ỌKOBARO jọ nọ ọ rrọ ikpe udhegbọ nọ a re se Sylviana ọ ta nọ: “Okenọ egbẹnyusu mẹ a gbiku eware nọ a rọ ẹro ruẹ nọ a kpohọ usiuwoma ota evaọ oria nọ ẹgwọlọ ọ mae rrọ, mẹ tẹ gwọlọ nọ me re wobọ evaọ iruo yena nọ e rẹ kẹ evawere na.” Oniọvo-ọmọtẹ na ọ ta re nọ: “Rekọ ozọ u je mu omẹ inọ mẹ rẹ sae kwa kpohọ oria nọ ẹgwọlọ ọ mae rrọ họ.”

Kọ who wo ọkpọ iroro Sylviana na no ẹdẹjọ? Kọ whọ gwọlọ kwa kpohọ ẹkwotọ nọ a mae jọ gwọlọ iwhowho-uvie, rekiyọ who bi roro nọ o te jọ bẹbẹ kẹ owhẹ re who le utee yena tobọ? O tẹ rrọ ere, jọ udu u whrehe owhẹ hẹ. Jihova o fiobọhọ kẹ inievo emetẹ gbe emezae buobu nọ a gwọlọ ru iruo odibọgba rai kẹre fi ebẹbẹ rai kparobọ no. Re whọ sae riẹ epanọ Jihova o ro fiobọhọ kẹ inievo nana jọ no, joma ta kpahe ikuigbe inievo jọ nọ e nyae ta usiuwoma evaọ obọ Madagascar, ukoliko avene nọ o mae rro evaọ akpọ na.

Anwọ ikpe ikpe nọ i kpemu na, ekobaro gbe iwhowho-uvie nọ i bu vi udhosa gbikpe nọ i no erẹwho ikpegbọvo * ze, a nyaze ẹkwotọ Africa nana nọ ahwo buobu a jọ wo adhẹẹ kẹ Ebaibol na. Ofariẹ, iwhowho-uvie buobu evaọ Madagascar na a rọ unevaze kwa kpohọ eria sa-sa no evaọ ukoliko ologbo nana nyae ta usiuwoma. Joma ta kpahe inievo nana jọ.

A FI OZODHẸ GBE ELỌHOMA KPAROBỌ

Perrine avọ Louis

Louis avọ Perrine, ọzae-avọ-aye nọ a rrọ ikpe ọgba gbọ a kwa no France kpobọ Madagascar. Ikpe buobu a je roro kpahe epanọ a sae gbẹ rọ jọ iruo Uvie na wobọ ziezi evaọ ẹkwotọ ọfa, rekọ o jẹ kaki no Perrine eva ze he. Ọ ta nọ: “Ozọ u je mu omẹ nọ mẹ riẹ epanọ o te jọ họ. Mẹ jẹ ruawa nọ mẹ be te nyasiọ uviuwou, ukoko, uwou, iruo, gbe eria kpobi nọ e reria omẹ oma no ba. Uzẹme na họ, awaọruọ ọ jọ use-abọ ulogbo nọ mẹ riẹriẹ ovao dhe.” Evaọ 2012, Perrine ọ tẹ gbaudu wọ, kẹsena avọ Louis a tẹ kwa nya. Ẹvẹ o rri iroro-ejẹ rai na? Ọ ta nọ: “Me te roro kpemu, mẹ sae ta nọ o be bọ ẹrọwọ mai ga nọ ma be ruẹ epanọ Jihova o bi ro fiobọhọ kẹ omai na.” Louis ọzae riẹ ọ ta nọ “Dai roro iei, evaọ orọ ọsosuọ nọ ma kpohọ Ekareghẹhọ uwhu Jesu evaọ Madagascar, emọ-uwuhrẹ Ebaibol ikpe mai a nyaze!”

 Eme o kẹ ọzae-avọ-aye nana ẹgba nọ a sae rọ daji ẹkwotọ usiuwoma ota rai evaọ okenọ a make rẹriẹ ovao dhe ebẹbẹ? A lẹ se Jihova re ọ kẹ ae ogaga nọ a sai ro thihakọ. (Fil. 4:13) Louis ọ ta nọ: “Ma ruẹ nọ Jihova ọ kuyo elẹ mai jẹ kẹ omai ‘udhedhẹ riẹ.’ Ma sae tẹrovi evawere nọ usiuwoma ota na o be wha se omai. Ofariẹ, egbẹnyusu mai evaọ obọ uwou a kere ileta se omai jẹ rọ ekọmputa vi uwou se omai, be tuduhọ omai awọ nọ jọ oma o rrọ omai hi.”​—Fil. 4:​6, 7; 2 Kọr. 4:7.

Jihova ọ ghale akothiwo Louis avọ Perrine na. Louis ọ ta nọ: “Evaọ Akpe 2014, ma kpohọ Isukulu Ebaibol Rọkẹ Ezae Ileleikristi avọ Eyae Rai * evaọ obọ France. Isukulu na nọ ma kpohọ yọ okẹ nọ u no obọ Jihova ze nọ o rẹ thọrọ omai ẹro ho.” Nọ ọzae-avọ-aye na a nwrotọ no isukulu na no, ukoko o tẹ wariẹ vi ai kpobọ Madagascar yọ onana o kẹ rae evawere gaga.

“EVA RAI E TE WERE OMAI GAGA!”

Nadine avọ Didier

Evaọ 2010 nọ Didier avọ Nadine a kwa no obọ France kpobọ Madagascar, yọ a vrẹ ikpe udhuvẹ gbikpe no. Didier ọ ta nọ: “Okenọ ma gbẹ dina maha ma ru iruo ọkobaro, kẹsena ma te yẹ emọ esa. Nọ a te ahwo no, ma te je roro sọ ma rẹ sae kwa kpohọ orẹwho ọfa kẹ iruo usiuwoma ota na.” Nadine ọ ta nọ: “O jẹ ruọ omẹ oma ha fikinọ ma te nyasiọ emọ na ba, rekọ a tẹ vuẹ omai nọ: ‘Wha tẹ kwa kpohọ ẹkwotọ nọ ẹgwọlọ ọ mae rrọ evaọ orẹwho ofa, eva rai e te were omai gaga!’ Ẹme rai na o tuduhọ omai awọ, fikiere ma tẹ kwa. Dedenọ obonọ ma rrọ enẹna o thabọ no emọ mai, eva e be were omai nọ ma be sai lele ae ta ẹme ẹsikpobi.”

O jọ bẹbẹ kẹ Didier avọ Nadine re a wuhrẹ ẹvẹrẹ Malagasy na. Nadine ọ ta nọ: “Ma gbẹ rrọ emọ ikpe udhe he.” Ẹvẹ a sai ro fi ẹbẹbẹ na kparobọ? Orọ ọsosuọ, a kuomagbe ukoko ẹvẹrẹ French. Kẹsena, nọ a ruẹ nọ u te epanọ a re ro wuhrẹ ẹvẹrẹ na no, a te nwene kpohọ ukoko ẹvẹrẹ Malagasy. Nadine ọ ta nọ: “Ahwo buobu nọ ma rẹ nyaku evaọ usiuwoma ota a gwọlọ wuhrẹ Ebaibol. Ẹsibuobu a re yere omai inọ ma nya bru ai. Oke ọsosuọ o jọ omẹ oma wọhọ ewezẹ. Eva e be were omẹ gaga nọ mẹ rrọ ọkobaro evaọ ẹkwotọ nana. Mẹ tẹ kpama evaọ ohiohiẹ, mẹ rẹ ta kẹ omamẹ nọ, ‘Me bi kpohọ usiuwoma nẹnẹ, a rẹ ruẹ oware nọ u woma tere he!’”

U re fo Didier họ ehwẹ nọ ọ tẹ kareghẹhọ okenọ o ro mu ẹvẹrẹ Malagasy họ ewuhrẹ. Ọ ta nọ: “U wo ẹdẹjọ nọ me je ru ewuhrẹ, rekọ me je wo otoriẹ uyo nọ inievo na a jẹ kẹ hẹ. Nọ a tẹ kuyo no, ẹme nọ mẹ jẹ ta kpobi họ, ‘Whẹ kobiruo.’ Nọ me yere oniọvo-ọmọtẹ jọ kẹ uyo riẹ no, inievo nọ e keria emu riẹ a tẹ jẹ rọ obọ ta kẹ omẹ nọ uyo riẹ na o gba ha. Mẹ tẹ nwani se oniọvo-ọmọzae ọfa nọ ọ kẹ uyo na, yọ me roro nọ uyo uwhremu na o jọ gbagba.”

Ọ RỌWO AVỌ EVAWERE

Evaọ okokohọ ologbo 2005, Thierry avọ aye riẹ Nadia a rri edrama na, “Le Itee nọ E rẹ Rehọ Orro kẹ  Ọghẹnẹ.” Edrama yena nọ a rehọ no Ebaibol ze na o duobọte Thierry avọ Nadia je ru nọ a rọ gwọlọ nọ a rẹ kwa kpohọ ẹkwotọ nọ ẹgwọlọ ọ mae rrọ. Thierry ọ ta nọ: “Nọ edrama na i re no, nọ ma jẹ tehe abọ, me te go uzou bru aye mẹ jẹ nọe nọ, ‘Bovẹ ma be kwa kpohọ?’ Aye mẹ ọ tẹ vuẹ omẹ nọ o je roro kpahe oware ovona.” O gbẹ raha oke he, a tẹ jẹ ma omaa epanọ a re ro le utee rai nana tobọ. Nadia ọ ta nọ: “Ẹmẹrera na, ma te je siobọno eware nọ ma wo bẹsenọ e rẹ kawo te epanọ e sae rọ gba ekpa ene nọ ohwo ọ rẹ sae wha kperẹ!”

Oka ẹkpẹlobọ: Nadia avọ Marie-Madeleine; Oka obọze: Thierry

A te obọ Madagascar evaọ 2006, yọ umuo oke yena vrẹ a jẹ rọ reawere usiuwoma na. Nadia ọ ta nọ: “Oghẹrẹ nọ ahwo a rẹ rọ gaviezọ kẹ usiuwoma na u re ru eva were omai gaga.”

Rekọ ikpe ezeza nọ i lele i rie, ọzae-avọ-aye nana a tẹ rẹriẹ ovao dhe ẹbẹbẹ jọ. Marie-Madeleine, oni Nadia nọ ọ rrọ obọ France o kie wiri obọ jẹ nwoma evaọ uzou. Nọ ọzae-avọ-aye na a lele edọkita nọ ọ be rẹrote Marie-Madeleine ta ẹme no, a tẹ vuẹ oni na nọ jọ ọ nyaze obọ Madagascar ti lele ae rria. Dede nọ oni na o te ikpe udhone no oke yena, ọ rọwo nọ ọ rẹ nyai lele ae rria. Ẹvẹ obọ Madagascar o rrọ oni na oma? Ọ ta nọ: “O nwane lọhọ họ re obonẹ o reria omẹ oma, rekọ dede nọ oma mẹ o gbẹ ga tere he, me bi fiobọhọ evaọ ukoko nọ mẹ rrọ. Yọ oware nọ o be mae kẹ omẹ evawere họ obonẹ nọ mẹ rrọ na u ru nọ ọmọtẹ mẹ avọ ọzae riẹ a be sae rọ ruabọhọ iruo odibọgba rai evaọ ẹkwotọ na.”

“MẸ RUẸ OBỌ JIHOVA”

Riana nọ ọ be rọ ẹvẹrẹ Tandroy ru ẹme

Riana yọ oniọvo-ọmọzae nọ ọ vrẹ ikpe udhe obọ. Ọ whẹro evaọ Alaotra Mangoro, ẹwho jọ evaọ ofẹ ovatha-ọre Madagascar nọ otọ riẹ u re wou eware gaga. Ọ riobe ziezi fikiere ọ jẹ gwọlọ nọ o re kpohọ iyunivasiti. Rekọ nọ o ti mu Ebaibol họ ewuhrẹ no, o te nwene iroro. Ọ ta nọ: “Mẹ daoma gaga re mẹ kaki nwrotọ no ekọleji, yọ mẹ ya eyaa kẹ Jihova nọ, ‘Mẹ tẹ pase edawọ urere mẹ, me ti mu iruo ọkobaro họ.’” Riana o gine koko eyaa riẹ nọ o nwrotọ no. Ọ kwa bru oniọvo-ọmọzae jọ nọ ọ rrọ ọkobaro, o te mu iruo ubroke jọ họ, kẹsena ọ tẹ ruọ iruo ọkobaro. Ọ ta nọ: “Iroro yena họ enọ e mai woma nọ mẹ jẹ no.”

Rekọ ahwo uviuwou Riana a wo otoriẹ oware nọ o gbe ro le utee akpọ na jọ họ họ. Ọ ta nọ: “Ọsẹ mẹ, oniọvo ọsẹ mẹ, gbe oniọvo oni mẹ ologbo a jẹ tuduhọ omẹ awọ nọ me kpohọ isukulu ikpehru. Rekọ mẹ gwọlọ siọ iruo ọkobaro ba fiki oware ofa jọ họ.” U kri hi, Riana ọ tẹ gwọlọ nọ ọ rẹ kwa kpohọ ẹkwotọ nọ a jọ mae gwọlọ obufihọ iwhowho-uvie. Eme ọ lẹlẹ e riẹ wo isiuru nana? Ọ ta nọ: “Iji a kpare ethẹ ruọ iwou evaọ oria nọ ma jẹ rria je tho eware mai buobu. Uji nana u ru omẹ kareghẹhọ ẹme nọ Jesu ọ ta kpahe ‘efe obọ odhiwu’ nọ ma re kokohọ kẹ omamai. Mẹ tẹ gbaemu nọ mẹ rẹ daoma roma kẹ egagọ Jihova vi epaọ anwẹdẹ kpobi.” (Mat. 6:​19, 20) Fikiere Riana ọ tẹ kwa kpohọ ofẹ obọze ovatha-ọre Madagascar nọ o rehọ emaele egba eree (800) thabọ no oria nọ ọ jọ, yọ oso ọ rẹ kake jọ obei rrọ họ. Ahwo Madagascar nọ a re se Antandroy a jọ ẹkwotọ nana. Kọ fikieme ọ rọ kwa kpobei?

Amara ọvo taure iji e tẹ te ziọ oria nọ a jọ nyaze ti tho ai na yọ Riana o mu Ebaibol họ ewuhrẹ kugbe ezae ivẹ Antandroy no. Onana u ru nọ o ro wuhrẹ eme ẹvẹrẹ na jọ, yọ o je roro ahwo Antandroy buobu nọ a ri ti yo ovuẹ Uvie na ha. Ọ ta nọ, “Mẹ lẹ se Jihova re o fiobọhọ kẹ omẹ kwa kpohọ ẹkwotọ nọ a rẹ jọ jẹ ẹvẹrẹ Tandroy na.”

Riana ọ kwa, rekọ ọ tẹ rẹriẹ ovao dhe ẹbẹbẹ jọ nọ ọ nwani te obei. Ọ jẹ ruẹ iruo ho. Ọzae jọ ọ ta kẹe nọ: “Fikieme whọ rọ nyaze obonẹ? Ahwo a be kwa no obonẹ kpohọ obonọ who no ze na nyae gwọlọ iruo!” Nọ eka ivẹ e vrẹ no, Riana o te no ẹkwotọ na kpohọ okokohọ ologbo dede nọ ugho nọ o jariẹ obọ u tulo ho, yọ o bi roro kpahe oware nọ o ti ru. Evaọ ẹdẹ urere okokohọ na, oniọvo-ọmọzae jọ o te dhe oware họ ẹkpa ukotu Riana. Kpakiyọ ugho! Ugho na u te Riana j’ofa zihe kpobọ Antandroy je mu eki iyogọto họ. Riana ọ ta nọ: “Mẹ ruẹ obọ Jihova evaọ ẹruoke nọ mẹ rọ gwọlọ obufihọ. Mẹ sae ruabọhọ usiuwoma ota na je fiobọhọ kẹ ahwo nọ a ri ti yo kpahe Jihova vẹre he.” Iruo buobu e jariẹ nọ a re ru evaọ ukoko na re. Riana ọ ta re nọ: “Eka ivẹ kpobi mẹ jẹ hae kẹ ovuẹ ogbotu. Oghẹrẹ utiona Jihova ọ jẹ rọ rehọ ukoko na wuhrẹ omẹ.” Enẹna,  Riana o gbe bi fiobọhọ kẹ ahwo ẹvẹrẹ Tandroy buobu nọ a gwọlọ riẹ kpahe Jihova.

“ỌGHẸNẸ UZẸME NA” Ọ GHALE OMẸ

Jihova ọ ya eyaa kẹ omai nọ “ohwo nọ ọ gwọlọ oghale evaọ otọ na kẹ oma riẹ, o reti wo oghale obọ Ọghẹnẹ uzẹme” na. (Aiz. 65:16) Ma tẹ be hae daoma fi ise-abọ kparobọ re ma sai wobọ ziezi evaọ iruo Uvie na, ma re wo eghale Jihova. Roro kpahe Sylviana nọ ma fodẹ evaọ emuhọ uzoẹme na. Kareghẹhọ nọ ozọ u je mu ei inọ ọ rẹ sae kwa kpohọ oria nọ ẹgwọlọ ọ mae rrọ họ. Fikieme o je ro roro ere? Ọ ta nọ: “Owọ mẹ jọ o kpẹre vi ọjọ. Fikiere mẹ rẹ nya jeli jeli, yọ onya u re kri omẹ ẹbẹ hẹ.”

Sylviana (ẹkpẹlobọ) avọ Sylvie Ann (obọze) kugbe Doratine evaọ ẹdẹ nọ ọ rọ họ-ame

Dede na, evaọ 2014, Sylviana o kuomagbe Sylvie Ann, oniọvo-ọmọtẹ ọmaha jọ nọ ọ rrọ ọkobaro evaọ ukoko rai, kẹsena a tẹ kwa kpohọ iwhre ọsese jọ nọ o rehọ emaele udhuvẹ gbe ikpegbesa thabọ no ẹwho rai. Ghelọ ebẹbẹ nọ o wo, Sylviana o le utee riẹ tobọ, yọ Jihova ọ ghale riẹ gaga. Ọ ta nọ: “Nọ ma rria ẹkwotọ ọkpokpọ na te ukpe ovo no, ọmọ-uwuhrẹ Ebaibol mẹ jọ nọ a re se Doratine, ọ tẹ họ-ame evaọ okokohọ okogho.”

“ME TI FIOBỌHỌ KẸ OWHẸ”

Wọhọ epanọ eme inievo nọ ma gbiku rai na i dhesẹ, ma tẹ daoma fi ise-abọ nọ ma wo kparobọ re ma sai ru vi epaọ anwẹdẹ evaọ iruo Uvie na, ma rẹ ruẹ orugba eyaa nana nọ Jihova ọ ya kẹ idibo riẹ inọ: “Mẹ te kẹ owhẹ ogaga, me ti fiobọhọ kẹ owhẹ.” (Aiz. 41:10) Onọ u re ru usu mai kugbe Jihova ga vi epaọ anwẹdẹ. U te no ere no, ma tẹ be hae rọ unevaze kpohọ abọ ọfa evaọ orẹwho mai hayo orẹwho ofa kẹ iruo Uvie na, o rẹ ruẹrẹ omai kpahe kẹ iruo nọ ma ti ru evaọ akpọ ọkpokpọ na. Wọhọ epanọ Didier nọ ma fodẹ no ẹsejọ na ọ ta, “ma tẹ kwa kpohọ oria nọ a jọ mae gwọlọ iwhowho-uvie kẹ usiuwoma ota na, o rẹ ruẹrẹ omai kpahe kẹ obaro!” Ajọ inievo efa buobu a gbẹ rọ unevaze fialoma via enẹna kẹ iruo nana nọ e rẹ ruẹrẹ omai kpahe kẹ obaro na!

^ edhe-ẹme 4 Erẹwho nọ inievo na a no ze họ America, Canada, Czech Republic, France, Germany, Guadeloupe, Luxembourg, New Caledonia, Sweden, Switzerland, gbe United Kingdom.

^ edhe-ẹme 8 A nwene odẹ Isukulu na kpohọ Isukulu Rọkẹ Etausiuwoma Uvie Na no. Egbodibo oke-kpobi nọ e rrọ iruo Uvie na evaọ orẹwho ofa nọ a nyate utee na, a rẹ sai fi odẹ hotọ kẹ isukulu na evaọ orẹwho obọrai hayo orẹwho ofa nọ a be jọ rehọ ẹvẹrẹ rai ru isukulu na.