Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Amono A bi Ru Oreva Jihova Nẹnẹ?

 UWUHRẸ AVỌ 23

Ẹvẹ A bi ro Kere jẹ Fa Ebe Mai?

Ẹvẹ A bi ro Kere jẹ Fa Ebe Mai?

Ogbẹgwae Ebe-Ikere evaọ obọ America.

South Korea

Armenia

Burundi

Sri Lanka

Re ma sai whowho “usiuwoma” na kẹ “erẹwho gbe erua gbe evẹrẹ gbe ahwo kpobi,” ma bi kere jẹ be fa ebe mai evaọ evẹrẹ nọ i bu vi egba ihrẹ gbe udhuvẹ gbikpe (750). (Eviavia 14:6) Kọ ẹvẹ ma be sai ro ru iruo nana kpobi? Onana o be sae lọhọ, keme ma wo inievo nọ a salọ no eria sa-sa ze evaọ akpọ na soso, nọ i bi kere ebe mai, gbe utu efefafa nọ e be fa ebe na fihọ evẹrẹ sa-sa, aikpobi Isẹri Jihova.

Ẹvẹrẹ Oyibo a re ro mu eme na họ ekere. Ugboma Esuo na oye o be rẹrote iruo Ogbẹgwae Ebe-Ikere na evaọ obọ America nọ u wuzou iruo ukoko na. Ẹko-iruo nana o rẹ rẹrote iruo inievo nọ i bi kere ebe na, inievo nana jọ a rrọ oria nọ u wuzou iruo mai, efa e rrọ iwou ogha sa-sa. Fikinọ enọ i bi kere ebe na a no erẹwho sa-sa ze, u bi fi obọ họ nọ ma be sai ro kere kpahe eware nọ e be ginẹ via evaọ erẹwho sa-sa, yọ onana o be lẹliẹ ahwo buobu wo isiuru kpahe ebe mai.

A re vi eme na se inievo nọ e rrọ iruo efafa. Nọ a tẹ ruẹ nọ eme nọ a kere na e gba ziezi no, a vẹ rọ ekọmputa vi ai se inievo nọ e rrọ iruo efafa evaọ iwou ogha nọ e rrọ akpọ na soso. Inievo nana a rẹ fa eme na, se ai sọ a fa oria jọ thọ, kẹsena a vẹ wariẹ se ai sọ iroro eme na i vẹ ziezi. Inievo nana a rẹ daoma salọ “eme uzẹme” nọ e gba ziezi nọ a tẹ be fa eme na fihọ ẹvẹrẹ rai, yọ a rẹ ruẹ nọ eme nana e rọwo kugbe otofa Oyibo na ziezi.—Ọtausiuwoma Na 12:10.

Ekọmputa i bi ru iruo na vẹrẹ. A rẹ sae rọ ekọmputa nwene ẹta ohwo nọ o bi kere obe hayo ọfefafa ha. Rekọ iruo ahwo nana e rẹ mae vẹrẹ nọ a tẹ be rehọ ekọmputa gbe ekwakwa efa nọ a sai ro ru ekiakiẹ ru iruo na. Isẹri Jihova a ru okwakwa jọ fihọ ekọmputa rai nọ a re se MEPS [Multilanguage Electronic Publishing System]. Onana u bi fi obọ họ nọ eme evẹrẹ nọ a be fa kpobi e jẹ be ruẹrẹ họ kpatiẹ, o vẹ jẹ ruẹrẹ iwoho fihọ ae ziezi, jẹ ruẹrẹ eme na họ re a rọ ẹjini kere ae.

Fikieme ma be rọ daoma ru onana kpobi, dede nọ ahwo nọ a be jẹ evẹrẹ jọ nọ a bi kere ebe kẹ a tulo ho? Keme o rrọ oreva Jihova inọ “ahwo kpobi a wo usiwo, re a ze te riẹ uzẹme na.”—1 Timoti 2:3, 4.

  • Ẹvẹ a bi ro kere ebe mai?

  • Fikieme ma be rọ fa ebe mai fihọ evẹrẹ buobu?