Israel

Czech Republic

Benin

Cayman Islands

Kọ o te were owhẹ re who ru ekiakiẹ nọ i re fi obọ họ kẹ owhẹ gbe wo eriariẹ Ebaibol ziezi? Kọ o rrọ isiuru ra re who wo otoriẹ oria jọ Ebaibol na, ohwo, ẹwho, hayo oware jọ nọ a fodẹ evaọ Ebaibol na? Hayo kọ u bi gbe owhẹ unu sọ Ebaibol na ọ sai fi obọ họ kẹ owhẹ ku ẹbẹbẹ jọ nọ who wo họ? O tẹ rrọ ere, whọ rẹ sai ru ekiakiẹ kpahe onana evaọ ubruwou-ebe nọ o rrọ Ọgwa Uvie na.

Whọ rẹ jariẹ ruẹ eware buobu nọ who re ro ru ekiakiẹ. O sae jọnọ who wo ebe Isẹri Jihova kpobi evaọ ẹvẹrẹ ra ha. Rekọ whọ rẹ jọ ubruwou-ebe nọ o rrọ Ọgwa Uvie na ruẹ ebe ekpokpọ mai buobu. Whọ sae jẹ jariẹ ruẹ Ebaibol efa sa-sa nọ amọfa a fa, obe-ofeme, gbe eware ekiakiẹ efa buobu. Taure ewuhrẹ o te ti muhọ hayo nọ a te ku ewuhrẹ họ no, whọ rẹ sae jọ ubruwou-ebe na ru ekiakiẹ kẹ omara. Otẹrọnọ ekọmputa ọ rrọ eva ubruwou-ebe na, ẹsejọhọ whọ te jariẹ ruẹ Watchtower Library. Onana yọ okwakwa ekọmputa nọ whọ rẹ jọ ruẹ ebe mai buobu, yọ u wo oria nọ whọ rẹ sai kere ẹme nọ whọ gwọlọ kiẹ kpahe fihọ, re o rehọ owhẹ kpohọ etẹe ababọ okioraha.

Ubruwou-ebe na u re fi obọ họ kẹ inievo nọ i re ru ẹme evaọ Ewuhrẹ Uzuazọ gbe Usiuwoma Ota na. Whọ sae jọ ubruwou-ebe Ọgwa Uvie na ru ekiakiẹ nọ whọ tẹ be ruẹrẹ ẹme ra kpahe. Ọsẹro ewuhrẹ na họ ọnọ ọ rẹ rẹrote ubruwou-ebe na. O rrọ owha-iruo riẹ re ọ ruẹ nọ o fi ebe ekpokpọ kpobi fihọ eva ubruwou-ebe na, jẹ ruẹ nọ a ruẹrẹ e rai họ ziezi. Whọ sae ta kẹ ọsẹro ewuhrẹ na hayo oniọvo nọ o bi wuhrẹ obe kugbe owhẹ re o dhesẹ oghẹrẹ nọ whọ sae rọ ruẹ evuẹ nọ whọ be gwọlọ kẹ owhẹ. Rekọ, a kẹ ohwo ọvuọvo uvẹ re ọ tọlọ obe jọ no ubruwou-ebe na kpo ho. Yọ u fo nọ ma rẹ rẹrote ebe na ziezi, ma re kere eme hayo siusi fihọ ae vievie he.

Ebaibol ọ ta nọ re ma sai wo “eriariẹ Ọghẹnẹ,” u re no omai eva ze re ma kiẹ gwọlọ iẹe “wọhọ efe nọ a sino.” (Itẹ 2:1-5) Ubruwou-ebe nọ o rrọ Ọgwa Uvie na o rẹ sai fi obọ họ kẹ owhẹ mu ekiakiẹ họ eruo.

  • Didi eware nọ a sai ro ru ekiakiẹ e rrọ ubruwou-ebe Ọgwa Uvie na?

  • Ono ọ rẹ sai fi obọ họ kẹ owhẹ riẹ oghẹrẹ nọ whọ sae rọ ruẹ evuẹ nọ whọ gwọlọ evaọ ubruwou-ebe na?