Ere ọmọtẹ ikpe 13 jọ nọ ohwo jọ ọ rehọ ọmọ arakọ ruọghọ ọ ta. Aye jọ nọ ọ rẹ thueki ọ ta nọ ọsẹ riẹ ọ rehọ ekọmputa ru ei ọghọ evaọ okenọ ọ gbẹ jọ isukulu ikpehru, yọ okẹ na o rẹ thọrọ iẹe ẹro vievie he. Ọzae jọ ọ ta nọ omobe osese nọ aye riẹ o kere ẹme fihọ kẹe evaọ okenọ a rọo te ẹgbukpe no họ okẹ nọ o mae woma kpaobọ nọ a kẹ riẹ no.

Kukpe kukpe, ahwo a rẹ raha oke roro kpahe okẹ nọ o mai “woma kpaobọ” nọ a rẹ rọ kẹ egbẹnyusu hayo imoni rai evaọ okenọ a te bi ru oware jọ. Yọ eva e rẹ were ahwo buobu nọ oware nọ a ro ru ohwo ọghọ o tẹ were ohwo na ziezi, wọhọ epanọ o jọ kẹ ahwo nọ ma ta kpahe evaọ obọ ehru na. Kọ ẹvẹ kpahe owhẹ? Kọ whọ gwọlọ nọ whọ rẹ kẹ ohwo okẹ nọ o rẹ were iẹe ziezi? Kọ whọ gwọlọ nọ a rẹ kẹ owhẹ okẹ nọ o rẹ were owhẹ ziezi re?

Mai kpobi ma wo irẹro itieye na, orọnikọ fiki oghẹrẹ nọ o te jọ ohwo nọ a kẹ okẹ na oma ọvo ho, rekọ oghẹrẹ nọ o te jọ ohwo nọ ọ kẹ okẹ na oma. Ebaibol na ọ ta nọ: “Ẹkẹ evawere e mae rrọ vi emio.” (Iruẹru Ikọ 20:35) Eva e rẹ mae were ohwo nọ ọ kẹ okẹ otẹrọnọ ohwo nọ a kẹ okẹ na o rri rie ghaghae.

Nọ o rrọ ere na, ẹvẹ whọ sae rọ kẹ amọfa okẹ nọ o rẹ were ai ziezi, je ru eva were owhẹ re? Kọ otẹrọnọ whọ riẹ okẹ nọ o mai “woma kpaobọ” nọ whọ rẹ kẹ ohwo ho, ẹvẹ whọ sae rọ riẹ okẹ nọ o te were iẹe?