Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Amono A bi Ru Oreva Jihova Nẹnẹ?

 UWUHRẸ AVỌ 7

Oghẹrẹ Vẹ Iwuhrẹ Ukoko Mai E Rrọ?

Oghẹrẹ Vẹ Iwuhrẹ Ukoko Mai E Rrọ?

New Zealand

Japan

Uganda

Lithuania

Omakugbe Ileleikristi kẹ egagọ evaọ ikpe-udhusoi ọsosuọ o jọ kpatiẹ, eware nọ a jẹ mae jarai ru họ ile-esuọ, olẹ, gbe Ikereakere na nọ a jẹ hai se jẹ ta ẹme kpahe. (1 Ahwo Kọrint 14:26) Epọvo na ma be hai ru evaọ iwuhrẹ ukoko mai.

Ebaibol ma be rehọ iwuhrẹ na no ze, yọ i re duobọte k’abọ k’abọ uzuazọ. Evaọ urere-oka kpobi, Isẹri Jihova a re kuomagbe evaọ ikoko rai re a gaviezọ kẹ ovuẹ ogbotu nọ a rẹ kẹ evaọ iminiti 30 rono Ebaibol ze, yọ a rẹ jọ ovuẹ na dhesẹ epanọ eria Ebaibol sa-sa i ro kiekpahe uzuazọ mai gbe oke nọ ma be rria na. Ọnọ ọ be kẹ ovuẹ na ọ rẹ tuduhọ omai kpobi awọ re ma hai rri ọvuọ Ebaibol riẹ leliei. Nọ a tẹ kẹ ovuẹ na no, ma ve ru Uwuhrẹ “Uwou-Eroro” na evaọ auwa ọvo, yọ a rẹ kẹ ohwo kpobi uvẹ re ọ kpahe fihọ enọ nọ a te nọ rono uzoẹme nọ a be jọ Uwou-Eroro Na wuhrẹ evaọ ẹdẹ yena ze. Uwuhrẹ nana u re fi obọ họ kẹ omai fi ekpọvio Ebaibol họ iruo evaọ uzuazọ mai. Uzoẹme nọ a m’omaa riẹ fihọ ẹkpoka oye ikoko Isẹri Jihova nọ i bu vi idu udhusoi gbe ikpe (110,000) wariẹ akpọ na họ a re wuhrẹ evaọ ẹkpoka yena.

Iwuhrẹ ukoko mai i bi fi obọ họ kẹ omai nyaharo evaọ onaa ewuhrẹ. Evaọ owọwọ ẹdẹjọ evaọ udevie-oka kpobi, ma re koko oma họ ru ewuhrẹ nọ o wo abọ esa nọ a re se Uzuazọ Oleleikristi gbe Usiuwoma Ota Mai, yọ eware nọ a ruẹrẹhọ Obe Ewuhrẹ Uzuazọ gbe Usiuwoma Ota nọ u re kpozi kamara kamara ma re ro ru ewuhrẹ nana. Abọ ọsosuọ ewuhrẹ nana nọ a re se Eware Aghae nọ E Rrọ Ebaibol Na u re fiobọhọ kẹ omai wo otoriẹ eria Ebaibol nọ ma se kpahotọ no. Kẹsena u ve te abọ ọfa nọ a re se Wo Onaa Ziezi Evaọ Usiuwoma Ota Na, onọ ma re jo ru idhesẹvia epanọ ma rẹ rọ rehọ Ebaibol na ta usiuwoma kẹ ahwo. Oniọvo jọ nọ ọ rrọ ọkohrẹ o re muẹrohọ oghẹrẹ nọ ma bi ro ru eme na re ọ sai fi obọ họ kẹ omai wo ẹnyaharo evaọ isase gbe ẹmeọta mai. (1 Timoti 4:13) Ewuhrẹ Odibọgba na họ abọ urere nọ a re ru iminiti 30, yọ a rẹ jariẹ ru eme, idhesẹvia, gbe ekiẹriwo nọ i re fi obọ họ kẹ omai riẹ epanọ ma sae rọ rehọ Ebaibol na wuhrẹ amọfa.

Nọ who te kpohọ iwuhrẹ ukoko mai, oma o te were owhẹ fiki obọdẹ eware nọ who ti wuhrẹ no Ebaibol na ze.—Aizaya 54:13.

  • Eware jọ vẹ whọ te ruẹ nọ a bi ru evaọ iwuhrẹ ukoko Isẹri Jihova?

  • Ewuhrẹ ukoko mai jọ vẹ ọ were owhẹ nọ whọ rẹ nya kẹle na?