Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Wuhrẹ Emọ Ra

 UWUHRẸ 8

Josaya O Wo Emamọ Egbẹnyusu

Josaya O Wo Emamọ Egbẹnyusu

Kọ who roro nọ o rrọ bẹbẹ re a ru oware uwoma?— Ere ahwo buobu a roro. Ebaibol na ọ ta nọ o jọ bẹbẹ kẹ ọmọ jọ nọ a re se Josaya re o ru oware uwoma. Rekọ o wo emamọ egbẹnyusu nọ i fi obọ họ kẹe. Joma wuhrẹ kpahe iẹe avọ egbẹnyusu riẹ.

Odẹ ọsẹ Josaya Amọn. Yọ ọ jọ ovie Juda. Amọn o yoma gaga yọ ọ jẹ gọ edhọ. Nọ Amọn ọsẹ Josaya o whu no, Josaya o te zihe ruọ ovie Juda. Rekọ ikpe eree ọvo ọ jọ. Kọ who roro nọ ọ jọ yoyoma wọhọ ọsẹ riẹ?— Ijo, ọ jọ ere he.

Zefanaya ọ vuẹ ahwo na inọ a gọ edhọ họ

Dede nọ ọ jọ ọmaha, Josaya o yoẹme kẹ Jihova. Fikiere ahwo nọ a you Jihova ọvo a jọ egbẹnyusu riẹ. Yọ a fi obọ họ kẹe ru oware uwoma. Amono a jọ egbẹnyusu Josaya?

Odẹ ogbẹnyusu riẹ jọ Zefanaya. Zefanaya yọ ọruẹaro nọ ọ jẹ ta kẹ ahwo Juda nọ, a tẹ gọ edhọ, eware iyoma e te via kẹ ae. Josaya ọ gaviezọ kẹ ẹme  Zefanaya, fikiere ọ tẹ gọ Jihova viukpenọ ọ rẹ gọ edhọ.

Odẹ ogbẹnyusu riẹ ọfa Jerimaya. Enwenọ oke ovona a ro yẹ Jerimaya avọ Josaya, yọ a rria kẹle ohwohwo no emaha ze. Aimava a kpekpe gaga, fikiere nọ Josaya o whu, Jerimaya o te kere ole uweri jọ kpahe Josaya, keme o da riẹ gaga. Jerimaya avọ Josaya a fi obọ họ kẹ ohwohwo ru oware uwoma, yọ a je yoẹme kẹ Jihova.

Josaya avọ Jerimaya a fi obọ họ kẹ ohwohwo ru oware uwoma

Eme who wuhrẹ no emamọ oriruo Josaya ze?— Dede nọ Josaya ọ jọ ọmaha, o ru oware uwoma. Ọ riẹ nọ ahwo nọ a you Jihova u fo nọ o re lele nyusu. Daoma jọ egbẹnyusu ahwo nọ a you Jihova, nọ a rẹ sai fi obọ họ kẹ owhẹ ru oware uwoma.

JỌ EBAIBOL RA SE

  • 2 Iruẹru-Ivie 33:21-25; 34:1, 2; 35:25