Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Zihe Bru Jihova Ze

 ABỌ AVỌ 2

Awaọruọ—“A be Nwẹ Omai Evaọ Kabọ Kabọ”

Awaọruọ—“A be Nwẹ Omai Evaọ Kabọ Kabọ”

“Oniọvo-ọmọtẹ jọ nọ a re se June ọ ta nọ: “Nọ ma jọ orọo te ikpe udhegbisoi no, mẹ avọ ọzae mẹ ma tẹ fa orọo. Emọ mẹ i no ukoko na. Oghoghẹrẹ eyao egaga i te kie omẹ. Ọkora ọ tẹ da omẹ oma fia. O jọ omẹ oma nọ akpọ mẹ kpobi ọ raha kuotọ no gbe nọ mẹ sai gbe thihakọ ofa ha. Mẹ tẹ siọ ewuhrẹ ba ẹnya, mẹ tẹ te siọ iruo Uvie na ba no.”

AWAỌRUỌ yọ oware nọ ohwo kpobi ọ sai wo, makọ ahwo Ọghẹnẹ dede. Ọso-ilezi na o kere nọ: “Iroro ibuobu e vọ omẹ eva.” (Olezi 94:19) Yọ Jesu ọ ta nọ evaọ oke urere na, “awaọruọ uzuazọ” o sai ru ei jọ bẹbẹ re a gọ Jihova. (Luk 21:34) Kọ ẹvẹ o rrọ kẹ owhẹ? Kọ ẹbẹbẹ ugho, ebẹbẹ uviuwou hayo ẹyao o be wha awaọruọ se owhẹ? Ẹvẹ Jihova ọ sai ro fiobọhọ kẹ owhẹ thihakọ?

“Ogaga nọ U Vi Ogaga”

Ma sae rọ ẹgba obọmai siọ awaọruọ ba ha. Pọl ukọ na o kere nọ: “A be nwẹ omai evaọ kabọ kabọ . . . ; eware i re dhe omai ọvẹ . . . ; a be rọ omai fotọ.” Ghele na, ọ ta re inọ “a keke omai ba ugbẹhẹ hẹ,” “ma rẹ ruẹ edhere ro noi,” yọ “ma bi whu hu.” Eme o re fiobọhọ kẹ omai thihakọ? “Ogaga nọ u vi ogaga,” koyehọ ogaga nọ u re no obọ Jihova Ọghẹnẹ Erumeru na ze.2 Ahwo Kọrint 4:7-9.

Roro kpahe epanọ “ogaga nọ u vi ogaga” u ro fiobọhọ kẹ owhẹ evaọ okenọ u kpemu. Kọ whọ kareghẹhọ epanọ ẹme jọ nọ a ru u ro ru owhẹ wo edẹro gaga kẹ uyoyou udidi Jihova? Kọ ẹrọwọ nọ who fihọ eyaa Jihova u je dhe ẹgẹga nọ who je wuhrẹ ahwo kpahe ẹruore Aparadase? Nọ ma te kpohọ iwuhrẹ jẹ be ta oware nọ ma rọwo kẹ amọfa, ma re wo ẹgba nọ ma re ro thihakọ eware nọ e rẹ wha awaọruọ ze, ma ve je wo udhedhẹ iroro re ma sae gọ Jihova avọ oghọghọ.

‘Jawo, re Whọ Ruẹ nọ Jihova O Woma’

O sae jọ owhẹ oma nọ eware nọ i bi si owhẹ i bu hrọ. Wọhọ oriruo, Jihova ọ ta nọ ma kake gwọlọ Uvie na, ma hai ru egagọ uviuwou, kpohọ iwuhrẹ, je kpohọ usiuwoma ota. (Matiu 6:33; Luk 13:24) Kọ otẹrọnọ ọwọsuọ, ẹyao, hayo ebẹbẹ uviuwou e be j’owhẹ ru epanọ whọ hai ru te he? Hayo kọ otẹrọnọ iruo ra i bi mi owhẹ oke gbe ẹgba nọ whọ hai ro ru eware kugbe ukoko na? Ohwo ọ sai reghe no, nọ o te rri eware nọ e vọ otọ kẹe yọ o wo oke hayo ẹgba nọ ọ sai ro ru ai hi. Ẹsejọhọ who tube roro no inọ eware nọ Jihova o bi rẹro rai mi owhẹ i bu hrọ.

Jihova o re roro kẹ ohwo. O re rẹro eware nọ ma sai ru hu mi omai hi. Yọ ọ riẹ nọ o rẹ rehọ oke re ma sae wariẹ wo ẹgba nọ oma o tẹ rrọ omai no hayo nọ ma tẹ rẹriẹ ovao ku idhọvẹ jọ.—Olezi 103:13, 14.

Wọhọ oriruo, roro kpahe oghẹrẹ nọ Jihova o ro fiobọhọ kẹ Elaeja. Nọ udu u whrehe Elaeja gaga avọ ozọ nọ u mu rie te epanọ ọ rọ dhẹ kpobọ udhude, kọ Jihova ọ whọku ọruẹaro na je doku ei nọ o zihe kpohọ iruo nọ ọ kẹ riẹ? Ijo. Isiava Jihova o vi ukọ-odhiwu nyae rọwo Elaeja no owezẹ ze ẹmẹrera jẹ kẹe emu. Ghele na, edẹ udhuvẹ e vrẹ no, Elaeja ọ gbẹ jẹ ruawa jẹ dhozọ.  Eme ọfa Jihova o ru ro fiobọhọ kẹe? Orọ ọsosuọ, Jihova o dhesẹ kẹe nọ ọ rẹ sae thọe. Orọ avivẹ, Jihova ọ rehọ “uru okakao” rọ ta ẹme kẹ Elaeja rọ sasa iẹe oma. Ukuhọ riẹ, Jihova o te dhesẹ kẹe nọ ahwo idu buobu efa e riẹ nọ e be gọ Ọghẹnẹ ziezi. U kri hi Elaeja ọ tẹ wariẹ mu iruo aruọruẹ riẹ họ avọ ọwhọ. (1 Ivie 19:1-19) Eme onana u wuhrẹ omai? Okenọ awaọruọ ọ lẹliẹ udu whrehe Elaeja, Jihova ọ rọ odiri gbe ohrọ-oriọ fiobọhọ kẹe. Jihova o ri nwene he. O bi ru epọvo na kẹ omai re.

Nọ who te bi roro kpahe oware nọ who re ru kẹ Jihova, riẹ utho nọ whọ rẹ sai ru. Whọ rehọ onọ whọ be sai ru enẹna wawo epanọ whọ jẹ hai ru vẹre he. Wọhọ oriruo: Ọdhohrẹ nọ ọ siọ ohrẹ-odhẹ ba te emerae buobu hayo ikpe jọ no ọ tẹ wariẹ muhọ ọ sae dhẹ te epanọ ọ jẹ dhẹ vẹre he. Ukpoye, o re fi itee esese họ nọ i re fiobọhọ kẹe wo ẹgba gbe ithihakọ. Ileleikristi a wọhọ ahwo nọ a rẹ dhẹ ohrẹ. A re fi itee họ nọ a te bi wuhrẹ. (1 Ahwo Kọrint 9:24-27) Kọ who gbe fi utee jọ nọ whọ rẹ sai le tobọ lọlọhọ obọnana họ? Wọhọ oriruo, whọ sai fi utee họ inọ who ti kpohọ ewuhrẹ ukoko na jọ. Lẹ se Jihova re o fiobọhọ kẹ owhẹ le utee yena tobọ. Nọ whọ be wariẹ wo ẹgba nọ whọ rẹ rọ gọe na, whọ te ‘jawo jẹ ruẹ nọ Jihova o woma.’ (Olezi 34:8) Kareghẹhọ nọ oware kpobi nọ whọ sai ru evaọ abọ nana, o tẹ make kawo, u re dhesẹ nọ who you Jihova, yọ o rẹ dae ẹro fia.Luk 21:1-4.

Jihova o re rẹro eware nọ ma sai ru hu mi omai hi

“O Kẹ Omẹ Ẹgba nọ Mẹ Gwọlọ nọ Mẹ rẹ rọ Kpama”

Ẹvẹ Jihova o ro fiobọhọ kẹ June zihe bru rie ze? Ọ ta kẹ omai nọ: “Mẹ jẹ lẹ se Jihova ẹsikpobi re o fiobọhọ kẹ omẹ. Kẹsena aye ọmọ mẹ ọ tẹ vuẹ omẹ kpahe okokohọ jọ nọ a bi ti ru evaọ ẹwho mẹ. Mẹ tẹ jiroro nọ me re kpohọ okokohọ na ẹdẹ ọvo. Oma o were omẹ gaga nọ mẹ rọ wariẹ kuomagbe ahwo Jihova. Okokohọ yena o kẹ omẹ ẹgba nọ mẹ gwọlọ nọ mẹ rẹ rọ kpama. Obọnana mẹ wariẹ mu Jihova họ ẹgọ no avọ evawere. Uzuazọ mẹ u woma gaga no. Me te je vuhumu nọ u fo re mẹ ọvo ọ jọ omẹ hẹ, yọ mẹ ọvo ọ sae wha owha na ha. Me yere Ọghẹnẹ inọ oke o gbẹ jariẹ nọ me ro zihe ze.”