Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Uwou-Eroro Na  |  No. 2 2017

 UZOẸME UKE NA | KỌ WHỌ TE JẸ OKẸ ỌGHẸNẸ NỌ O MAE RRO NA REHỌ?

Okẹ Ọghẹnẹ nọ O Mae Rro Na​—Fikieme O rọ Ghare Tere?

Okẹ Ọghẹnẹ nọ O Mae Rro Na​—Fikieme O rọ Ghare Tere?

Eme o re ru okẹ jọ ghaghae kẹ owhẹ? Ẹsejọhọ eware ene nana e rrọ usu eware nọ e rẹ sai ru okẹ jọ ghaghae kẹ owhẹ: (1) ohwo nọ ọ kẹ owhẹ okẹ na, (2) ẹjiroro nọ ọ rọ kẹ owhẹ okẹ na, (3) oware nọ ohwo nọ ọ kẹ okẹ na ọ raha fihọ iẹe, gbe (4) oware nọ okẹ na u ru kẹ owhẹ. Nọ ma te roro kpahe eware nana, e rẹ sai fiobọhọ kẹ omai wo edẹro kẹ okẹ ẹtanigbo na, okẹ Ọghẹnẹ nọ o mae rro kpaobọ.

ONO Ọ KẸ OKẸ NA?

Ekẹ jọ e rẹ sae jọ ghaghae fikinọ ohwo nọ ọ kẹ omai okẹ na ọ rrọ ọkwa okpehru jọ, hayo ma wo adhẹẹ kẹ gaga. Yọ ekẹ efa jọ e rẹ sae jọ ghaghae kẹ omai nọ i te no obọ ahwo uviuwou mai hayo egbẹnyusu ekpekpe mai ze, o tẹ make rọnọ ugho nọ a raha fihọ okẹ na u tulo ho. Oghẹrẹ okẹ utiona Russell ọ kẹ Jordan nọ ma fodẹ evaọ uzoẹme nọ o vrẹ na. Kọ ẹvẹ onana o rọ wọhọ okẹ ẹtanigbo na?

Orọ ọsosuọ, Ebaibol na ọ ta nọ “Ọghẹnẹ o vi Ọmọ ọvo riẹ ziọ akpọ na re ma ruẹsi wo uzuazọ ẹkwoma riẹ.” (1 Jọn 4:9) Onana u ru nọ okẹ na o rọ ginẹ rrọ ghaghae. Ohwo ọvo nọ udu-esuo riẹ u kpehru vi orọ Ọghẹnẹ ọ rrọ họ. Ọso-ilezi na o kere kpahe Ọghẹnẹ nọ: “Whẹ, ọnọ odẹ riẹ o rrọ Jihova, whẹ ọvo họ Ọnọ Ọ Mai Kpehru vi otọakpọ na kpobi.” (Olezi 83:​18NW) Okẹ ofa nọ u kpehru vi onana o rrọ họ.

Orọ avivẹ, Ọghẹnẹ yọ “Ọsẹ mai.” (Aizaya 63:16) Fikieme ma rọ ta ere? Keme ọye ọ kẹ omai uzuazọ. Ofariẹ, ọ be rẹrote omai wọhọ epanọ ọsẹ oyoyou ọ rẹ rẹrote ẹgwọlọ emọ riẹ na. Nọ ọ jẹ ta ẹme kpahe idibo riẹ jọ evaọ oke anwae nọ o se Ifremu, Ọghẹnẹ ọ nọ inọ: “Kọ Ifremu họ ọmọ ọghaghae mẹ na? Kọ ọye họ ọmọ nọ me you na? . . . Fikiere uru riẹ u bi si omẹ, mẹ rẹ te ghinẹ reohrọ riẹ.” (Jerimaya 31:20) Epọvo na Ọghẹnẹ o rri idibo riẹ nẹnẹ ghaghae re. Orọnikọ Ọghẹnẹ ọ ma omai ọvo ho, rekọ ọ rrọ Ọsẹ oyoyou gbe ogbẹnyusu mai. Kọ onana u gbe dhesẹ nọ okẹ kpobi nọ u re no obọ riẹ ze o rẹ jọ ghaghae?

 FIKIEME A RỌ KẸ OKẸ NA?

Ekẹ jọ e rẹ jọ ghaghae keme unevaze ohwo na ọ rọ kẹ okẹ na orọnikọ a gbae họ họ. Yọ ohwo nọ ọ ginẹ rọ unevaze kẹ okẹ, o re rẹro nọ a te hwa zihe kẹe he.

Ọghẹnẹ ọ kẹ omai ọmọvo riẹ keme o you omai. Ebaibol na ọ ta kpahe ẹjiroro nọ Ọghẹnẹ o ro vi ọmọvo riẹ ze inọ: “Ẹkwoma onana Ọghẹnẹ o ro dhesẹ uyoyou riẹ kẹ omai, Ọghẹnẹ o vi Ọmọ ọvo riẹ ziọ akpọ na re ma ruẹsi wo uzuazọ ẹkwoma riẹ.” (1 Jọn 4:9) Kọ o gba Ọghẹnẹ họ nọ o re vi ọmọvo riẹ ze? Ijo! “Osa ẹtanigbo nọ Kristi Jesu ọ hwa” na yọ edhere nọ Ọghẹnẹ o ro dhesẹ “uwowou ulogbo” riẹ via.​—Ahwo Roma 3:24.

Kọ fikieme okẹ Ọghẹnẹ nana o jẹ rrọ odhesẹvia “uwowou ulogbo”? Ebaibol na ọ ta oware nọ o jẹ rrọ ere inọ: “Ọghẹnẹ o dhesẹ uyoyou riẹ kẹ omai, keme nọ ma gbẹ jọ erahaizi, Kristi o whu kẹ omai.” (Ahwo Rom 5:8) Uyoyou nọ o kare oriobọ oye o wọ Ọghẹnẹ fiobọhọ kẹ omai ahwo-akpọ nọ a rrọ iyiyẹ, jẹ vọ avọ uzioraha. Orọnikọ ma te kẹ okẹ nana ha, yọ ma sae hwa zihe kẹe he. Okẹ Ọghẹnẹ nana họ okẹ nọ o mae rro kpaobọ evaọ usu ekẹ kpobi nọ ọ kẹ omai no.

EME OHWO NỌ Ọ KẸ OKẸ NA Ọ RAHA FIHỌ IẸE?

Ekẹ jọ e rẹ jọ ghaghae keme o rehọ oware jọ mi ohwo nọ ọ kẹ okẹ na hayo ohwo na ọ raha oware jọ fihọ iẹe. Otẹrọnọ u re no ohwo jọ eva ze re o siobọno oware jọ nọ o rọ ghaghae kẹe fiki mai, okẹ utioye na o rẹ jọ ghaghae kẹ omai fiki oware nọ o rehọ mi ei.

Ọghẹnẹ o “siobọno Ọmọ ọvo riẹ.” (Jọn 3:16) Omọfa nọ ọ ghare vi ọmọvo Ọghẹnẹ ọ rrọ họ. Evaọ ikpe buobu nọ Ọghẹnẹ ọ jẹ rọ ma ehrugbakpọ na, Jesu o je ru iruo kugbe Ọsẹ riẹ, yọ ọ “jọ eva-ewerọ” kẹe. (Itẹ 8:30) Jesu họ ‘Ọmọ Ọghẹnẹ nọ o you’ gbe “uwoho Ọghẹnẹ nọ a rẹ ruẹ hẹ na.” (Ahwo Kọlọsi 1:​13-15) Usu imava nọ o kpekpe vi onana o rrọ họ.

Ghele na, Ọghẹnẹ ọ “tubẹ gboke Ọmọ obọriẹ hẹ.” (Ahwo Rom 8:32) Jihova ọ kẹ omai okẹ nọ o mae ghare kẹe. Okẹ ofa nọ o rehọ oware mi Ọghẹnẹ te onana o rrọ họ.

OKẸ NA U RU ẸGWỌLỌ JỌ GBA

Ekẹ jọ e rẹ jọ ghaghae keme i fiobọhọ ru ẹgwọlọ mai jọ gba, ẹsejọhọ evaọ oke nọ ma rọ gwọlọ iẹe. Wọhọ oriruo, otẹrọnọ whọ be mọ ẹyao nọ o fi uzuazọ ra họ ọza yọ who wo ugho ho, rekọ ohwo jọ o te fiobọhọ kẹ owhẹ hwosa ẹsipito na, kọ who gbe yere ohwo na ziezi? A sai rọ ugho dẹ okẹ utioye na ha, o gbẹ rrọ ere?

“Wọhọ epanọ ahwo kpobi a bi whu fiki Adamu na, ere ọvona re ahwo kpobi a ti wo uzuazọ fiki Kristi.” (1 Ahwo Kọrint 15:22) Fikinọ mai kpobi yọ emọ Adamu, ma bi “whu,” yọ ma be sae vabọ no okpẹtu ẹyao avọ uwhu hu, hayo ruẹrẹ usu mai họ kugbe Ọghẹnẹ re ma no otọ obrukpe uzioraha avọ uwhu. Yọ fikinọ mai ahwo-akpọ ma rrọ iyiyẹ, ma wo ogaga nọ ma sai ro siwi “uzuazọ” mai hayo orọ amọfa ha. Ebaibol na ọ ta nọ: “Ohwo ọ sae ta omaobọ riẹ hẹ, hayo hwaosa uzuazọ riẹ kẹ Ọghẹnẹ hẹ . . . Keme ẹta uzuazọ riẹ o rẹ ghaghae, o re te he.” (Olezi 49:​7, 8) Ma gwọlọ obufihọ gaga keme ma sai hwosa ẹtanigbo na ha. A tẹ nyasiọ omai ba, kiyọ u re kẹ omai no.

Rekọ fiki uyoyou ulogbo riẹ, Jihova ọ tẹ hwa osa “usiwo” nọ ma gwọlọ, re “ahwo kpobi a ti wo uzuazọ” ẹkwoma Jesu. Ẹvẹ ẹtanigbo na o ro ru onana gba? “Azẹ Jesu Ọmọ riẹ o re ru omai fo no izieraha kpobi.”  Ma te fi ẹrọwọ họ azẹ Jesu nọ o hwẹ fiki mai na, ma re wo erọvrẹ izieraha mai, jẹ reawere uzuazọ ebẹdẹ bẹdẹ. (1 Jọn 1:7; 5:13) Kọ eme ẹtanigbo na o ti ru kẹ ahwo mai nọ a whu no? “Epanọ ọzae ọvo ọ wha uwhu ze na, ere ọvona re ọzae ọvo [Jesu] ọ wha ẹkparomatha ze.”​—1 Ahwo Kọrint 15:21. *

Okẹ ẹtanigbo na họ okẹ u no oria nọ o mai kpehru ze, o tẹ jẹ rrọ okẹ nọ u dhesẹ uyoyou nọ o mae rro kpaobọ. Ohwo ọvo nọ ọ kẹ omai okẹ nọ o rehọ oware mi ei te onọ Jihova ọ kẹ omai na ọ rrọ họ. Yọ okẹ ovuovo nọ u ru ẹgwọlọ obọdẹ mai jọ gba te okẹ ẹtanigbo na nọ u siwi omai no igbo uzioraha gbe uwhu na o rrọ họ. Ginọ uzẹme, okẹ ovuovo nọ a sae rọ wawo okẹ idhe ẹtanigbo na o rrọ họ.

 

^ edhe-ẹme 19 Re whọ gbẹ riẹ kpahe ẹjiroro Ọghẹnẹ kẹ ahwo nọ a whu no nọ ọ te kpare ziọ uzuazọ, se uzou avọ 7 obe nana Eme Ebaibol na O Gine Wuhrẹ? onọ Isẹri Jihova a kere. Whọ sae jẹ ruẹ e riẹ evaọ oria itanẹte mai www.jw.org/iso.