Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Uwou-Eroro Na  |  No. 4 2016

Kọ Ma te Rria Akpọ nọ Ọ Kare Ozighi Ẹdẹjọ?

Kọ Ma te Rria Akpọ nọ Ọ Kare Ozighi Ẹdẹjọ?

Kọ ohwo jọ ọ họre owhẹ hayo ohwo uviuwou ra jọ no ẹdẹjọ? Kọ ozọ u bi mu owhẹ nọ ohwo jọ ọ te họre owhẹ ẹdẹjọ? A dhesẹ ozighi wọhọ “ẹyao nọ o bi kpomahọ uzuazọ ahwo evaọ akpọ na soso.” Joma ta kpahe iriruo jọ.

UKPE GBE ỌGBADUO: Ukoko Okugbe Erẹwho (United Nations) o niyẹrẹ nọ, “Aye ọvo evaọ usu eyae esa ọ rẹriẹ ovao dhe ukpe ugbobọ no, hayo ọzae riẹ ọ gba riẹ du no.” Mai yoma na, “rono oware nọ o be via na ze, o wọhọ nọ oware nana o te via kẹ aye ọvo evaọ usu eyae isoi evaọ obaro.”

ITU UGBARUGBA: Iyẹrẹ i dhesẹ nọ, itu ugbarugba nọ i bu vi idu ọgba (30,000) eye e rrọ obọ America. Evaọ Latin America, enwenọ omọvo evaọ usu imasa ọ ta nọ ọ rẹriẹ ovao dhe ozighi no.

UWHU NỌ OZIGHI Ọ WHA ZE: Evaọ ukpe jọ kẹle na, oware wọhọ ahwo idu-egba isoi (500,000) soso a kpe kufiẹ fiki ozighi, yọ unu ahwo nana a bu vi ahwo nọ ẹmo o kpe. Evaọ ofẹ Africa gbe America jọ ọvo, ahwo nọ a kpe fiki ozighi, a rehọ akuane bu vi ahwo nọ a kpe evaọ eria efa kpobi evaọ akpọ na. Evaọ ofẹ jọ America, a kpe ahwo nọ a bu vi idu-ẹgba ọvo (100,000) evaọ ukpe ovo fiki ozighi, yọ a kpe ahwo nọ a bu te oware wọhọ idu udhuvẹ gbe ikpe (50,000) evaọ Brazil fiki ozighi re. Kọ ozighi ọ te sai kuhọ ẹdẹjọ?

KỌ OZIGHI O TI KUHỌ ẸDẸJỌ?

Fikieme ozighi ọ rọ da akpọ na fia enẹ? Eware buobu e be whae ze, ejọ họ: ofu nọ o bi dhe ahwo fikinọ ahwo jọ a be ruẹ-uye yọ amọfa a be re akpọ kuoma, ahwo nọ a rri uzuazọ te oware ovo ho, idieda-thomawa gbe imu egaga erehọ, emọ nọ e be ruẹ ekpako soso nọ i bi ru ozighi kẹdẹ kẹdẹ, gbe otu ugbarugba nọ ohwo ọvo ọ be kpọ unu hu.

Uzẹme riẹ họ, a be jọ ofẹ jọ akpọ na daoma gaga re a sai si ozighi no otọ. Evaọ ikpe 10 nọ e vrẹ na, ozighi nọ ọ jẹ wha uwhu ze evaọ ẹwho São Paulo evaọ orẹwho Brazil, o kpotọ gaga. Rekọ omozighi ototọ ọ gbẹ riẹ ghele, keme a tẹ ghale iẹe, imakpe evaọ usu ahwo idu-ẹgba ọvo (100,000) a bi whu fiki ozighi evaọ ẹwho yena. Nọ o rrọ ere na, ẹvẹ ozighi ọ te sai ro no otọ riẹriẹriẹ?

Re ozighi ọ sae no otọ riẹriẹriẹ, o gwọlọ nọ ahwo a re nwene uruemu rai. Re a sai nwene, o gwọlọ nọ ahwo nọ a bi ru ozighi, a rẹ rehọ emamọ iruemu wọhọ uyoyou, adhẹẹ, gbe ororokẹ ro nwene ekpehre iruemu wọhọ omorro, uvou-uthei gbe oriobọ.

Eme ọ rẹ sai fiobọhọ kẹ ohwo ru inwene ilogbo itieye na? Iviena se kpahe oware nọ Ebaibol na ọ ta:

  • “Enẹ ma re ro dhesẹ nọ ma you Ọghẹnẹ, ma re koko ijaje riẹ.”—1 Jọn 5:3.

  • ‘Ozodhẹ ỌNOWO na u dhesẹ nọ ohwo o re mukpahe umuomu.’ *Itẹ 8:13.

Makọ ahwo nọ a re ru ozighi gaga dede a rẹ sai nwene riẹriẹriẹ otẹrọnọ a gine you Ọghẹnẹ je wo oghẹrẹ ozodhẹ nọ a gbe ro ru eva dhae he. Kọ onana o sae ginẹ via?

 Dai roro kpahe ọzae jọ nọ a re se Alex, * ọnọ ọ rria uwou-odi ikpe 19 soso evaọ orẹwho Brazil fiki uzuazọ ozighi riẹ. O zihe ruọ Osẹri Jihova evaọ ukpe 2000, nọ Isẹri Jihova a wuhrẹ Ebaibol na kugbei no. Kọ uruemu ozighi na u gine noi obọ? Ee, yọ o rẹ da Alex gaga nọ o te roro kpahe eware iyoma nọ o ru vẹre na. Ọ ta nọ: “Enẹna me gine you Ọghẹnẹ keme ọ rọvrẹ omẹ no. Yọ uyoyou nọ me wo kẹ Ọghẹnẹ oye u fiobọhọ kẹ omẹ nwene iruemu iyoma mẹ.”

Omọfa jọ họ César nọ ọ be rria obọ Brazil, ọnọ ọ jẹ hae kpare ethẹ ahwo, o ve tho eware rai, yọ ọ jẹ hae tube kpohọ edhere nyai kpe ahwo mi igho dede. Oghẹrẹ uzuazọ nana o yeri evaọ ikpe 15 soso. Kọ eme o fiobọhọ kẹe nwene? Evaọ okenọ ọ jọ uwou-odi na, Isẹri Jihova a te wuhrẹ Ebaibol na kugbei. César ọ ta nọ: “Ebaibol na nọ me je wuhrẹ na u fiobọhọ kẹ omẹ riẹ ẹjiroro nọ mẹ rọ rrọ uzuazọ. Me te ti wo uyoyou kẹ Ọghẹnẹ, je wuhrẹ kpahe epanọ mẹ rẹ rọ dhozọ riẹ. Koyehọ oghẹrẹ ozodhẹ nọ me gbe ro zihe nyai ru eware nọ e rẹ dha Jihova eva ha. Mẹ gwọlọ rri aruoriwo nọ Ọghẹnẹ o dhesẹ kẹ omẹ vo vievie he. Fikiere, me nwene uzuazọ mẹ fiki uyoyou gbe ozodhẹ nọ me wo kẹe.”

Se kpahe epanọ whọ sae rọ rria akpọ nọ ọ kare ozighi

Eme iriruo ahwo nana i dhesẹ? Iriruo nana i dhesẹ nọ Ebaibol na o wo ẹgba nọ ọ sai ro nwene uzuazọ ohwo, ẹkwoma iroro ohwo nọ o re nwene. (Ahwo Ẹfisọs 4:23) Alex nọ ma kake fodẹ na ọ ta haro nọ: “Eware nọ me wuhrẹ no Ebaibol na ze e wọhọ ame nọ o hwẹ ku omẹ oma, nọ ọ rọ ẹmẹrera wozẹ iroro iyoma no omẹ udu. Me je roro nọ mẹ rẹ sai siobọno ekpehre iruemu nana vẹre he.” Uzẹme riẹ họ, nọ ma tẹ be hai kuvẹ re Ẹme Ọghẹnẹ ọ kpọ omai, ọ rẹ sae wozẹ iruemu iyoma no omai oma. Ẹme Ọghẹnẹ o wo ẹgba nọ ọ sai ro ru ohwo fo. (Ahwo Ẹfisọs 5:26) Onana o rẹ whae ze nọ ahwo nọ a maki wo uruemu oriobọ nọ a je ru ozighi vẹre, a sai ro nwene zihe ruọ ahwo dhedhẹ nọ a rrọ wowou. (Ahwo Rom 12:18) Fikinọ ahwo otiọye na a bi fi izi Ebaibol họ iruo evaọ uzuazọ rai, a re wo udhedhẹ.—Aizaya 48:18.

Isẹri Jihova nọ i bu vi Ima eree (8,000,000) evaọ ekwotọ egba ivẹ gbe udhuvẹ (240) a duku ifue ozighi no. Dede nọ a no erẹwho sa-sa ze, a wo ọvuọ ovioma riẹ, yọ a no uyẹ sa-sa ze, a wuhrẹ epanọ a re you Ọghẹnẹ jẹ dhozọ riẹ no, yọ a wo uyoyou kẹ ohwohwo jẹ be rria dhedhẹ kugbe ohwohwo wọhọ uviuwou ovo. (1 Pita 4:8) Onana o kẹ imuẹro nọ ma te rria akpọ nọ ọ kare ozighi ẹdẹjọ.

AKPỌ NỌ OZIGHI Ọ TE JỌ HỌ Ọ KẸLE NO!

Ebaibol na ọ ya eyaa nọ Ọghẹnẹ o ti si ozighi no otọ kẹle. “Ẹdẹ ẹdhoguo gbe ẹdẹ nọ a te rọ raha ahwo nọ a riẹ Ọghẹnẹ hẹ” ọ kẹle no, nọ Ọghẹnẹ o ti ro si ozighi kpobi no otọ riẹriẹriẹ. (2 Pita 3:5-7) Ahwo a te gbẹ ruẹ uye fiki ozighi otu ugbarugba ha. Rekọ ẹvẹ o sai ro mu omai ẹro inọ Ọghẹnẹ o ti gine si ozighi no otọ?

Ebaibol na ọ ta nọ Ọghẹnẹ “mukpahe ọnọ o you igbruku,” koyehọ ozighi. (Olezi 11:5) Ọghẹnẹ o you udhedhẹ gbe oziẹ-okiẹrẹe. (Olezi 33:5; 37:28) Fikiere ọ te kẹ ahwo ozighi uvẹ bẹdẹ bẹdẹ hẹ.

Akpọ nọ ọ vọ avọ udhedhẹ ọ be tha. (Olezi 37:11; 72:14) Kọ u gbe woma re who gbe wuhrẹ kpahe oware nọ who re ru re whọ sae rria akpọ nọ ozighi ọ te jọ họ?

^ edhe-ẹme 14 Ma nwene edẹ na.