Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Uwou-Eroro Na—Uvitha Uwuhrẹ  |  Ava 2016

Ruabọhọ Egagọ Jihova avọ Evawere

Ruabọhọ Egagọ Jihova avọ Evawere

DAI roro kpahe ẹdẹ nọ eva e mae rọ were owhẹ no evaọ uzuazọ. Kọ ẹdẹ ehaa-orọo ra manikọ ẹdẹ nọ who ro yẹ ọmọ ọsosuọ ra? Kọ ẹdẹ nọ whọ rọ họ-ame? O sae jọnọ ẹdẹ ame-ọhọ ra họ ẹdẹ nọ ọ mai wuzou kẹ owhẹ evaọ uzuazọ, ọ tẹ jẹ rrọ ẹdẹ nọ eva e mae rọ were owhẹ no. Yọ evaọ ẹdẹ yena, eva e were inievo na gaga nọ who dhesẹ via nọ, whọ rọ udu ra, uzuazọ ra, iroro ra, gbe ẹgba ra kpobi you Ọghẹnẹ.—Mak 12:30.

Ẹsejọhọ anwọ oke yena ze, eva e be hae were owhẹ gaga evaọ egagọ Jihova. Dede na, eva e gbẹ be were inievo jọ te epanọ o jọ kẹ ae nọ a họ-ame obọ họ. Fikieme o rọ rrọ ere? Ẹjiroro vẹ ma wo nọ ma rẹ rọ ruabọhọ gọ Jihova avọ evawere?

OWARE NỌ INIEVO JỌ A GBẸ BE WEREVA HA

Usi uwoma Uvie na o rẹ kẹ omai evawere gaga. Fikieme ma rọ ta ere? Keme Jihova ọ ya eyaa nọ kẹle na, Uvie na o te raha akpọ omuomu nana no jẹ rehọ akpọ ọkpokpọ ze. Obe Zefanaya 1:14 o ta nọ: “Ẹdẹ ologbo ỌNOWO na ọ kẹle i no, o te je te otọ no.” Ma te bi roro nọ Uvie na u lehie ga hrọ, o sae whae ze nọ ma gbe ro wo evawere he. Yọ onana o sae whae ze nọ ma re ro si uke kpemu evaọ egagọ Ọghẹnẹ.—Itẹ 13:12.

Nọ ma tẹ be raha oke kugbe ibe Ileleikristi mai, o rẹ tuduhọ omai awọ nọ ma rẹ rọ ruabọhọ gọ Jihova avọ evawere. O sae jọnọ emamọ uruemu idibo Jihova, oye o were omai nọ ma rọ ziọ ukoko na je mu Jihova họ ẹgọ avọ evawere. (1 Pita 2:12) Dede na, eme ọ rẹ sae via nọ a tẹ whọku oniọvo jọ evaọ ukoko na fikinọ ọ thọ uzi Ọghẹnẹ? Onana o sae lẹliẹ udu whrehe inievo jọ je ru nọ a gbe ro wo evawere he.

Ilale efe o sae jẹ whae ze nọ ma gbẹ rọ wereva ha. Evaọ oghẹrẹ vẹ? Akpọ Ẹdhọ ọ rẹ gwọlọ tẹzẹ omai dẹ eware nọ ma ginẹ gwọlọ họ. Fikiere ajọ ma kareghẹhọ ẹme Jesu na inọ: “Ohwo ọvo ọ rẹ sae gbodibo kẹ ilori ivẹ hẹ; o re mukpahe ọjọ o ve you ọdekọ, hayo ọ rẹ talamu ọjọ ọ vẹ siọ ọdekọ. Wha sae gbodibo kẹ Ọghẹnẹ gbe efe he.” (Matiu 6:24) Ma rẹ sae rọ evawere gọ Jihova jẹ rọ akpọ nana ruiruo vọvọ evaọ oke ovona ha.

WEREVA EVAỌ EGAGỌ JIHOVA

Re a gọ Jihova o rrọ owha ogbẹgbẹdẹ kẹ enọ i you rie he. (1 Jọn 5:3) Kareghẹhọ nọ Jesu ọ ta nọ: “Wha nya bru omẹ ze, whai kpobi nọ e be ruẹ uye, nọ ewha egbẹgbẹdẹ e rrọ uzou, mẹ te sasa owhai oma. Wha rehọ owhowha mẹ je wuhrẹ mi omẹ, keme mẹ rrọ wowolẹ je wo omaurokpotọ, wha re ti wo omosasọ. Keme owhowha mẹ o rẹ nyaoma ha, yọ owha mẹ o rrọ vovori.” (Matiu 11:28-30) Ma tẹ be rọ eva kpobi gọ Jihova, o rẹ kẹ omai evawere gbe omosasọ. Eware buobu e ginẹ riẹ nọ e rẹ lẹliẹ omai wereva evaọ egagọ Jihova. Joma ta kpahe esa jọ.—Habakuk 3:18.

 Ọghẹnẹ evawere nọ ọ kẹ omai uzuazọ na ma be gọ. (Iruẹru Ikọ 17:28; 1 Timoti 1:11) Ma riẹ nọ fiki Jihova ma rọ rrọ uzuazọ. Fikiere, ajọ ma gbẹ hae rọ evawere gọ Jihova, o tẹ make rọnọ ma họ-ame kri no.

Ẹruore Uvie na nọ Héctor ọ be hae kareghẹhọ gbe obọ nọ o bi wo ziezi evaọ iruẹru ukoko na u bi ru ei wereva ẹsikpobi

Roro kpahe oniọvo jọ nọ a re se Héctor, ọnọ ọ jọ ọsẹro okogho evaọ ikpe 40 soso. Dede nọ ọ ‘who no,’ ọ gbẹ be rọ evawere gọ Jihova. (Olezi 92:12-14) Fikinọ ẹyao ọ be kẹ aye Héctor uye, u ru nọ ọ gbẹ be sai ro wobọ tere he evaọ egagọ Jihova, ghele na eva e be were iẹe. Héctor ọ ta nọ: “Dede nọ ẹyao aye mẹ na o bi dhe ẹgẹga yọ re mẹ rẹrote ei o lọhọ họ, mẹ be kuvẹ hẹ re onana u mi omẹ evawere mẹ evaọ egagọ Ọghẹnẹ. Fikinọ Jihova ọ kẹ omẹ uzuazọ, yọ ọ ma ohwo akpọ fiki obọdẹ ẹjiroro, oyena ọvo u te oware nọ me re ro wo uyoyou udidi kẹe jẹ rọ eva mẹ kpobi gọe. Mẹ bẹ daoma wobọ ziezi evaọ usiuwoma ota na, yọ mẹ be hae kareghẹhọ ẹruore Uvie na ẹsikpobi re mẹ gbẹ hae wereva.”

Jihova ọ kẹ omai okẹ ẹtanigbo na, onọ u ru rie lọhọ nọ ma sai ro yeri uzuazọ evawere. Ginọ uzẹme inọ, “Ọghẹnẹ o you akpọ na gaga o te siobọno Ọmọ ọvo riẹ, re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.” (Jọn 3:16) Ma rẹ sai wo ẹrọvrẹ izieraha mai je wo uzuazọ ebẹdẹ bẹdẹ nọ ma te fi ẹrọwọ họ idhe ẹtanigbo na. Onana yọ obọdẹ ẹjiroro nọ ma re ro yere Jihova. Yọ ma te wo edẹro kẹ idhe ẹtanigbo na, o rẹ wọ omai rọ evawere gọ Jihova.

Jesús o siobọno eware jọ fiki iruo Uvie na, jẹ rọ evawere gọ Jihova evaọ ikpe buobu

Oniọvo-ọmọzae jọ nọ a re se Jesús nọ ọ jẹ rria obọ Mexico ọ ta nọ: “Mẹ jọ ọrigbo kẹ iruo mẹ, yọ ẹsibuobu mẹ jẹ hai ru vrẹ oke iruo na o tẹ make rọnọ o gbahọ nọ me ru ere dede he. Ugho nọ me je le o jẹ wọ omẹ ru onana. Kẹsena me te ti wuhrẹ kpahe Jihova gbe epanọ o ro siobọno Ọmọ oyoyou riẹ kẹ ahwo-akpọ. Onana u te ru nọ mẹ rọ gwọlọ gọe. Fikiere, mẹ tẹ roma mudhe kẹ Jihova jẹ họ-ame. Yọ dede nọ me ru iruo kẹ ekọmpene na te ikpe 28 soso, me te no iruo na je mu iruo odibọgba oke-kpobi họ.” Enẹ Jesús o ro mu Jihova họ ẹgọ avọ evawere.

Ma bi yeri uzuazọ ẹfuọ, onọ o be kẹ omai evawere. Kọ whọ kareghẹhọ oghẹrẹ nọ uzuazọ ra o jọ re whọ tẹ te riẹ Jihova? Pọl ukọ na ọ kareghẹhọ Ileleikristi obọ Rom inọ, a jọ “erigbo kẹ uzioraha vẹre” rekọ enẹna a zihe ruọ “erigbo ẹrẹreokie” no. Fikinọ Ileleikristi yena a je yeri uzuazọ ofuafo, u ru nọ a ro wo ẹruore uzuazọ ebẹdẹ bẹdẹ. (Ahwo Rom 6:17-22) Mai omamai ma bi koko izi ikiẹrẹe Jihova, fikiere ma bi wo  ọkora nọ o re no uzuazọ ọfariẹ-ogbe hayo ozighi ze he. Onana o be ginẹ kẹ omai evawere gaga.

“Ikpe nọ mẹ rọ gọ Jihova no họ ikpe nọ mẹ mai ro wo evawere no evaọ uzuazọ..”—Jaime

Roro kpahe oriruo Jaime, ọnọ ọ rọwo nọ Ọghẹnẹ ọ rrọ vẹre he, ọ tẹ jẹ jọ ọbọ-ego. Nọ Jaime o mu ewuhrẹ họ ẹnya, uyoyou nọ ọ jọ udevie inievo na ruẹ, o lẹliẹ akpọ gbei unu. Re Jaime ọ sae siobọno oghẹrẹ uzuazọ nọ o je yeri, ọ tẹ lẹ re Jihova o fiobọhọ kẹe rọwo nọ Ọghẹnẹ ọ ginẹ rrọ. Jaime ọ ta nọ: “Ẹmẹrera na, mẹ tẹ te ruẹ vuhumu nọ kpakọ Ọghẹnẹ oyoyou jọ nọ ọ vọ avọ ohrọ, ọ ginẹ rrọ. Izi ikiẹrẹe Jihova nọ me bi koko e be thọ omẹ gaga. Ogbẹrọnọ me nwene he, ẹsejọhọ enẹ yọ a kpe omẹ no, wọhọ epanọ o via kẹ egbẹnyusu mẹ jọ nọ ma gbẹ jẹ hae bọ-ego. Ikpe nọ mẹ rọ gọ Jihova no họ ikpe nọ mẹ mai ro wo evawere no evaọ uzuazọ.”

OMA O RRỌ OWHẸ HẸ

Eriwo vẹ u fo nọ ma re wo nọ ma be hẹrẹ ekuhọ akpọ omuomu nana? Kareghẹhọ nọ ma bi ru oreva Ọghẹnẹ enẹna je bi rẹro uzuazọ ebẹdẹ bẹdẹ evaọ obaro. “Fikiere, ma jọ oware uwoma uruo o bẹ omai no ho, keme nọ oke u te te, ma ti vu ibi riẹ otẹrọnọ oma o gbẹ rrọ omai no ho.” (Ahwo Galesha 6:8, 9) Avọ obufihọ Jihova, ajọ ma thihakọ, jẹ daoma wo emamọ iruemu nọ i re fiobọhọ kẹ omai zọ evaọ “uye ulogbo na,” jẹ ruabọhọ egagọ Jihova avọ evawere.—Eviavia 7:9, 13, 14; Jemis 1:2-4.

Ma wo imuẹro inọ Jihova ọ te ghale omai otẹrọnọ ma thihakọ te urere, ọ tẹ jẹ riẹ iruo mai gbe uyoyou nọ ma dhesẹ kẹe gbe odẹ riẹ. Ma tẹ ruabọhọ egagọ Jihova avọ evawere, ma te jọ wọhọ Devidi ọso-ilezi na nọ ọ ta nọ: “Kẹse kẹse mẹ avọ ỌNOWO na a gbẹ rọ; keme ọ rọ obọze mẹ, mẹ gbẹ sae ti kie he. Fikiere eva e tẹ were omẹ, ẹzi mẹ ọ tẹ rẹ ghọghọ; oma mẹ o rẹ te ria omofọwẹ.”—Olezi 16:8, 9.