EVAỌ ubrobọ ekuhọ ikpe 1950, ọsẹ John o kurẹriẹ ziọ ukoko na jẹ họ-ame evaọ ẹwho Gujarat, obọ India. John avọ inievo isoi riẹ gbe oni rai a kru egagọ Katọlik ga wumuo ho, fikiere aikpobi a jẹ wọso ọsẹ rai.

Ẹdẹjọ, ọsẹ John ọ tẹ kẹe ileta inọ o ro se oniọvo jọ evaọ ukoko riẹ. Ohiohiẹ ẹdẹ yena nọ John ọ jẹ gwọlọ rovie ugbogbo ulogbo jọ, o tẹ biẹe uziobọ yoyoma. Rekọ fikinọ John ọ gwọlọ nya uwou nọ ọsẹ riẹ o vi rie na ghele, ọ tẹ rọ omohọ gba uziobọ nọ u bi hwẹ na, jẹ nyae rọ ileta na se oniọvo na.

Nọ John o te oria oniọvo na, aye riẹ nọ ọ rrọ Osẹri Jihova re, o mi John ileta na. Aye na o te muẹrohọ nọ John ọ nwoma evaọ uziobọ, fikiere ọ tẹ gwọlọ nọ o re fiobọhọ kẹe. Ọ tẹ wọ ẹkpẹti-imu riẹ ze, nabe rọ imu ririe omola na jẹ rọ ebandeji gbae. Kẹsena o te gbe egho iti kẹ John, nọ o bi ru enana kpobi na yọ ọ be rọ edhere owowolẹ ta ẹme kẹe kpahe Ebaibol na.

Onana u ru nọ eriwo nọ John o wo kpahe Isẹri Jihova na u ro muhọ enwene. Kẹsena ọ tẹ nọ oniọvo-ọmọtẹ na enọ ivẹ jọ kpahe oghẹrẹ nọ oware nọ ọyomariẹ ọ rọwo u ro wo ohẹriẹ no orọ ọsẹ riẹ. Ọ nọ riẹ sọ Jesu họ Ọghẹnẹ, ọ tẹ jẹ nọe sọ u fo re Ileleikristi a lẹ se Meri. Oniọvo na o wuhrẹ epanọ a rẹ ta ẹvẹrẹ John nọ a re se Gujarati, fikiere ọ tẹ rọ ẹvẹrẹ nana kiyo enọ na no Ebaibol ze jẹ kẹe omobe na “This Good News of the Kingdom.”

Uwhremu na nọ John o je se omobe na, o te vuhumu nọ o duku uzẹme Ebaibol no. Ọ tẹ nyabru ozerẹ ichọche rai jẹ nọe enọ ivẹ evona. Eva e tẹ dha ozerẹ ichọche na gaga te epanọ ọ rọ rehọ Ebaibol riẹ fi John, o te do ku ei nọ: “Who zihe ruọ ẹdhọ no! Dhesẹ oria Ebaibol nọ o ta nọ Jesu họ Ọghẹnẹ hẹ kẹ omẹ. Dhesẹ oria nọ o ta nọ ma du gọ Meri hi kẹ omẹ. Dhesẹ iẹe kẹ omẹ!” Oware nọ ozerẹ ichọche na o ru na u gbe John unu gaga, John ọ tẹ vuẹe nọ: “Mẹ rẹ gbẹ rọ ithihi mẹ te ichọche Katọlik ofa ha.” Yọ ẹdẹ yena John o gine te ichọche na ba!

Isẹri Jihova a te mu Ebaibol họ ewuhrẹ kugbe John, kẹsena ọ tẹ roma mudhe jẹ họ-ame. Uwhremu na, amọfa evaọ uviuwou riẹ a te kurẹriẹ ziọ ukoko na re. Rite inẹnẹ, oka omola na o gbẹ rrọ uziobọ John anwọ ikpe udhosa nọ ọ rọ nwoma na. Eva e rẹ were iẹe ẹsikpobi nọ ọ tẹ kareghẹhọ oware uwoma nọ Oleleikristi na o ru kẹe na, onọ u si rie ziọ egagọ uzẹme.​—2 Kọr. 6:4, 6.