Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Amono A bi Ru Oreva Jihova Nẹnẹ?

 UWUHRẸ AVỌ 22

Eme A rẹ Jọ Uwou Ogha Ru?

Eme A rẹ Jọ Uwou Ogha Ru?

Solomon Islands

Canada

South Africa

Inievo uviuwou Ebẹtẹle a re ru iruo evaọ ẹko-iruo sa-sa, be rẹrote iruo usiuwoma ota na evaọ orẹwho ọvo hayo bu viere. Inievo jọ yọ efefafa, efa e rẹ rọ ijini kere ebe, efa e rẹ ruẹrẹ ebe na họ epanọ a ti ro vi ai se ikoko, amọfa a re ru eware ikporakporo gbe ividio, gbe iruo efa sa-sa.

Ogbẹgwae Uwou Ogha o rẹ rẹrote iruo na. Ugboma Esuo na o mu iruo uwou ogha kpobi họ obọ Ogbẹgwae Uwou Ogha, yọ ekpako ukoko esa hayo bu viere nọ i wo eriariẹ ziezi evaọ ukoko na a rẹ jọ ogbẹgwae nana. Ogbẹgwae na o rẹ nẹ iyẹrẹ kẹ Ugboma Esuo na kpahe ẹnyaharo nọ ọ rrọ iruo Uvie na evaọ orẹwho nọ a rrọ gbe ebẹbẹ nọ a be rẹriẹ ovao dhe. Iyẹrẹ itieye na i re fi obọ họ kẹ Ugboma Esuo na jiroro kpahe izoẹme nọ a ti kere fihọ ebe mai, hayo ro ru iwuhrẹ ukoko gbe ikokohọ. Ugboma Esuo na u re vi inievo jọ nyai rri ẹnyaharo iruo Uvie na evaọ erẹwho sa-sa. Inievo nana e rẹ kẹ Egbẹgwae Uwou Ogha ekpọvio sa-sa kpahe epanọ a sae rọ rẹrote ewha-iruo rai ziezi. (Itẹ 11:14) A re ru ọruẹrẹfihotọ re oniọvo nọ a vi ze na ọ kẹ ovuẹ nọ o rẹ bọ inievo nọ e rrọ orẹwho nọ o weze kpohọ na ga.

Uwou ogha o rẹ tha ikoko kpobi nọ e rrọ orẹwho na uke. Inievo nọ e rrọ ẹko-iruo ẹruorote iruẹru ikoko evaọ uwou ogha a re kuenu kẹ ikoko ekpokpọ nọ a gwọlọ tohọ. Inievo efa nọ e rrọ ẹko-iruo nana, ae a rẹ rẹrote iruo ekobaro, imishọnare, esẹro okogho gbe erọ ubrotọ, nọ e rrọ ẹkwotọ nọ uwou ogha na o rrọ. Uwou ogha o rẹ m’omaa ikokohọ esese gbe ilogbo, rẹrote ebabọ Egwa Uvie ekpokpọ, jẹ ruẹ nọ a vi ebe kpohọ ikoko sa-sa. Iruo kpobi nọ a bi ru evaọ uwou ogha i bi fi obọ họ wha iruo usiuwoma ota na haro ziezi.—1 Ahwo Kọrint 14:33, 40.

  • Ẹvẹ Egbẹgwae Uwou Ogha a be rọ tha Ugboma Esuo na uke?

  • Ewha-iruo jọ vẹ a be rẹrote evaọ uwou ogha?