Kpohọ eme nọ e riẹ eva

Kpohọ oria izoẹme

Eyaa nọ I ti Rugba

Eyaa nọ I ti Rugba

A be jọ akpọ na soso ta usiuwoma Uvie Ọghẹnẹ nẹnẹ wọhọ epanọ Jesu ọ ruẹaro riẹ. (Matiu 24:14) Obe Daniẹl o ta nọ Uvie na yọ egọmeti nọ Ọghẹnẹ o ro mu. Evaọ uzou avọ 2 obe Daniẹl, whọ rẹ ruẹ eruẹaruẹ nọ a jọ ta kpahe egọmeti hayo ivie ahwo-akpọ unọjọ utọjọ, no oke Babilọn anwae ze rite oke mai na. Owọ avọ 44 o ta oware nọ o te via evaọ obaro inọ:

“Ọghẹnẹ obọ odhiwu na ọ rẹte rehọ uvie nọ a rẹ raha ha muẹ, hayo a rẹte se isuẹsu riẹ ba kẹ amọfa ha. Ọ rẹte whọlọ ivie na kpobi ọ vẹte rehọ ai ze oba, ọ vẹte jọ bẹdẹ.”

Eruẹaruẹ nana avọ efa evaọ Ebaibol na, i dhesẹ nọ Uvie Ọghẹnẹ o te rehọ ẹta isuẹsu ahwo-akpọ jẹ wha ufuoma gbe udhedhẹ ziọ akpọ na. Ẹvẹ uzuazọ o te jọ evaọ otọ esuọ Uvie Ọghẹnẹ? Joma dhunu te eyaa jọ nọ i ti rugba kẹle.

  • A TI GBE FI ẸMO HO

    Olezi 46:9: “[Ọghẹnẹ] o ru akpọ na kpobi nọ ẹmo o je serihọ ri te oka akpọ; o te wiri uzei na, o te bru ehi na ibribro, ọ tẹ rehọ erae mahe ekẹkẹ na!”

    Dai roro epanọ akpọ na ọ te jọ nọ a tẹ rehọ igho nọ a bi ro ku ekwakwa ẹmo ro ru eware nọ i re fiobọhọ kẹ ahwo-akpọ, ukpenọ a rẹ rehọ igho yena ro ku eware nọ i re kpe ahwo! Eyaa yena i ti rugba kẹle evaọ otọ esuo Uvie Ọghẹnẹ.

  • AHWO A TE GBẸ MỌ HỌ

    Aizaya 33:24: ‘Ohwo ọvo nọ ọ be rria eva riẹ nọ ọ rẹ te ta nọ, “Mẹ be mọ” ọ rrọ họ.’

    Oke o be that nọ ahwo a te gbẹ mọ họ. Eyao wọhọ ẹyao-ọta, ẹyao iroro, uliaro, ifiva, gbe eyao itieye na efa e te gbẹ jariẹ hẹ. O te gbẹ gwọlọ nọ ma kpohọ ẹsipito hayo lọ imu hu. Ohwo kpobi nọ ọ te rria akpọ na o ti wo omokpokpọ.

  • EMU Ọ TE VỌ ORIA KPOBI

    Olezi 72:16: “Jọ ibi i vihọ eva otọ na.”

    Eware nọ a kọ i ti wo ẹvi gaga, yọ ohwo kpobi ọ te ruẹ emu re. Ohọo u ti gbe mu hu, yọ ahwo a te re emamọ emu.

  • EDADA, UWERI, GBE UWHU E TE GBẸ JỌ HỌ

    Eviavia 21:4: “[Ọghẹnẹ] o ti ririe irui-oviẹ kpobi no aro rai, uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha. Eware ọsosuọ na e vrẹ no.”

     Oyena u dhesẹ nọ ahwo a te jọ gbagba, yọ a te rria bẹdẹ bẹdẹ evaọ aparadase otọakpọ! Ere Jihova Ọsẹ oyoyou mai na, ọ ya eyaa riẹ.

“O RE RU EPANỌ MẸ TA GBA”

Kọ eyaa nana e wọhọ iku-esia kẹ owhẹ? Dede nọ ahwo buobu a rọwo nọ oghẹrẹ uzuazọ nọ Ọghẹnẹ ọ ya eyaa riẹ evaọ Ebaibol na o te were gaga, o rrọ bẹbẹ kẹ ae re a wo otoriẹ oghẹrẹ nọ o te jọ re ohwo ọ rria bẹdẹ bẹdẹ. Oyena u gbe omai unu hu, keme ohwo ọvo ọ re rria bẹdẹ bẹdẹ hẹ, re ọ vuẹ omai epanọ o rẹ jọ.

No emuhọ ze, ahwo-akpọ a rrọ otọ igbo uzioraha gbe uwhu. Fikiere, u kri akpọ no nọ a be rọ reoja, ruẹ uye, jẹ rẹriẹ ovao dhe ebẹbẹ. Onana o reria e rai oma te epanọ o rọ wọhọ nọ enẹ Ọghẹnẹ ọ gwọlọ nọ ahwo-akpọ a yeri uzuazọ. Rekọ oyena u wo ohẹriẹ no ẹjiroro nọ Jihova Ọghẹnẹ ọ rọ ma ahwo-akpọ.

Re Ọghẹnẹ o fiobọhọ kẹ omai wo imuẹro kpahe eyaa riẹ kpobi, ọ ta kpahe ẹme riẹ nọ: “O re zihe bru omẹ tha ababọ họ, rekọ o re ru epanọ mẹ ta gba je ru oware nọ mẹ rehọ fiki riẹ vi ei na gba.”​—Aizaya 55:11.

Ebaibol na ọ ta nọ, Jihova “ọ rẹ sae ta ọrue he.” (Taitọs 1:2) Nọ orọnọ ọ ya eyaa eware iwoma nana kpobi kẹ omai kpahe obaro na, o rrọ oware areghẹ re ma nọ omamai inọ: Kọ o ginẹ lọhọ re ahwo-akpọ a rria bẹdẹ bẹdẹ evaọ aparadase otọakpọ nọ a ya eyaa riẹ na? Kọ eme ma re ru re eware nọ Ọghẹnẹ ọ ya eyaa rai na e sai te omai obọ? Evaọ izoẹme nọ e rrọ obaro na, whọ te ruẹ iyo rọkẹ enọ nana.