• UKPE NỌ A YẸ OMẸ: 1960

  • ORẸWHO MẸ: FRANCE

  • IKU MẸ: ỌGBA-OZIGHI NỌ Ọ RẸ LỌ IMU EGAGA, JE RRI EYAE KUẸKU

UZUAZỌ MẸ EVAỌ OKENỌ U KPEMU:

A yẹ omẹ evaọ Mulhouse, okpẹwho nọ ọ rrọ France, yọ a rẹ jọ ofẹ nana ru ozighi gaga evaọ okpẹwho na. Nọ mẹ jẹ rro ze, ozighi ọvo whọ rẹ ruẹ evaọ udevie iviuwou sa-sa nọ e rrọ okegbe mai. Evaọ uviuwou mai, a rri eyae te oware ovo ho, yọ ọzae ọ tẹ gwọlọ ru oware, ọ rẹ nọ aye riẹ hẹ. A wuhrẹ omẹ nọ oria aye họ ikichini, jẹ rẹrote eware uwou na.

Mẹ jẹ rro ze, eware iyoma buobu e via kẹ omẹ. Nọ mẹ jọ ikpe 10, ọsẹ mẹ o te whu fiki idi-eda thomawa. Ikpe isoi nọ i lele i rie, oniọvo ọkpako mẹ o te thuru whu. Evaọ ukpe ovo yena, a tẹ jọ orua mai kpe ohwo jọ evaọ okenọ a jẹ họre, yọ onana u gbomẹ unu gaga. Ahwo uviuwou mẹ a wuhrẹ omẹ epanọ a rẹ rehọ emegha gbe igbeke họre nọ u te duwuku. Eware nana i te ru akpọ vẹso omẹ, mẹ gbẹ riẹ onọ me re ru hu. Fikiere mẹ jẹ hae si eka fihọ omamẹ jẹ da-idi vrẹ oma.

Nọ mẹ jọ ikpe 16, mẹ jẹ hae da ilolo idi 10 hayo 15 kẹdẹ kẹdẹ, yọ u kri hi me te mu imu egaga họ ẹlọ. Re mẹ sae ruẹ ugho hwosa eware nana, me te mu ewẹ-idhe gbe eyọno họ ẹzẹ je mu uji họ etho. Nọ mẹ jọ ikpe 17, yọ me kpohọ ega unuẹse buobu no. A te kele unuẹse nọ a kare omẹ fihọ ega fiki uji-utho gbe ozighi, i bu te isia 18 soso.

Nọ mẹ nwane vrẹ ikpe 20 obọ, uzuazọ mẹ u te yoma vi epanọ o jọ. Me re vovo te iko ige 20 kẹdẹ kẹdẹ gbe oghẹrẹ efa nọ e ga viere nọ egọmeti o fi awhaha họ. Ẹsibuobu me je ti whu fikinọ mẹ vovo bu hrọ. Me te mu imu egaga họ ẹzẹ, fikiere mẹ rẹ wha emegha gbe igbeke lele oma. Ẹdẹjọ, mẹ jẹ te rehọ ugbeke sa ọzae jọ kpe, rekọ ugbọlọ na u te ki ayọno ebẹte riẹ, ọ gbẹ nwoma ha! Nọ mẹ jọ ikpe 24, oni mẹ o te whu, ofu mẹ ọ tẹ ga vi epanọ ọ jọ vẹre. Mẹ tẹ be nya edhere vrẹ, ahwo a rẹ kẹnoma kẹ omẹ lelele keme ozọ u bi mu ai. Fikinọ mẹ jọ ọgba ohọre, enwenọ koka koka iporisi i re mu omẹ hayo mẹ rẹ ruẹ omamẹ evaọ obọ ẹsipito avọ ela.

Nọ me te ikpe 28 no, me te wo aye. Rekọ fiki oghẹrẹ uzuazọ nọ me je yeri na, me wo adhẹẹ kẹ aye mẹ vievie he. Mẹ jẹ hae lae eka, je kpei ukpe ẹsọ. Ma jẹ hae ru oware ovo kugbe he. Mẹ jẹ hae roro nọ mẹ tẹ kẹe emero ezọ gbe ifiare eghaghae nọ me tho, eva e te were iẹe. Rekọ ẹdẹjọ, oware jọ nọ me rẹro riẹ hẹ o tẹ via. Aye mẹ o te mu Ebaibol na họ ewuhrẹ kugbe Isẹri Jihova. Nọ a nwani wuhrẹ kugbei evaọ ẹdẹ ọsosuọ no, ọ tẹ siọ ivovavovo ba, ọ gbẹ jẹ rehọ igho uji mẹ hẹ, ọ tẹ jẹ zihe emero ezọ gbe ifiare eghaghae nọ mẹ kẹ riẹ na kẹ omẹ. Eva riẹ e tẹ dhomẹ gaga. Mẹ gbẹ gwọlọ nọ o wuhrẹ kugbe Isẹri Jihova ha, yọ  me re vovo isigareti fihọ iẹe ovao. Ofariẹ riẹ, mẹ jẹ hae sei ẹkoko jẹ raha iẹe kẹ ahwo nọ a be rria oyena kpobi.

Evaọ aso ẹdẹjọ nọ mẹ da idi bẹ no, me te tu erae họ uwou mai. O gbẹ rrọ aye mẹ hẹ, mẹ avọ ọmọtẹ mai nọ ọ jọ ikpe isoi, ma hai ti whu. Nọ idi na e hiẹ no omẹ aro no, udu mẹ u te brukpe omẹ gaga. Me te je roro nọ Ọghẹnẹ ọ sae rọ vrẹ omẹ vievie he. Mẹ kareghẹhọ ẹdẹjọ nọ ozerẹ ichọche jọ ọ jẹ ta nọ ahwo omuomu a ti kpohọ ehẹle. Makọ edọkita nọ mẹ jẹ hae nyabru re o fiobọhọ kẹ omẹ fiki oghẹrẹ uzuazọ nọ me bi yeri na, ọ ta kẹ omẹ nọ: “U re kẹ owhẹ no! Ohwo ọvo nọ ọ sae gbe fiobọhọ kẹ owhẹ ọ rrọ họ.”

EPANỌ EBAIBOL NA O RO NWENE UZUAZỌ MẸ:

Nọ uwou mai o to no, ma tẹ kwa kpobọ uwou ọgọ mẹ. Nọ Isẹri Jihova a nyaze ti wuhrẹ Ebaibol na kugbe aye mẹ evaọ ẹdẹjọ, mẹ tẹ nọe nọ, “Kọ Ọghẹnẹ ọ te sae rọ vrẹ omẹ ghele eware iyoma kpobi nọ me ru no na?” A te se obe 1 Ahwo Kọrint 6:9-11 kẹ omẹ. Oria Ebaibol nana o ta kpahe iruemu nọ Ọghẹnẹ o mukpahe, je fibae nọ: “Ere whai otujọ wha jọ.” Eme nana e kẹ omẹ imuẹro inọ mẹ sai nwene uzuazọ mẹ. Isẹri na a te je se obe 1 Jọn 4:8 rọ kẹ omẹ imuẹro inọ Ọghẹnẹ o you omẹ. Eme nana e tuduhọ omẹ awọ gaga, fikiere mẹ tẹ ta kẹ Isẹri Jihova na nọ a wuhrẹ Ebaibol na kugbe omẹ isiava ẹkpoka, me te je mu iwuhrẹ rai họ ẹnya. Yọ mẹ jẹ hae lẹ se Jihova kẹse kẹse re.

Evaọ amara nọ me ro mu uwuhrẹ na họ na, me te siobọno udi gbe imu egaga. Rekọ oma o jẹ hae wọ omẹ re me zihe kpohọ eware yena! Mẹ jẹ hae wezẹ ekpehre ewezẹ, uzou ogaga o jẹ hae tehe omẹ, iriẹ omamẹ e jẹ hae da omẹ, gbe eware efa buobu nọ i re ru ohwo nọ ọ be siọ imu egaga ba ẹrehọ. Ghele na, o jọ omẹ oma wọhọ ẹsenọ Jihova o kru omẹ obọ be bọ omẹ ga. O jọ omẹ oma wọhọ Pọl ukọ na. Rọ kpahe obọ nọ Ọghẹnẹ o fihọ kẹe, Pọl o kere nọ: “Evaọ eware kpobi, me bi wo ẹgba ẹkwoma ọnọ ọ be kẹ omẹ ogaga.” (Ahwo Filipai 4:13) Nọ oke o be nyaharo na, mẹ tẹ te siọ ivovavovo kpobi ba riẹriẹriẹ.—2 Ahwo Kọrint 7:1.

U te no uzuazọ mẹ nọ Ebaibol na o fiobọhọ kẹ omẹ nwene no, Ebaibol na o fiobọhọ kẹ omẹ kpọ eware vi evaọ uviuwou mẹ. Oghẹrẹ nọ me je yerikugbe aye mẹ u nwene. Me te je bru ọghọ họ iẹe oma. Mẹ tẹ gwọlọ nọ o ru oware jọ kẹ omẹ, mẹ rẹ ta nọ “ivie,” nọ o te ru oware na no, mẹ vẹ ta nọ “whọ kobiruo.” Me te ti wuhrẹ epanọ a rẹ jọ emamọ ọsẹ je fi emamọ oriruo họ otọ kẹ ọmọtẹ mai. Nọ a wuhrẹ Ebaibol na kugbe omẹ te ukpe ovo no, mẹ tẹ roma mudhe kẹ Jihova jẹ họ-ame, me te kuomagbe aye mẹ evaọ egagọ Jihova.

IRERE NỌ ME WO NO:

Uzẹme riẹ họ, izi Ebaibol nọ me fihọ iruo, eye i siwi uzuazọ mẹ. Makọ ahwo uviuwou mẹ nọ a rrọ ukoko ho, a ruẹ vuhumu nọ me gbe nwene he, enẹ yọ me whu no fiki imu egaga erehọ, hayo nwanọ a kpe omẹ no evaọ ohọre jọ.

Izi Ebaibol nọ e ta kpahe ewha-iruo ọzae evaọ uviuwou nọ me fihọ iruo họ oware nọ u nwene uzuazọ uviuwou mẹ riẹriẹriẹ. (Ahwo Ẹfisọs 5:25; 6:4) Ma te mu eware họ eru kugbe evaọ uviuwou mai. Enẹna, ukpenọ mẹ rẹ ta nọ oria nọ u te aye mẹ evaọ uwou na họ ikichini, mẹ rẹ rọ evawere thae uke evaọ uwou na re ọ sai rọ euwa 70 ta usiuwoma kamara kamara. Yọ ọ be rọ evawere fiobọhọ kẹ omẹ re mẹ sae rẹrote ewha-iruo ọkpako ukoko nọ me wo na.

Uyoyou gbe ohrọ nọ Jihova o dhesẹ k’omẹ u nwene uzuazọ mẹ. Mẹ gwọlọ nọ mẹ rẹ vuẹ amọfa nọ a bi yeri ekpehre uzuazọ kpahe uyoyou gbe ohrọ Jihova, o tẹ make rọnọ ahwo a bi roro nọ u re kẹ ae no wọhọ epanọ a je roro nọ u re kẹ omẹ no. Mẹ riẹ nọ Ebaibol na o wo ẹgba nọ ọ sai ro fiobọhọ kẹ oghẹrẹ ohwo kpobi nwene uzuazọ riẹ re ọ sai yeri uzuazọ evawere. Ebaibol na o wuhrẹ omẹ epanọ mẹ sai ro wo uyoyou jẹ rọ adhẹẹ kẹ oghẹrẹ ahwo kpobi, te ezae te eyae, u te je wuhrẹ omẹ epanọ mẹ sae rọ rehọ adhẹẹ kẹ omamẹ re.