EVAỌ uvo Ẹdoka ẹdẹjọ, ọzae-avọ-aye jọ nọ a re se Kenneth avọ Filomena nọ a be rria Curaçao a te kpohọ usiuwoma. A te weze kpohọ uwou ọzae-avọ-aye jọ nọ a bi wuhrẹ Ebaibol kugbe vẹre.

Kenneth ọ ta nọ: “Nọ ma te etẹe yọ a kare ẹthẹ uwou na, yọ omoto nọ ọzae-avọ-aye na a wo ọ jọ ighẹ na gbe he. Iroro jọ e tẹ ruọ omẹ udu inọ me se ifonu aye ọzae na.”

Nọ aye na ọ tọlọ ifonu na, ọ tẹ ta nọ ọzae riẹ ọ rrọ obọ iruo. Rekọ nọ aye na ọ te riẹ nọ Kenneth avọ Filomena a nyaze, ọ tẹ nyaze ti rovie ẹthẹ kẹ ae jẹ ta nọ a ruọ uwou.

A muẹrohọ nọ aye na ọ be viẹ anwẹsiẹ. Rekọ taure a te mu obe-uwuhrẹ na họ Kenneth ọ tẹ lẹ. Nọ ọ nwani ku olẹ na họ no, aye na ọ tẹ wariẹ muhọ ẹviẹ. Kẹsena Kenneth avọ Filomena a tẹ nọ aye na kpahe oware nọ o be thọ.

Aye na ọ tẹ ta nọ ọ jẹ gwọlọ epanọ o re ro kpe omariẹ no evaọ uvo ẹdẹ yena, yọ okenọ o je ro kere omobe hẹrẹ ọzae riẹ, Kenneth ọ rọ nwani se ze na. Aye na ọ ta kẹ ae nọ o wo ẹyao-iroro, fikiere a tẹ rọ eria Ebaibol sa-sa tuduhọ iẹe awọ. Eme uduotahawọ yena i siwi uzuazọ riẹ.

Kenneth ọ ta nọ, “Ma yere Jihova gaga nọ ọ rọ rehọ omai fiobọhọ kẹ aye na nọ iroro e gba dhe udu na, maero kọ oghẹrẹ nọ ọ rọ rehọ ukọ-odhiwu hayo ẹzi ọfuafo riẹ kpọ omai rọ ifonu sei.” *

Kọ Kenneth avọ Filomena a ta gba nọ a rọ rọwo nọ Ọghẹnẹ ọ rọ ukọ-odhiwu hayo ẹzi ọfuafo riẹ kpọ ae bru aye na? Manikọ o fake via ere gheghe?

Ma sae nwane ta gbiae he. Rekọ ma riẹ nọ Ọghẹnẹ ọ rẹ rehọ ikọ-odhiwu riẹ fiobọhọ kẹ ahwo evezi. Wọhọ oriruo, Ebaibol na ọ ta nọ Ọghẹnẹ ọ rehọ ukọ-odhiwu riẹ kpọ Filip olele na re ọ nyai fiobọhọ kẹ ọwharọ Ẹtiopia na, ọnọ ọ jẹ gwọlọ ohwo nọ o re fiobọhọ kẹe wo otoriẹ Ẹme Ọghẹnẹ.​—Iruẹru Ikọ 8:​26-31.

Egagọ buobu a rọwo nọ emama ẹzi e riẹ, inọ ejọ i bi yoẹme kẹ Ọghẹnẹ gbe nọ ohwo kpobi o wo ọvuọ ukọ-odhiwu riẹ nọ ọ be kpọe. Yọ amọfa a rọwo nọ orọnikọ ikọ-odhiwu e rrọ ọvo ho, rekọ a be rọ edhere igbunu jọ kpọ ahwo evaọ uzuazọ. Rekọ ahwo jọ buobu a rọwo nọ ikọ-odhiwu e rrọ vievie he.

Kọ ikọ-odhiwu a ginẹ rrọ? Otẹrọnọ a rrọ, ẹvẹ uzuazọ rai u ro muhọ? Ẹvẹ ma sae rọ ginẹ riẹ uzẹme na kpahe ikọ-odhiwu? Kọ ikọ-odhiwu e sae ginẹ kpọ mai evaọ uzuazọ? Joma ta kpahe uzẹme ẹme na.

^ edhe-ẹme 8 Ebaibol na ọ ta nọ odẹ Ọghẹnẹ họ Jihova.​—Olezi 83:​18NW.