Evaọ uzoẹme nọ o vrẹ na, ma ta kpahe oka nọ Jesu ọ kẹ. Oka yena o kẹ imuẹro ivevẹ inọ a rehọ Uvie Ọghẹnẹ mu no evaọ obọ odhiwu, yọ Jesu Kristi họ Ovie riẹ.

Ebaibol na ọ ta nọ okenọ a tẹ rehọ Jesu mu Ovie no, oware ọsosuọ nọ o ti ru họ, ele nọ o ti le Setan avọ idhivẹri riẹ no obọ odhiwu ze. Otọakpọ na ọvo a be jọ ru ugberuo rai enẹna. Onana yọ ẹjiroro jọ nọ eware i ro yoma thesiwa no anwọ 1914 ze na.​—Eviavia 12:7, 9. 

Dede nọ akpọ na o bi dhe eyeyoma, Jesu nọ ọ rrọ Ovie Uvie Ọghẹnẹ na o bi ru eware nọ i bi fiobọhọ kẹ ahwo evaọ akpọ na soso. Fikinọ a be ta usi uwoma Uvie na evaọ akpọ na soso, ahwo buobu a be jọ Ebaibol na wuhrẹ eware nọ i re fiobọhọ kẹ ae evaọ uzuazọ yọ a bi ru lele ae. (Aizaya 2:2-4) Onana u bi ru nọ ima ahwo buobu a bi ro wo evawere evaọ uviuwou rai, yọ a gbẹ be kuvẹ re iruo gbe ilale efe e rehọ oke rai kpobi no ho. A bi wuhrẹ epanọ a sai ro yeri emamọ uzuazọ enẹna yọ a be daoma wo iruemu nọ Ọghẹnẹ ọ gwọlọ nọ ahwo nọ a te jọ otọ esuo Uvie riẹ a re wo.

Dede nọ Jesu o bi su evaọ obọ odhiwu, egọmeti ahwo-akpọ i gbe bi su otọakpọ na. Rekọ Ọghẹnẹ ọ vuẹ Jesu nọ: “Nya re who su evaọ udevie ewegrẹ ra.” (Olezi 110:2) Kẹle na, Jesu ọ te raha ahwo kpobi nọ a be wọso Ọghẹnẹ no je si ebẹbẹ ahwo kpobi nọ a bi yoẹme kẹ Ọghẹnẹ notọ.

Evaọ etoke yena, Uvie Ọghẹnẹ u ti ru eware nana:

• O te raha egagọ erue no. Egagọ nọ i bi wuhrẹ ahwo erue kpahe Ọghẹnẹ jẹ be wha ebẹbẹ se ahwo na e te gbẹ jariẹ hẹ. Ebaibol na o dhesẹ egagọ erue wọhọ ogberẹ. Ọraha riẹ u ti gbe ahwo buobu unu.​—Eviavia 17:15, 16.

• O te raha egọmeti ahwo-akpọ no. Uvie Ọghẹnẹ o te rehọ esuo ohwo-akpọ te oba.​—Eviavia 19:15, 17, 18.

• O te raha irumuomu no. Kọ ẹvẹ kpahe ahwo nọ a bi keke aro fihọ ru eware iyoma gbe enọ e se nọ a rẹ romakpotọ kẹ esuo Uvie Ọghẹnẹ? “Rọkẹ irumuomu na, a ti kpe ai no otọakpọ na.”​—Itẹ 2:22.

• O te raha Setan avọ ikọ-imuomu riẹ no. Setan avọ ikọ-imuomu riẹ a gbẹ te sai “su erẹwho na thọ ofa ha.”​—Eviavia 20:3, 10.

Irere vẹ enana kpobi e te wha se ahwo nọ a romakpotọ kẹ esuo Uvie Ọghẹnẹ?

Jesu nọ ọ rrọ Ovie Uvie na evaọ obọ odhiwu na o ti ru eware nọ osu ohwo-akpọ ọvuọvo ọ rẹ sai ru hu. Ahwo idu udhuhrẹ-gbene (144,000) nọ a salọ no otọakpọ na ze a ti lele iei su. (Eviavia 5:9, 10; 14:1, 3) O ti ru nọ a te rọ jọ otọakpọ na ru oreva Ọghẹnẹ. Rekọ, eme Uvie Ọghẹnẹ u ti ru kẹ ahwo nọ a te jọ otọakpọ na?

• U ti si ẹyao, owho, gbe uwhu no. “Ohwo ọvo nọ ọ be rria ẹkwotọ na nọ ọ te ta nọ, ‘Mẹ be mọ’ ọ te jariẹ hẹ,” yọ “uwhu o gbẹ te jọ ofa ha.”​—Aizaya 33:24; Eviavia 21:4.

• O te wha uvi udhedhẹ gbe omofọwẹ ze. “Udhedhẹ nọ emezae ra i ti wo o te dafia,” yọ “omomọvo rai ọ te keria ọvuọ otọ ure evaene gbe otọ ure ifigi riẹ, ohwo ọvo o ti ru ozọ mu ai hi.”​—Aizaya 54:13; Maeka 4:4.

• O te kẹ ahwo emamọ iruo nọ a ti ru. “Ahwo mẹ nọ mẹ salọ a te reawere iruo abọ rai vọvọ. A te ruẹ uye kufiẹ hẹ.”​—Aizaya 65:22, 23.

• U ti ru otọakpọ na fihọ wowoma. “Udhude na avọ otọ oyaya na e te wereva, yọ udhude opraprara na o te ghọghọ jẹ whẹ idodo họ wọhọ ododo safrọn.”​—Aizaya 35:1.

• U ti wuhrẹ ahwo oware nọ a re ru re a rria bẹdẹ bẹdẹ. “Re a wo uzuazọ ebẹdẹ bẹdẹ, o gwọlọ nọ a rẹ riẹ owhẹ, Ọghẹnẹ uzẹme ọvo na, gbe ọnọ who vi ze na, Jesu Kristi.”​—Jọn 17:3.

Ọghẹnẹ ọ gwọlọ nọ who wo eghale nana. (Aizaya 48:18) Ma te jọ uzoẹme nọ o rrọ aro na ta kpahe oware nọ who re ru enẹna re whọ sai wo uzuazọ yena tobọ evaọ obaro.