Ebaibol na o dhesẹ nọ evaọ okenọ u kpemu, Ọghẹnẹ ọ rehọ iko-odhiwu fiobọhọ kẹ idibo riẹ re a sai ru oreva riẹ. (Olezi 34:7) Wọhọ oriruo:

• Okenọ Jihova ọ raha ikpẹwho Sọdọm avọ Gomora, ikọ-odhiwu i fiobọhọ kẹ Lọt avọ uviuwou riẹ dhẹ.​—Emuhọ 19:​1, 15-26.

• Okenọ a gbolo emoha Hibru esa na fihọ erae evaọ Babilọn oke anwae, Ọghẹnẹ “o vi ukọ-odhiwu riẹ ze ti siwi idibo riẹ.”​—Daniẹl 3:​19-28.

• Nọ Daniẹl ọzae okiẹrẹe na ọ rria ọgọdọ ikpohrokpo asohẹrioke no, ọ ta nọ ọ zọ keme ‘Ọghẹnẹ o vi enjẹle riẹ ze ti wuhu enu ikpohrokpo na di.’​—Daniẹl 6:​16, 22.

U wo okejọ nọ ikọ-odhiwu a ro fiobọhọ kẹ idibo Ọghẹnẹ evaọ ikpe-udhusoi ọsosuọ, nọ o rọwokugbe oreva Ọghẹnẹ. Wọhọ oriruo:

• Okenọ a fi ikọ Jesu jọ họ uwou-odi, ukọ-odhiwu o rovie ethẹ uwou-odi na kẹ ai, ọ tẹ ta kẹ ai nọ a kpobọ etẹmpol re a ruabọhọ iruo usiuwoma ota na.​—Iruẹru Ikọ 5:​17-21.

• Ukọ-odhiwu ọ ta kẹ Filip ọtausiwoma na nọ o kpohọ edhere nọ a re ro no Jerusalẹm kpohọ Gaza, re ọ nyae ta usiuwoma kẹ ohwo Ẹtiopia nọ o kpohọ Jerusalẹm nyae gọ Ọghẹnẹ.​—Iruẹru Ikọ 8:​26-33.

• Nọ oke Ọghẹnẹ u te re ahwo nọ a rrọ ahwo Ju hu a zihe ruọ Ileleikristi, ukọ-odhiwu ọ tẹ romavia kẹ oletu ogbaẹmo ahwo Rom nọ a re se Kọniliọs evaọ eruẹaruẹ, ọ tẹ ta kẹe nọ o vi ahwo nyai se Pita ukọ na ziọ uwou riẹ.​—Iruẹru Ikọ 10:​3-5.

•   Okenọ a mu Pita ukọ na fihọ uwou-odi, ukọ-odhiwu ọ tẹ romavia kẹe je si ei no uwou-odi na no.​—Iruẹru Ikọ 12:​1-11.

Ma re ruẹ imuẹro evuọvo nọ i dhesẹ nọ ikọ-odhiwu a be rọ edhere igbunu fiobọhọ kẹ ahwo nẹnẹ hẹ, wọhọ epanọ Ebaibol na o dhesẹ nọ a ru evaọ okenọ u kpemu. Rekọ Jesu ọ ta kpahe oke mai na inọ: “A rẹ te ta usi uwoma Uvie na evaọ akpọ na soso re o jọ isẹri kẹ erẹwho na kpobi, kẹsena urere na o vẹ te ze.” (Matiu 24:14) Kọ whọ riẹ nọ ikọ-odhiwu i bi fiobọhọ kẹ ilele Jesu nọ e be ta usiuwoma na evaọ akpọ na soso nẹnẹ?

Obe Eviavia u dhesẹ nọ ikọ-odhiwu i ti fiobọhọ kẹ ahwo evaọ akpọ na soso re a sae riẹ kpahe Jihova Ọghẹnẹ gbe ẹjiroro nọ o wo kẹ ahwo-akpọ. Jọn ukọ na o kere nọ: “Mẹ tẹ ruẹ ukọ-odhiwu ọfa nọ ọ be rra evaọ idadeghe, yọ o bi whowho usi uwoma ebẹdẹ bẹdẹ kẹ enọ e be rria otọakpọ na, kẹ orẹwho, orua, ẹrọunu gbe oghoghẹrẹ ahwo kpobi. Ọ jẹ rọ urru oruarua ta nọ: ‘Wha dhozọ Ọghẹnẹ jẹ kẹe oruaro, keme auwa nọ o ti ro bruoziẹ o te no, fikiere wha gọ Ọnọ ọ ma odhiwu na gbe otọakpọ na gbe abade na gbe iyeri-ame na.’” (Eviavia 14:​6, 7) Eware nọ idibo Ọghẹnẹ buobu a rọ ẹro ruẹ no, i dhesẹ nọ ikọ-odhiwu e be thọ iruo usiuwoma ota akpọ-soso na uke. Ofariẹ, nọ ọrahauzi ọvo dede o te kurẹriẹ bru Jihova ze, “ikọ-odhiwu Ọghẹnẹ a rẹ ghọghọ” gaga.​—Luk 15:10.

Kọ eme ọ te via nọ a tẹ ta usiuwoma na te ẹgwọlọ Ọghẹnẹ no? Evaọ Amagẹdọn, “egbaẹmo obọ odhiwu” a ti kuomagbe Jesu Kristi Ovie ivie na fi “ẹmo ẹdẹ ologbo Ọghẹnẹ Erumeru na.” (Eviavia 16:​14-16; 19:​14-16) Ikọ-odhiwu a te kobaro evaọ etoke ẹdhoguo obrukpe evaọ okenọ Jesu “ọ te rehọ uye kẹ enọ . . . i bi yoẹme kẹ usi uwoma kpahe Olori mai Jesu hu.”​—2 Ahwo Tẹsalonika 1:​7, 8.

Jọ u mu owhẹ ẹro inọ ikọ-odhiwu na a you owhẹ gaga. A bi muẹrohọ ahwo kpobi nọ a ginẹ gwọlọ gọ Ọghẹnẹ, yọ Jihova ọ be hae rehọ ai tuduhọ idibo riẹ awọ jẹ thọ ae.​—Ahwo Hibru 1:14.

Fikiere o gwọlọ nọ mai omomọvo ma rẹ jẹ iroro jọ. Kọ ma te gaviezọ kẹ usiuwoma Uvie na nọ a be ta evaọ akpọ na soso na? O te were Isẹri Jihova nọ e rrọ okegbe ra re a fiobọhọ kẹ owhẹ wo erere no obufihọ ikọ-odhiwu na ze.