A RẸ RUOBỌ EYAA NANA HA! Ọghẹnẹ ọ ya eyaa inọ ọ te kẹ omai uzuazọ ebẹdẹ bẹdẹ evaọ otọakpọ obonẹ. Rekọ o rrọ bẹbẹ kẹ ahwo buobu re a rọwo onana. Ahwo a rẹ ta nọ: ‘Ohwo kpobi o ti whu ẹdẹjọ. A bi yẹ ahwo jọ ze yọ ahwo jọ a bi whu.’ Amọfa jọ a rọwo nọ ahwo a sae rria bẹdẹ bẹdẹ rekọ orọnọ evaọ otọakpọ họ. A rẹ ta nọ okenọ ohwo o te whu je kpohọ odhiwu no ọvo ọ sae rọ rria bẹdẹ bẹdẹ. Kẹ ẹvẹ who roro?

Taure whọ tẹ kuyo jọ, roro kpahe iyo nọ Ebaibol na ọ kẹ kpahe enọ esa nana: Ẹvẹ oghẹrẹ nọ Ọghẹnẹ ọ ma ahwo-akpọ u ro dhesẹ epanọ ọ gwọlọ nọ a rẹ rria krite? Eme họ ẹjiroro ọsosuọ nọ Ọghẹnẹ o wo kẹ otọakpọ na gbe ahwo-akpọ? Eme ọ whariẹ ze nọ ahwo-akpọ a bi ro whu?

OGHẸRẸ NỌ A MA OHWO-AKPỌ

Evaọ usu eware nọ Ọghẹnẹ ọ ma fihọ otọakpọ na kpobi, ahwo-akpọ a wo ohẹriẹ gaga. Evaọ oghẹrẹ vẹ? Ebaibol na ọ ta nọ ahwo-akpọ ọvo Ọghẹnẹ ọ ma “tho” omariẹ, evaọ “uwoho” riẹ. (Emuhọ 1:​26, 27) Kọ eme oyena u dhesẹ? U dhesẹ nọ Ọghẹnẹ ọ ma ahwo-akpọ re a sae rehọ aro kele iruemu-aghae riẹ, wọhọ uyoyou gbe uvi-ẹdhoguo.

Ofariẹ, ọ ma ahwo-akpọ evaọ oghẹrẹ nọ a sai ro roro, riẹ ohẹriẹ nọ o rrọ oware uwoma gbe uyoma, je wo usu kugbei. Oye o whariẹ ze nọ u re ro si omai urru re ma rri je wuhrẹ kpahe eware igbunu nọ e rrọ odhiwu gbe akpọ na, jẹ reawere ile, eme-urirẹ, gbe eware nọ e vọ avọ erru. Mae rro na, ohwo-akpọ o wo isiuru nọ ọ rẹ rọ gwọlọ gọ Ọghẹnẹ. Iruemu nana e lẹliẹ ahwo-akpọ wo ohẹriẹ ulogbo no emama efa nọ e rrọ uzuazọ evaọ otọakpọ na.

Fikiere, dai roro kpahe onana: O hae jọ nọ Ọghẹnẹ ọ gwọlọ nọ ahwo-akpọ a rria imikpe jọ ọvo, fikieme ọ rọ ma ahwo-akpọ avọ iruemu gbe ekwakwa iwoma nana? Uzẹme riẹ họ, Ọghẹnẹ ọ ma ahwo-akpọ enẹ re a sae reawere uzuazọ evaọ otọakpọ na bẹdẹ bẹdẹ.

ẸJIRORO ỌSOSUỌ ỌGHẸNẸ

Ahwo jọ a rẹ ta nọ Ọghẹnẹ ọ ma ahwo-akpọ re a rria otọakpọ na bẹdẹ bẹdẹ hẹ. Ukpoye, anọ Ọghẹnẹ ọ ma otọakpọ na re a rriae ubroke ọvo. Evaọ oke yena, ọ vẹ dawo ahwo-akpọ re ọ riẹ enọ i gine te kẹ uzuazọ obọ odhiwu, nọ e te rria obei bẹdẹ bẹdẹ. O tẹ ginẹ rrọ ere, kọ o gbẹ wọhọ nọ Ọghẹnẹ họ ọnọ ọ wha emuemu gbe eyoma nọ ọ da akpọ na fia nẹnẹ  ze? Rekọ onana u wo ohẹriẹ gaga no oghẹrẹ ohwo nọ Ọghẹnẹ ọ rrọ. Ebaibol na ọ ta kpahe Ọghẹnẹ nọ: “Iruo riẹ i kiete, keme idhere riẹ kpobi i re wowoma. Ọghẹnẹ ọtẹruo nọ ọ kare eyoma, nọ o re wowoma je kiete.”​—Iziewariẹ 32:4.

Ebaibol na o ru omai riẹ ẹjiroro ọsosuọ nọ Ọghẹnẹ o wo kẹ otọakpọ na inọ: “Ihru na e rọ ỌNOWO, rekọ akpọ na ọ rehọ iẹ kẹ emọ ahwo.” (Olezi 115:16) Uzẹme, Ọghẹnẹ ọ ma otọakpọ na wowoma, re o jọ uwou ahwo-akpọ bẹdẹ bẹdẹ, yọ ọ ma eware nọ i re fiobọhọ kẹ ahwo-akpọ reawere uzuazọ ebẹdẹ bẹdẹ fihọ iẹe.​—Emuhọ 2:​8, 9.

“Ihru na e rọ ỌNOWO, rekọ akpọ na ọ rehọ iẹ kẹ emọ ahwo.”​—Olezi 115:16

Ebaibol na o te je ru omai riẹ ẹjiroro nọ Ọghẹnẹ o wo kẹ ahwo-akpọ. Ọ ta kẹ ọzae-avọ-aye ọsosuọ na inọ: “Wha vọ evaọ akpọ na re wha wo i; re wha wuzou . . . eware kpobi nọ i wo uzuazọ nọ e be nya evaọ akpọ na.” (Emuhọ 1:28) Onana u dhesẹ nọ Ọghẹnẹ ọ gwọlọ nọ a rẹrote ọgbọ owowoma nọ o fi rai họ na, je ru ei kẹre bẹsenọ akpọ na kpobi o re zihe ruọ aparadase! Evaọ uzẹme, oware nọ Adamu avọ Ivi a je rẹro riẹ họ, uzuazọ ebẹdẹ bẹdẹ evaọ otọakpọ orọnikọ obọ odhiwu hu. Yọ epọvo na o hae jọ kẹ emọ nọ a ti yẹ.

FIKIEME MA BI RO WHU?

Kọ fikieme ma bi ro whu? Ebaibol na o dhesẹ nọ omama ẹzi jọ nọ Ọghẹnẹ ọ ma ọ wọso ẹe. Uwhremu na a se omama ẹzi na Setan Ẹdhọ na, keme ọ jẹ gwọlọ raha ẹjiroro nọ Ọghẹnẹ o wo kẹ otọakpọ na evaọ ogba Idẹn. Ẹvẹ o ro ru onana?

Setan o ru nọ Adamu avọ Ivie a ro kuomagbei wọso Ọghẹnẹ. Setan ọ bọwo Ọghẹnẹ ota inọ ọ be ko emamọ eware jọ dhere no Adamu avọ Ivie, wọhọ ufuoma nọ a rẹ rọ salọ oware uwoma hayo uyoma kẹ oma rai. Onana u ru nọ Adamu avọ Ivi a ro kuomagbe Setan ghẹmeeyo kẹ Ọghẹnẹ. Eme o no rie ze? Uwhu, wọhọ epanọ Ọghẹnẹ ọ vẹvẹ e rai unu vẹre. A te ku ẹruore uzuazọ ebẹdẹ bẹdẹ evaọ aparadase otọakpọ kufiẹ.​—Emuhọ 2:17; 3:​1-6; 5:5.

Aghẹmeeyo Adamu avọ Ivie u kpomahọ ahwo kpobi no oke yena ze rite inẹnẹ. Ebaibol na ọ ta nọ: “Uzioraha o rọ ẹkwoma omọvo [Adamu] ruọ akpọ na, uwhu u je no uzioraha ze . . . , ere uwhu u ro te ahwo kpobi.” (Ahwo Rom 5:12) Ma bi whu keme ma reuku uzioraha gbe uwhu mi ọsẹgboni ọsosuọ mai, orọnikọ otatha mai oye hayo kọ omaa jọ nọ Ọghẹnẹ o wo ho.

WHỌ SAE RRIA BẸDẸ BẸDẸ EVAỌ OTỌAKPỌ

Ọkparesuọ nọ ọ romavia evaọ ogba Idẹn na u nwene omaa nọ Ọghẹnẹ o wo kẹ ahwo-akpọ gbe otọakpọ na ha. Uyoyou ulogbo Ọghẹnẹ gbe uvi-ẹdhoguo riẹ o wọ riẹ nọ ọ rọ wariẹ ru ọruẹrẹfihotọ re o si omai no igbo uzioraha gbe uwhu. Pọl ukọ na ọ ta nọ: “Uwhu họ osohwa uzioraha, rekọ okẹ nọ Ọghẹnẹ ọ rẹ kẹ họ uzuazọ ebẹdẹ bẹdẹ ẹkwoma Kristi Jesu Olori mai.” (Ahwo Rom 6:23) Fikinọ Ọghẹnẹ o you omai gaga, o “siobọno Ọmọ ọvo riẹ [Jesu Kristi], re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.” (Jọn 3:16) Jesu ọ rọ uzuazọ riẹ dhe idhe, jẹ rọ ere ta omai no igbo nọ Adamu o fi omai họ. *

Kẹle na, eyaa aparadase evaọ otọakpọ nọ Ọghẹnẹ ọ ya na i ti rugba. Whọ sae jọ usu ahwo nọ a te rria aparadase na nọ who te ru lele ohrẹ Jesu na inọ: “Wha rehọ unuẹthẹ ohwahwa na ruọ eva keme edhere nọ o bi su kpohọ ọraha o riama fihọ, unuẹthẹ riẹ ọ rrọ kẹkẹe, yọ ibuobu e be rehọ iẹe ruọ eva; rekọ edhere nọ o bi su kpohọ uzuazọ ọ rrọ kekeke, unuẹthẹ riẹ ọ rrọ hwahwa, yọ umutho ahwo a bi duku ei.” (Matiu 7:​13, 14) Oghẹrẹ nọ uzuazọ ra o te jọ evaọ obaro, obọ ra o rrọ. Kọ eme who ti ru?

^ edhe-ẹme 17 Re whọ gbẹ riẹ kpahe oware nọ ẹtanigbo na ọ rẹ sai ru kẹ owhẹ, se uzou avọ 5 obe na Eme Ebaibol na O Gine Wuhrẹ? onọ Isẹri Jihova a kere, whọ sae jẹ ruẹ e riẹ evaọ www.jw.org/iso.