Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Uwou-Eroro Na  |  No. 2 2016

 UZOẸME UKE NA

Fikieme Jesu Ọ rọ Ruẹ Uye je Whu?

Fikieme Jesu Ọ rọ Ruẹ Uye je Whu?

“Uzioraha o rọ ẹkwoma omọvo [Adamu] ruọ akpọ na, uwhu u je no uzioraha ze.”—Ahwo Rom 5:12

Otẹrọnọ a nọ owhẹ nọ, “Kọ whọ gwọlọ rria bẹdẹ bẹdẹ?” Ẹvẹ whọ te ta? Ahwo buobu a rẹ sae ta nọ o te were ae re a rria bẹdẹ bẹdẹ, rekọ a re roro nọ o rẹ sae via ha. A rẹ ta nọ ohwo o te yeri yeri, o ve whu, ohwo ọvo nọ o ti whu hu ọ riẹ hẹ.

Rekọ ẹvẹ otẹrọnọ a ku onọ na rẹriẹ a jẹ nọ owhẹ nọ, “Kọ whọ gwọlọ whu?” Re a ginẹ ta uzẹme, ahwo buobu a te ta nọ ijo. Ẹme nọ ma gwọlọ ta na họ, ohwo ọvo ọ gwọlọ whu hu ọ tẹ make be ruẹ uye. Ebaibol na o dhesẹ nọ Ọghẹnẹ ọ ma ohwo avọ isiuru nọ ọ rẹ rọ rria bẹdẹ bẹdẹ. Ebaibol na ọ tubẹ ta nọ Ọghẹnẹ o “fi uzuazọ ibẹdẹ họ eva ohwo.”—Ọtausiuwoma Na 3:11.

Rekọ ahwo a be rria bẹdẹ bẹdẹ nẹnẹ hẹ. Eme ọ via? Kọ eme Ọghẹnẹ o ru kpahe ẹbẹbẹ nana nọ ọ rrọ otọ na? Iyo nọ Ebaibol na ọ kẹ i woma wumuo ho, yọ onana u wobọ kugbe oware nọ o wha riẹ ze nọ Jesu ọ rọ ruẹ uye je whu.

OWARE NỌ O VIA

Izou esa ọsosuọ obe Emuhọ Ebaibol na e vuẹ omai epanọ Ọghẹnẹ o ro fi uzuazọ ebẹdẹ bẹdẹ họ kẹ Adamu avọ Ivi jẹ vuẹ ae oware nọ a re ru re a sai woi. O tẹ jẹ ta kpahe epanọ a rọ ghẹmeeyo kẹ Ọghẹnẹ je ku uzuazọ ebẹdẹ bẹdẹ kufiẹ. Fikinọ ohwo ọ rẹ sai wo otoriẹ iku na lọlọhọ, ahwo jọ a re roro nọ iku isia gheghe. Wọhọ Ebe Usiuwoma na, obe Emuhọ o kẹ imuẹro inọ iku nana ginọ uzẹme. *

Kọ eme o no aghẹmeeyo Adamu na ze? Ebaibol na ọ ta nọ: “Wọhọ epanọ uzioraha o rọ ẹkwoma omọvo [Adamu] ruọ akpọ na, uwhu u je no uzioraha ze na, ere uwhu u ro te ahwo kpobi oma keme aikpobi a raha uzi no.” (Ahwo Rom 5:12) Adamu ọ rọ ẹkwoma aghẹmeeyo riẹ raha uzi Ọghẹnẹ. Ọ tẹ rọ ere ku uvẹ nọ ọ hae rọ rria bẹdẹ bẹdẹ kufiẹ je whu. Fikinọ mai yọ emọ Adamu, ma reuku uzioraha mi ei. Onana o wha riẹ ze nọ ma be rọ mọ, who, je whu na. Ẹme nana nọ Ebaibol na ọ ta kpahe oware nọ o wha riẹ ze nọ ma bi ro whu na, o rọwokugbe oware nọ egba-eriariẹ a ta inọ emọ a rẹ rọ eware sa-sa tho esẹgbini rai. Kọ eme Ọghẹnẹ o ru kpahe ẹbẹbẹ nana nọ ọ rrọ otọ na?

 OWARE NỌ ỌGHẸNẸ O RU NO

Ọghẹnẹ o ru ọruẹrẹfihotọ no re ọ dẹ oware nọ Adamu o kufiẹ zihe ze, koyehọ re ọ ta emọ Adamu no igbo uzioraha gbe uwhu re a sae rria bẹdẹ bẹdẹ. Ẹvẹ Ọghẹnẹ o ro ru onana?

Ebaibol na ọ jọ obe Ahwo Rom 6:23 ta nọ, “uwhu họ osohwa uzioraha.” Onana u te dhesẹ nọ uwhu họ oware nọ u re no uzioraha ze. Nọ Adamu ọ raha uzi, o te whu. Ere ọvona re, fikinọ mai yọ erahizi, ma re whu re. Rekọ a yẹ omai fihọ igbo uzioraha orọnikọ mai họ enọ e raha uzi na ha. Fikiere Ọghẹnẹ o te vi ọmọvo riẹ ze re o whu evaọ ẹta mai. Ẹvẹ onana o sae rọ lọhọ?

Uwhu Jesu u rovie uvẹ uzuazọ ebẹdẹ bẹdẹ avọ evawere fihọ

Nọ orọnọ Adamu nọ ọ jọ ohwo ọgbagba ọ wha uzioraha gbe uwhu ze fiki aghẹmeeyo na, ere ọvona o gwọlọ ẹmeoyo omọfa nọ ọ rrọ gbagba re a sai siwi omai no igbo uzioraha gbe uwhu. Ebaibol na o dhesẹ i rie vevẹ inọ: “Wọhọ epanọ aghẹmeeyo ọzae ọvo o ru ahwo buobu zihe ruọ erahaizi na, ere ọvona re a te rọ ẹkwoma ẹmeoyo omọvo ru ahwo buobu kiẹrẹe.” (Ahwo Rom 5:19) “Omọvo” yena họ Jesu. Jesu o no obọ odhiwu ze, o te zihe ruọ ohwo ọgbagba *, kẹsena o te whu kẹ omai. Onana u te ru ei lọhọ nọ ma sai ro wo emamọ usu kugbe Ọghẹnẹ gbe ẹruore uzuazọ ebẹdẹ bẹdẹ.

OWARE NỌ JESU Ọ RỌ RUẸ UYE JE WHU

Fikieme o rọ gwọlọ nọ Jesu o re whu re ọ sai siwi omai no igbo uzioraha gbe uwhu? Kọ Ọghẹnẹ nọ ọ rrọ Erumeru na ọ gbẹ sai ru ei lọhọ re emọ Adamu a rria bẹdẹ bẹdẹ ababọ ohwo jọ nọ o re whu? Ababọ avro, Ọghẹnẹ o wo ogaga utioye. Rekọ o hae jọnọ o ru ere, uzi nọ o jie inọ uwhu họ osohwa uzioraha na o hai ti rugba ha. Uzi yena o rrọ oware nọ a re mu nwene fihọ oghẹrẹ nọ u je ohwo ho. O rọwokugbe oziẹ okiẹrẹe Ọghẹnẹ.—Olezi 37:28.

Ọghẹnẹ o gbe ru lele uvioziẹ riẹ hẹ, o hae te lẹliẹ ahwo wo avro sọ Ọghẹnẹ ọ sai gine ru ẹme riẹ gba evaọ eware efa. Wọhọ oriruo, kọ ahwo a gbẹ hae vro sọ Ọghẹnẹ o ti dhesẹ ababọ ọriẹwẹ evaọ oghẹrẹ nọ ọ te rọ salọ emọ Adamu nọ i ti wo uzuazọ ebẹdẹ bẹdẹ? Kọ ahwo a hai fievahọ iẹe nọ o ti ru eyaa  riẹ gba? Uvioziẹ riẹ nọ o ru lele na o kẹ omai imuẹro inọ Ọghẹnẹ o re ru oware nọ u kiẹrẹe ẹsikpobi.

Ẹkwoma uwhu Jesu, Ọghẹnẹ o rovie uvẹ uzuazọ ebẹdẹ bẹdẹ fihọ evaọ Aparadase otọakpọ. Muẹrohọ ẹme nọ Jesu ọ ta evaọ obe Jọn 3:16 inọ: “Ọghẹnẹ o you akpọ na gaga o te siobọno Ọmọ ọvo riẹ, re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.” Ọghẹnẹ ọ rọ ẹkwoma uwhu Jesu dhesẹ uvioziẹ riẹ via, maero kọ uyoyou ulogbo riẹ nọ o wo kẹ ahwo-akpọ.

Rekọ, fikieme o rọ gwọlọ nọ Jesu ọ rẹ ruẹ uye je whu uwhu odada wọhọ epanọ a dhesẹ i rie evaọ Ebe Usiuwoma na? Nọ orọnọ Jesu ọ ruẹ uye je thihakọ te urere na, u dhesẹ ẹme Ẹdhọ fihọ ọrue koikoi inọ ahwo a ti yoẹme kẹ Ọghẹnẹ hẹ, nọ a tẹ rẹriẹ ovao dhe odawọ hayo nọ a tẹ be ruẹ uye. (Job 2:4, 5) Nọ Setan o ru Adamu ohwo ọgbagba na raha uzi no, o sae lẹliẹ ohwo roro nọ ẹme Setan na ginọ uzẹme, inọ okenọ eware i te woma kẹ omai ọvo ma re ro yoẹme kẹ Ọghẹnẹ. Rekọ Jesu nọ ọ jọ ohwo ọgbagba wọhọ Adamu, o yoẹme kẹ Ọghẹnẹ dede nọ ọ ruẹ uye ogaga. (1 Ahwo Kọrint 15:45) Jesu ọ tẹ rọ ere dhesẹ nọ Adamu ọ hẹ sai yoẹme kẹ Ọghẹnẹ o hae jọnọ ọ gwọlọ ru ere. Fikinọ Jesu ọ thihakọ te urere nọ ọ rẹriẹ ovao dhe edawọ, ọ tẹ rọ ere fi emamọ oriruo họ otọ kẹ omai nọ ma rẹ rọ aro kele. (1 Pita 2:21) Ọghẹnẹ ọ rọ uzuazọ sebaewhuo hwosa kẹ Ọmọ riẹ fikinọ o yoẹme kẹe te urere.

ERERE NỌ Ọ SAI TE OWHẸ

Uwhu Jesu yọ oware nọ o ginẹ via dẹẹ. Uvẹ uzuazọ ebẹdẹ bẹdẹ u rovie fihọ no. Kọ whọ gwọlọ rria bẹdẹ bẹdẹ? Jesu ọ fodẹ oware nọ ma re ru re ma sai wo uzuazọ ebẹdẹ bẹdẹ inọ: “Re a wo uzuazọ ebẹdẹ bẹdẹ, o gwọlọ nọ a rẹ riẹ owhẹ, Ọghẹnẹ uzẹme ọvo na, gbe ọnọ who vi ze na, Jesu Kristi.”—Jọn 17:3.

Isẹri Jihova nọ i kere emagazini nana a be tuduhọ owhẹ awọ nọ, who gbe wuhrẹ kpahe Jihova nọ ọ rrọ Ọghẹnẹ uzẹme na, gbe Ọmọ riẹ, Jesu Kristi. Eva e te were Isẹri Jihova nọ e rrọ okegbe ra re a fiobọhọ kẹ owhẹ wuhrẹ kpahe Jihova avọ Jesu. Whọ te jẹ ruẹ evuẹ efa evaọ oria Itanẹte mai www.jw.org/iso.

^ edhe-ẹme 8 Se “The Historical Character of Genesis,” evaọ obe na Insight on the Scriptures, Uko 1, ẹwẹ-obe avọ 922, onọ Isẹri Jihova a kere.

^ edhe-ẹme 13 Ọghẹnẹ o kpeze uzuazọ Ọmọ riẹ no obọ odhiwu ze fihọ edhede Meri nọ o ro dihọ, yọ ẹzi ọfuafo Ọghẹnẹ o ru nọ Jesu ọ gbẹ rọ reuku sebaẹgba mi Meri hi.—Luk 1:31, 35.