Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Wuhrẹ Emọ Ra

 UWUHRẸ 6

Devidi Ọ Jẹ Dhozọ Họ

Devidi Ọ Jẹ Dhozọ Họ

Eme who re ru nọ ozọ u te bi mu owhẹ?— Ẹsejọhọ whọ te dhẹ bru ọsẹ hayo oni ra. Rekọ omọfa jọ ọ riẹ nọ ọ rẹ sai fi obọ họ kẹ owhẹ re. Ohwo yena ọ ga vi ahwo kpobi. Kọ whọ riẹ ohwo na?— Ẹhẹ, Jihova Ọghẹnẹ. Joma wuhrẹ kpahe ohwo jọ evaọ Ebaibol na nọ a re se Devidi. Ọ riẹ nọ Jihova o ti fi obọ họ kẹe, fikiere ọ jẹ dhozọ họ.

Okenọ Devidi ọ gbẹ jọ ọmaha, ọsẹgboni riẹ a ro wuhrẹ iẹe re o you Jihova. Onana u ru nọ Devidi ọ gbẹ jẹ rọ dhozọ họ dede nọ eware nọ e rẹ lẹliẹ ozọ mu ei e via kẹe. Ọ riẹ nọ Jihova nọ ọ rrọ ogbẹnyusu riẹ na, o ti fi obọ họ kẹe. Ẹdẹjọ nọ Devidi ọ jẹ rẹrote igodẹ ọsẹ riẹ, okpohrokpo ologbo jọ ọ tẹ wọ ogodẹ jọ. Kọ whọ riẹ oware nọ Devidi o ru? O te mu okpohrokpo na họ ele, nọ o lei mu, ọ tẹ rọ abọ gheghe kpei. Ẹdẹ ọfa jọ nọ adaka ọ wọ ogodẹ riẹ jọ, Devidi o kpe rie re. Kọ whọ riẹ ohwo nọ o fi obọ họ kẹ Devidi?— Ee, Jihova.

Oke ofa jọ o jariẹ nọ Devidi ọ dhozọ họ. Emọ Izrẹl a je lele ahwo Filistia fi ẹmo. Isoja ahwo Filistia jọ ọ jọ thethei ruaro gaga, yọ a re se ohwo otiọye na ogwara. Odẹ riẹ họ Goliat. Ogwara nana ọ jẹ la Jihova avọ ahwo Izrẹl eka. O je seha nọ ohwo Izrẹl jọ ọ dae nyaze te họre ọyomariẹ. Rekọ ahwo Izrẹl kpobi a jẹ dhozọ riẹ. Nọ Devidi o yo ẹme na, ọ tẹ ta kẹ Goliat nọ: ‘Me ti lele owhẹ họre. Jihova o ti fi obọ họ kẹ omẹ kpe owhẹ.’ Kọ whọ gbẹ ruẹ nọ Devidi ọ jẹ dhozọ họ?— Ee, ọ dhozọ vievie he. Kọ whọ riẹ oware nọ Devidi o ru?

Devidi ọ tẹ tọlọ urọba gbe ibiutho isoi nọ e rrọ riẹriẹriẹ, kẹsena ọ tẹ nya re ọ họre ogwara na. Nọ Goliat ọ ruẹ epanọ Devidi ọ maha te, o te muhọ ẹhwẹ. Rekọ Devidi ọ tẹ ta kẹe nọ: ‘Ọgbọdọ whọ gwọlọ ro lele omẹ họre, rekọ odẹ Jihova me bi ro bru owhẹ ze.’ Kẹsena Devidi o te fi ubiutho jọ họ urọba na, ọ tẹ rehọ iẹe sa Goliat aruezo. Ogwara na o te kie fihọ  otọ, o je whu. Ozọ u te mu ahwo Filistia na, aikpobi a tẹ dhẹ. Ẹvẹ Devidi ọ sai ro kpe Goliat dede nọ ọ jọ ọmaha?— Jihova o fi obọ họ kẹe, yọ Jihova ọ ga vi ogwara yena.

Devidi ọ jẹ dhozọ họ keme ọ riẹ nọ Jihova o ti fi obọ họ kẹe

Eme who wuhrẹ no iku Devidi na ze?— Jihova ọ ga vi omọfa kpobi. Ọ tẹ jẹ rrọ ogbẹnyusu ra. Fikiere, ẹdẹ kpobi nọ ozọ u te bi mu owhẹ, kareghẹhọ nọ Jihova ọ rrọ kugbe owhẹ.

JỌ EBAIBOL RA SE

  • Olezi 56:3, 4

  • 1 Samuẹle 17:20-54