹ nọ ọ gwọlọ nọ ma riẹe. Ọ tubẹ vuẹ omai odẹ riẹ taure ma tẹ te riẹe. Fikiere, o rrọ vevẹ inọ ọ gwọlọ nọ ma rri rie wọhọ Ọghẹnẹ nọ o thabọ no omai hi, rekọ wọhọ ohwo dẹẹ nọ ma rẹ sai si kẹle.—Olezi 73:28.

Ma tẹ be hai se odẹ Ọghẹnẹ u re dhesẹ nọ ma gwọlọ riẹe. Wọhọ oriruo, ma rehọ iẹe nọ whọ vuẹ ohwo jọ nọ ọ gwọlọ jọ ogbẹnyusu ra inọ ọ hai se odẹ ra. Ẹvẹ o te jọ owhẹ oma otẹrọnọ ọ gbẹ be rọwo se odẹ ra ha? Nọ oke o be nyaharo na, who ti roro sọ ohwo na ọ ginẹ gwọlọ jọ ogbẹnyusu ra. Ere ọvona o rẹ jọ Ọghẹnẹ oma re. Jihova ọ vuẹ ahwo-akpọ odẹ riẹ no, yọ ọ gwọlọ nọ a hae rọ odẹ na sei. Ma te bi se odẹ na, yọ ma bi dhesẹ nọ ma gwọlọ si kẹle iẹe. O re tube muẹrohọ ahwo nọ a ‘bi roro didi kpahe odẹ riẹ.’—Malakae 3:16.

Ma tẹ gwọlọ jọ ogbẹnyusu Ọghẹnẹ, u wuzou gaga re ma riẹ odẹ riẹ. Rekọ ma tẹ riẹ odẹ riẹ no yọ u re no ho. O gwọlọ nọ ma rẹ riẹ oghẹrẹ ohwo nọ ọ ginẹ rrọ. Ma vẹ jẹ riẹ iruemu riẹ.

DIDI ODẸ ỌGHẸNẸ? Odẹ Ọghẹnẹ họ Jihova. Odẹ na u dhesẹ nọ Ọghẹnẹ ọ rẹ sai ru ẹjiroro riẹ kpobi gba