Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Uwou-Eroro Na—Uvitha Uwuhrẹ  |  Ava 2017

George Rollston avọ Arthur Willis nọ e jọ ekobaro nọ a bi ku ame fihọ oria nọ ame ọ rẹ jọ evaọ ẹjini omoto.—ofẹ Northern Territory, 1933

 IRUẸRU MAI ERỌ OKE NỌ U KPEMU

“Edhere Ọvuọvo O Yoma Hrọ Hayo Thabọ Hrọ Họ”

“Edhere Ọvuọvo O Yoma Hrọ Hayo Thabọ Hrọ Họ”

EVAỌ ASA 26, 1937, ezae ivẹ jọ nọ oma o rrọ no fiki erẹ ugbothabọ, a dhẹ omoto rai nọ ovu ọ dafia ruọ ẹwho Sydney evaọ Australia. Anwọ ẹgbukpe nọ a ro no ẹwho nana, a dhẹ emaele nọ i bu vi idu ikpegbivẹ (12,000) no evaọ iwhre sa-sa nọ idhere rai e mai yoma evaọ unuakpọ yena. Orọnikọ ezae nana yọ ahwo nọ a re kpohọ ugheriwo hayo no oria ruọ oria nyae kiẹ gwọlọ eware he. Arthur Willis avọ Bill Newlands yọ ekobaro nọ i wo ajọwha ziezi jẹ gbaemu nọ a rẹ wha usiuwoma Uvie na te ekwotọ nọ i siomano evaọ eria sa-sa Australia.

Taure ubrobọ ekuhọ ikpe 1920 u te ti te, yọ umutho Emọ-Uwuhrẹ Ebaibol * nọ e jọ Australia a ta usiuwoma na gaga no evaọ ewho nọ e jọ akotọ abade ẹkwotọ yena soso. U wo iwhre sa-sa nọ e jọ udevie Australia godo godo nọ ahwo a jọ tere he. Ẹkwotọ nana ọ rehọ akwa azeza gbọ, rro vi Nigeria, yọ ọ jẹ hae roro gaga. Rekọ inievo na a riẹ nọ o gwọlọ nọ ilele Jesu a re se isẹri kpahe iẹe makọ “rite oria nọ o mai thabọ evaọ otọakpọ na,” onọ u kugbe udevie Australia nọ iwhre nọ i thabọ no ẹwho e rrọ na. (Iruẹru 1:8) Rekọ ẹvẹ a te sai ro ru okpiruo nana? Emọ-Uwuhrẹ Ebaibol na a gba riẹ mu nọ a rẹ dao utho ẹgba rai kpobi, avọ imuẹro inọ Jihova ọ te ghale omodawọ rai.

EKOBARO A MU IRUO NA HỌ

Evaọ ukpe 1929, inievo nọ e jọ ukoko Queensland gbe Western Australia a ku imoto egaga jọ nọ e rẹ sai fiobọhọ kẹ ai te ekwotọ nọ i thabọ no ẹwho. Ekobaro nọ i wo ẹzẹ ziezi nọ e rẹ sae dhẹ idhere iyoma, jẹ sae ruẹrẹ imoto na nọ e tẹ raha evaọ edhere, e jẹ hae wha ai kpohọ usiuwoma. Ekobaro nana a kpohọ eria buobu nọ Isẹri Jihova a ri te ẹdẹvo ho.

Ekobaro nọ i wo ugho nọ a sae rọ dẹ omoto ho a jẹ hae dhẹ ebasikoro kpohọ iwhre na. Wọhọ oriruo, evaọ 1932, Bennett Brickell nọ ọ jọ ikpe udhegbesa evaọ oke yena, ọ dhẹ ebasikoro no ẹwho Rockhampton evaọ Queensland kpohọ erẹ usiuwoma ota evaọ ofẹ ẹkpẹlobọ ovatha-ọre Australia. Yọ erẹ nana o rehọ e riẹ emera isoi. Ọ rehọ ebasikoro ọgaga riẹ wọ eblankẹte, iwu, emuore, gbe ebe buobu. Makọ evaọ okenọ etaya ebasikoro riẹ e raha no evaọ erẹ na, ọ ruabọhọ onya na ghele avọ imuẹro nọ Jihova o ti su ei. O ghelie ebasikoro na nya  emaele egba ivẹ (200) nọ i kiọkọ taure o te ti te uwou evaọ erẹ yena, onana o jọ ẹkwotọ nọ uruame o jọ kpe ezae jọ whu no. Evaọ etoke ikpe ọgba nọ i lele i rie, Brọda Brickell o kpohọ erẹ usiuwoma ota sa-sa evaọ ẹkwotọ Australia soso, yọ ọ jẹ hae rọ ebasikoro, imotosaikoro, hayo omoto ru onana. Ọye ọ kake wha usiuwoma na te ẹko ahwo Australia nọ a re se Aborigines oma, evaọ iwhre nọ i thabọ no ẹwho. O te je fiobọhọ to ikoko ekpokpọ họ, onọ u ru nọ ahwo ẹkwotọ na a rọ riẹe gaga je wo adhẹẹ kẹe.

A FI EBẸBẸ KPAROBỌ

Australia yọ unuakpọ jọ nọ unu ahwo nọ a riẹ a mae kawo evaọ akpọ na, maero kọ evaọ ekwotọ riẹ nọ i thabọ no ẹwho. Fikiere, o ginẹ jọ ọtamuo idibo Jihova inọ a rẹ wha usiuwoma na te ahwo oma, makọ evaọ eria ithabọ nana nọ ahwo a rrọ tere he na.

Stuart Keltie avọ William Torrington nọ e jọ ekobaro a dhesẹ via inọ a wo ọtamuo otiọye. Evaọ 1933, a fa udhude nọ a re se Simpson Desert nọ uwẹkpẹ o dafia vrabọ nyae ta usiuwoma na evaọ ẹwho Alice Springs, onọ o jọ udevie Australia. Okenọ omoto ọsese rai ọ raha te epanọ a gbẹ sae rọ ruẹrẹ iẹe he, Brọda Keltie nọ owọ riẹ jọ o jọ onọ a rọ ure ku, ọ rehọ ekamẹle ruabọhọ erẹ usiuwoma ota na. Emamọ iyẹrẹ i no omodawọ ekobaro nana ze, nọ a nya ku ọzae jọ nọ o wo ehọtẹle evaọ oria nọ itreni e rẹ kpahe nọ a re se William Creek. Odẹ riẹ họ Charles Bernhardt, ọ jẹ uzẹme na rehọ uwhremu na jẹ zẹ ehọtẹle riẹ. Ọzae nana ọvo o ru iruo ọkobaro te ikpe ikpegbisoi evaọ ekwotọ Australia nọ i thabọ no ẹwho, yọ ivo egaga e rẹ jọ ẹkwotọ nana rro gaga.

Arthur Willis nọ ọ be wọ re o kpohọ erẹ usiuwoma ota evaọ iwhre Australia nọ i thabọ no ẹwho. —ofẹ Perth, Western Australia, 1936

O rrọ vevẹ, o gwọlọ nọ ekobaro ọsosuọ yena a re wo udu jẹ gbaemu ziezi re a sai fi ebẹbẹ nọ a rẹriẹ ovao dhe kparobọ. Evaọ etoke nọ a jẹ rọ jọ iwhre Australia ta usiuwoma na, u wo okejọ nọ Arthur Willis avọ Bill Newlands nọ ma fodẹ evaọ obọ emuhọ na a ruẹ uye gaga eka ivẹ re a sae dhẹ emaele udhe, fikinọ iso egaga i ru nọ udhude na u ro zihe ruọ ọloho. Ẹsejọ, a re tu omoto rai nya uwẹkpẹ buobu vrẹ, te ikiekpotọ nọ itho e dafia, gbe ethẹ nọ e rrọ kpakpafua nọ uwẹkpẹ o rrọ avọ ọgbẹroyẹ nọ o bi fi ae evaọ uvo ogaga na. Nọ omoto rai ọ tẹ raha, a rẹ nya hayo dhẹ ebasikoro evaọ edẹ buobu kpohọ ẹwho nọ ọ kẹle oma, jẹ hẹrẹ eka buobu bẹsenọ ekwakwa nọ a gwọlọ nwene fihọ omoto na i re te ai obọ. Ghelọ ebẹbẹ yena, a jẹ hae wereva. Brọda Arthur Willis ọ wariẹ ẹme nọ ọ romavia evaọ emagazini The Golden Age na inọ: “Edhere ọvuọvo o yoma hrọ hayo thabọ hrọ họ.”

Brọda Charles Harris nọ ọ jọ iruo ọkobaro na ikpe buobu ọ ta nọ ebẹbẹ nọ a rẹriẹ ovao dhe evaọ iwhre na i si rie kẹle Jihova vi epaọ anwẹdẹ. Ọ ta re nọ: “Uzuazọ o rẹ mai woma nọ ohwo o te wo umutho ekwakwa. Otẹrọnọ Jesu ọ rẹ jọ otafe hẹrioke nọ o tẹ gwọlọ ere, kiyọ ma re ru ere avọ evawere nọ iruo mai i te fi omai họ uyero utioye.” Nwane ere ekobaro buobu a ru. Ma yere Ọghẹnẹ gaga kẹ omodawọ rai, keme u ru nọ usiuwoma u ro te oria kpobi evaọ unuakpọ yena, onọ u fiobọhọ kẹ ahwo buobu zihe ruọ idibo Ọghẹnẹ.

^ edhe-ẹme 4 Evaọ ukpe 1931, Emọ-Uwuhrẹ Ebaibol na a tẹ re odẹ na, Isẹri Jihova.Aiz. 43:10.